Keleng Ate Dibata Si La Erkeri-kerin (1 Yohanes 4: 9-10)

PEKAN DOA

GEREJA GBKP

WARI III, SELASA 23 SEPTEMBER 2014.

Introitus    :    Kataken bujur man TUHAN , sabap mehuli kal Ia, keleng ateNa tetap rasa lalap (Mazmur 136:1).

Ogen         :    Perngandungen 3:22-27.

Khotbah    :    1 Yohanes 4:9-10.

Tema         :    Keleng Ate Dibata Si La Erkeri-kerin

LATAR BELAKANG

1.      Secara umum kitab 1 Yohanes isurat man kalak kristen ibas rangka mbina kiniteken gelah kalak kiniteken kalak kristen jadi megegeh ras termotivasi nggeluh ibas kiniteken sisejati.

2.      Nggeluh ibas kiniteken sisejati harus teridah ibas bentuk keleng ate, sebab keleng ate eme sada respon kiniteken kalak kristen sebab nggo leben ngaloken keleng ate Ibas Tuhan nari. Tujun enda gelah sapih-sapih kalak kristen harus nggeluh sikeleng-kelengen.

3.      Kekelengen mpersadaken kerina jelma. Erkiteken sie me reh Tuhan ibas Yesus Kristus ku doni enda, janah mate Ia gelah kerina manusia banci nggeluh ibas kekelengen, alu bage nggeluh ibas keselamaten. I jenda penulis ncidahken kerna erti kekelengen simurni lit ibas salib Kristus ntah pe kematen Yesus. Sebab erkiteken keleng ate Tuhan maka nggit Tuhan mate gelah kerina manusia banci terkelin.

4.      Kekelengen singgo icidahken Tuhan enda me siharus ipraktekken kalak kristen. Kekelengen e tuhu-tuhu murni ras la ngarapken balas, tapi kekelengen siicidahken kalak kristen sipatna murni gelah kalak sideban banci nggejapken kekelengen siibas Tuhan nari. Jadi kalak kristen ipake Tuhan sebage alatna gelah kalak sideban banci nggejapken kerna keleng ate Tuhan.

5.      Tuhan la saja kekelengen e sendiri, tapi kegeluhen man manusia. Ibas rangka sie me Yesus nggit mate gelah kerina manusia ndatken kegeluhen. Alu bage ngatakenca la lit sideban sibanci mereken kegeluhen adi la arah Yesus Kristus. Tapi kegeluhen sidat manusia la saja terjeng tek man Tuhan tapi patuh ibas kerina perentah-perentahNa.

APLIKASI

            Keleng ate Tuhan la erkeri-kerin. Keleng ate Tuhan tetap seri nderbih, sendah ras sipepagin. Inti keleng ate Tuhan man banta gelah kita kerina nggeluh ibas keselamaten. Emaka selaku kalak sitek Tuhan sajalah sijadi pengarapenta, bagepe adi jumpa perbeben ras kiniseran rehlah kita man Tuhan.

            Amin gia keleng ate Tuhan la erkeri-kerin, labo berarti kita banci nggeluh rate-ate, lang. Tapi erkiteken keleng ate Tuhan lit tep-tep wari maka la perlu kita mbiar nggeluh I tengah-tengah doni enda. Bagepe erkiteken lit keleng ate Tuhan, maka seharusna min kita selaku kalak kristen harus tetap nggeluh ibas sikeleng-kelengen.

Pdt. StevenKumenit, STh.M.Min.