Kinierbagen Kap Kebayaken (1 Korintus 12:14-27)

BAHAN PERPULUNGEN JABU-JABU

GEREJA GBKP

TANGGAL 8 – 14 MARET 2015.

1 KORINTI 12 : 14 – 26.

Tema : Kinierbagen Kap Kebayaken.

LATAR BELAKANG

1.      I tengah-tengah perpulungen Korinti enggo terbentuk sada golongan “rohani”. Golongan enda erpengakap maka ia enggo seh ku tingkat kegeluhen sisempurna sebab bas golongan enda lit pemere-pemere Dibata khususna glosolalia (bahasa lidah) ras ernubuat. Janah kalak enda erpengakap kalak silenga dat pemere-pemere Dibata enda (kharisma) berarti ia lenga bo seh ku tingkat kegeluhen sisempurna. Erkiteken sie me perpulungen Korinti ngayaki karunia e, janah mengabaiken karunia-karunia sideban, padahal melala kal bentuk pemere-pemere Dibata (karunia).

2.      Lit nge si erbahanca maka lit karunia-karunia khusus i tengah-tengah perpulunge. Janah fungsi kerina e ibas rangka mbangun kula ni Kristus, emaka pemere-pemere Dibata si lit i tengah-tengah perpulungen ula min erbahanca terjadi perpecahan ntah pe  kelompok-kelompok, tapi harus nggeluh ibas persadan, sebab kerina nge saling membutuhkan.

3.      Guna lebih menjelasken kerna pemere-pemere Dibata e saling membutuhken, maka ijelasken Paulus man perpulungen Korinti alu make gambaren kula manusia. Ibas kula manusia lit anggota-anggotana, janah kerina anggota punya peran ras fungsi masing-masing, bagepe kerina saling membutuhken sada ras sideban, emaka teridah nggeluh harmonis. Enda ipake Paulus gelah perpulungen meteh ras menghargai kerna peranen Kesah Sibadia. Sebab gegeh Kesah Si Badia nge simpersadaken kerina anggota-anggota si lit.

4.      Kinererbagen si lit la banci meneken kiniersadaan nggeluh, tapi justru kinierbagen e (pemere sipelain-lain) e harus mpeturah saling ketergantungen sada ras sideban, sebab masing-masing lit peranna, janah relasi antar anggota e harus nggeluh.

5.      Ibas sada Kesah kerina ipersada. La lit nari siberbeda-beda. Kerina suku bangsa enggo ipersada ibas ikaten Kesah. La lit singatakenca aku kalak Yahudi, aku kalak Yunani, bagepe  budak ras kalak merdeka sebab kerina enggo i peridiken ibas peridin si Badia (baptisan kudus), janah ibere minem ibas sada Kesah.

APLIKASI

            Sada realita si lit bas kita eme litna kinierbagen. Kinierbagen enda la saja kerna warna kulit, suku, budaya, pemeteh, rsd, tapi pe kerna pemere Dibata (Talenta). Tapi  selaku anggota perpulungen arus tetap nggejapken maka kita enda eme anggota - anggota kula ni Kristus, siarus nggeluh sisampat-sapaten,sepengodak sepengole, sebab ibas kita nggeluh i tengah-tengah gereja, lit sada tanggungjawabta eme ngelai.

            Amin gia kita nggeluh ibas kinierbagen, tapi arus sigejapken maka kegeluhenta ibas gereja eme nggeluh saling membutuhken sada ras sidebanna.

            Memang ibas gereja, lit nge secara khusus idilo Tuhan guna ngelai ras mpermakani anggota perpulungen eme Serayan Tuhan (Pendeta, Pertua ras Diaken), tapi labo berarti tanggungjawab pelayanan kerina pelin-pelin idahiken serayan Tuhan, lang. Tapi kerina kita anggota perpulungen arus ikut muat bagin ibas ngelai. Serayan Tuhan arus mengfungsikan anggota perpulungen ibas ngelai i tengah-tengah gereja. Bagepe seayan Tuhan arus njaga kearmonisan nggeluh perpulungen. Ula sempat kenierbagen si lit bas perpulungen jadi perpecahan. Tapi serayan Tuhan arus ngenen kinierbagen eme sada kebayakan.Janah enda pe siarus ipebetehken man anggota perpulungen.

            Bagepe selaku serayan Tuhan ula min nggejapken maka ia “bos/pejabat” sierkuasa ibas gereja, tapi arus igejapkenna maka ia serayan ntah suruh-suruhen Tuhan siarus ngelai alu meteruk ukur. Sierbahanca lit denga serayan erpengakap ia “bos/pejabat” ibas gereja, erkite-kiteken salah pengangkanna kerna erti gereja ras jabatan serayan ibas gereja e.  

Pdt. Steven KUmenit, STh.M.Min.