Kemegahenku Eme Nandai Tuhan (Jeremia 9:23-24)

KOTBAH MINGGU

28 JANUARI 2018

GEREJA GBKP

Invocatio   :    Meriahlah min akapndu katawari pe erkiteken persadanndu ras Tuhan. Sekali nari ku kataken meriahlah (Pilipi 4:4).

Ogen         :    Matius 20:1-16 (Tunggal).

Kotbah      :    Jeremia 9:23-24 (Antiponal).

Tema         :    Kemegahenku Eme Nandai Tuhan.

LATAR bELAKANG

1.      Sijadi bahan kotbahta sekali enda eme kata persinget (kritikan) Tuhan man kalak pentar. Sebab tupung sie kalak pentar  jago akapna bana, bagepe megah akapna erkiteken beluh ia menafsir undang-undang Tuhan, tapi terjeng pemeteh ngenca, la lit bas ia jera.

2.      Siniharapken Tuhan, janah enda siarus lit man kalak pentar eme lit bas ia nggeluh erkemalangan man Tuhan, sebab beluh ia menafsir undang-undang Tuhan. Janah erkiteken beluh ia menafsir undang-undang Tuhan, banci ikatakenna man kalak Jahudi. Alu bage kalak Jahudi banci nggeluh mbiar ras erkamalan man Tuhan. Tanda ia nggeluh mbiar ras erkemalangan man Tuhan eme idalankenna kegeluhen singena ate Tuhan. Moral ras etika teridah ibas kegeluhen bangsa Jahudi. Perlu siteh ibas kegeluhen kalak Jahudi, kepentaren e reh ibas Dibata nari. Emaka kalak simbiar ras erkemalangen man Tuhan ndatken kepentaren (Bdk. Kuan-Kuanen 1:7).

3.      Kepentaren, gegeh ras kebayaken la lit ertina i lebe-lebe Dibata, emaka ula meganjang ukur, sebab uga pa pe hebatna e adi reh penghukumen Dibata man kalak Jahudi, kerina e la ngasup nelamatkan dirina ras bangsa Jahudi. Emaka gelah ia selamat ras kerina kalak Jahudi selamat ermegahlah ibas Tuhan. Ermegah erkite-kiteken itandaina Tuhan. Sebab ibas nandai Tuhan alu payo maka kalak Jahudi banci selamat. Alu kata sideban ibas kalak pentar nandai Tuhan, maka itehna karakter Tuhan. Itehna Tuhan penyelamat, bagepe menghukum kalak si la ngelakoken kai singena ate Tuhan.      

4.      Adi kalak pentar nandai Tuhan alu payo, tentuna iajarkenna man kalak Jahudi kerna kebujuren ras simehuli singena ate Tuhan. Tuhu kalak Jahudi nggo nggeluh alu erbana-bana, nggo erdosa i lebe-lebe Tuhan, tapi erkiteken keleng ate Tuhan tetap, maka adi kalak Jahudi jera ialemi Tuhan kerina dosa-dosana.

5.      Tuhan e banci itandai arah perbahanen-perbahanen singgo ilakoken Tuhan i tengah-tengah bangsaNa (bangsa Jahudi).

APLIKASI

            Secara manusia lit denga kita ndarami kemegahan arah doni enda. Jadi penungkunen man banta apakah e salah. Situhuna e la salah adi lah kita ngangkai e merupaken pemere Tuhan, ntah pe bagin ibas kita nandai Tuhan. Sebab ibas kita nandai Tuhan alu payo berarti kita nandai kerna karakter, keleng ate Tuhan (bdk. Ise kin Tuhan e). Emaka la perlu kita mbiar kerna kegeluhenta. Sebab ibas kita ernalem man Tuhan ras ndalanken kai singena ateNa maka ipasu-pasuna kita.

            Erkiteke-kiteken penandainta kerna Tuhan payo maka ibas kegeluhenta tep-tep wari nggeluh alu meriah ukur. Sebab siteh la kap sia-sia kita nggeluh i tengah-tengah doni enda. Bagepe la lit bas kita cian ate ngenen keberhasilan kalak sideban.

            Perlu siteh kemegahan doni enda eme kepentaren, gegeh, kebayaken, jabaten la baba kita nggeluh ibas keselamaten. Tapi penandainta kerna Tuhan alu payo me simbaba kita alu keselamatan.

Pdt. Steven Kumenit, STh.M.Min.