Pemerentah Eme Persuruhen Dibata (Roma 13:1-7)

PEKAN PENATALAYANAN

GEREJA GBKP

WARI IV, 24 JANUARI 2018.

Invocatio   :    Persingetilah ia kerina gelah patuh man pemerentah ras si erkuasa, ibegikenalah katana dingen nggit ndalanken kerina dahin simehuli (Titus 3:1).

Ogen         :    Masmur 72:1-4.

Kotbah      :    Roma 13:1-7.

Tema         :    Pemerentah Eme Persuruhen Dibata.

LATAR BELAKANG

1.      Isuruh Paulus perpulungen Roma, khususna pribadi lepas pribadi selaku kalak kristen arus patuh man pemerintah. Sebab ibas patuh man pemerintah, berarti kalak kristen patuh  man Tuhan, sebalikna ibas kalak kristen la patuh man pemerintah, berarti kalak kristen la patuh man Tuhan. Enda ikataken Paulus sebab pemerintah eme persuruhen Tuhan ibas doni enda.

2.      Engkai maka kalak kristen arus patuh man pemerintah ? sebab karya Tuhan erdahin ibas pemerintah. Emaka ibas kalak kristen patuh, berarti mengakui otoritas pemerintah ras mbiar man Tuhan erkite-kiteken pusuh peraten siersuruh. Jadi ibas kalak kristen nggeluh ibas kepatuhan  simurni man pemerintah maka kalak kristen la nggit ngelakoken si la mehuli selaku warga negara.

3.      Situhuna kai siikataken Paulus enda, labo erkiteken sada tuntutan selaku warga negara, tapi peraten Tuhan nandangi kerina kalak si tek man baNa. Ate Tuhan  gelah kerina kalak kristen arus ncidahken kinitekenna ibas kegeluhenna sitep-tep wari. Tuhu pemerintah  sindalanken kebijaken-kebijakan ibas rangka minpin ras ngaturken sada-sada bangsa, tapi situhuna pemerintah eme alat ntah persuruhen Dibata ngenca.

4.      Erkiteken pemerintah eme persuruhen Dibata maka tugas pemerintah eme nehken kiniulin man kerina manusia, termasuk kalak kristen. Erkiteken sie me maka kalak si ersalah patut ihukum sue ras undang-undang siberlaku ibas negara e. Gia, lit kuasa man pemerintah guna ngukum sesekalak jelma, khususna sierbahan salah (melanggara hukum), tapi kalak kristen la perlu mbiar. Kalak kristen arus tetap ndalanken kai simehuli. Bagepe kai siipindo pemerintah, khususna pajak, mpekena-kena lingkungen, rsd arus silakoken.  

5.      Ibas kalak kristen patuh man pemerintah ras ndalanken tanggungjawab selaku warga negara alu mehuli maka ipuji pemerintah me kalak kristen. Alu bage keberadaan ras perkembangen kekristenan ibas kota Roma banci erdalan alu mehuli.

APLIKASI

            Adi siperdiateken kerna sejarah pengangkatan raja-raja (pemerintah), maka siidah i je Tuhan sendiri singangkat ras nangkuhken raja e. Fungsi ras tugas raja eme njaga kedamen, mereken nggeluh sejahtera man rakyatna ras njaga kiniteken masyarakat gelah tetap ersembah man Dibata saja. Tapi adi raja la ndalanken tugas enda maka ihukum Tuhan ia. Ibas pemahaman sibagenda rupana maka Raja (pemerintah) eme persuruhen Dibata ibas doni enda.

            Pemerintah si genduari pe bage ka. Pemerintah sigenduari eme persuruhen Dibata ibas doni enda guna njaga kita gelah nggeluh tenang ras dame, bage nggeluh ibas kesejahteraan. Alu bage kegeluhen masyarakat ibas negara tercukupi. Tapi adi lit masyarakat simusil maka tugas pemerintah eme ngangkat ia ibas kemusilan nari.  Emaka pemerintah arus ndalanken fungsi pemerintahenna gelah kita kerina nggeluh bagi siisuraken Tuhan.

            Erkiteken pemerintah eme persuruhen Dibata maka Dibata mereken kuasa man bana guna ngukum sesekalak jelma si la patuh ndalanken tanggungjawabna selaku masyarakat. I ja adi masyarakat la putuh ibas kebijakan pemerintah ras undang-undang nagara, ia patut ihukum. Sebalikna adi pemerintah rate-ate ndalanken kuasana maka tugas kita selaku masyarakat eme mpersingeti pemerintah. Alu bage kita selaku masyakata berfungsi selaku kontrol nandangi pemerintah gelah pemerintah mehuli ndalanken fungsi ras tanggungjawabna selaku pemerintah persuruhen Dibata.

Pdt. Steven Kumenit, STh.M.Min.