Pemimpin Si Ermeteruk UKur (Yohanes 12: 12-16)

PERPULUNGEN JABU-JABU

TANGGAL 25 PEBUARI – 3 MARET 2018

GEREJA GBKP

Johanes 12 : 12 - 16.

Tema : Pemimpin Si Ermeteruk UKur

LATAR BELAKANG

1.      Sijadi bahan oratenta sendah eme turi-turin kerna Jesus Kristus selaku kalak Jahudi bengket ku Yerusalem guna ngerayaken Paskah kalak Jahudi ras sura-sura jelma sinterem nandangi Jesus. Sebab ibas undang-undang agama Jahudi ibas perayaan Paskah kalak Jahudi i ja pa pe harus reh ku Jerusalem guna ersembah man Tuhan i rumah pertoton.

2.      Jelma sinterem si lit i Jerusalem megi berita Jesus sangana ibas perdalanan ku Jerusalem maka itektekna lambe jenari ialo-alona Jesus, janah ersurak-surak jelma sinterem nina ”pujilah Dibata! Ipasu-pasu gelah Kam si reh ibas gelar Tuhan! Ipasu-pasu gelah Raja kalak Israel”. Surak-surak jelma sinterem enda situhuna lit sada sura-sura ras pengarapen simbelin nandangi Jesus eme nggo paksana Jesus jadi Raja man kalak Israel, janah akap Jelma sinterem Jesus reh ku Jerusalem la saja terjeng ngerayaken Paskah kalak Jahudi tapi jadi Raja kalak Israel. Sebab Jerusalem eme pusat    pemerintahan ras kota raja.

3.      Perlu siteh surak-surak jelma sinterem, janah enda situhuna sada ende-enden pujin sirusur iendeken ibas wari raya Paskah kalak jahudi, janah enda pe merupaken sada pertoton gelah keselamatan si reh ibas Tuhan nari reh man kalak Jahudi. Ende-enden enda ibuat ibas Mazmur 118:26-27.  Emaka adi Jesus jadi raja, tentuna sura-sura kalak  Jahudi seh. Arapen enda lit bas diri Jesus, sebab Jesus  lit kuasa singasup naluken erbage-bage kuasa ras ngasup naluken bangsa Romawi, simerupaken bangsa sisangana erkuasa ras ngkuasai bangsa Jahudi. Kenca sie ipajekken Jesus Kerajaan Israel.  

4.      Sura-sura jelma sinterem nggo iangkai Jesus, emaka iersak Jesus sada kelede singuda denga bengket ku kota Jerusalem. Kelede enda ibuat Jesus  i kuta Betfage. Jesus ngersak kelede merupaken simbol kiniteruken ukur ras ermomo man jelma sinterem eme kerehenNa labo bagi siisuraken jelma sinterem tapi ibas rangka keselamatan secara universal eme secara jasmani ras rohani. Jadi labo guna majekken kerajaan secara politik, sebab adi memang guna erperang ras majekken kerajaan politik, kendaraan siipake Jesus eme Kuda.

5.      Ibas Jesus ngersak kelede merupaken sada penggenapan ibas nubuat nabi Zakari 9:9. Saja ajar-ajar Jesus la ngangkai kai  ertina. Tapi kenca Jesus  ipakuken i kayu persilang, janah kenca ipekeke Dibata ibas simate nari, iinget ajar-ajar maka sitersurat enda eme kerna Jesus janah nggo pe jadi man baNa. Jadi ajar-ajar Jesus ngasup ngertiken enda kerina kenca Jesus imuliaken ras ajar-ajar nggo ngaloken Kesah Si badia. Alu kata sideban kesah Si Badia nge singajarisa man ajar-ajar Jesus.

APLIKASI

            Sue ras situasi siberkembang genduari, kususna i Sumatera Utara eme pemilihen kepala daerah, gubernur ras wakil gubernur, tentuna melala harapen-harapen man calon pemimpinta. Tapi sipasti salah sada harapan man pemimpinta eme jadi min pemimpin simeteruk ukur. Pemimpin si meteruk ukur labo saja ncidahken kesederhanaan ras ngueken sura-sura masyarakatna, tapi pemimpin simeteruk ukur ngasup mabai masyarakat ku kesejahteraan ras ngasup ngataken lang ibas sura-sura si la mehuli.

            Pemimpin simeteruk ukur la gampang terpengaruh tupung ipuji-puji kalak ras nggejapken lit kuasa/hebat ia. Apakah erkiteken lit talenta bas ia, ntah melala pendukungna. Tapi adi ipuji-puji kalak ia, pemimpin e la cepat puas bagepe merasa diri hebat sidungna banci pemimpin e meganjang ukur ras memimpin alu rate-ate.

            Perlu siteh model ntah karakter pemimpin banci mpengaruhi keadaan daerah/kota. Sebab pemimpin simeteruk ukur banci ibabaina kota siipimpinna ku simehuli, sebab kesejahteraan masyarakat saja siikurina, labo kesejahteraan pribadi ntah kelompok. Emaka dahinta genduari mari sinen rekam jejak calon pemimpin e. Adi nggo dat, marilah alu pimpinan Kesah Si Badia sipilih simehuli, gelah mehuli daerahnta.

Pdt. Steven Kumenit,STh.M.Min.  

Dibata Perkeleng Dingen Perkuah (Yunus 4:1-11)

KOTBAH MINGGU

TANGGAL 25 FEBUARI 2018.

GEREJA GBKP

Invocatio   : La ia nggit patuh, ilupakenna kerina perbahanenNdu, ilupakenna tanda-tanda kuasa si nggo icidahkenNdu, ibas kiniganjangen ukurna, ipilihna sekalak pemimpin lako maba ia mulih ku bas perbudaken i Mesir. Tapi Kam kap Dibata si ngalemi salah; Kam melias dingen perkeleng, la pedas merawa. Mbelin kap perkuah ateNdu; janah la itadingkenNdu ia (Nehemia 9:17).

Ogen         :    Johanes 3:16-21 (Tunggal).

Kotbah      :    Juna 4:1-11(Tunggal).

Tema         :    Dibata Perkeleng Dingen Perkuah

LATAR BELAKANG

1.      Juna sekalak Nabi siasalna ibas Israel (kerajaan Israel Utara) nari, janah isuruh Tuhan guna mberitaken pertobatan man kalak/kota Niniwe. Kalak si la sada bangsa ras bangsa Israel. Bangsa si la sada kiniteken ras bangsa Israel. Niniwe kota siidiriken Nimrod sekalak pemburu simegegeh ras hebat sipernah ngelawan Dibata. Niniwe eme ibu kota Asiria/ Asyur. Kalak Niniwe ersembah man dewi cinta ras perang.

2.      Sijadi bahan kotbahnta eme nembeh ate Juna man Tuhan, erkiteken icidahken Tuhan perkuah ateNa man bangsa Niniwe, bangsa sipernah naban bangsa Israel. Perkuah ate Tuhan icidahken alu la menghukum bangsa Niniwe.  Nembeh ras merawa Juna man Tuhan labo erkiteken icidahken Tuhan perkuah ateNa, bagepe erkiteken Tuhan eme Tuhan man kerina bangsa. Tapi lebih ku bas kemanusiaan, sebab nembeh Juna man bangsa Niniwe erkite-kiteken bangsa Niniwe pernah   jadi bangsa sinaban bangsa Israel.

3.      Nabi Juna tuhu-tuhu nandai Tuhan alu payo. Ibas penandai Juna kerna Tuhan eme Tuhan e perkuah, melias ras la minter merawa, bagepe pedas ngobah keputusan adi idah Tuhan manusia tuhu-tuhu jera. Em sebabna tupung Tuhan ndilo Juna guna mberitaken berita pertobatan, la nggit Juna. Pedas-pedas Juna lombat ku Sepanyol. Ibas karakter Tuhan enda me sierbahanca Tuhan la surung ngukum kalak Niniwe. Ibas kekecewaan simbagesna nari, nina Juna buatlah kesahku. Sadar Juna Kesah enda mada Tuhan. Adi Tuhan muat kesahna berarti Juna mate, janah lanai idahna karakter Dibata e.

4.      Amin gia keputusan Tuhan eme mereken keselamatan man bangsa Niniwe erkiteken lit pertobatan bangsa e, tapi Juna tetap denga mengharapkan penghukuman ibas Tuhan nari man kota Niniwe, emaka lawes ia ku julun kuta e, ipajekkenna sapo-sapo ingan cilinggemna gelah ibas ingan e nari banci idahna penghukuman Tuhan nandangi kota Niniwe e. Tuhu-tuhu perukuren manusia ntah keegoisan Juna saja siicidahkenna.

5.      I Sapo-sapo ingan cilinggem Juna e, Tuhan mereken pengajaren gelah Juna banci meteh ras ngangkai keputusan Tuhan si la ngukum tapi nelamatken kota Niniwe e. Pengajaren Tuhan arah batang lulang. Ibas berngi ipeturah Tuhan batang lulang ibabo Juna, maka senang akapna.Tapi nandangi pultak matawari isuruh Dibata nipe-nipe mangani batang lulang e seh mate. Jenari isuruh Tuhan rembus angin timur nari, emaka narus ia labuh erkiteken iparpari las matawari. Erkiteken seh kal lasna maka padin akapna mate (enda pedua kali Juna nggit mate). Emaka nina Dibataman Juna, bujur kin kam merawa erkiteken batang Lulang e. Kam kin sipeturahsa. La lit penampatndu ibas peturah batang lulang e, tapi merawa kam. Juna merawa labo saja erkiteken batang lulang e mereken cilinggemman bana, tapi keleng atena batang lulang e. Bage me situhuna perkelengKu nandangi kuta Niniwe si jera e. Apai ka je lit 120.000 danak-danak si lenga meteh apai si salah apai sibenar ras seh kal buena asuh-asuhen i je. Perlu siteh, alkitab bahasa Indonesia la kataken danak-danak tapi penduduk lebih dari 120.000. Ate Dibata ngataken lit 120.000 danak-danak silenga meteh apai sisalah ras benar ras asuh-asuhen simelala, gelah Juna banci sadar kerna keselamatan manusia ras ciptaan Tuhan sideban. Lit keselamatan universal, la saja man bangsa Israel tapi pe man bangsa sideban ras asuh-asuhen.

APLIKASI       

            Salah sada karakter Dibata eme perkeleng dingen perkuah. Seharusna min karakter Dibata enda arus iteh kita kerina. Alu bage la perlu kita mbiar ras aru ate ibas ndalani kegeluhenta sitep-tep wari, sebab Dibata banci nampati kita tupung kita ibas kesusahen ras kiniseran.

            Dibata siperkeleng ras perkuah banci sinanami adi kita nggeluh ibas jera. Sebab nggeluh ibas jera berarti ngelakoken kai singena ate Tuhan. Bagepe nggeluh ibas jera berarti ngikuti ras ndalanken peraten Tuhan, labo peraten manusia. Ngikuti sura-sura Tuhan, labo sura-sura manusia. Tapi amin gia Dibata e perkeleng ras perkuah, labo berarti kita banci nggeluh rate-ate, lang. Dibata siperkeleng ras perkuah tetap lit batasna. Batasna eme ibas kerehenNa mulihken ibas doni enda. Alu bage ula nembeh ateta, bagepe morah ateta ngidah lit senina turangta ibas kegeluhenna sitep-tep wari ngelakoken si la bujur ras si langena ate Tuhan, tapi tempa la siidah penghukuman Tuhanman bana. Perlu siteh Tuhan tetap mereken kesempaten man banta guna jera, gelah kita banci nggeluh ibas keselamatan. Bagepe kalak singgeluh ibas keselamatan arus tetap ndalanken kai singena ate Tuhan. Enda me situhuna kalak singgo nggeluh mbaru ras tek man Jesus selaku Tuhan ras Juru Selamat manusia. Sebab perlu siteh kalak sitek man Tuhan ras ndalanken kataNa ndatken kegeluhen situhu-tuhu, tapi kalak si la tek ras la ndalanken kataNa kebilangen me pagi.

            Dibata siperkeleng ras perkuah, searusna min nggeluh man banta, sebab kita eme anak-anakNa, janah kita nggo nggeluh ibas persadan ras Ia. Emaka marilah sicidahken man temanta manusia  nggeluh perkeleng ras perkuah.

Pdt.Steven Kumenit, STh.M.Min.

Dahilah Tuhan Maka Kam Nggeluh (Amos 5: 4-6)

PERPULUNGEN JABU-JABU

TANGGAL 18-24 PEBUARI 2018

GEREJA GBKP

Amos 5 : 4-6.

Tema : Dahilah Tuhan Maka Kam Nggeluh

LATAR BELAKANG

1.      Tahun 800 ope Kristus pertumbuhen ekonomi, perdagangan bangsa Israel maju kal, erbahanca masyarakar Israel (kerajaan Israel Utara) menikmati alu mehuli. Tapi ibas kemajun ekonomi enda, turah masalah sideban man bangsa Israel eme terjadi kesenjangan ekonomi (kalak bayak erbayakna, kalak musil ermusilna. Bagepe kalak bayak ngenca simenikmati  ras dat keuntungan ibas kemajun ekonomi enda). Terjadi penindasan ras kinilaadilan (Praktek-praktek penipuan nandangi kalak musil si la berdaya, bagepe merampas tanah milik kalak musil). Ibadah i rumah pertoton terjeng seremonial formalitas saja, emaka agama tupung sie la mpengaruhi kalak Israel guna erbahan simehuli ibas kegeluhenna tep-tep wari. Agama la menghasilkan keadilan moral ras sosial), rsd.

2.      Nabi Amos amin gia kalak Israel Selatan, isuruh Tuhan ia erdahin i Kerjaan Israel Utara, situpung sie terjadi kemerosotan kiniteken ras keleng ate.

3.      Ibas praktek-praktek si la ngena ate Tuhan siilakoken bangsa Israel mabai bangsa Israel ibas kematen. Erkiteken sie, nabi Amos ngerana gelah bangsa Israel jera. Bangsa Israel harus ndahi Tuhan maka nggeluh. Ndarami Tuhan alu tuhu-tuhu teridah ibas praktek kegeluhen, la bo i Betel (ingan rumah pertoton ras pusat ibadah kerajaan Israel Utara), ula ndarami i Gilgal (pusat ibadah kerajaan Israel utara), bagepe ula lawes ku Bersyeba (kalak Israel adi ku Bersyeba harus mentasi kerajaan Israel Selatan). Nai Bersyeba merupaken ingan badia sipenting (bdk. Kejadin 26:23-25). Perlu siteh erkiteken perekonomian mehuli maka lit kalak Israel ersembah, nehken persembahen ras ziarah ku ingan-ingan si badia.

4.      Lit sada pengakap kalak Israel alu ersembah ras nehken persembahan, maka dosa-dosana ialemi Tuhan. Memang Tuhu ibas kegeluhen beragama bangsa Israel, lit persembahen pengalemi dosa. Persembahen pengalemi dosa enda banci ialoken Tuhan adi reh ibas pusuh siersuruh nari. Tuhu-tuhu iendesken man Tuhan alu pusuh sigetem nari. Tapi adi terjeng seremonial ngenca, janah gelah dat pasu-pasu Tuhan nari, enda me si la ngena ate Tuhan. Ndahi Tuhan ibas rumah pertoton berarti nggit megiken sora ras pengajaren Tuhan, janah ngeloken ibas kegeluhen sitep-tep wari.

5.      Amin gia nandangi ihukum bangsa Israel erkiteken dosa siibahanna, tapi Amos tetap ngerana gelah bangsa Israel ndahi Tuhan, bangsa Israel harus jera gelah terhindar ibas penghukuman Tuhan nari. Ndahi Tuhan berarti ngelakoken simehuli singena ate Tuhan, ras nggit megiken pengajaren Tuhan. Tuhu berziarah ku ingan si badia (Betel, Gilgal ras Besyeba), merupaken salah sada bentuk “ndahi” Tuhan. Sebab ingan-ingan e  pernah Tuhan ncidahken kemulianNa. Tapi siimaksudken ndahi Tuhan situhu-tuhu eme ngelakoken simehuli ras menjauhkan diri dari kejahatan.

APLIKASI

            Nterem denga singertiken kegeluhen manusia terjeng ibas doni enda ngenca, emaka guna ndatken kegeluhen arus tercukupi pangan inemen. Erkiteken salah pengangkan kerna erti nggeluh, maka nterem kalak kristen ndabuh ku bas dosa (KKN, nipu, judi, rsd). Padahal kegeluhen la saja terjeng ibas doni enda saja, tapi kenca reh Jesus Kristus mulihken ku doni enda. Em sebab nina Jesus, manusia nggeluh la saja terjeng roti, tapi arah kata siibelasken Dibata (Bdk. Matius 4:4). Bagepe nina Jesus aku me dalan guna ndatken kegeluhen (bdk. Johanes 14:6). Alu bage kegeluhen situhu-tuhu lit man Jesus Kristus. Jesus Kristusme ulu kegeluhen.

            Dahilah Tuhan maka kam nggeluh. Ngatakenca kegeluhen e lit man Tuhan saja. Jadi penungkunen, uga carana kita dahi Tuhan. Perlu siteh lit sada paksa Tuhan e la banci i dahi. Emaka caranta dahi Tuhan gelah kita nggeluh eme ibas kegeluhenta tep-tep wari harus nggeluh ibas pertobatan. Ndalanken simehuli ras singena ate Tuhan.

            Sehubungen ras berbangsa ras bernegara. Kita selaku warga negara arus nggeluh bujur ras adil. Kita arus  patuh nandangi pemerintah sebab pemerintah eme persuruhen Dibata. Bagepe kita arus nggeluh berdampingan ras kalak sideban ras agama sideban. Bagepe kita arus ertoto man Tuhan gelah bangsa Indonesia ipasu-pasu Tuhan. Jadi kita arus jadi sira ras terang i tengah-tengah bangsa ras negara, gelah pedas tercipta masyarakat si adil ras makmur (bdk. Konfesi GBKP kerna politik ras Bimbingan Moderamen kerna Politik ibas PILKADA).

Pdt. Steven Kumenit, STh.M.Min.