Kalak Singarap Man Tuhan La Kemelan (Mazmur 25:1-7)

KOTBAH MINGGU

TANGGAL 18 FEBUARI 2018

GEREJA GBKP

Invocatio :    Erlebuh aku mindo penampat man Tuhan, janah ialoiNa aku i datas delengNa si Badia nari (Masmur 3:5).

Ogen        :    Lukas 9:57-62 (Tunggal).

Kotbah     :    Masmur 25:1-7 (Responsoria).

Tema       :    Kalak Singarap Man Tuhan La Kemelan.

LATAR BELAKANG

1.      Sijadi bahan kotbahta sekali enda eme sada pertoton mindo penampat Daud nari man Tuhan erkite-kiteken igejapken lit dosa bas ia. Janah dosa enda erbahanca  ia la teneng.

2.      Adi tetap nggeluh dosa ibas diri Daud, maka lit piga-piga konsekwensina siinanami Daud eme : a). Mela akapna. b). Itawa-tawai imbang-imbangna (bdk. Indo : beria-ria ntah meremehkan).  c). Juru. Daud erpenggejapen adi lit dosa bas ia, la ngena ate Tuhan man bana. Tuhan ndauh ras ia, emaka Tuhan selaku penampat sibanci nampati ia la realisasikan Tuhan. Jadi Tuhan selaku ampang-ampang nggeluh ndauh ras Tuhan, emaka imbang-imbang Daud lanai mbiar man bana.

3.      Duad ertoto man Tuhan saja sebab igejapken Daud Tuhan ngenca sibanci nampati ia. Emaka pertoton siiendesken Daud tuhu-tuhu ibas pusuh nari. Jenda ngantakenca lit pertobatan situhu-tuhu. Tuhu ibas kiniteken simbanges ras pengalaman nggeluh erkiniteken man Tuhan erbahanca Daud erlebuh man Tuhan. Daud erpengakap la lit Dibata sideban sibanci mbebasken ras nampati ia ibas erbage-bage persoalen ras perbeben  nggeluh seakan Tuhan saja. Janah adi kegeluhen si bersih ras Badia, ngena ate Tuhan. Emaka ibereken Tuhan pusuh siteneng ras kehamatan. Alu bage imbang-imbang Daud mehamat ras mbiar man bana.

4.      Gelah tetap nggeluh bersih ras Badia igejapken Daud kegeluhenna arus iendesken man Tuhan gelah iajari Tuhan ngangkai peratenNa, kususna kerna kebenaren siarus idalanken ibas kegeluhen sitep-tep wari.

5.      Dosa mabai erbage-bage konsekwensi si la mehuli ibas kegeluhen tep-tep wari, bagepe nggeluh ibas penghukuman Tuhan. Emaka mindo Daud man Tuhan gelah Tuhan ula ertaktak kerna dosa-dosana tapi mekuah min ate Tuhan nandangi ia ras keleng ate Tuhan sinai-nai nari iberekenNa man manusia, enda min si ibereken Tuhan man bana. Alu bage lit pengalemi dosa ibas Tuhan nari.

APLIKASI

            Keberhasilan nggeluh la itentuken doni enda nari, tapi hubungenta ras Tuhan. Emaka kotbahta sekali enda menekanken nggeluh ibas Tuhan ipasu-pasu Tuhan. La kita kemelan sebab Dibata siisembah kita ngasup nampati kita, janah penampat Tuhan mereken ketenangen nggeluh, kehamatan ras erbage-bage keberhasilan.

            Daud tuhu-tuhu nandai ise kin Tuhan e. Emaka lit pengendesen total kegeluhenna, janah adi lit pegejapen dosa bas ia, minter ertoto ras erlebuh ia man Tuhan, emaka mis teneng geluhna. Kegeluhen Daud enda jadi persinget man banta, sebab kita enda kalak sierkiniteken man Tuhan. Jadi penungkunen man banta, nggo sejauh mana “keintimanta” ras Tuhan. Ibas erti kata nggo kin lit kegeluhen persilahangken dirinta ibas erbage-bage kuasa dosa ras pendilo doni enda nari. Sebab adi kita nggo nggeluh ras Jesus berarti sada keuntungen simbelin man banta, sebab Ia similih kita. Erkiteken Ia similih kita jadi pengikutNa, maka la ateNa mereken kemelan man banta.

            Perlu siteh kita nggo ngayuken pendilo Tuhan. Emaka selaku pengikut Tuhan, kegeluhenta arus tuhu-tuhu bersih, emaka adi sigejapken lit salah dosa bas kita, mari  erlebuh kita man Tuhan guna mindo pengalemi dosa man baNa, sebab Tuhan la pernah ertaktak kerna dosa-dosa siibahan kita, tapi keleng ateNa kita. Bagepe mari sipindo penegu-negu Tuhan nari gelah kita ngasup ndalanken kebenaren ras kebujuren ibas kegeluhenta tep-tep wari. Erlebuh kita man Tuhan la saja sipindo pengalemi dosa man baNa, tapi sipindo gelah Tuhan ngajari kita ndalanken kai singena ateNa ibas kegeluhenta tep-tep wari. Alu bage kita tetap ikelengiNa ras ipasu-pasuNa. Jadi ibas kita nggo jadi kristen marilah kegeluhen singena ate Tuhan sidalanken. Maksudna kita harus nggeluh ibas pendiloTuhan situhu-tuhu.

Pdt.Steven Kumenit, STh.M.Min

“Ikutken Jesus, Persilahang Dirindu ras Persan Silangndu” (Markus 8:31-38)

KOTBAH MINGGU

TANGGAL 11 FEBUARI 2018.

GEREJA GBKP

Invocatio   :    Kam min jadi inganku cicio si aman, dingen jadi bentengku si enteguh. Kam kap kecionku ras pertahanenku (Masmur 71:3).

Ogen         :    Roma 10:13-21 (Antiponal).

Kotbah      :    Markus 8: 31- 38 (Tunggal).

Tema         :    “Ikutken Jesus, Persilahang Dirindu ras Persan Silangndu”

LATAR BELAKANG

1.      Sijadi bahan kotbah sekali enda eme turi-turin Jesus nuriken kerna kiniseran ras kematenNa, bagepe kekekenNa man ajar-ajarNa. Kiniseran ras kematenNa erkite-kiteken pemimpin-pemimpin ras imam-imam simbelin bagepe guru-guru agama nulak Jesus. Palas penolakenna eme la ngasup ras la teralokenna kerehen Kristus ibas doni enda.

2.      Tuhu Mesias merupakan penampat siitimai kalak Jahudi, tapi konsep Mesias siitimai ras reh ku doni enda la bagi Jesus. Ibas konsep kalak Jahudi  kerehen Mesias eme reh ibas kesusuran raja, tubuh ibas kerajaan, menggenapi hukuman man kerina musuh-musuhna, rsd. Nggo ka i luar konsep kerehen Mesias kalak Jahudi, tambah ka melala kritikan-kritikan Jesus man pemimpin-pemimpin ras imam-imam simbelin bagepe guru-guru agama erkite-kiteken la icidahkenna kegeluhen situhu-tuhu selaku kalak simeteh kerna keselamatan, maka lit man kalak enda sada “kebencian”man Jesus. Emaka ibas kerina kesempatan isidingina atena Jesus gelah Jesus terbukti ersalah. Adi nggo lit kesalahan Jesus, maka e me dalanna ibabana Jesus ku sidang Sahendrin (Pengadilan agama) gelah iputusken Jesus ersalah, janah harus ihukum.

3.      Jesus ngerana kerna kiniseran, kematen ras kekekenNa tupung perjalanan Jesus ras ajar-ajar ku Jerusalem. Ate Jesus ku Jerusalememe ibas rangka ngerayaken wari raya Paskah kalak Jahudi. Sebab ibas wari raya paskah kalak Jaudi kerina kalak Jahudi reh ku Jerusalem. Sebab i Jerusalem ingan rumah pertoton. Bagepe  Jerusalem eme pusat agama kalak Jahudi ras ingan Sahendrin. Alu bagepe nterem i je ringan pemimpin-pemimpin kalak Jahudi, imam-imam si mbelin bagepe guru-guru agama, emaka penolakan bagepe kiniseran ras kematenNa nggo ndeher. Ibas palas enda me ipebetehken Jesus man ajar-ajarna tupung Jesus ras ajar-ajar lit i daerah Kaserea Pilipi. Bagepe erkite-kiteken nggo lit sada pengakun ajar-ajar kerna Jesus selaku Mesias, emaka nggo seh paksana Jesus nuriken kerna kiniseran, kematen ras kekekenNa man ajar-ajarNa.

4.      Penuriken Jesus kerna kiniseran ras kematenNa, kepeken lenga teraloken ajar-ajarNa, emaka iawin Petrus me Jesus, janah ipandang Petrus me Jesus. Ate Petrus  mpegegehi ras ngapuli Jesus. Sebab konsep Mesias eme penampat ras ngasup naluken kerina musuh-musuhna. Tapi irawai Jesus ia. Nina Jesus Laweslah ibas Aku nari Iblis. Perukurenndu e perukuren manusia kap, la bagi perukuren Dibata. Ate Jesus ngatakenca enda kerina ibas rencana Dibata. Emaka manusia la banci nahanca, ntah pe nolaksa. Ikataken iblis, sebab sura-sura iblis kerina rencana Dibata gagal. Alu kata sideban menolak pendahin Dibata merupaken pendahin iblis kap.

5.      Sikap Petrus simewakili ajar-ajar Jesus erbahanca Jesus harus mereken pengajaren mulihi man jelma sinterem ras man ajar-ajarNa sendiri. Kepeken sura-sura doni mbelin denga pengarapenna ibas ngikut Jesus. Kerajaan doni denga siiarapken man Jesus. Emaka adi Jesus manteki Kerajaan bagi kerajaan doni, maka ajar-ajar Jesus dat keduduken simehuli. Ibas palas enda me kepeken ajar-ajar ras jelma sinterem arus persilahang bana ras mersan kayu persilang, sebab kerina erta doni ras keduduken la lit ertina adi nggo mate. Tapi sipenting eme ngakuken Jesus i tengah-tengah manusia si genduari ras i tengah-tengah kalak perdosa alu la mela-mela gelah ndatken keselamaten.

APLIKASI

            Nggeluh bas doni enda melala tawaran-tawaran negatif sibanci ncedai kinitekenta man Jesus Kristus. Bagepe siidah nterem denga kita la ngasup nggeluh ibas kiniseran, emaka ndabuh ku bas dosa. Tapi lit sada penungkunen, apakah adi kita nggo tek ras ikut Jesus, nggo bebas ibas erbage-bage perbeben ras kiniseran nggeluh ? tentuna lang. Amin gia kita tek man Jesus, perbeben ras kiniseran nggeluh banci denga ngkenai kita. Sebab iblis bagi singa sigawa-gawa ndarami ise si man gerlemenna. Amin bage gia adi nggeluh kita ras Jesus Kristus jumpa kita perbeben ras kiniseran ngasup kita megenggeng, janah kinigenggengenta e mabai kita nggeluh ibas persadan ras Jesus Kristus. Kita ndatken keselamaten situhu-tuhu.

            Keselamaten arus ipebetehken man kerina jelma. Janah inti keselamatan eme tek man Jesus Kristus. Lit dua bentuk, uga kita banci pebetehken keselamatan e man kerina jelma. 1). Arah kata. Kita arus mberitaken Berita Si Meriah man kerina jelma. 2). Arah perbahanen. Kita singgo tek arus tutus ras ndalanken kai singena ate Tuhan ibas kegeluhenta sitep-tep wari. Sebab ibas kita ncidahken praktek-praktek simehuli singena ate Tuhan, gelar Jesus terpuji ras termulia. Emaka kalak banci tek man Jesus Kristus. Ibas dua bentuk enda, tentuna lit masalah siijumpai kita, lit sila nggit ngaloken berita si meriah e. Ntah pe mekisat kita erberita.

            Masalah sideban sibanci kita erdosa eme menghadapi PILKADA. Ibas PILKADA enda melala bentuk-bentuk sila ngena ate Tuhan ipraktekken i je, iantarana Money Politik, menjelek-jelekkan calon kepala daerah, kekerasan, iming-iming kedudukan, rsd. Perlu siteh kegeluhenta la saja terjeng ibas doni enda, tapi kenca kematen lit kegeluhen. Maksudna kalak si la setia ndalanken kai singena ate Tuhan, kenca kematen dat penghukumen sirasa lalap, nggeluh ia ibas neraka. Tapi kalak situtus ndalanken kata Dibata man bana alokenna kegeluhen situhu-tuhu si rasa lalap eme keselamatan. Emaka penting situhuna man banta eme perukurenta bali min ras perukuren Jesus Kristus. Alu bage banci sidat kai kin sura-sura Tuhan ibas doni  enda. Jadi ibas kita ngikuti Jesus ngasup kita persilahang dirintaalu la terpengaruh ras ndalanken kepentaren doni ras ndalanken kai si la ngena ate Tuhan. Tapi kita tetap nggeluh ibas persadan ras Tuhan amin gia kita arus mersan silang (nggeluh ibas kiniseran ntah pe mate).

            Arus siteh ngikutken Jesus labo berarti ikut-ikut bage-bage saja, labo berarti jadi kalak kristen bage-bage saja. Tapi ngikutken Jesus berarti Jesus jadi inganta cicio, benteng kegeluhenta. Alu bage kita ipasu-pasuNa.

Pdt. Steven Kumenit, STh.M.Min.  

Pulahilah BangsaNa (Topik : Politik, Konfesi GBKP, Realita Perpolitikan) - Lukas 4: 18-19.

PERPULUNGEN JABU-JABU

TANGGAL 11 – 17 FEBUARI 2018.

GEREJA GBKP

Lukas 4: 18-19.

Tema : Pulahilah BangsaNa (Topik : Politik, Konfesi GBKP, Realita Perpolitikan).

LATAR BELAKANG

1.      Kuta Nasaret ingan Jesus ipebelin. Janah selaku kalak Jahudi situtus, reh Jesus ibas wari sabat guna ersembah man Tuhan. Ibas kebaktin wari sabat ibereken kalak man Jesus kitab nabi Jesaya, kenca ipepayoNa, idahNa me ayat-ayat si ateNa iogekenNa, jenari iogena. Kitab Jesaya siioge Jesus eme Jesaya 61:1,2.

2.      Ibas Jesaya 61:1,2 enda ngerana kerna Dibata nuruh suruh-suruhenNa singgo  ngaloken Kesah Tuhan ras nggo itangkuhken jadi Kristus guna mberitaken Berita Si Meriah. Palas Berita si Meriah eme nggo reh masa Mesias. Ibas masa Mesias, ate Tuhan njadiken doni enda ndatken keselamatan. Ndatken pasu-pasu ras nggeluh ibas kemalemen ate, subuk jasmani bagepe pertendin, subuk lahiriah, bagepe batiniah (bdk. Syalom). Alu bage ibas masa Mesias, kerina nggeluh ibas keselamatan ras kemalemen ate, sebab Mesias si reh e mperdiateken kalak musil, sitertaban ras kalak pentang.

3.      Alu Jesus ngoge kitab Jesaya 61:1,2 enda situhuna, Jesus nggo ngerana kerna penggenapan nubuat Jesaya. Mesias siitimai bangsa Israel (Jahudi) nggo reh, janah genduari nggo ras kalak Jahudi. Emaka secara langsung, nggo itenahken Jesus kerina kalak Jahudi, situpung sie nggeluh tertaban, subuk secara pilitik (bdk. Itaban kerajaan Romawi), bagepe secara rohani (tertaban alu dosa). Ibas Jesus kalak Jahudi ndatken keselamatan ras kemalemen ate.

4.      Perlu siteh lit pengarapen simbelin man kalak Jahudi kerna Mesias. Mesias siitimai kalak Jahudi merupaken padan Dibata, janah banci mbebasken kalak Jahudi ibas penindasan ras mulahi bangsa Jahudi ibas tabanan nari, janah ngasup mpepalem erbage-bage pinakit. Ibas palas enda me situhuna Jesus ngerana arah ngoge kitab Jesaya 61:1,2 masa Mesias nggo seh. Mesias siitimai kalak Jahudi, genduari nggo ras ia.

5.      Memang secara umum Berita Si Meriah siibaba Jesus merupaken mada kerina jelma. Tapi khusus Berita Si Meriah enda jadi keriahen man kalak musil, eme kalak biasa siitindas ras itaban sirusur ihina penguasa ras pemimpin agama iperdiateken ras ibela Tuhan. Masa keselamatan ntah pe tahun Jobel nggo seh i tengah-tengah doni enda. janah tahun Jobel enda ibaba Jesus Kristus.

APLIKASI

            Temanta sendah eme Pulahilah bangsaNa. Perlu sipehami maka bangsa Indonesia eme milik Tuhan. Janah ate Tuhan kita sitading ibas Indonesia enda nggeluh ibas kedamen, keadilen, kebujuren, kemalemen ate, ras la nggeluh ibas penjajahan bangsa sideban nari, rsd.

            Tuhu secara the jure (Hukum) ras the fakto (fakta), bangsa Indonesia nggo merdeka, tapi adi sinen kerna kegeluhenta bangsa Indonesia, kepeken kita lenga pula ibas erbage-bage persoalan, antara lain kemiskinan, penindasan, kinilabujuren, lenga lit supremasi hukum simehuli, rsd. Enda kerina erbahanca bangsa Indonesia la banci mereken kegeluhen si dame ras nggeluh ibas kemalemen ate man banta. Tapi gelah nggeluh alu mehuli, bangsa Indonesia nggeluh alu sejahtera, kita butuh politik simehuli. Sebab ibas pedalanken politik simehuli maka bangsa Indonesia banci nggeluh sejahtera, adil ras makmur. Perlu siteh lebe  politik eme penataan negara, emaka hakekat politik eme sebuah usaha untuk mengelola dan menata sistim pemerintahan untuk mewujudkan kepentingan atau cita-cita suatu bangsa. Cita-cita bangsa Indonesia eme terciptana adil dan makmur. Emaka seharusna min kerina elit-elit politik (pemerintah, ras partai politik) arus ikut ibas mensejahterakan masyarakat.

            Ngenen tujun ras cita-cita bangsa Indonesia enda, ras hakekat politik simehuli e, maka gereja GBKP la “elergi” kerna politik e. emaka Gereja GBKP nggo erbahan sada point ibas konfesi (pengakun iman) kerna Politik. Ibas konfesi GBKP isuratken : a). Politik merupakan upaya untuk menata kehidupan masyarakat demi kesejahteraan bersama. b). Politik menjadi sarana kesaksian dan alat untuk menghadirkan kerajaan Allah di tengah masyarakat. c). gereja menolak setiap upaya partai politik, sekelompok orang atau perorangan yang menjadikan gereja sebagai kendaraan politik. d). Dalam pentas politik, gereja hadir sebagai garam dan terang baik dalam proses pencerahan masyarakat dalam pengambilan keputusan-keputusan politik. f). Gereja dipanggil untuk mempersiapkan warganya untuk diutus dalam politik.

            Gereja selaku mitra pemerintah berupaya gelah kerina anggota gereja, bagepe secara institusi gelah terciptana masyarakat adil ras makmur. Sebab ibas ndalanken politik simehuli maka gereja nggo jadi sira ras terang man doni enda. Enda pe idalanken gereja sekaligus mendewasakan gereja ras menolak unsur-unsur politik praktis. Sebab ibas ndalanken politik-politik praktis si la mehuli. Bangsa Indonesia banci “ceda”. Enda me sigenduari teridah. Emaka lit singatakenca politik eme kotor.

             Amin gia politik eme alat guna mensejahterakan masyarakat, tapi la banci lang kita harus mindo gegeh ras kepentaren man Tuhan Dibata. Sebab ibas kita mindo gegeh ras kepentaren man Tuhan Dibata, kita ngasup ndalanken politik simehuli. Alu bage bangsa Indonesia banci pulah ibas erbage-bage persoalan. Alu kata sideban, ipakeken Tuhan kita guna mulahi bangsaNa.

Pdt. Steven Kumenit, STh.M.Min.