Ise Kin Kesah Si Badia E ? (Yohanes 7:37-39)

PEKAN DOA

GEREJA GBKP

WARI 1, MINGGU 22 SEPTEMBER 2013

Introitus   : Doni lume denga, la lit tempasna. Lawit si mbelang ergalumbang itutupi gelap mesangat, janah kesah Dibata kelaling-kelaling i babo lau engkuasaisa.

Ogen : Perbahanen Rasul-Rasul 2:1-4.

Khotbah   :    Yohanes 7: 37-39.

Tema        :    Ise Kin Kesah Si Badia ?

LATAR BELAKANG

1.      Salah sada wari raya kalak Jahudi eme wari raya sapo-sapo. Ibas wari raya enda seh kal teremna kalak Jahudi i Jerusalem, sebab merupaken sada kewajiban man bangsa Jahudi guna ngerayakenca, janah kerina kalak Jahudi si lit i darat Jerusalem reh ku Jerusalem guna ngerayaken wari raya e. Makna perayaan wari raya sapo-sapo enda eme guna mperingeti uga Dibata nemani ras nampati bangsa Israel sedekah bangsa Israel erdalan ibas taneh simesawang. Ibas perdalanen ku taneh Kanaan bangsa Israel tading ibas kemah ras sapo-sapo. Jadi lit makna historis teologis. Tapi lit ka makna aplikasina eme ibas perdalanen anak-anak Dibata ibas doni enda, Dibata kap sinampati ras jadi ingan kecion gedang-gedang wari. Janah perayaan sapo-sapo irayaken kalak Jahudi sedekah pitu wari.

2.      Ibas suasana perayaan sapo-sapo, khususna ibas wari pengkeri-kerin kerja e (wari pepituken) simerupaken puncak perayaan e,  Jesus tedis janah ngerana Ia  i lebe-lebe jelma sinterem, nina Ise muas rehlah ku Aku gelah ia minem. Bagi si tersurat i bas Pustaka Si Badia, 'Kalak si tek man bangKu, erburak i bas ia nari lau si mereken kegeluhen.'  Ikataken enda kenca dung upacara lau. Sebab ibas tradisi upacara lau nterem kalak ku kolam Siloam, ikut pe imam-imam alu ngembus terompet. Kenca seh i kolam Siloam sekalak imam ngisi buli-buli emas alu lau kolam Siloam nari, kenca sie lawes mulihken rombongan e ku rumah pertoton, jenari lau siibuat imam ndai ituangken ku mezbah. Kenca sie iogeken kai siikataken Jesaya eme  Bagi lau mereken keriahen man kalak si muas, bage pe bangsa Dibata ermeriah ukur tupung Dibata ngkelini ia (Jesaya 12:3).

3.      Makna ibas perayaan Upacara lau enda eme mperingeti perdalanen bangsa Israel i taneh mesawang, khususna kerna lau sindarat ibas deleng batu. Bagepe upacara lau e merupaken sada pertoton guna mindo udan. Perlu lebe siteh  kolam Siloam eme reh ibas Gihon nari. Ibas pemerintahen raja Hizkia ibahanna saluran lau ibas lau Gihon nari ku Yerusalem. I Jerusalem lit sada kolam kitik guna menampung lau Gihon e. Kolam eme siigelari kolam siloam si ertina siiutus.  Emaka amin gia kota e ikepung musuh, masyarakat Yerusalem tetap ndatken lau guna keperlunna.

4.      Ate Jesus ngerana gelah jelma sinterem meteh ise Ia. Sebab memang jelma sinterem ertoto mindo udan tapi ibalik sie situhuna siipindona eme kemalemen ate (kebahagiaan) ras kemakmuran. Kerina e banci ibereken Jesus. Ibas Jesus lit lau si banci maler ras mereken kegeluhen, emaka rehlah ku Jesus. Sebab sia-sia kap puji-pujin siiendeken ibas perayaan e adi la ndarat ibas pusuh nari ras la  nggeluh ibas persadan ras Tuhan.  Ise singaloken Jesus pasti ndatken kegeluhen. Alu bage terjadi me kegeluhen simbaru man kalak e, janah kalak e ngaloken pasu-pasu ibas Dibata nari. Pasu-pasu Tuhan siberhubungen ras “hidup berkelimpahan” e berkaitan ras Kesah Si badia. Sebab Jesus lenga imuliaken. Jesus lenga nangkih ku Sorga. Kesah Si Badia reh kenca Jesus nangkih ku Sorga.

5.      Yesus ngerana kerna Kesah Si Badia alu make anding-andingen eme lau simereken kegeluhen, emaka pengertin secara sederhana kerna Kesah Si Badia eme mereken kegeluhen man kalak si tek man Yesus Kristus. Saja alu terang Yohanes ngataken maka Kesah Si Badia e reh kenca Yesus iangkat ras imuliaken.

APLIKASI

            Adi kita ngerana kerna Kesah Si Badia berarti kita ngerana kerna oknum sideban Dibata. Ibas arti kata Kesah Si Badia eme Dibata sendiri. Arah Kesah Si Badia Tuhan hadir  ras erdahin ibas doni enda guna mereken kegeluhen man manusia. Janah siimaksudken kegeluhen la saja terjeng manusia nggeluh ibas doni enda, tapi pe mereken kegeluhen situhu-tuhu man manusia e. Janah kegeluhen situhu-tuhu e adi manusia tek man Yesus Kristus. Ibas rangka sie me Kesah Si Badia persadaken kita ras Yesus Kristus, gelah manusia si tek man Yesus ndatken kegeluhen.

            Erkiteken Kesah Si Badia eme Dibata sendiri, maka Kesah Si Badia lit pe ibas Padan Sindekah, saja gelarna eme Kesah Tuhan, bagepe ibas zaman Yesus Kristus, Kesah Si Badia lit i je, saja pendahin Kesah Si Badia lenga kal ituriken secara “menonjol”, sebab i je ituriken kerna Yesus Kristus ras keselamatan. Kesah Si Badia ituriken secara menonjol kenca Yesus Kristus iangkat ke Surga ras imuliaken. Janah Kesah Si Badia e reh ibas Surga nari ncenepi kerina kalak si tek man Tuhan (band. Ogenta)

            Ibas khotbahnta cukup jelas kal man banta, Yesus ngerana kerna kegeluhen, i ja ise sitek man baNa ndatken kegeluhen, janah kegeluhen e berhubungen ras  Kesah Si Badia.

Pdt. Steven Kumenit, STh.M.Min.