Kesah Si Badia Mulahi Ras Mpebadiaken Kulanta (1 Korintus 6:19-20)

PEKAN DOA

GEREJA GBKP

WARI IV, RABU 25 SEPTEMBER 2013

Introitus   :    KesahKu Kutamaken i bas pusuhndu, janah tetap Kuperdiateken maka ikutkenndu undang-undangKu, janah patuh man perentah si Kubereken man bandu (Esekiel 36:27).

Ogen        :    Esekiel 11:19-21

Khotbah   :    1 Korinti 6:19-20.

Tema        :    Kesah Si Badia Mulahi Ras Mpebadiaken Kulanta.

LATAR BELAKANG

1. Ibas bahan khotbahnta Paulus mereken kata persinget man perpulungen Korinti kerna kai makna kula ibas pandangan kalak singgo tek man Yesus Kristus. Enda ikataken Paulus sebab paksa sie kalak si tek man Tuhan lanai makeken kulana alu mehuli. Kalak si tek man Tuhan tetap denga iperbudak dosa. Alu kata sideban kalak sitek man Tuhan salah ngangkai kerna kebebasan singgo ibereken Tuhan man bana. Erkiteken salah pengangkai maka salah ka pedalankenna.

2.   Kebebasan singgo ibereken Tuhan man kalak si tek, labo berarti banci rate-ate, khususna man pangan singgo ipersembahken man “berhala”. Memang situhuna nai ope denga kalak Korinti tek man Yesus selaku Tuhan ras Juruselamat manusia  kerina e biasa man bana, janah sie igelari budak dosa, sebab kerina e bentuk-bentuk dosa. Tapi kenca ia nggo tek man Tuhan maka kegeluhen sibage lanai banci. Ngkai ? sebab kalak sitek nggo itukur Tuhan alu meherga eme ibas kayu persilang i uruk Golgota, dareh Yesus mambur guna nelamatken manusia, erkiteken sie me kalak si tek man Yesus nggo nggeluh ibas persadan ras Yesus. Alu kata sideban kalak sitek nggo nggeluh ibas perjabun alu pertendin ras Yesus Kristus. Emaka perbahanen-perbahanen sierbahanca melket kula kalak si tek lanai banci.

3.   Guna mereken pengangkan terbagesen, Paulus mereken sada pengangkan alu sederhana kerna kula. Nina Paulus kula kalak sitek eme Rumah Petoton Kesah Si Badia.

4.   Amin gia perpulungen Korinti mayoritas kalak kristen siasalna non Yahudi, tapi Paulus mentransfer pengangkan kalak Yahudi kerna Rumah Pertoton. Rumah Pertoton man kalak Yahudi badia kal, sebab i je Tuhan hadir ntah je Ia ringan.

5.   Kalak kristen (perpulungen Korinti) erkiteken nggo itukur Tuhan, bagepe njadiken ia jadi kalak si tek dingen badia, maka kula kalak si tek e jadi Rumah Pertoton Kesah Si Badia, emaka erkiteken kula kalak sitek nggo jadi Rumah Pertoton Kesah Si Badia, maka alu sendirina kula kalak sitek lanai jadi sekerajangen manusia (kalak si tek) tapi nggo jadi sikerajangen Kesah Si Badia, sebab e rumahNa. Alu bage kegeluhen kalak si tek la banci nggeluh alu rate-ate, sebab adi kegeluhen rate-ate, nggeluh erbahan dosa, man pangan singgo ipersembahken man “berhala-berhala” maka rumah pertoton Kesah Si Badia e jadi melket. Alu bage kalak sitek nggo nggeluh ibas dosa ras iteruh pernembeh ate Tuhan.

APLIKASI

            Rusur sibegi kalak kristen (kita) nggo nggeluh ibas kebadiaan ntah pe nggo mbersih, enda payo, sebab sipemena : kita nggo ibersiken ras ibadiaken Yesus arah kayu persilang. Kerina dosa-dosa singelangketi kita ndube nggo ibersihken Tuhan. Sipeduaken : Kesah Si Badia erdahin ibas pusuhta nari. Erkiteken Kesah Si Badia e me Badia maka kita pe ipebadiaken ras ibersihkenNa. Emaka kita nggeluh ibas persadan ras Kristus. Ibas kepatuhenta man Kristus Yesus kita tetap nggeluh ibas kebadiaan. Kita enda tuhu-tuhu jadi sikerajangenNa (bangsaNa). Tapi amin bage gia, kita harus njaga kebadiaan ras bersih kulanta alu ndalanken kai singena ate Tuhan. Tapi adi la sidalanken kerna hal-hal simehuli, amin gia kita nggo iselamatken, tetap nge kita ihukum Tuhan pagi (band.ogenta).

Pdt. Steven Kumenit, STh.M.Min.