Kesah Si Badia Mpengasup Kita Ngidah Sura-Sura Dibata (Yoel 2:28-32)

PEKAN DOA

GEREJA GBKP

WARI V,  KAMIS 26 SEPTEMBER 2013.

Introitus   : Nina Jusup njabapsa, "Labo terantusi aku, o Raja, tapi Dibata banci mereken antusen si mehuli." (Kejadin 41:16).

Ogen        : Perbahanen Rasul-Rasul 11:23-30.

Khotbah   : Joel 2:28-32.

Tema        : Kesah Si Badia Mpengasup Kita Ngidah Sura-Sura Dibata.

LATAR BELAKANG

1.   Secara umum banci sikataken bahan khotbahta enda eme sada nubuat nabi Joel man bangsa Israel gelah bangsa Israel jera ibas dosa nari. Sebab adi la jera maka penghukumen Tuhan seh man bangsa Israel. Tapi adi lit si jera ras mindo penampat man Tuhan kalak e terkelin me. Penghukuman man bangsa Israel terjadi paksa wari Tuhan. Ibas wari Tuhan e kehancuran, kegelapan, bagepe kejadin-kejadin alam siluar biasa jadi i tengah-tengah bangsa Isreal.

2.  Wari Tuhan man kalak si tek man Tuhan lanai jadi kebiaren sebab kalak sitek pasti nggeluh ibas keselamaten. Enda jadi erkiteken ibas kegeluhen kalak si tek tetap mengandalkan Tuhan, ntah pe mindo penampatNa.

3.   Yoel ngataken man bangsa Israel, tuhu bangsa Israel ihukum Tuhan, tapi kenca dung penghukuman Tuhan e, ibereken Tuhan ka nge KesahNa man kerina bangsa Israel emaka terjadi me kegeluhen simbaru. Kesah Tuhan siibereken Tuhan man bangsa Israel menghadirkan kuasa Tuhan emaka terjadi me tanda-tanda sengget i tengah-tengah bangsa Israel. Erkiteken Kesah Tuhan ngkuasai bangsa Israel maka terjadi me nubuaten, nipi ras pengenehenen.

4.   Kesah Tuhan berkarya man bangsa Israel. Jadi ibas Tuhan mereken KesahNa man bangsa Israel, i je ngataken, la saja Tuhan “memulihken keadaan bangsa Israel sierdosa” tapi pe Tuhan erkuasa (nen = menguasai) man bangsa Israel. Jadi ibas situasi simbaru siikuasai Kesah Tuhan eme keselamaten man kerina bangsa Israel, bagepe njadiken bangsa Israel jadi nabi. Bagepe Kesah Tuhan siibereken Tuhan “mendobrak” status sosial si lit i tengah-tengah masyarakat bangsa Yahudi, emaka terjadi me sada persadan si la nai mbeda-mbedaken status sosial. 

5.   Ibas bahan khotbahnta enda Yoel ndatken sada pengenehenen kerna situasi alam semesta ope denga wari Tuhan, janah enda sada tanda ope denga wari Tuhan simbelin. Tanda siibahan Tuhan i langit ras i doni eme dareh, api ras cimber bagi embun. Matawari jadi gelap. Bulan salih jadi megara bagi dareh. Enda ikataken Joel gelah bangsa Israel banci ngenen ras ngangkai kerna kuasa Tuhan e. Alu bage bangsa Israel banci mbiar ras erkemalangan man Tuhan. Tapi ipihak sideban, sada sura-sura nabi Joel ngataken sie, gelah kalak sitek tetap nggeluh mbiar man Tuhan ras tetap mindo penampat man baNa. Alu kata sideban Joel mpegegehi kiniteken kalak si tek man Tuhan.

APLIKASI

            Kegeluhen simbaru siimiliki kalak sitek berakibat kalak sitek nggeluh kuasa Kesah Si Badia emaka kegeluhen kalak sitek la saja nggeluh ibas pengangkan kerna kata Dibata alu payo, tapi pe kalak sitek meteh kerna sura-sura Tuhan. Janah sura-sura Tuhan alu sederhana banci iertiken ibas dua hal eme sipemena kalak sitek harus nggeluh erkemalangan man Tuhan ras ndalanken kai singena ateNa. Sipeduaken : kalak sitek harus nggeluh ibas kekelengen. Kekelengen enda harus icidahken guna nampati sapih-sapih kita manusia simbutuhken penampat erkite-kiteken bas perbeben (band. Ogen).

            Ibas situasi sibagenda maka kalak sitek ibas kerehen wari Tuhan nggeluh ibas keselamaten.

Pdt. Steven Kumenit, STh, M.Min.