Ijenda Aku Suruhlah Aku (Yesaya 6:1-8)

PERPULUNGEN JABU-JABU

GEREJA GBKP

TANGGAL 31 JANUARI – 6 FEBUARI 2016.

Jesaya 6:1-8.

Tema : Ijenda Aku Suruhlah Aku

LATAR BELAKANG

1.      Bangsa Yehuda eme bangsa pilihen Tuhan. Tujun Tuhan milih bangsa Israel/Yehuda ibas rangka keselamatan i tengah-tengah doni enda. Bangsa Yehuda ipake Tuhan jadi alatNa, emaka selaku bangsa Tuhan, seharusna min kegeluhen bangsa Yehuda nggeluh ibas kebadian, kebujuren ras keadilan. Tapi si jadi lang. Bangsa Yehuda nggeluh alu erbana-bana. Bangsa Yehuda lanai mbiar ras erkemalangen man Tuhan, emaka terjadi me penindasan, kinilaadilen, la lit kekelengen, ras pang mindo penampat man bangsa Mesir asangkan man Tuhan.

2.      Amin gia bangsa Yehuda nggo nggeluh erbana-bana, lanai setia man Tuhan. Tapi Tuhan tetap erkeleng ate man bangsa Yehuda. Ate Tuhan gelah bangsa Yehuda tetap jadi bangsa pilihen ras alatNa. Emaka ibas palas enda me idilo Tuhan si Yesaya gelah peseh berita penghukuman Tuhan. Ate ibas bangsa Yehuda megiken berita penghukuman Tuhan, bangsa Yehuda minter jera ras mbiar ras erkemalangan man Tuhan.

3.      Pendilo Tuhan man Yesaya terjadi ibas rumah pertoton. Idah Yesaya kehadiren Tuhan ibas rumah pertoton. Tapi igejapken Yesaya, erkiteken nggo idahna Tuhan, maka sekali enda ia mate. Sebab ibas pustaka si Badia (Taurat Musa), manusia la iperkenankan ngidah Tuhan, sebab manusia e erdosa. Adi manusia ngidah Tuhan maka mate me ia (band. Keluaran 33:20). Apai ka igejapken Yesaya, ia tading ibas bangsa si erdosa, bagepe ia sendiri manusia sierdosa.

4.      Ibas rencana Tuhan simbelin nandangi doni enda, ibenai ibas bangsa Yahuda nari, maka ialemi Tuhan kerina dosa-dosa Yesaya. Arah Malekat Serafim ipebadiakan Tuhan Yesaya. Malekat Serafim maba rara, jenari arah rara e ikuitna biber Yesaya. Pengalemi dosa ras kebadiaan nggeluh merupakan sada hal sipenting ibas nehken sura-sura Tuhan nandangi bangsaNa. Sebab ibas nehken sura-sura Tuhan, perlu kinipangan ras kemurniaan nggeluh, gelah la jadi batu antuken nandangi bangsa Tuhan.

5.      Ibegi Yesaya sada penungkunen ras pengutusen ibas Tuhan nari. Emaka ialoi Yesaya persuruhen Tuhan e. Emaka Yesaya jadi nabi Tuhan. Tugas nabi Yesaya eme mpekena kegeluhen erkiniteken bangsa Yehuda gelah jera ras mulih kempak Tuhan. Emaka lit keselamatan man bangsa Yehuda. Tapi adi lang maka penghukumen Tuhan ipeseh man bangsa Yehuda.

APLIKASI

            Sigejapken maka lit sura-sura Tuhan simbelin nandangi doni enda eme keselamatan. Erkiteken sie me maka nggo idilona kita nggeluh ibas keselamatan. Kita genduari enggo nggeluh ras Yesus Kristus. Tapi tanggungjawabta la saja njagai keselamatan singgo ibereken Tuhan man banta, tapi ndahiken dahin Tuhan ibas doni enda. Kita arus jadi aron Tuhan ibas doni enda, gelah doni enda nggeluh ibas keselamatan.

            Ndahin keselamatan eme dahin pelayanan gereja (GBKP). Adi bage kita kerina. Emaka ibas pelayanan keselamatan gereja; melala anggota gereja singgeluh ibas keterikaten dosa. Lit praktek-praktek dosa siilakokenna. Bagepe lit anggota perpulungen singgeluh ibas penindasan, ras beban nggeluh sideban, termasuk mpekena-kena doni enda. Dahin enda, labo ikhususken man pendeta, pertua ras diaken. Tapi man banta kerina. Emaka genduari nina Tuhan, ise ndia kusuruh. Ise ndia nggit maba berita ibas Aku Nari ? nintalah enda aku Tuhan suruhlah aku. Sebab perlu siteh meriah ukurta sebab ipake ras ipercayaken Tuhan kita jadi aronNa. Adi ipake Tuhan kita jadi aronna berarti ngena ateNa kita. Tapi selaku persuruhen Tuhan, simaba berita ibas Tuhan nari. Kita arus nggeluh ibas kebadiaan, gelah la kita jadi batu antuken man kalak sideban. Mbelang man peranin, tapi kurang siranisa pe. Marilah kita ngayuken pendilo ras persuruhen Tuhan man banta alu mpeseh Berita Si Meriah. Berita keselamatan man kerina jelma ras doni enda.

Pdt. Steven Kumenit, STh.M.Min.