Penandaiku Nandangi Kristus Mpelimbarui Geluhku (Filipi 3:1-10)

PERPULUNGEN JABU-JABU

GEREJA  GBKP

TANGGAL 7 – 13 FEBUARI 2016.

Pilipi 3:1-10.

Tema : Penandaiku Nandangi Kristus Mpelimbarui Geluhku.

LATAR BELAKANG

1.      Ibas perkembangan kekeristenan ibas gereja mula-mula, lit kelompok Yudaisme. Kelompok Yudaisme enda eme kalak kristen sitetap denga jemak adat istiadat agama Jahudi, khususna kerna sunat. Amin gia ia nggo tek man Yesus Kristus, tapi sunat eme sada hal siutama ibas kinitekenna. Sebab sunat eme ikaten perpadanan antara manusia ras Tuhan (band. Kejadin 17).

2.      Erkiteken sunat merupakan sada hal siutama ibas kegeluhen kalak Yahudi, maka kelompok Yudaisme enda reh ku perpulungen, termasuk perpulungen Pilipi, alu ngataken maka keselamatan sialoken perpulungen lenga kuh. Keselamatan banci kuh adi perpulungen isunat.

3.      Pengajaran ras dogma Yudaisme enda mbaba kebingungan i tangah-tengah perpulungen Pilipi. Erkiteken sie, Paulus mereken sada kelurusan kerna keselamatan. Nina Paulus, justru perpulungen Pilipi nge si nggo ngaloken sunat situhu-tuhu. Maksudna perpulungen nggo ersembah ibas kebenaren ras tek man Yesus Kristus, janah ibas Kesah Si Badia perpulungen nggeluh ibas ikaten-ikaten perpadanan ras Yesus Kristus. Perpulungen la nggeluh ibas kegeluhen daging eme ketutusen ndalanken taurat (Sunat) secara lahiriah, sierbahanca bene makna sunat. Sebab kalak Yahudi ndalanken sunat secara lahiriah, emaka kegeluhenna eme praktekken kai si la ngena ate Tuhan. Tapi perpulungen nggo ndalanken sunat situhu-tuhu eme nggeluh ibas pengharapan man Yesus Kristus.

4.      Gelah kegeluhen persadan perpulungen ras Yesus Kristus tetap nggeluh, ipersingeti Paulus perpulungen gelah ia metenget nandangi biang. Siimaksudken Paulus biang eme kelompok Yudaisme singajarken pengajaren si papak. Padahal kata biang biasa igunakan kalak Yahudi man kalak si la kalak Yahudi (kafir). Sebab pengakap kalak Yahudi, kalak kafir enda melket ras najis. Ia ngenca sibadia ras benar. Ipersingeti Paulus perpulungen Pilipi gelah perpulungen pilipi sadar ras nggejapken, kepeken lihat bahaya sisangana “mengintai” ia, sibanci nirangken persadanna ras Tuhan. Adi perpulungen tetap metenget, maka kegeluhen kinitekenna tetap terjaga ras megegeh.

5.      Gelah perpulungen ngangkai kerna keselamatan ras kebenaren situhu-tuhu, Paulus mereken sada penjelasan kerna kebodohan praktekken ketutusan lahiriah. Nina Paulus, ia eme kalak Yahudi asli, sidalanken secara benar kerna adat istiadat agama Yahudi. Paulus kalak Heber asli. Sunat ibas umur waluh wari (peraturan agama yahudi, anak dilaki kalak Yahudi, umur waluh wari harus isunat). Kerna ndalanken undang-undang, Paulus igolongken selaku kalak Parisi (kalak Parisi eme kalak situtus ndalanken undang-undang Taurat. Kalak Parisi tehna ras angkaina titik koma ibas undang-undang, bagepe tehna artina). Janah erkiteken ndalanken undang-undang e maka akapna kalak kristen ntah pe kalak sitek man Yesus Kristus arus imasapkan, sebab kalak kristen eme “kalak sesat), emaka la banci berkembang ibas doni enda. jadi erkiteken tutus ndalanken adat istiadat agama Yahudi maka igasgasi Paulus me gereja.  Bagepe erkiteken ketutusan ndalanken undang-undang e, akap Paulus e merupakan sada kebenaran, kepeken lang. Kerina e merupaken sada kebodohan. Emaka itadingkenna kerina e, erkite-kiteken nggit ngaloken Kristus ras kebenarenna, janah man Kristus saja Paulus tek. Ibas tek ras ersembah alu bulat ukur man Kristus ras ndalanken kebenaren ibas kegeluhen tep-tep wari, maka Paulus nggeluh ibas keselamatan. Paulus nggit muat bagin ibas kiniseran ras kekeken Kristus. Alu bage ibas sada pengarapan, Paulus ipekeke Dibata ibas simate nari ku kegeluhen. Enda me siarus idalanken perpulungen Pilipi.

APLIKASI    

            Kristus eme Mesias. Janah Kristus eme Tuhan. Kalak si tek man Kristus Yesus berarti ia nggeluh ibas keselamatan. Ibas Kristus lit kuasa, janah kuasa enda ibabo kerina kuasa si lit ibas doni enda, termasuk kuasa setan. Enda nggo ibuktiken Kristus ibas kekekenNa. Bagepe Kristus Yesus dem alu keleng ate. Emaka la ateNa kita ndabuh ibas dosa, janah sirang kita ras Ia. Sebab adi kita nggo sirang ras Tuhan maka lanai lit keselamatan man banta.

            Kuasa ras keleng ate Tuhan enda me siarus iteh ras siitandai. Jadi penungkunen uga carana gelah tuhu-tuhu kita nandai Kristus alu bulat ukur (sempurna). Siarus ilakoken kita eme tadingken biak manusia male, janah tutus kita ersembah man baNa, bagepe tutus kita ngoge Pustaka Si Badia. Sebab ibas kita tutus ersembah man Tuhan, bagepe tutus ngoge Pustaka Si Badia, maka kita banci meteh kerna karakter Kristus sierkuasa ras perkeleng. Alu eersada kinitekenta ras penandainta kerina nandangi Kristus, emaka kita dewasa, janah dungna kita seh ku tingkat kedewasaan Kristus si serta (band Efesus 4:13). Alu bage amin gia kita jumpa perbeben ras kiniseran, la jadi masalah man banta, sebab ibas kita natap kempak Kristus, ergegehna kita ndalani geluhta ibas doni enda.

Pdt. Steven Kumenit, STh.M.Min.