Pembincarkan Kemulian Tuhan (2 Korintus 3:12-18)

KHOTBAH TANGGAL 7 FEBUARI 2016.

GEREJA GBKP

Invocatio    :    TUHAN nggeluh kap! Pujilah Penampatku! Beritakenlah kemulian Dibata si nelamatken aku (Mazmur 18:47).

Ogen          :    Keluaran 34:29 – 35 (Tunggal).

Khotbah     :    2 Korinti 3:12-18 (Tunggal).

Tema          :    Pembincarken Kemuliaan Dibata.

LATAR BELAKANG

1.      Secara umum, sijadi bahan khotbahnta sekali enda eme apologet ntah pe pembelaan rasul Paulus nandangi pendahin pelayanenna. Sebab lit anggota perpulungen Korinti, bagepe lit kelompok simensangsikan pelayanan Paulus. Nina, pelayanan Paulus ibas rangka ndatken surat pujin ibas perpulungen Korinti nari, gelah surat enda banci ipake ibas pelayanan Paulus ibas ingan si deban. Bagepe la lit surat rekomendasi ibas Yerusalem nari. Pengangkan sisalah enda ilurusken Paulus. Paulus la perlu bagi kalak sideban simake surat pujin ibas perpulungen nari. Tapi siiperluken Paulus eme perkembangen kiniteken perpulungen, si kin e merupaken surat situhu-tuhu, siitulis labo alu tinta tapi alu Kesah Dibata. Emaka pendahin Paulus ibas rangka gelah manusia ndeher ras Tuhan (band. Ayat 9).

2.      Secara khusus ibas khotbahnta, uga Paulus mbandingken pelayanan Musa ibas padan sindekah ras pelayananna genduari. Sada hal simbedaken eme Musa nai ibas pelayanenna mpeseh kata Tuhan nutup ayona gelah sinalsal si lit ibas ayona la lesap seh bene. Janah silebihna pe ibas kalak Jahudi ngogeken kitab-kitab ikaten perpadanen, kalak Jahudi la ngangkai kai maksudna, sebab ukur kalak Jahudi tertutup. Ukur sibatun-batun sinutupi ukurna. Tapi beda ras kalak sierkusur  (berbalik) kempak Tuhan. Penutup si nutupi ukurta nggo nantang.

3.      Kalak Yahudi tetap denga ku sinagoge (rumah Pertoton), ersembah ia man Tuhan, tapi tetap denga perbahanen si la mehuli si la ngena ate Tuhan idalankenna. Emaka segambar ras Tuhan la teridah. Kerna perlu siteh, kita enda segambar ras Tuhan, tapi erkiteke dosa maka segambar ras Tuhan la nai teridah. Dosa sierbahanca lanai teridah. Dosa e me sinutupi ukur kalak Yahudi guna ngangkai keselamatan si lit ibas Yesus Kristus. Padahal ibas Taurat, ngerana kerna kemuliaan Tuhan.

4.      Jenari lit sada motivasi siibereken Paulus man perpulungen gelah perpulungen natap kemuliaan Tuhan. Kemuliaan Tuhan lit ibas Yesus Kristus. Emaka Tugas perpulungen eme pembincarken kerna kemuliaan Tuhan eme Yesus Kristus. Alu bage kita kerina iobah ibas kedewasaan kiniteken, seh ku segambar ras Tuhan (Imago Dei).

5.      Alu bage perpulungen Korinti ula bali ras kalak Yahudi siukurna batu-batun. Tapi jadilah segambar ras Tuhan sitep-tep wari arus iubah, gelah segambar ras Tuhan teridah.

APLIKASI

            Temanta merupakan sada kalimat penugasan man banta gelah pebincarkan kemuliaan Tuhan. Kemuliaan Tuhan lit ibas Yesus Kristus. Emaka salah  sada tanggungjawab kita selaku kalak kristen eme uga kita banci pebincarkan kemuliaan Tuhan e ibas kegeluhenta tep-tep wari. Tuhu lit perbeben ras kiniseran man banta si banci nutupi kemuliaan Tuhan. Emaka la banci kita pebincarkan kemuliaan Tuhan. Ngangkai kemuliaan Tuhan si lit ibas Yesus Kristus mabai kita ngasup ernalem man baNa. Ngasup kita mindo penampat man Tuhan. Sebab nina Tuhan Yesus kerina kuasa i surga ras i doni nggo ibereken Tuhan man bangku (Matius 28:18). Bagepe perlu siteh ibas Yesus, kita kerina nggo ibebasken. Pembebasen i awali ibas merigatna kire-kire Rumah Pertoton gelah kita kerina banci ersembah man Yesus. Bagepe gelah ngasup kita ngidah kemuliaan Tuhan maka pusuh sibatu-batun sinutupi ukurta arus italangi ras ula nari ipake gelah kita seh ku segambar ras Tuhan. Perlu siteh memang tangtangna kita enda segambar ras Tuhan (band. Kejadin 1:26), tapi erkiteken dosa emaka sisegambar ras Tuhan nggo ceda. Tapi erkiteken kita nggo nggeluh ibas Yesus Kristus maka kita arus tetap natap kempak Yesus simerupaken ulu bincar kemuliaan e. Kita enda nggo  nggeluh ibas keselamatan. Bagepe ula kita bagi musa ndatken kemuliaan Tuhan, adi ia jumpa ras Tuhan. Mbincar Tuhan nggo lit bas kita, kenca kita nggo iselamatkan Tuhan, janah ngasup pe kita pebincarkan ibas kegeluhenta tep-tep wari. Pebincarkan kemuliaan Tuhan alu ndalanken kai singena ate Tuhan. Emaka marilah kita tuhu-tuhu nggeluh ibas Tuhan gelah teridah tuhu kita enda manusia siberbeda ras tinepa Tuhan sideban.

Pdt. Steven Kumenit, STh.M.Min.