Lebih Asa Siarapken Kalak (Pelayanan Prima). (Matius 5:38-48)

KHOTBAH MINGGU TANGGAL 19 FEBUARI 2017.

GEREJA GBKP

Invocatio      : Adi idahndu lembu ntah kelede imbangndu pulah, tangkap janah bereken man bana (Keluaran 23:4).

Ogen        :    Imamat 19:1, 2, 9-18. (Responsoria).

Khotbah   :    Matius 5 : 38-48 (Tunggal).

Tema        :    Lebih Asa Siarapken Kalak (Pelayanan Prima).

LATAR BELAKANG

1.      Sijadi bahan khotbahta sekali enda, bagin si la terpisahken ibas khotbah Yesus i datas uruk. Ibas khotbah enda Yesus mereken pengajaren kerna kekelengen. Pengajaren Yesus eme pengajaren  siberbeda ras hukum siidalanken kalak Yahudi. Berbeda kal ras hukum setimpal. Emaka nina Yesus arus sabar ras la banci erbalas sijahat alu sijahat. Arus nggeluh ibas  keleng ate. Alu bage enda merupaken pengajaren simbaru.

2.      Ibas kegeluhen kalak Yahudi kerna hukumen nandangi kalak siersalah nggo jelas. Janah enda pe iatur ibas undang-undang agama (hukum Taurat). Kalak Yahudi banci mindo man hakim, gelah hakim ngukum sue ras kesalahan singgo ibahan kalak man bana. Adi ipen, mata ntah pe tanna si ceda (cacat), maka hakim arus ncedai ipen, mata ntah pe tan (bdk. Kel. 21:23-24; Imamat 24:19-20; Ulangan 19:21). Tapi ibas perdalanen waktu, hukumen enda lanai jadi hak hakim pelin-pelin, tapi nggo ipake jadi hak kerina kalak Yahudi. Jadi lanai perlu ipindona man hakim, tapi ia sendiri singelakokenca. Situhuna makna undang-undang enda, gelah lanai lit kejahatan ibas bangsa Israel. Bagepe ibas kegeluhen Yahudi, merupaken sada penghinaan man kalak Yahudi adi lit si mparap kurumna. Emaka adi llit simparap kurum si kemuhen, bereken parapna kurumna si kawes. Sebab alu erbahan bage, maka sibereken contoh simehuli kerna kesabaran ras keleng ate. Alu bage kalak jahat banci jera. Bagepe adi lit kalak erkiteken mora ateta bajunta, maka bereken pe cabinta. Bagepe iajarken Yesus uga “ersikap” adi ia ipaksa maba barang 1 km, maka kita arus maba 2 km. Enda ikataken Yesus sebab ibas hukum Roma, sekalak tentera berhak  maksa sesekalak jelma maba barangna sedauh 1,5 km. Bagepe ula tulak adi lit kalak siminjam kai-kai pe man banta. Maksud ibas kerina enda eme ajar-ajar Yesus ras jelma sinterem la banci jadi kalak egois simpertahankan hakna saja. Tapi arus nggeluh ibas keleng ate.

3.      Tole ibas pengajaren Yesus e, khususna kerna ngkelengi imbang-imbang. Kalak si tek man Yesus arus melebihi kalak sideban ibas ngkelengi imbang-imbang. Kalak sitek singgo nggeluh ibas Kinirajaan Surga lanai nggeluh ibas emosi ras dendam. Emaka siarus ilakoken kalak sitek eme notoken imbang-imbang sierbahanca geluhta jadi mesera.

4.      Perbahanan ngkelengi imbang ras notoken ia, merupakan karakter anak-anak kinirajaan Surga, bagepe karakter Dibata. Dibata ibas keleng ateNa mereken kegeluhen man kerina jelma, subuk man kalak bujur ras si la bujur (si jahat ras si la jahat).

5.      Kegeluhen kalak singgo tek man Dibata arus lain/beda ras sideban. Singgo tek man Dibata ndalanken kekelengen la saja terjeng/ sebatas temanta saja. Tapi pe man kalak sideban. Perlu siteh kalak Yahudi ngertiken, teman eme sapih-sapih ia kalak Yahudi ngenca. Kalak sideban la temanna. Jadi ate Yesus ula saja kekelengen e terjeng sapih-sapih ia kalak Yahudi, tapi pe man kerina jelma.

APLIKASI

            Ibas khotbahnta sekali enda, kita ipersingeti kerna uga nggeluh ibas kekelengen. Nggeluh ibas kekelengen berarti nggeluh i luar kebiasan-kebiasaan doni. Memang tuhu ndalanken enda tempah mesera kita ngikutkenca, tapi adi nggeluh lalap ibas undang-undang Tuhan maka banci silaksanakan kerna nggeluh ibas kekelengen.

            Nggeluh ibas kekelengen berarti kita anak-anak Dibata kap. Alu bage kita la mereken kesempaten man siiblis berperan ibas kegeluhenta.  Bagi siikataken Alfred Plumer : membalas kebaikan dengan kejahatan berarti membiarkan iblis mempengaruhi kita dengan kebencian, iri, dengki. Membalas kebaikan dengan kebaikan itu adalah hal yang manusiawi.  Tapi membalas kejahatan dengan kebaikan adalah sipat Dibata. Kita tidak akan pernah bisa bahagia dan damai sejahtera jika masih menyimpan dendam dan kebencian.

            Ngelakoken lebih asa siarapkan kalak, ncidahken perbahanen nggeluh ras perbahenenta la tergantung man kai siibegi ras sialoken ibas kalak sideban, tapi tergantung ibas pemeliharaan Dibata, ras nggeluh ibas kekelengen.

            Nggeluh ibas kekelengen ibas Tuhan nari, berarti kita nggeluh ibas kiniteruken ukur ras nggit ngalami salah kalak, la erbalas sijahat alu sijahat ras la nggit ngelakoken kejahatan ibas kegeluhenta.emaka perlu siteh, Dibata ngenca siberhak ngukum ntah pe mbalas nandangi kalak jahat, la kita (bdk. Kej.50:19). Perbahanen sibage, berarti kita berbeda ras kalak sideban.  Alu bage kita nggeluh serta bagi Bapanta si i surga.

            Memang ibas kegeluhenta tep-tep wari, banci saja sijumpai tekanan-tekanan man banta. Banci saja kita imusuhi kalak. Banci saja secara manusia, nembeh ras merawa ateta man kalak sierbahan kejahaten man banta. Tapi kita isingetken, kepeken kita enda berbeda ras kalak sideban, kita enda anak-anak Dibata, emaka kejahatan kai pe arus ibalas alu kelengen, ras notoken imbang-imbangta, gelah banci sadar ia ras Dibata banci masu-masu kita. Kita ipengasup Tuhan guna ngaloken perbeben ras kiniseranta e, janah kita ipehaga Dibata.

            Memang ibas kegeluhenta, lit undang-undang ras hakim sibanci “mengadili kalak sierbahan kejahatan. Emaka bereken tanggungjawab hakim man hakim, janah ula kita jadi hakim sendiri.

            Bagepe arus kita inget, gelah la nembeh ras merawa kalak man banta, tentuna kita arus ngelakoken simehuli singena ate Tuhan man temanta manusia, gelah ia pe erbahan simehuli man banta. Tapi adi nggo mehuli perbahanenta, janah nembeh ras merawa ia man banta, maka mari sitotoken gelah Dibata erdahin bas kita ras man temanta e.

            Perbahanen lebih asa siniarapken kalak, ngataken man banta, maka isekelewetta memala temanta manusia simbutuhken penampat, emaka kita selaku gereja, subuk pribadi bagepe institusi, ipindo ntah pe la ipindo, kita arus ngkelengi ras nampati ia.

Pdt. Steven Kumenit, STh.M.Min.