Malem Kal Ate Nggeluh Ibas Undang-Undang Tuhan (Mazmur 119:1-8)

KHOTBAH MINGGU TANGGAL 12 FEBUARI 2017.

GEREJA GBKP

Invocatio      : Malem ate kalak si TUHAN Dibata penundalenna, si ibahanna Dibata nu Jakup jadi penampatna (Mazmur 146:5).

Ogen        :    1 Korinti 3:1-9 (Antiponal).

Khotbah   :    Mazmur 119:1-8 (Tunggal).

Tema        :    Malem Kal Ate Nggeluh Ibas Undang-Undang Tuhan.

LATAR BELAKANG

1.      Sijadi bahan khotbahta sekali enda Mazmur siipake tupung bangsa Israel ngerayaken wari raya Paskah. Ibas wari raya Paskah e bangsa Israel ngendeken Mazmur enda. janah mazmur enda igolongken mazmur kepentaren.

2.      Pemazmur ngenen guna ndatken kemalemen ate, bangsa Israel arus ndalanken : nggeluh la erpandangen, ngikutken undang-undang Tuhan, ngikutken perentahNa, ndarami Tuhan alu bulat ukur, erdalan ibas dalan Tuhan, si la pernah erbahan kesalahan. Tapi gelah kerina enda idalanken, maka bangsa Israel harus matuhi undang-undang Tuhan alu tutus. Undang-undang Tuhan e me taurat. Bagepe undang-undang Tuhan eme sura-sura Tuhan.

3.      Undang-undang Tuhan (hukum Taurat), tangtangna ibereken Tuhan man bangsa Israel arah Musa, tupung bangsa Israel ngadi-ngadi i dataran deleng Sinai. Undang-undang Tuhan (hukum Taurat) isina eme pengajaren ntah pe petunjuk. Undang-undang Tuhan ibereken Tuhan  la bo maksud terjeng sada peraturen guna ipatuhi gelah ndatken “perkenanan Tuhan”. Tapi alu maksud gelah bangsa Israel tetap nggeluh ibas pekenanan Tuhan. Sebab perlu siteh bangsa Israel nggo nggeluh ibas perkenanan Tuhan, tupung bangsa Israel ibaba Tuhan ndarat i Mesir nari. Alu bage undang-undang Tuhan merupaken pasu-pasu Tuhan simbelin man bangsa Israel.

4.      Pengalaman spiritual pemazmur eme uga pemazmur ngenen undang-undang Tuhan palas ndatken kemalemen ate. Kerina undang-undang Tuhan arus ipatuhi alu bage kemalemen ate siidatken pemazmur eme  la dat juru. Bagepe akap pemazmur undang-undang Tuhan la saja terjeng i oge tapi arus ipelajari kerna keputusen-keputusen Tuhan. Alu bage pemazmur ndatken kai sura-sura Tuhan, maka ipujina Tuhan.

5.      Ate Pemazmur gelah bangsa Israel alu bulat ukur ngkelengi undang-undang Tuhan. sebab kenca bangsa Israel patuh ras ndalanken perintah-perintah Tuhan, maka bangsa Israel lalap nggeluh ibas pasu-pasu Tuhan.

APLIKASI

            Kerina manusia merincuh ndatken malem ate, janah melala bentuk manusia ndarami kemalemen ate. Tapi perlu siteh kemalemen ate siitawarken doni ras kuasa gelap, terjeng sementara. Kemalemen ate situhu-tuhu ibas Dibata ngenca. Alu bage adi ateta ndatken kemalemen ate situhu-tuhu, maka kita arus ngikuti kai siisura-suraken Tuhan. Jadi penungkunen man banta uga carana gelah siteh sura-sura Tuhan. gelah siteh sura-sura Tuhan maka kita arus lalap ngoge pustaka Si Badia. Janah la saja terjeng ngoge tapi pe arus kita ngerenungken suari ras berngi (band. Masmur 1:1-3).

            Ndalanken undang-undang Tuhan alu patuh ras tutus maka kinitekenta reh dewasana, lanai kita nggeluh erpihak-pihak (band. Ogen). Kita nggeluh ibas kekelengen.  Alu bage kita nggeluh ibas kemalamen ate sebab kita ipasu-pasu Tuhan. Jadi kemalemen ate la saja terjeng siteh ngenca, bagepe ngaloken kai siisura-surakenta, tapi arus idalanken undang-undang Tuhan eme kerna simehuli singena ate Tuhan. . Janah perlu siteh ula aru ateta ras mbiar kita ndalanken undang-undang Tuhan, sebab Dibata tetap nemani ras mereken gegeh man banta. La itadingken Tuhan kita, sebab padanna eme tetap ber – Imanuel (bdk. Masmur 119:8).

Pdt. Steven Kumenit, STh.M.Min.