Ngelai Eme Komitmenku (Markus 10:35-45)

PERPULUNGEN JABU-JABU

GEREJA GBKP

TANGGAL 12-18 FEBUARI 2017.

Markus 10:35-45.

Tema : Ngelai Eme Komitmenku

LATAR BELAKANG

1.      Ibas bahan oratenta sendah eme lit sada pemindon anak-anak Sebedeus eme Jakup ras Johanes. Ipindona gelah ia duana banci kundul arah kawes ras kemuhen Yesus, adi pagi Yesus erkuasa. Pemindon siipindoken anak-anak Sebedeus enda, erkiteken salah pengangkanna kerna kerajaan si pagi ipanteki Yesus. Akapna kerajaan sipagi ipanteki Yesus, bali ras kerajaan doni enda. Emaka adi pantek kerajaan e, berarti Yesus jadi raja. janah situhuna enda me gambaren man bangsa Yahudi kerna Mesias. Mesias eme siipadanken Dibata reh ibas rangka pemulihen bangsa Israel (kerajaan Daud). Emaka ibas Yesus Kristus reh harapen guna mbebasken bangsa Yahudi ibas kekuasaan bangsa Romawi nari.

2.      Pemindon Jakup ras Johanes man Yesus tupung Yesus ras ajar-ajarNa sangana erdalan ku Yerusalem. Yerusalem eme pusat pemerintahan, ingan raja. Alu bage ibas pengakap Jakup ras Johanes nggo paksana pindona ingan simehuli ibas kinirajaan e. Maksudna ibas sistim pemerintahan raja, kenca raja simerupaken pemimpin tertinggi, simerentah kerajaan e, maka kalak sindeher ras raja e, sikundul ibas kawes ras kemuhen raja (kalak siterdeher). Alu bage ate Jakup ras Johanes gelah ia duana dat bagin ibas kuasa kerajaan e. Apai ka Jakup ras Johanes enda keluarga ndeher Yesus (keponakan/anak).

3.      La ikataken Yesus lang ibas pemindon Jakup ras Johanes, tapi Yesus mereken sada penjelasan kerna kiniseran alu make simbol cawan ras peridin. Kiniseran si nandangi ialokenna tuhu-tuhu mberat. Ate Yesus gelah Jakup ras Johanes banci rukur mulihi kerna pemindon e. Tapi tetap Jakup ras Johanes ibas pemindonna e. Jakup ras Johanes ngasup ngaloken kiniseran.

4.       Amin gia nggo tetap ukurna ngasup ngaloken kiniseran, tapi nina Yesus ise sikundul i kawes ras kemuhenNa labo Ia sinentukenca tapi  Dibata pagi sinentukenca. Sebab menyangkut ibas keselamatan ras erkuasa ibas kinirajaan surga. Kalak sibanci bengket ras nggeluh ibas kinirajan Dibata eme kalak sikonsisten ndalanken kai singena ate Tuhan. ntah pe ngelai guna keselamaten doni enda.

5.      Ngenen pemindon Jakup ras Johenes kerna  kuasa ras ngasup ngaloken kiniseran, dungna ipake Jesus kesempaten e guna ngajarken ajar-ajar kerna litna perbedaan siprinsipil kerna kalak sierkuasa ibas pemerintahan (kerajaan doni) ras pemerintahan Dibata (kerjaan Dibata). Ibas pemerintahan doni, kalak sierkuasa banci ia merentah rayatna, bagepe pemimpin banci  rate-ate nandangi bahawanna, tapi ibas pemerintahan Dibata, la bage. Sebab ise siatena jadi mehaga, ia arus ngelai, janah ise siatena arah lebe, maka ia arus jadi suruh-suruhen. Sebab Anak manusia (Yesus), sipagi jadi Raja, reh ku doni enda labo guna ielai tapi guna ngelai, alu bage seh me keselamatan i tengah-tengah doni enda. Jadi nggeluh ibas kerajaan Dibata, la llit orientasi kuasa, tapi orientasi ngelai.

APLIKASI

            Komitmen eme sada perpadanen guna ngelakoken, entah  sada perpadanen ras dirinta ntah kalak sideban guna idalanken.

            Salah sada komitmenta selaku kalak kristen eme ngelai, nggeluh ibas erdiakoni. Konsep ngelai tentuna ibas Tuhan nari, Tuhan Yesus reh ku doni enda guna ngelai, janah enda kerina ibas rangka keselamatan. Ngelai eme bentuk kita erdiate ras mediate nandangi senina turangta simbutuhken penampat.

            Ibas gerejanta melala siarus ngelai, khususna ibas berdiakonia. Emaka ibas kita ngelai, malala tersampati. Tapi gelah kita banci ngelai arah diakonia maka kita arus make prinsip Yesus Kristus eme ngelai ras nggeluh ibas kiniteruken ukur. Janah kerna ngelai, nggo melala siicontohken Tuhan Yesus, emaka mari sidalanken.

            Perlu siteh, pelayanan diakonia berbeda ras STS siidalanken persadan-persadan i luar gereja. Janah ngelai ibas gereja kerna diakonia eme kita kerina. Bagepe amin gia kita Pdt, Pt ras Dk, labo berarti kita ibereken kuasa guna merentah saja, janah la kita ngelai, tapi justru arus teridah maka selaku pemimpin i tengah-tengah gereja,kita arus ertutusna ngelai, jadi contoh. Bagepe marilah sipake konsep, padin mere asangkan ngalo.

Pdt. Steven Kumenit, STh.M.Min.