Buat Baginndu Ibas Dahin-Dahin Gereja (Roma 12:3-8)

KHOTBAH MINGGU, 27 AGUSTUS 2017.

GEREJA GBKP

Invocatio   :    E maka ola kam mela ersaksi kerna Tuhanta; bagepe ola kam mela kerna aku si ipenjaraken erkiteken Kristus. Tapi buat baginndu ibas kiniseran guna Berita Si Meriah bagi ibereken Dibata man bandu gegeh guna sie (II Timotius 1:8).

Ogen         :    Lukas 22:24-30 (Tunggal).

Khotbah    :    Roma 12:3-8 (Tunggal).

Tema         :    Buat Baginndu Ibas Dahin-Dahin Gereja.

LATAR BELAKANG

1.      Rasul Paulus mereken kata persinget man perpulungen Roma gelah tetap nggeluh ibas persadan. Nggeluh ibas persadan, anggota perpulungen Roma arus nggeluh ibas kiniteruken ukur, ras arus rembang tengah pengukuri kerna diri sendiri. Anggota perpulungen arus sadar ise ia situhuna. Enda ikataken Paulus, sebab lit perubaten siterjadi i perpulungen Roma. Perlu siteh anggota perpulungen Roma eme Kalak Jahudi ras la kalak Jahudi. perubaten enda la saja terjeng keselamatan, eme nina kalak kristen asal Jahudi keselamatan arus ndalanken Taurat ras sunat. Bagepe nina kalak kristen la kalak Jahudi, kalak keristen asal Jahudi marampek kinitekenna erkite-kiteken masih mpertahankan taurat ras Sunat.

2.      Kegeluhen ibas persadan arus nadingken persoalan-persoalan sibanci ncedai ikaten persadan, emaka Palus make kapasitasna selaku Rasul mpersingeti perpulungen Roma gelah nggeluh ibas kiniteruken ukur ras sadar kerna diri sendiri sue ras belinna kiniteken singgo ibagi-bagiken Dibata.

3.      Gelah lebih mbages pengangkan perpulungen Roma kerna makna persadan ras makna  kiniteken ibas persadan, maka Paulus menganalogikan persadan sisaling mbutuhkan sada ras sideban alu make kula. Ibas sada kula melala ring-ringna, janah ring-ring e lit gunana. Bagepe kegeluhen perpulungen, amin gia nterem anggota  tapi sada kula kap perpulungen e. Bagepe iajuk Paulus gelah anggota perpulungen si lit bas ia pemere-pemere Dibata (karunia-karunia khusus) arus makeken sue ras pemere-pemere Dibata si lit bas ia. Jadi makna persada eme anggota perpulungen iiket ibas sada kula, janah anggota perpulungen arus ngelai sue ras makna ring-ring. Emaka amin gia lain-lain ring-ring e tapi berfungsi guna persadan, la berdiri sendiri. Enda ikataken Paulus sebab lit kecenderungan kalak si lit bas ia pemere-pemere Dibata (Karunia) nggeluh ibas meganjang ukur.

4.      Lit pitu pemere-pemere Dibata siikataken Paulus (Kengasupen ernubuat, kengasupen guna nampati, kengasupen ngajar, kengasupen guna petetap ukur kalak, kengasupen guna mere, jadi pemimpin, ngasup ncidahken perkuah ate man kalak sideban), tapi labo berarti pitu enda ncidahken ganjang teruken pemere-pemere Dibata sipelain-lain e. Tapi guna ncidahkan makna ras fungsi masing-masing pemere-pemere Dibata sipelain-lain e.  Alu enda ngataken, amin gia lit perbedaan-perbedaan ibas kegeluhen perpulungen, tapi arus nggeluh ibas persadan. Sebab perbedaan-perbedaan e ibereken Tuhan guna ngelai ibas perpulungen, janah ngelai arus meteruk ukur. Ibas analogi enda ate Paulus ngataken maka persadan perpulungen ibas Kristus. Amin gia erbage-bage pemere-pemere Dibata, tapi arus nggeluh ibas persadan. Anggota perpulungen arus saling ngelai. Tep-tep anggota perpulungen arus tutus ngelai sue ras pemere-pemere Dibata si lit bas ia. Kerina pemere-pemere Dibata sipelain-lain e berfungsi guna mbangun persadan perpulungen (kula ni kristus).

5.      Pemere-pemere Dibata sipelain-lain e si lit man perpulungen labo imaksudken guna kepentingan ras keuntungan pribadi, tapi ibas rangka ngelai i tengah-tengah perpulungen ras ibas rangka kiniulin perpulungen, emaka pelayanan e arus idahiken ras-ras. Alu kata sideban ring-ring ibas kula e la lit situalen tapi kerina lit fungsina masing-masing emaka sisampat-sampaten ring-ring e.

APLIKASI

            Merupaken sada keriahen ras patut sikataken bujur man Tuhan, sebab ibas lias ras perkuah ateNa kita nggeluh ibas keselamatan. Bagepe nggo idilona kita gelah nggeluh ibas persadan gereja. Gelah keselamatan singgo iberekenNa man banta tetap terjaga ras tetap jadi sikerajangenta. Siimaksudken gelah tetap  keselamatan siiberekenNa man banta, sebab ibas kita nggeluh ibas persadan/perpulungen sisampat-sapaten kita ibas pelayanan. Alu bage, jelas man banta nggeluh ibas persadan la lit anggota perpulungen si banci kem ibas pelayanan. Kerina anggota perpulungen arus ngelai.

            Ibas rangka ngelai i perpulungen e, Tuhan nggo mereken man banta pemere-pemere si pelain-lain (karisma), gelah gereja Tuhan reh dewasana. Pemere-pemere Tuhan si pelain-lain e seri fungsina ras la lit ganjang teruken. Sebab kerina guna ngelai Tuhan. Emaka ibas kita ngelai Tuhan, tentuna ipasu-pasu Tuhan kita. Alu kata sideban pasu-pasu Tuhan ibas kita ngelai, labo itentuken alu mbelin kitikna pemere-pemere Tuhan si pelain-lain e.

            Adi megermet kita, ibas kita nggeluh ibas persadan gereja, lit sada biak sibanci ncedai ikaten persadan, eme kiniganjangen ukur. Merasa diri hebat ras penting.  Erkiteken sie me kita isingetken nggeluh ibas persadan arus nggeluh ibas kiniteruken ukur ras ngenen kalak sideban penting. Bagepe  adi la lit kalak sideban kita la banci ngelai, sebab kegeluhenta tempa-tempa lit ketergantungan man bana.

            Perlu siteh amin gia lain-lain kita, tapi kita sada kula. Janah la ngena ate Tuhan kerna meganjang ukur nggeluh ibas kulaNa. Singena ate Tuhan eme nggeluh ibas kiniteruken ukur ras ndalanken kai singena ateNa. Alu bage kita banci nggeluh ras Tuhan Yesus i Surga pagi.

            Erkite-kiteken ngelai eme karakter Jesus Kristus. Janah niNa : Aku reh labo guna ielai tapi guna ngelai (bdk. Matius 20:28). Bagepe ngelai merupaken sada bentuk ersaksi kerna Yesus Kristus sebage Tuhan ras Juru selamat manusia. Emaka la perlu kita mela ibas ngelai. Kita arus ngelai asa gegeh ras kengasupenta lit. Kita arus muat bagin ibas dahin-dahin gereja, sebab gereja idilo ibas rangka keselamatan doni enda.

Pdt. Steven Kumenit, STh.M.Min.

Kupekena-Kena RumahNdu (Hagai 2:1-9)

PERPULUNGEN JABU-JABU (PJJ)

GEREJA GBKP

TANGGAL 27 AGUSTUS – 2 SEPTEMBER 2017

HAGAI 2 :1-9.

Tema : Kupekena-Kena RumahNdu.

LATAR BELAKANG

1.      Tupung kerajaan Babel nerang bangsa Juda, la saja kalak Juda itaban i Babel, tapi pe Rumah Pertoton ceda, janah barang-barang si lit ibas rumah pertoton pe ibuat janah ibaba ku Babel. Enda jadi ibas tahun 586 SM.

2.      Makna Rumah Pertoton man bangsa Juda penting kal. Sebab la saja ingan ersembah man Tuhan, tapi pe Rumah Pertoton ingan Dibata. Rumah Dibata. Erkite-kiteken Rumah Pertoton eme Rumah Tuhan, maka Tuhan hadir man bangsa Juda. Bagepe merupaken simbol, bangsa Juda merupaken bangsa Dibata.

3.      Erkite-kiteken penting Rumah Pertoton man bangsa Juda, emaka kenca bangsa Juda mulih ibas pembuangen i Babel nari ibangunna mulihi Rumah Pertoton e. Tapi erkite-kiteken lit masalah ibas nari eme tempa-tempa lanai lit persadan erkite-kiteken masalah kepemilikan tanah ras lebih fokus mbangu rumah sendiri, emaka terabaikan mbangun Rumah Pertoton. Bagepe lit masalah i luar nari, eme subuk kalak Persia, bagepe kalak Samaria la ngena atena bangsa Juda mbangun mulihi Rumah Pertoton, emaka atena nggagalkenca. Ibas situasi sibage kalak Juda “frustrasi” emaka lanai lit semangatna nerusken pembangunan Rumah Pertoton.

4.      Ibas  rangka mereken semangat mbangun Rumah Pertoton, reh kata Tuhan man nabi Hagai, gelah kataken man Serubabel simerupaken gubernur Juda, bagepe man imam si Mbelin, bagepe man bangsa Juda, gelah ingetna mulihi kerna kinijilen Rumah Pertoton ope denga Rumah Pertoton e ceda. Kata Tuhan siikataken nabi Hagai eme a). Ula tumpat ukurndu. Teruskenlah ndahiken dahin mbangun Rumah Pertoton. b). Tuhan tetap nemani bangsa Juda ibas mbangun Rumah Pertoton, emaka ula mbiar. c). Ipereh Tuhan erta-erta ibas bangsa sideban nari guna ngisi ibas rumah Pertoton, sebab Tuhan siempuna emas ras pirak i doni enda. d). Rumah pertoton siibangun e jilen asangkan Rumah Pertoton ope ceda, siibangun raja Salomo. f). Ibas ingan enda ibereken Tuhan kesenangen ras kedamen man bangsa Juda.

5.      Bangsa Juda lanai perlu mbiar ibas mbangun Rumah Pertoton, sebab enda merupaken sada perintah ibas Tuhan nari. Emaka ise siatena ngelawan bangsa Juda guna ngagalken pembangunan Rumah Pertoton, jadi imbang Tuhan ia.

APLIKASI

            Mpekena-kena Rumah Pertoton merupaken dahinta ras. Dahin kerina anggota perpulungen. Sebab makna Rumah Pertoton/ gereja eme ingan kebaktin perpulungen secara komunal. Fungsi gedung gereja la saja ingan ersembah, tapi pe ingan ndatken pengajaren ibas Dibata nari, meningkatken kinitekenta ras nggeluh ibas persadan. Jadi gedung gereja merupaken central ibas kegeluhen erkiniteken man Tuhan.

            Erkite-kiteken penting gereja ibas kita selaku kalak sierkiniteken man Tuhan, maka penting ka bas kita guna mpekena-kena gedung gereja. Sebab adi gereja nggo ceda, bagepe i bas gedung gereja (alat-alat pendukung/ iventaris la mendukung ibas kita ersembah man Tuhan, tentuna la kita ndatken kedamen ras kesenangen ibas kita ersembah man Tuhan.

            Erkite-kiteken mpekena-kena Rumah Pertoton/ gereja merupaken tanggungjawabta, tentu merupaken sada kewajiban man banta guna sisampat-sampaten ibas mpekena-kena Rumah Pertoton. Emaka ibas tradisi gereja GBKP, amin gia runggun si deban simbangun ntah pe renovasi gedung gereja, kita terbeban guna ikut muat bagin ibas pengumpulan dana e. Tapi genduari pengumpulan dana secara sinodal lanai lit, nggo i ganti alu adangen Rp. 2000/ kepala keluarga/bulan. Pengumpulan dana secara klasis ras runggun tetap denga ilaksanakan. Pengalaman si lit, genduari ikatan persadan sisampat-sampaten nggo mulai urak (luntur). Enda teridah nterem kita lanai nggit muat bagin ibas pelaksanaan pengumpulan dana e. Tapi adi pengumpulan dana tingkat runggun, teridah ergiah-giah anggota perpulungen muat bagin.

            Perlu siteh ibas kita mpekena-kena rumah pertoton memang lit tantangan-tantangan, tapi adi lit persadan ras sada visinta kerna makna Rumah Pertoton/ Gereja, tentuna kerina tantangan ras masalah banci teratasi. Bagepe perlu siteh ibas kita mbangun Rumah Pertoton, marilah kita selaku anggota perpulungen terbaban muat bagin mbangun Rumah Pertoton/Gereja, ula siharapken kalak ndarat nari simbangun inganta ersembah man Tuhan. Gelah sikelengi Rumah Pertoton/ Gereja sibangun kita e. Alu kata kita si deban, adi kita simuat bagin tentuna lit ras memiliki kerna Rumah Pertoton/ Gereja.

            Jadi bahan pertimbangen man banta. Adi mejile denga rumah pertoton ras layak denga ipake, ula lebe irenovasi, siterkesan tempa-tempa ikut-ikuten ras kalak sideban. Amin gia mbangun Rumah Pertoton keharusan, adi memang nggo perlu ipekena.  Tapi marilah kita ngukuri uga gelah gereja e banci sipergunaken alu maksimal, gelah kita sireh ersembah man Tuhan nggecapken kesenangen ras kedamen sebab kita banci jumpa ras Tuhan (bdk. Kel. 25:8-9; Jesaya 2: 3-4). Emaka marilah siisi alat-alat/ I ventaris pendukung kebaktin. Jadi jumpa ras Tuhan labo itentuken arah gedung gereja simejile, tapi arah pusuh ersembah simehuli.

Pdt. Steven Kumenit, STh.M.Min.