Jadilah Usihen Bagi Kristus (Roma 15:1-8)

KHOTBAH MINGGU, 6 AGUSTUS 2017.

GEREJA GBKP

Invocatio    :    Geluhku jadi usihen man nterem kalak, sabab Kam kap pengawalku si megegeh (Mazmur 71:7).

Ogen          :    2 Kronika 15:9-15 (Tunggal).

Khotbah     :    Roma 15:1-8 (Responsoria).

Tema          :    Jadilah Usihen Bagi Kristus.

LATAR BELAKANG

1.      Amin gia la bo Paulus simajekken perpulungen Roma, tapi situasi ras perkembangen perpulungen Roma iteh Paulus, sebab tupung sie perpulungen Roma lit ibas bahaya perpecahan erkite-kiteken latar belakang kegeluhen terbaba denga amin gia nggo jadi kristen. Perlu lebe siteh, anggota perpulungen Roma eme kalak Yahudi ras la kalak Yahudi. Kalak kristen asal Yahudi lit denga pangan sipantangenna, tapi kalak kristen siasalna la kalak Jahudi nari, la lit pangan si ipantangkenna. Kepeken keadaan enda mpengaruhi kegeluhen ibas persadan perpulungen.

2.      Ngangkai kiniteken kalak kristen eme kalak sierkiniteken man Tuhan Yesus, keselamatanna la bo itentuken arah mantangken piga-piga pangan. Tapi tek ras ndalanken kataNa. Nina Yesus : labo sibengket arah babah erbahanca kalak keliamen, tapi sindarat arah babahna nari nge erbahanca ia keliamen (Matius 15:11). Enda ngatakenca la lit erkiteken pangan si erbahanca kalak kristen la bengket ibas kinirajan surga. Alu bage kerina pangan banci sipan.

3.      Ibas kinatana i tengah-tengah perpulungen Roma lit anggota perpulungen simantangken piga-piga pangan. Janah anggota perpulungen enda ikataken perpulungen kelas dua. Situhuna ipantangkenna piga-piga pangan, labo erkite-kiteken pengamalan kiniteken, tapi erkite-kiteken kurang denga pengangkanna kerna erkiniteken man Tuhan, sidungna anggota perpulungen enda ikataken kalak simerampek kiniteken ras ibas perpulungen anggota enda eme anggota kelas dua.

4.      Erkite-kiteken pengangkan kiniteken siberbeda simpengaruhi kegeluhen ergereja, dungna terjadi me dua golongan kiniteken, eme simegegeh kinitekenna (la lit pangan sipantangkenna ras kalak simerampek kinitekenna (lit piga-piga pangan siipantangkenna).

5.      Ibas rangka njaga persadan perpulungen gelah la ceda, maka Paulus mereken sada kata persinget man kalak sierpengakap ia merupaken golongan simegegeh kinitekenna. Lit piga-piga hal siikataken Paulus eme : Sipemena : Kalak simegegeh kinitekenna arus nampati kalak simerampek kinitekenna. Ertina kalak simegegeh kinitekenna arus ngergai kai siilakoken kalak simerampek kinitekenna. Kalak simegegeh kinitekenna la banci “menghina” man kalak simerampek kinitekenna. Kalak simegegeh kinitekenna ula dirina saja siipikirkenna, ula egois. Tapi usihlah Yesus. Yesus la diriNa saja siukuriNa, tapi iukuriNa keselamatan jelma sinterem. Emaka kalak simegegeh kinitekenna arus ngukuri kerna temanna manusia si merampek denga kinitekenna. Arus ngelakoken simehuli gelah kalak simerampek kinitekenna erteguhna kinitekenna, janah ipujina Dibata. Sipeduaken : Kalak simegegeh kinitekenna arus ngaloken kalak simerampek kinitekenna ibas persadan. Alu bage ibas perpulungen la lit golongan perpulungen kelas dua ras kelas sada, tapi kerina anggota perpulungen sierkiniteken man Yesus Kristus. Bagi kristus nggo ngaloken kalak simegegeh kiniteken nggeluh ibas persadan ras Ia, maka nggo sepatutna kalak simegegeh kinitekenna ngaloken kalak si la megegeh kinitekenna ibas persadan perpulungen, gelah nggeluh ibas keselamatan. Bagi Kristus erdahin man kalak Jahudi lako ncidahken Dibata setia nandangi janji-janjiNa eme keselamatan man bangsa Jahudi.

APLIKASI

            Meriah ukurta sebab gereja GBKP nggo njayo 76 tahun. Tentuna selaku gereja singgo njayo melala singgo ibahan gereja GBKP nandangi perpulungen ras jelma sinterem. Adi nggo njayo berarti kita nggo dewasa ibas bergereja ras melayani.

            Ibas minggu enda kita isingetken gereja singgo njayo, lit min kegeluhen sidewasa ibas kegeluhen persadan. Nggeluh harmonis. Ula nggeluh ibas perpecahan. Emaka gelah nggeluh ibas persadan maka Yesus Kristus jadi usihen. Kristus selaku Takal perpulungen alu meriah ukur ngaloken kita selaku anggota gereja alu la mbeda-mbedaken status sosial. Jadi ibas palas keleng ate, Kristus ngaloken kita jadi perpulungenna. Emaka kita selaku gereja, arus min saling menerima sada ras sidebanna. Tuhu persadanta iuji arah perkembangan doni enda. Emaka siidah lit anggota perpulungen nggo mulai nggeluh erbana-bana ntah pe sisada-sisada, bage pe lit konflik bas gereja, sierbahanca ncedai persadan perpulungen, bagepe banci erbahanca persadanta pecah. Ngusih Yesus, berarti ngusih pelayanan ras karakter Yesus. Yesus ngasup ngaloken kita ibas erbage-bage keadaan geluhta. Ibas kinilatunggungta i lebe-lebe Yesus, tapi ibas rangka keselamatan, nggit Ia ngaloken kita.

            Ibas kegeluhen siharmonis ras mbiar man Tuhan, maka sigejapken lit tanggungjawabta selaku gereja eme nehken persembahen man Tuhan. Kita kerina nggejapken, erkite-kiteken uhan simasu-masu kita maka la sitading-tading kita nehken persembahen. La lit bas ukurta mbiar ibas kita nehken persembahen, ras la lit bas ukurta mela kita nehken persembahen erkite-kiteken sitik ngenca. Erkite-kiteken mbiar ras erkemalangan man Tuhan, maka asa ngasup ras gegehta sibereken persembahen man Tuhan, sebab siteh Tuhan pasti nampati kita ras masu-masu Kita. Bagepe siteh persembahenta guna kemulian Tuhan arah pelayanan-pelayanan gereja.

Pdt. Steven Kumenit, STh.M.Min.