Kuasa Dibata Si Mbebasken (Mazmur 44:1-9)

KHOTBAH MINGGU, 13 AGUSTUS 2017.

GEREJA GBKP

Invocatio    : Sabap i bas sada wari pagi ibebasken Dibata me kerina si enggo ijadikenNa e i bas perbudaken si erbahanca ia kernep, gelah ia merdeka janah ngenanami kebebasen dingen kemulian ras kerina anak-anak Dibata (Roma 8:21).

Ogen          :    Hakim-Hakim 7:1-15 (Tunggal).

Khotbah     :    Masmur 44:1-9 (Antiponal).

Tema          :    Kuasa Dibata Si Mbebasken.

LATAR BELAKANG

1.      Ende-enden simerupaken pertoton ncidahken kerna kuasa Tuhan simbelin simbebasken ras naruhken bangsa Israel ku taneh Kanaan. Pemazmur  ibas pertoton ngataken la lit peranen bangsa Israel ibas memasuki taneh Kanaan, kerina e pelin-pelin kuasa ras keleng ate Tuhan.

2.      Pemazmur la ikut tupung Dibata mbebasken bangsa Israel i taneh perbudaken, bangsa Mesir nari ras naruhken bangsa Israel ku taneh Kanaan. Bagepe peristiwa-peristiwa sideban si mbebaskan Tuhan man bangsa Israel, i ja Tuhan naluken bangsa-bangsa sideban gelah bangsa Israel selamat seh ku taneh Kanaan. Tapi erkite-kiteken peristiwa pembebasan ras keselamatan bangsa Israel lalap ituriken, mulai angkaten sipemena singenanami peristiwa pembebasan ras penaruhken Tuhan ku taneh Kanaan ituriken man anak-anakna seh ku angkaten pemazmur, emaka iteh pemazmur kerna kuasa pembebasan Tuhan e.

3.      Panah si ngelambangkan alat perang, la e jadi jaminan ntah penentu kemenangan bangsa Israel nandangi bangsa-bangsa sideban (bangsa Mesir ras Pilistin), tapi kemanangan bangsa Israel itentuken kuasa Tuhan. Adi itentukan gegeh panah, bangsa Israel la ngasup nandingi alat perang ras tentera bangsa-bangsa si deban. Erkiteken sie me bangsa Israel la ernamlem man panah e, tapi man kuasa Tuhan. Alu kata sideban Tuhan selaku Raja, Tuhan ikut erperang. Gegeh kemenangan e labo ibas senjata perang eme pedang ras panah, tapi pelin-pelin erkite-kiteken Tuhan.

4.      Ibas penggejapen bangsa Israel, kerina siinanamina, benai pembebasan i taneh Mesir nari, pengkawali Tuhan man bangsa Israel ibas perdalanen ku taneh Kanaan, ras bengket ku taneh Kanaan seh genduari (angkatan pemazmur), erkite-kiteken Tuhan. Emaka tanda keriahen ras ketutusen bangsa Israel ernalem man Tuhan, gedang-gedang wari ipuji bangsa Israel Tuhan, ras asa lalap bangsa Israel ngataken bujur man Tuhan.

5.      Ende-enden pertoton enda isehken man Tuhan gelah Tuhan nelamatkan bangsa Israel ibas kiniseran nari, khususna ibas penindasan bangsa si deban nari. Sebab tupung sie bangsa Juda lit ibas krisis : kalak Juda talu ibas perang, itaban, janah idayakan ras ibuang ku bangsa-bangsa sideban. Kejadin enda labo erkite-kiteken dosa ntah pe kinilapatuhen Israel. Tapi ate Tuhan ibas kesetiaan bangsa Juda, Tuhan ersura-sura gelah bangsa Juda tetap ngidah kemulian Tuhan simereken kemenangan.

APLIKASI

            Minggu enda merupaken peringeten kerna HUT RI pe 72 tahun ken. Emaka kita ipersingeti, Dibata berkarya sepanjang sejarah guna mbebasken sitertindas, si iperbudak. Tuhan tuhu-tuhu berpihak nandangi kalak sitertindas. Tuhan mengangkat sitertindas ras sitertaban.

            Kemerdekaan siinanami bangsa Israel arus sipahami erkite-kiteken Tuhan, labo erkite-kiteken gegeh ras kengasupen manusia, amin gia lit keterlibatan manusia i je. Jadi kemerdekaan kita eme erkite-kiteken perkuah ate Tuhan. Sebab adi sinen kerna alat perang (bambu runcing, pedang, ndalanken grilia) ras kejadin si nggo inanami Indonesia (iperbudak: kerja rodi ras romusa), la kap mungkin secara manusia kita banci merdeka.  Alu bage gelah ula kita meganjang ukur. Emaka ibas pancasila ikataken Ketuhanen yang maha esa. Lit pengakun kerna kuasa Tuhan. Tapi siidah melala terjadi persoalan-persoalan ntah pe krisis. Tuhu terjadi persoalan, khususna kerna SARA. Padahal nai ibas merebut kemerdekaan kerina rakyat indonesia la memikirken kerna SARA, tapi uga gelah kita banci merdeka. Tapi ngkai maka genduari kita memikirken kerna SARA, bagepe terjadi krisis-krisis sideban.

            Memahami kuasa Tuhan simbebasken, tentuna ngataken selaku kalak sierkiniteken man Tuhan  arus mbiar man Tuhan singgeluh singgo memerdekan Indonesia enda. Alu bage ibas kita ngisi kemerdekaan enda, kita muji Tuhan ras ngataken bujur man baNa alu ndalanken simehuli singena ate Tuhan. Kita arus ndalanken kebujuren ras keadilan, ula lit bas kita simpraktekken KKN, penindasan ras pasif ibas ngisi kemerdekaan enda. Jadi Dibata tetap melibatkan kita guna ngisi kemerdekaan kita, gelah tuhu-tuhu kita la saja terjeng merdeka secara politik, tapi merdeka ibas kerinana. Alu bage kita nggeluh ibas mejuah-juah.

              

Pdt. Steven Kumenit, STh.M.Min.