Gereja Si Maba Kejuah-Juahen Nandangi Perpulungen (Lukas 4:16-19)

PERPULUNGEN JABU-JABU (PJJ)

GEREJA GBKP

TANGGAL 6 – 12 AGUSTUS 2017.

Lukas 4:16-19.

Tema : Gereja Si Maba Kejuah-Juahen Nandangi Perpulungen.

LATAR BELAKANG

1.      Kuta Nasaret ingan Jesus ipebelin. Janah selaku kalak Jahudi situtus, reh Jesus ibas wari sabat guna ersembah man Tuhan. Ibas kebaktin wari sabat ibereken kalak man Jesus kitab nabi Jesaya, kenca ipepayoNa, idahNa me ayat-ayat si ateNa iogekenNa, jenari iogena. Kitab Jesaya siioge Jesus eme Jesaya 61:1,2.

2.      Ibas Jesaya 61:1,2 enda ngerana kerna Dibata nuruh suruh-suruhenNa singgo  ngaloken Kesah Tuhan ras nggo itangkuhken jadi Kristus guna mberitaken Berita Si Meriah. Palas Berita si Meriah eme nggo reh masa Mesias. Ibas masa Mesias, ate Tuhan njadiken doni enda ndatken keselamatan. Ndatken pasu-pasu ras nggeluh ibas kemalemen ate, subuk jasmani bagepe pertendin, subuk lahiriah, bagepe batiniah (bdk. Syalom). Alu bage ibas masa Mesias, kerina nggeluh ibas keselamatan ras kemalemen ate, sebab Mesias si reh e mperdiateken kalak musil, sitertaban ras kalak pentang.

3.      Alu Jesus ngoge kitab Jesaya 61:1,2 enda situhuna, Jesus nggo ngerana kerna penggenapan nubuat Jesaya. Mesias siitimai bangsa Israel (Jahudi) nggo reh, janah genduari nggo ras kalak Jahudi. Emaka secara langsung, nggo itenahken Jesus kerina kalak Jahudi, situpung sie nggeluh tertaban, subuk secara pilitik (bdk. Itaban kerajaan Romawi), bagepe secara rohani (tertaban alu dosa). Ibas Jesus kalak Jahudi ndatken keselamatan ras kemalemen ate.

4.      Perlu siteh lit pengarapen simbelin man kalak Jahudi kerna Mesias. Mesias siitimai kalak Jahudi merupaken padan Dibata, janah banci mbebasken kalak Jahudi ibas penindasan ras mulahi bangsa Jahudi ibas tabanan nari, janah ngasup mpepalem erbage-bage pinakit. Ibas palas enda me situhuna Jesus ngerana arah ngoge kitab Jesaya 61:1,2 masa Mesias nggo seh. Mesias siitimai kalak Jahudi, genduari nggo ras ia.

5.      Memang secara umum Berita Si Meriah siibaba Jesus merupaken mada kerina jelma. Tapi khusus Berita Si Meriah enda jadi keriahen man kalak musil, eme kalak biasa siitindas ras itaban sirusur ihina penguasa ras pemimpin agama iperdiateken ras ibela Tuhan. Masa keselamatan ntah pe tahun Jobel nggo seh i tengah-tengah doni enda. janah tahun Jobel enda ibaba Jesus Kristus.

APLIKASI

            Gereja la banci terjeng ngerana saja, tapi arus melayani se ku kegeluhen anggota perpulungen (bdk. Secara holistik). Gereja ngasup ndalanken enda kerina, erkite-kiteken gereja ikuasai Kesah Si Badia, janah gereja idilo guna mbebasken kalak sitertaban, tertindas ibas erbage-bage bentuk (ekonomi, pendidikan, persoalan keluarga, rsd) ras gereja mereken kejuah-juahen man jelma sinterem (perpulungen).

            Ibas erbage-bage persoalan ras perbeben kalak kristen, Tuhan Yesus me jawaban guna nampati kita. Alu bage ibas pengangkan simehuli kerna Yesus eme Tuhan ras erkuasa subuk i doni bage i surga,  nggit kita reh mindo penampat man baNa.

            Gereja GBKP arus sensitif ibas erbage-bage persoalan si lit i tengah-tengah perpulungen, alu bage gereja GBKP ngasup pro aktif melayani gelah anggota perpulungen si lit ibas perbeben ras persoalan banci ndatken serpang pulah.

            Gereja simereken kejuah-juahen, la saja gereja secara institusi/lembaga, tapi gereja secara pribadi eme kita kerina. Kita arus ngenen keadaan temanta simungkin mbutuh penampat, je min kita. Alu bage malem atena ibas kehadirenta erkiteken kita ngasup nampati ia. Memang secara praktis, gereja GBKP nggo ngelakoken diakonia (DUB ras diakonia tranformatif), pendidikan, CU, pelayanan nandangi sipenakit HIV/HIDS,  pekabaran injil, bank BPR, pelayanan pastoral konseling, erbahan peningkaten ekonomi jemaat, rsd. Tapi kai singgo ibahan kita selaku gereja secara person ?

             Siidah malala persoalan-persoalan siinanami anggota perpulungen sierbahanca anggota perpulungen stres, sakit, rsd. Ngenen enda maka gereja sidem Kesah Si Badia arus ngasup ngapuli ras mbebaskan anggota perpulungen ibas erbage-bage persoalen. Termasuk gereja arus ngasup mbebasken anggota perpulungen ibas kemiskinan.

            Gereja GBKP arus tetap memproklamirken, gereja GBKP tetap ikuasai Kesah Si Badia sikatawari pe ngasup mbebasken kalak sitertaban, tertindas ras mereken kemalemen ate man anggota perpulungen. Alu bage meriah ukurna reh ku gereja ras ku perpulungen jabu-jabu ras PA bagepe kegiaten-kegiaten gereja sideban.

Pdt. Steven Kumenit, STh.M.Min.