Kempak Yesus kita Natap (Ibrani 12:1-11)

PERPULUNGEN JABU - JABU

GEREJA GBKP

TANGGAL 14 - 20 APRIL 019

=========================================================

HEBER 12 : 1 - 11

Tema : Kempak Yesus kita Natap

LATAR BELAKANG

1.  Perlu siteh surat Heber enda ilamatkan man kalak kristen sisangana dat perbeben ras kiniseran simesangat kal. Perbeben simesangat eme penghinaan ras hambatan-hambatan. Erkiteken sie me kalak kristen Jahudi nggo mulai putus asa, lanai nggit pulung guna ertoto ras muji Tuhan, semangat erkiniteken ras erpengarapen man Yesus Kristus nggo nusur. Bagepe nggo mulai pe kalak kristen Yahudi rukur mulihi gelah mulihken ku agama Yahudi ndube. Sebab jadi agama Yahudi la lit penindasan, penghambatan ras penghinaan. Ibas palas enda me penulis Heber mereken pergegeh  man kalak kristen gelah natap kempak Yesus. Ibas kalak Kristen natap kempak Yesus, maka sidat me gegeh ras pengarapan. Alu bage kalak kristen tetap megegeh nggeluh ibas doni enda, bagepe nggeluh ras Yesus ibas kinirajan Surga. Dat bagin ibas kebadiaan Yesus, alu bage nggeluh ibas kemalemen ate.

2. Iajuk penulis Heber gelah natap kempak Yesus. Sebab belin kal  kiniseran siinanami Yesus arah kalak perdosa. Puncak kiniseran Yesus eme i kayu persilang. Kayu persilang la saja ingan penghukuman kalak jahat, tapi pe kalak siihukum ibas kayu persilang mela siakap, sebab kayu persilang penghukuman nandangi kalak jahat si la terampuni kejahatanna, e pe igengken Yesus sebab lit keriahen sinemai Ia.

3. Ketutusen ras patuh ndalanken kai sipedahken Dibata ndatken keriahen ras kemalemen ate. Enda me siilakoken Yesus, emaka amin gia Ia ngenanami kiniseran seh mate i kayu persilang tetap Yesus nggeluh ibas kapatuhen man Dibata saja. Erkkiteken si e Yesus kundul ibas kemuhen kursi kinirajan Surga. Emaka Natap kempak Yesus la saja kalak kristen isuruh ngenen kiniseran ras kinigenggengen Yesus ngalakan kiniseran e, tapi kalak kristen banci meteh Yesus e Imam si mbelin. Yesus e me sinelamatken kita sierkiniteken man baNa.

4.  Kegeluhen kalak kristen igambarkan ibas 2 hal eme 1). Kalak kristen sangana ibas perdalanan. 2). Kalak kristen sangana ibas perlumban. Makna  2 gambaran enda seri nge. Kalak kristen sangana erdalan ras sangana ngikuti perlumban, janah melala saksina. Emaka selaku kalak kristen ula kita talu ibas perlumbaan ntah pe la seh ibas tujun perdalanenta eme kinirajan Surga. 

5. Harus siakap kiniseran e tempa-tempa sada didikan ibas Bapa nari. Bagepe siidah ibas ngenanami kiniseran la seh ku mambur dareh. Perlu siteh kalak kristen eme anak si sah, erkiteken sie me Dibata ngajari kalak kristen gelah jadi patuh man Bapa ras guna kiniulin kalak kristen sebage anak si sah. Alu bage kalak kristen tetap nggeluh erkiniteken man Yesus Kristus ras tetap semangat pulung muji Dibata ras ertoto man Dibata.

APLIKASI

            Tuhu kita selaku kalak kristen nggo iselamatkan ras ibebasken Yesus Kristus arah kayu persilang. Erkiteken kita nggo iselamatkan maka kita jadi anak si sah. Kita jadi anakNa. Tapi labo berarti kita nggeluh aman saja, la lit perbeben. Perbeben tetap lit nge. Sebab adi siidah amin gia iblis nggo italuken Yesus Kristus, tapi tetap dengan iblis bagi singa darami ise siman gerlemenna. Bagepe ipake iblis doni enda guna ngkuasai kita. Bagepe kiniseran ipake iblis guna ngelawan Yesus Kristus.

            Perbeben ras kiniseran lit isekelewetta, janah banci saja ngkenai kita. Perbeben ras kiniseran e ula sinen arah kacamata negatif. Sebab adi sinen arah kacama negatif, lit piga-piga hal sibanci kenai kita eme 1). Berat siakap mersan kiniseran e, alu bage jungut-jungut kita, seh pe kita mpersalahkan Dibata. 2). Kita jadi kalak perdosa, sebab sidarami konpensasi-konpensasi ntah pe dalan keluar arah doni enda. 3). kita banci jadi kalak murtat pe. Lanai kita jadi kalak kristen. Tapi adi sinen arah kacamata positif, maka kiniseran e merupakan pengajaren man banta. Alu bagepe megenggeng kita ibas ngenanami perbeben ras kiniseran. Bagepe gelah megegeh kita ngenanami perbeben ras kiniseran mari sitatap kempak Yesus. Yesus Kristus, amin gia belin kal perbeben ras kiniseran, seh mate pe i kayu persilang, tapi erkiteken megeggeng maka imuliaken BapaNa Ia ibas Surga. Kita pe bage ka, Adi sitatap kempak Yesus Kristus. Kita la saja megegeh mersan perbeben ras kiniseran, tapi pe banci kita erlebuh man Yesus mindo penampat. Emaka sampatiNa kita ibas erbage-bage perbeben nras kiniseranta.

Pdt. Steven Kumenit, S.Th.M.Min