Tema :Anak Biri-Biri Ni Dibata Simaba Kedamen Subuk i Doni Bagepe i Surga (Wahyu 5:1-14).

KHOTBAH MINGGU GBKP
TANGGAL 27 NOPEMBER 2011.
=========================
Introitus : Arah ukurna jine itadingkenNa kerina si lit i bas Ia. Jadi seri Ia ras manusia; nggeluh bagi sekalak juak-juak. Janah teridah bagi sekalak jelma (Pilipi 2:7).
Ogen : Sakaria 9:9-14.
Khotbah : Ketangkasen 5:1-14.
Tema : Anak Biri-Biri Ni Dibata Simaba Kedamen Subuk i Doni Bagepe i Surga.

LATAR BELAKANG
1. Kitab Ketangkasen enda, merupaken sada kitab sinuriken kerna pengenehenen Yohanes i Pulao Patmos.
2. Ibas rangka memahami kerna maksud khotbahnta enda, kita harus memahami lebe kerna situasi doni enda. Kai siterjadi ras siilakoken doni enda tuhu-tuhu enggo jahat, janah enda enggo isuratken ras imeteraikenTuhan. Emaka ibas sada paksa ihukum Tuhan me doni enda, janah la lit sada manusia pe ibas doni enda singasup mbukakensa, gelah manusia ras doni enda terhindar ibas hukumen Tuhan. Bagepe padan Tuhan kerna pasu-pasuNa, lanai banci seh ku doni enda erkiteken penghukumen Tuhan. Enda me sierbahanca ceda ukur Yohanes. (ayat 1-4).
3. Ibas suasana ceda ate, ngerana sekalak pertua ngapuli Yohanes, gelah ula Yohanes tangis sebab singa ibas suku Juda nari metunggung mbukasa. Perlu lebe siteh, enda merupaken sada gambaren singataken Yehuda bali ras singa ras kerajaan Israel tetap ipinpin ibas kalak Yehuda nari. (band. Kejadin 49:9-10). Alu bage ijenda ikataken kerna kerehen sekalak Raja ibas kesusuren Daud nari. Janah adi siertiken terbagesen eme Mesias (Yesus Kristus). Singa ibas suku Yehuda nari enggo menang.
4. Yohanes ngenen maka Yesus ilambangken ras anak biri-biri. Janah tuhu anak biri-biri enggo isalibkan, tapi situhuna la Ia mate. Yesus nggeluh janah tedis i tengah-tengah kursi kinirajaan. Kematen i kayu salib erbahanca Yesus naluken kuasa dosa. Yesus menang. Janah kemenangen Yesus erbahanca manusia ras doni enda lanai ihukum Dibata. Kemenangen Yesus merupaken keselamaten man kerina bangsa. kemenagen Yesus erbahan pertua-pertua si duapuluh empat e erjimpuh nembah man Yesus. Bagepe teridah erkiteken kemenangen Yesus, ras kinitunggungen Yesus guna mbuka gulungen kitab ras pitu materai ndai erbahanca turah ende-enden pujin. La saja pertua-pertua si rende, tapi pe malekat ras kerina makhluk subuk i langit, i doni, i teruh doni ras si lit ibas lawit.
5. Ibas pemahaman enda maka kita harus memahami : 1). Kitab enda merupaken kitab Apokaliptik, eme mbuka sada rahasia. 2). Kitab enda isuratken paksa kalak sierkiniteken lit ibas paksa kiniseran erkiteken penganiayaan si lit, bagepe erkiteken raja Domintianus menuntut gelah kerina wargana harus ndilo ia selaku Tuhan ras Dibata. Erkiteken sie me maka kalak kristen harus iapuli ras harus ipebetehken kerna kai siterjadi ibas paksa sireh. Alu bage kalak sitek tetap nggeluh ibas erkiniteken man Tuhan Yesus selaku Tuhan.

APLIKASI
Minggu enda kita enggo bengket ku minggu-minggu Adven (minggu ngalo-ngalo kerehen Yesus Kristus). Ibas minggu Adven sipemena enda kita isingetken uga Mesias siitimai kalak Yahudi enggo reh ku doni enda. Janah kerehenna mbaba keselamaten man banta. KematenNa masapken kerina dosanta, janah kekekenNa mereken kegeluhen simbaru man banta. Erkiteken kemenangenNa e kegeluhenta ipekena-kenaNa mulihi, tempas Dibata (Imago Dei) si enggo ceda man banta ibereken mulihi. Janah Imago Dei enda me siharus tetap nggeluh bas kita. Emaka ula nari kita terkontaminasi ibas erbage-bage kegeluhen si la payo ras la mehuli menurut pengakap Dibata, gelah katawari paksa pe kita metunggung i lebe-lebe Dibata. Alu bage ibas kerehen Yesus peduakaliken, kita tuhu-tuhu nggeluh ras Yesus.
Kegeluhen selaku anak sienggo iselamatken, harus min ipraktekken ntah pe harus icidahken i tengah-tengah kegeluhenta tep-tep wari. Kita harus nggeluh bagi singena ate Tuhan. Adi Yesus Kristus reh ku doni enda mbaba kedamen i tengah-tengah doni enda, maka kita selaku anak-anakNa pe harus ka bage.Maka sipaling penting bas kita eme kita harus nggeluh ersada ras Yesus. Sebab ibas kita nggeluh ersada ras Yesus Kristus maka perukurenta jadi bali ras Ia. Ibas perukurenta sibali ras Kristus maka si lit bas kita eme nggeluh ibas kiniteruken ukur, ras ngkelengi kedamen. La kita balas kejahatan alu kejahatan, tapi tuhu-tuhu ngangkai nggeluh ibas kiniersadan eme hal siutama i tengah-tengah kegeluhenta.
Kedamen i doni enda merupaken sura-suranta kerina. Sebab ibas kedamen nge kita banci beraktivitas alu teneng ras la kita mbiar. Tapi siidah genduari, kita nggeluh ibas kebiaren, subuk ibas beragama bagepe ibas aktivitasta tep-tep wari. Persoalen enda tentuna ngatakencamnaka lenga lit kedamen ibas doni enda.
Sekali enda ibas khotbahnta, ngerana kerna dame i doni ras i surga. Memang adi kita ngerana kern surga banci saja kita muat kesimpulen maka surga eme ingan kedamen. Kalak singgeluh i surga tentuna nggeluh ibas kedamen, sebab i surga Yesus si jadi raja. Tapi uga kerna dame i doni. Enda me sijadi harapenta, ras sijadi tugasta. Kita harus njadiken doni enda tuhu-tuhu dame. Tuhu tugas enda mberat, tapi teklah maka ibas gegeh kuasa Dibata, kerina enda banci sidalanken. Alu bage pembunuhen, peperangen, nangko, penindasan, KKN, rsd banci masap ibas doni enda. Emaka marilah sibenai ibas dirinta sendiri. Guna seh ku je sipaling utama bas kita eme kita harus nggit ikuasai Kesah Si Badia ras patuh man kepemimpinen Yesus Kristus. Sepanjang la kita patuh man kepemimpinen Yesus Kristus ras la kita ikuasai Kesah Si Badia sepanjang e me kita nggeluh ibas kai si la ngena ate Tuhan. Jadi ula min kita jadi raja nandangi dirinta, sebab kita enda tinepa Dibata. Bagepe adi lit perbeben ras kiniseran siendeskenlah man Tuhan saja, gelah la sisubuki sijahat alu sijahat, tapi subukilah alu keleng ate. Bagepe kita tetap ertoto man Tuhan gelah peraten Tuhan ngkuasai doni enda. Alu bage nggeluh me kedamen ibas doni enda.

Pdt. Steven Kumenit, STh,M.Min.

Anak Biri-Biri Ni Dibata Simaba Kedamen Subuk i Doni Bagepe i Surga (Ketangkasen 5:1-14).

KHOTBAH MINGGU GBKP
TANGGAL 27 NOPEMBER 2011.
==========================
Introitus : Arah ukurna jine itadingkenNa kerina si lit i bas Ia. Jadi seri Ia ras manusia; nggeluh bagi sekalak juak-juak. Janah teridah bagi sekalak jelma (Pilipi 2:7).
Ogen : Sakaria 9:9-14.
Khotbah : Ketangkasen 5:1-14.
Tema : Anak Biri-Biri Ni Dibata Simaba Kedamen Subuk i Doni Bagepe i Surga.

LATAR BELAKANG
1. Kitab Ketangkasen enda, merupaken sada kitab sinuriken kerna pengenehenen Yohanes i Pulao Patmos.
2. Ibas rangka memahami kerna maksud khotbahnta enda, kita harus memahami lebe kerna situasi doni enda. Kai siterjadi ras siilakoken doni enda tuhu-tuhu enggo jahat, janah enda enggo isuratken ras imeteraikenTuhan. Emaka ibas sada paksa ihukum Tuhan me doni enda, janah la lit sada manusia pe ibas doni enda singasup mbukakensa, gelah manusia ras doni enda terhindar ibas hukumen Tuhan. Bagepe padan Tuhan kerna pasu-pasuNa, lanai banci seh ku doni enda erkiteken penghukumen Tuhan. Enda me sierbahanca ceda ukur Yohanes. (ayat 1-4).
3. Ibas suasana ceda ate, ngerana sekalak pertua ngapuli Yohanes, gelah ula Yohanes tangis sebab singa ibas suku Juda nari metunggung mbukasa. Perlu lebe siteh, enda merupaken sada gambaren singataken Yehuda bali ras singa ras kerajaan Israel tetap ipinpin ibas kalak Yehuda nari. (band. Kejadin 49:9-10). Alu bage ijenda ikataken kerna kerehen sekalak Raja ibas kesusuren Daud nari. Janah adi siertiken terbagesen eme Mesias (Yesus Kristus). Singa ibas suku Yehuda nari enggo menang.
4. Yohanes ngenen maka Yesus ilambangken ras anak biri-biri. Janah tuhu anak biri-biri enggo isalibkan, tapi situhuna la Ia mate. Yesus nggeluh janah tedis i tengah-tengah kursi kinirajaan. Kematen i kayu salib erbahanca Yesus naluken kuasa dosa. Yesus menang. Janah kemenangen Yesus erbahanca manusia ras doni enda lanai ihukum Dibata. Kemenangen Yesus merupaken keselamaten man kerina bangsa. kemenagen Yesus erbahan pertua-pertua si duapuluh empat e erjimpuh nembah man Yesus. Bagepe teridah erkiteken kemenangen Yesus, ras kinitunggungen Yesus guna mbuka gulungen kitab ras pitu materai ndai erbahanca turah ende-enden pujin. La saja pertua-pertua si rende, tapi pe malekat ras kerina makhluk subuk i langit, i doni, i teruh doni ras si lit ibas lawit.
5. Ibas pemahaman enda maka kita harus memahami : 1). Kitab enda merupaken kitab Apokaliptik, eme mbuka sada rahasia. 2). Kitab enda isuratken paksa kalak sierkiniteken lit ibas paksa kiniseran erkiteken penganiayaan si lit, bagepe erkiteken raja Domintianus menuntut gelah kerina wargana harus ndilo ia selaku Tuhan ras Dibata. Erkiteken sie me maka kalak kristen harus iapuli ras harus ipebetehken kerna kai siterjadi ibas paksa sireh. Alu bage kalak sitek tetap nggeluh ibas erkiniteken man Tuhan Yesus selaku Tuhan.

APLIKASI
Minggu enda kita enggo bengket ku minggu-minggu Adven (minggu ngalo-ngalo kerehen Yesus Kristus). Ibas minggu Adven sipemena enda kita isingetken uga Mesias siitimai kalak Yahudi enggo reh ku doni enda. Janah kerehenna mbaba keselamaten man banta. KematenNa masapken kerina dosanta, janah kekekenNa mereken kegeluhen simbaru man banta. Erkiteken kemenangenNa e kegeluhenta ipekena-kenaNa mulihi, tempas Dibata (Imago Dei) si enggo ceda man banta ibereken mulihi. Janah Imago Dei enda me siharus tetap nggeluh bas kita. Emaka ula nari kita terkontaminasi ibas erbage-bage kegeluhen si la payo ras la mehuli menurut pengakap Dibata, gelah katawari paksa pe kita metunggung i lebe-lebe Dibata. Alu bage ibas kerehen Yesus peduakaliken, kita tuhu-tuhu nggeluh ras Yesus.
Kegeluhen selaku anak sienggo iselamatken, harus min ipraktekken ntah pe harus icidahken i tengah-tengah kegeluhenta tep-tep wari. Kita harus nggeluh bagi singena ate Tuhan. Adi Yesus Kristus reh ku doni enda mbaba kedamen i tengah-tengah doni enda, maka kita selaku anak-anakNa pe harus ka bage.Maka sipaling penting bas kita eme kita harus nggeluh ersada ras Yesus. Sebab ibas kita nggeluh ersada ras Yesus Kristus maka perukurenta jadi bali ras Ia. Ibas perukurenta sibali ras Kristus maka si lit bas kita eme nggeluh ibas kiniteruken ukur, ras ngkelengi kedamen. La kita balas kejahatan alu kejahatan, tapi tuhu-tuhu ngangkai nggeluh ibas kiniersadan eme hal siutama i tengah-tengah kegeluhenta.
Kedamen i doni enda merupaken sura-suranta kerina. Sebab ibas kedamen nge kita banci beraktivitas alu teneng ras la kita mbiar. Tapi siidah genduari, kita nggeluh ibas kebiaren, subuk ibas beragama bagepe ibas aktivitasta tep-tep wari. Persoalen enda tentuna ngatakencamnaka lenga lit kedamen ibas doni enda.
Sekali enda ibas khotbahnta, ngerana kerna dame i doni ras i surga. Memang adi kita ngerana kern surga banci saja kita muat kesimpulen maka surga eme ingan kedamen. Kalak singgeluh i surga tentuna nggeluh ibas kedamen, sebab i surga Yesus si jadi raja. Tapi uga kerna dame i doni. Enda me sijadi harapenta, ras sijadi tugasta. Kita harus njadiken doni enda tuhu-tuhu dame. Tuhu tugas enda mberat, tapi teklah maka ibas gegeh kuasa Dibata, kerina enda banci sidalanken. Alu bage pembunuhen, peperangen, nangko, penindasan, KKN, rsd banci masap ibas doni enda. Emaka marilah sibenai ibas dirinta sendiri. Guna seh ku je sipaling utama bas kita eme kita harus nggit ikuasai Kesah Si Badia ras patuh man kepemimpinen Yesus Kristus. Sepanjang la kita patuh man kepemimpinen Yesus Kristus ras la kita ikuasai Kesah Si Badia sepanjang e me kita nggeluh ibas kai si la ngena ate Tuhan. Jadi ula min kita jadi raja nandangi dirinta, sebab kita enda tinepa Dibata. Bagepe adi lit perbeben ras kiniseran siendeskenlah man Tuhan saja, gelah la sisubuki sijahat alu sijahat, tapi subukilah alu keleng ate. Bagepe kita tetap ertoto man Tuhan gelah peraten Tuhan ngkuasai doni enda. Alu bage nggeluh me kedamen ibas doni enda.

Pdt. Steven Kumenit, STh,M.Min.

Keleng AteNa Tetap Rasa Lalap (Roma 3:21-24)

BAHAN PJJ GEREJA GBKP
TANGGAL 27 NOPEMBER – 3 DESEMBER 2011.
=======================================
Roma 3:21-24.

Tema : Keleng AteNa Tetap Rasa Lalap.

LATAR BELAKANG
1. Adi siperdiateken ayat-ayat ope bahan oratenta, maka teridah i je, Paulus ncidahken kerna dosa manusia, janah enda erbahan manusia la nai erpengarapen, manusia enggo ndauh ibas keselamaten, sebab sirang ras Yesus Kristus. Tapi secara khusus, oratenta ngataken maka erkiteken kiniteken nge maka manusia mulihi rembak ras Tuhan. Jadi labo erkiteken ndalanken undang-undang. Alu kata sideban sesekalak jelma bengket ibas hubungen siintim ras Dibata erkite-kiteken kiniteken man Yesus Kristus, labo erkiteken ndalanken undang-undang. Alu bage penekanen Paulus eme kiniteken man Yesus Kristus me siutamana asangken ndalanken undang-undang.
2. Adi siperdiateken kerna teologi Paulus, maka salah sada eme manusia ibenarken arah kiniteken. Maksud Paulus eme kiniteken merupaken tanggapan manusia nandangi karya keselamaten Dibata ibas Kristus. Erkiteken sie kiniteken mpersadaken manusia ras Yesus Kristus, nggeluh ibas persadan ras Yesus Kristus. Jadi erkiteken Yesus Kristus nge, manusia nggeluh ibas keselamaten. Erkiteken Yesus Kristus, manusia ras Dibata nggeluh ibas perdamen. Erkiteken Yesus Kristus me, Dibata ngerembakken dirina man manusia..
3. Teridah kal alu jelas penekanan Paulus kerna kerina manusia si enggo erdosa, erkiteken sie kemuliaan Dibata lanai lit bas manusia. Tapi erkiteken Yesus Kristus manusia ibenarken. Emaka kerina kalak si tek ibenarkan, ntah pe Dibata ngerembakken dirina kempak manusia si tek man Yesus Kristus.
4. Jadi penegasen Paulus eme kerna Kristologi (keselamatan berpusat bas diri Yesus Kristus). Janah ipihak sideban Paulus ngataken maka situhuna undang-undang (hukum Taurat) la mereken keselamatan. Emaka la lit sekalak jelma ibenarken Dibata erkite-kiteken ndalanken undang-undang. Tuhu undang-undang eme pemere Dibata, tapi labo keselamatan. Maksudna undang-undang e lit ertina adi undang-undang e mbaba manusia nggeluh ibas kiniteken, jadi undang-undang labo sarana keselamaten. Enda me sierbahanca lit sada perbedaan sicukup mbelin, kerna undang-undang (hukum taurat), ija ibas ndalanken undang-undang, manuasia sendiri siberupaya nggeluh ibas kebenaren, tapi ibas Yesus Kristus Dibata jine simbenarken kegeluhen manusia sierdosa.
5. Erkiteken dosa maka manusia ndauh ras Dibata, tapi erkiteken pemere Dibata simbelin bas Yesus Kristus maka kerina manusia si erdosa mulihi nggeluh ras Dibata, enda labo erkiteken gegeh ras kengasupen manusia, tapi erkiteken Dibata jine singerembakken diriNa man manusia. Janah keselamaten siibereken Dibata arah Yesus Kristus eme keselamatan man kerina jelma. Adi ibas undang-undang (hukum Taurat), lit kalak Yahudi sierpengakap maka lit piga-piga kalak, ntah pe golongan sierpengakap maka arah ndalanken undang-undang nge ia ibenarken, erkiteken sie terjadi me sada pengangkan, maka kalak sierbahan dosa ia lanai atan ibas keselamatan. Tempa enggo tertutup kemungkinan nggeluh ibas keselamatan, tapi ibas Yesus Kristus, ise pe ia, golongan siapai pe ia, kerina banci dat keselamaten ibas Dibata erkiteken Yesus Kristus. Janah enda merupaken pemere Dibata simbelin bas diri manusia sierdosa.
APLIKASI
Kerna keleng ate Tuhan man banta kalak sitek merupakan sada bagin kegeluhen manusia, sebab ibas sejarah manusia keleng ate Tuhan la pernah mobah, Ia setia ibas kinilasetiaan manusia (kita). Seharusna, patut nge kita nggeluh ibas pernembeh ate Tuhan, tapi erkiteken keleng ate Tuhan kita lalap nggeluh ibas perkuah ateNa, sebab lalap iberekenna pengalemi dosa. Tapi kepeken ibas perbahanen Tuhan simbelin e, tempa kita enggo imanjaken, erkiteken sie lalap perbahanen dosa nge silakoken. Padahal keleng ate Tuhan singgeluh e man banta, gelah kita banci mengaplikasiken ibas kegeluhenta tep-tep wari. Kita harus nggeluh ndalanken kekelngen. Nggeluh mbiar man Dibata ras nggeluh selaku anak-anak Dibata i tengah-tengah doni enda.
Keleng ate Tuhan teridah kal ibas diri Yesus Kristus, sebab ibas Yesus Kristus Tuhan reh ku doni enda, Tuhan ngerembakken diriNa ras kita. Janah ibas ekspresi kiniteken, tep-tep tahun sirayaken kerehen Tuhan ibas doni enda alu ngerayaken Natal. Tapi rusur ka teridah perayaaan Natal ibahan terjeng ku bas perayaan-perayaan seremonial ngenca, emaka terkesan la ermakna ras mberati perpulungen erkiteken buena kutipan Natal. Sekali enda cuba sipikirken ras sipraktekken er-Natal alu mpraktekken keleng ate Tuhan. Sebab keleng ate Tuhan si tetap e nge siharus teridah ras banci igejapken kalak sideban, emaka kita jadi sarana guna ncidahken keleng ate Tuhan e. Adi Tuhan e perkeleng maka kita pe harus nggeluh ibas keleng ate.
Bagepe erkiteken sekali enda merupaken PJJ terakhir man banta, labo berarti aktivitasta enggo dung ibas tahun enda, tapi enda jadi motivasi man banta guna ndalanken kai singena ate Tuhan ibas kegeluhenta ibas tahun 2012. Apai ka ibas tahun 2012, ibas tahun kalender GBKP merupaken tahun solidaritas internal GBKP. Ibas tahun enda itekanken uga kegeluhenta harus nggeluh ibas kebersamaan ras saling mperdiateken sada ras sidebanna. Keleng ate Tuhan harus sicidahken ras sipraktekken ibas kegeluhen internalta, emaka tutus kita ersembah man Tuhan, ibas kebaktin minggu, PA , erdiakonia ras la lupa sitingkatken persepuluhen ras kolektenta, sebab arah enda pe banci ipake guna nehken keleng ate Tuhan i tengah-tengah pelayanen gereja.


Pdt. Steven Kumenit, STh.,M.Min.

Pakeken Senjata Si Ibereken Dibata Bas Geluhta (Epesus 6:10-20)

BAHAN PJJ GEREJA GBKP
TANGGAL 20 – 26 NOPEMBER 2011.
==============================
Epesus 6 : 10 – 20.

Tema : Pakeken Senjata Si Ibereken Dibata Bas Geluhta.

LATAR BELAKANG
1. Perkembangan gereja ibas abad sipemena termasuk gereja i Epesus, tuhu-tuhu dat tantangan ibas erbage-bage “aras”, subuk pemerintah, penguasa-penguasa bagepe iblis sierdahin ibas kelompok-kelompok jelma guna beneken ntah pe masapken kalak sitek.
2. Ibas situasi sibagenda reh Paulus arah suratna, mpersingeti perpulungen Epesus gelah perpulungen Epesus enda meteh kepeken lit musuh siatena ngelawan ia katawari paksa pe. Erkiteken sie Rasul Paulus mereken sada masukan uga carana ngelawan musuh e. Ibuat Paulus sada kebiasaan ibas dunia militer guna melukisken uga gelah kalak kristen tetap menang ngelawan musuh-musuh si lit.
3. Kata persinget enda, secara tidak langsung ikataken Paulus situhuna kegeluhen kalak kristen lit iantara dua kuasa sibertentantangan, eme kuasa iblis ras kuasa Tuhan. Tapi selaku kalak si tek man Tuhan kuasa Tuhanlah siharus jadi andalan. Pengalaman si lit kuasa iblis talu ibahan kuasa Tuhan. Saja ibas perdalanen kegeluhen kuasa iblis tetap erdahin guna naluken pengikut-pengikut Kristus. Enda me musuh e ras siharus italuken kalak sitek. Maksudna gelah perpulungen Epesus sienggo nggeluh ibas kemerdekaan/keselamaten ulanai jadi hamba iblis, tetap min perpulungen Epesus megegeh. Erkiteken sie me senjata siibereken Tuhan man kalak si tek harus ipake guna ngelawan musuh e. Jadi kekuatan iblis la banci ilawan alu gegeh ras kepentaren manusia, tapi harus ilawan alu kuasa Tuhan. Modal enda lit bas perpulungen, sebab perpulungen nggeluh ibas persadan ras Tuhan.
4. Musuh kalak si tek labo dirina sendiri, ntah pe hal-hal lahiriah/ siteridah (manusia), tapi lebih mbages eme hal-hal si la teridah, sierdahin ibalik kerina e eme iblis. Iblis ngasup ngkuasai jelma ras kegeluhenna, bagepe ngkuasai ingan-ingan tertentu. Kalak si tek harus erperang ngelawan kerina enda, gelah perpulungen tetap nggeluh selaku gereja. Bagepe i suruh Paulus gelah perpulungen mpergunaken senjata-senjata rohani. Senjata e lanai perlu idarami ija banci ibuat, tapi senjata e nggo ibereken Dibata man manusia sitek man bana, jadi tading mpergunakenca. Perlengkapen perang ras senjata-senjata Dibata eme 1). ketuhu-tuhun jadi bentingndu. 2). Kinibujueren jadi baju besi. 3). Keriahen ukur guna meritaken Berita si meriah. 4). Kemalemen ate jadi sepatu. 5). Kiniteken jadi ampang-ampang. 6). Keterkelinen jadi topi waja. 7). Kata Dibata jadi pedang. Kerina enda harus ilakoken alu ertoto. Kerina enda harus ipake adi reh kari paksa (wari) sijahat. Maksud ibas wari sijahat eme lit kari sada paksa litna sada tekanan ntah pe meningkatna tekanan penganiayaan ibas erbage-bage bentuk.
5. Bagepe isuruh Paulus gelah perpulungen la saja ertoto guna ia saja ras persadan perpulungen ibas rangka erperang ngelawan musuh, tapi iajuk Paulus gelah perpulungen pe notoken ia, gelah Paulus pang ngerana kerna Berita Si Meriah. Sebab erkiteken Berita Si Meriah me maka Paulus jadi utusen Tuhan.

APLIKASI
Tuhu kegeluhenta selaku kalak kristen enggo nggeluh ibas kemerdekaan, lanai nggeluh i teruh kuasa iblis, sebab kuasa iblis enggo italuken Yesus Kristus i kayu persilang. Tapi kuasa iblis seh genduari tetap erdahin guna naluken kita selaku anak-anak Dibata. Erbage-bage bentuk ras cara siibahan iblis gelah kita selaku anak-anak Dibata talu. Banci ka iblis e erdahin arah ekonomi/erta. Banci pe iblis erdahin arah perbeben ras kiniseran, bagepe erdahin iblis ibas kuasa ras jabatan, rsd. Enda kerina la teridah, mekatep kenca kita nggo ndabuh kubas dosa maka sadar kita. Erkiteken sie kita harus metenget nandangi kerina enda. Emaka senjata sienggo ibereken Tuhan man banta harus ipake guna ngelawan tipu muslihat iblis. Sebab adi enggo sipake senjata e ngasup kita ngelawan iblis, emaka kita megegeh guna mpertahanken kinitekenta.
Tekanan-tekanan iblis lebih meningkat ras tergejap ibas minggu-minggu adven, sebab ibas minggu-minggu adven enda kita nggeluh ibas ngalo-ngalo Tuhan Yesus Kristus, sienda la bo isenangi iblis, emaka ibas erbage-bage bentuk ras cara, ate iblis ngagalkenca. Bagepe ibas tradisita selaku kalak kristen, mekatep erkiteken enggo dem wari-wari guna ngerayaken Natal, maka enggo sipake minggu-minggu Adven enda guna kita er-Natal. Ibas kita Er-Natal kebutuhen-kebutuhen semakin meningkat, sebab melala kutipan-kutipan, rsd. Enda harus kita metenget. Erkiteken sie me kita harus makeken perlengkapen perang ras senjata perang sienggo ibereken Dibata man banta, gelah menang kita ras malem ateta.

Pdt. Steven Kumenit, STh.,M.Min.

Ergaken Kegeluhen Si Ibereken Dibata (Mazmur 90:1-4; 9-12).

BAHAN PJJ GEREJA GBKP
TANGGAL 13-19 NOVEMBER 2011.
============================
Mazmur 90:1-4; 9-12.

Tema : Ergaken Kegeluhen Si Ibereken Dibata

LATAR BELAKANG
1. Mazmur enda merupaken pertoton Musa, janah jenis Mazmur enda eme perngandungen. Ibas pertoton enda, ituriken Musa kerna ise kin Dibata e. Dibata enggo lit ope denga ijadiken doni enda, bagepe Dibata ingan cicio manusia. Enda ngataken situhuna manusia la lit ertina, manusia la lit kai pe adi ibandingken ras Tuhan. Bagepe manusia nggeluh ibas “kurun waktu” ngenca, tapi Dibata lang. Erkiteken sie me seribu tahun man manusia bali ras sada wari man Dibata. Jadi kegeluhen manusia ibas doni enda kentisik ngenca.
2. Kegeluhen manusia ibas doni enda terbatas kal. Iidah Musa maka kegeluhen manusia paksa sie terjeng pitu puluh tahun ngenca, tapi adi megegeh ia banci seh waluh puluh tahun, tapi kesusahen ayam-ayam geluh manusia e.Erkiteken sie me, Musa ertoto gelah Dibata mereken kepentaren man manusia guna ngangkai kerna kegeluhen manusia siterbatas enda, alu bage manusia banci nggeluh bujur ras erkemalangen man Tuhan saja. Ipake manusia kegeluhenna alu payo ibas kegeluhenna tep-tep wari.
3. Pertoton enda ipeseh Musa erkiteken igejapken Musa maka Dibata e kap penampat. La lit Dibata si lit ibas doni enda sibanci nampati bangsa Israel seakatan Dibata ngenca. Deleng pe simerupaken simbol simegegeh, la bo ngasup nampati manusia, sebab deleng e pe merupaken bekas tinepa Dibata. Musa ngangkai alu tuhu-tuhu adi Dibata nampati manusia maka manusia pasti ngangkai kerna keterbatasan geluhna. Janah la saja singkat, tapi pe lit ibas ancaman penghukuman Tuhan. Sebab ate Tuhan kegeluhen manusia harus nggeluh bujur i lebe-lebe Tuhan, adi lang maka manusia pasti ihukum Tuhan. (band. Kegeluhen manusia si pemena, Kej.3. Bagepe kerna penghukuman Tuhan man bangsa Israel kerna bangsa Israel la setia ibas perdalanenna i tanah mesawang ku taneh Kanaan). Emaka perlu nge kepentaren man manusia (bangsa Israel).
4. Pertoton enda jadi erkiteken pengalaman kiniteken paksa Musa minpin bangsa Israel ndarat i taneh perbudaken nari ku taneh Kanaan. Ibas perdalanen enda piga-piga hal siterjadi eme 1). Penyertaan Tuhan man bangsa Israel. La saja pernyertaan Tuhan tapi pe perlindungen Tuhan. Perlinbdungen Tuhan enda teridah arah uga Dibata nemani bangsa Israel arah binangun api ibas berngi gelah bangsa Israel la bergehen ntah lit ibas “kehangatan” sebab i taneh mesawang adi berngi seh kal bergena, janah ibas suari Tuhan mereken binangun embun gelah bangsa Israel la iparpari las matawari. Bagepe perlindungen ibas bangsa si deban siatena nerang bangsa Israel (band. Mesir, Filistin, Kanaan). Bagepe bangsa Israel dat inemen ras roti manna. 2). Bangsa Israel jungut-jungut ibas perdalanen, erkiteken sie bangsa Israel i hukum Tuhan. 3). Angkaten si pemena (sindarat i Mesir nari) mate kenca berumur pitu puluh tahun, janah adi megegeh ia banci seh waluh puluh tahun tapi ayam-ayam geluhna (kiniseran).
5. Alu litna kepentaren man manusia (bangsa Israel), maka kegeluhen bangsa Israel terjaga/terlindungi ibas penghukumen Tuhan, janah bangsa Israel tetap jadi bangsa Tuhan.

APLIKASI
Harus sisadari lebe, kita lit ibas doni enda erkiteken Dibata. Dibata sinjadiken kita. Janah kita banci nggeluh seh genduari erkiteken perkuah ate Tuhan saja. Bagepe adi sinen kerna kegeluhenta, pantas nge kita dat hukumen ibas Dibata nari. Tapi erkiteken perkuah ate Tuhan maka kita ibebasken ibas perbudaken dosa sipereh penghukumen Tuhan. Sienda seharusna min jadi palas bas kita guna ngisi wari-wari kegeluhenta alu mehuli ras kai singena ate Tuhan. Alu bage kita banci ngaloken pasu-pasu Tuhan.
Perlu siinget kita singgeluh genduari, labo saja sipenting enggo nggeluh, tapi uga gelah kegeluhenta enda tuhu-tuhu banci berarti, subuk secara horisontal bagepe vertikal. Guna kai kin gedang umurta, tapi la kita berarti ibas kegeluhenta, gendek pe umurta tapi tuhu-tuhu berarti kegeluhenta, em singena ate Tuhan. Emaka gelah lit ertina geluhta e, maka kegeluhenta harus nggeluh alu kepentaren, sebab kepentaren enda me simenuntun kita guna erbahan simehuli singena ate Tuhan.
Ibas tahun kalender gerejanta, genduari kita enggo bengket ibas liturgi pendungi tahun gereja. Maksudna enda kerina, kita iajuk guna ngerenungken kegeluhenta ras gereja, ija lit pasang surut siterjadi ibas kegeluhenta, termasuk pe kerna kinitekenta. Tapi siidah Tuhan tetap setia ibas kegeluhenta. Janah ibas pendungi tahun gereja enda kita iajuk guna lebih ersikap bengket kubas mingu-minggu adven ras Natal, gelah kinitekenta erdewasana amin gia kai si reh man banta.

Pdt. Steven Kumenit, STh,M.Min.

Tema : Kuasa Yesus Si Njemba Kita Ersaksi Kerna Ia (Matius 15:29-31)

BAHAN PJJ GEREJA GBKP
TANGGAL 6 – 12 NOVEMBER 2011.
==============================
Matius 15 : 29-31.

Tema : Kuasa Yesus Si Njemba Kita Ersaksi Kerna Ia.

LATAR BELAKANG.
1. Kuasa Yesus nggo mbar i daerah Galilea ras i darat Galilea (kalak si labo kalak Yahudi) , emaka kuja saja Yesus reh, ije minter itaruhken kalak, kalak sisakit gelah ipepalem Yesus. Enda me sijadi ibas oratenta sendah. Janah erkiteken kuasa Yesus sipepalem erbage-bage pinakit si .lit erbahanca mamang ate jelma sinterem, erkiteken sie me ipujina Dibata.
2. Ibas Yesus pepalem erbage-bage pinakit si lit, situhuna ijenda lit makna pembebasan. Ija kenca kalak sipinakitan enda ndai malem maka ia nggo bebas ibas perbeben ras kiniseran nari. Janah ijenda pe teridah maka kuasa Tuhan ngasup pepalem erbage-bage pinakit si lit bas manusia. Alu litna pembebasen, maka kalak ndai nggeluh ibas keriahen. Enda me situhuna makna kerehen Yesus i tengah-tengah doni enda.
3. Erkiteken terjadi Mujizat, maka nterem jelma muji Dibata si isembah kalak Israel. Situhuna enda ngatakenca bahwa kejadin siilakoken Yesus enda la i lingkungen kalak Yahudi, tapi i daerah Dakapolis, simayoritas pendudukna beragama si la seri ras agama kalak Yahudi. Erkiteken sie me pengakun enda, ngataken maka Dibata si isembah kalak Israel enda me lebih erkuasa asangken dibata si lit i daerah Dekapolis. Dibata –dibata kalak Dekapolis la bo lit kuasana erbahanca kai pe, tapi ibas kerina perbeben ras kiniseranna Dibata kalak Israel banci nangtangisa.
4. Ibas mujizat penyembuhan siilakoken Yesus i daerah si la nandai Dibata, ngataken Yesus pe erbahan pelayanan ras nehken berita kerna kuasa Dibata si lit bas diriNa, bagepe makna kerehen Mesias. Kerehen Mesias eme guna keselamaten ras pembebasan man kalak silit ibas perbeben ras kiniseran.
5. Bagepe ate Yesus ncidahken kesembuhen siilakokenna ngataken maka kerina jelma berhak ngaloken perkuah ate Tuhan (Yesus Kristus). Jadi amin gia Yesus tubuh ibas bangsa Yahudi nari, labo berarti keselamaten ras keriahen ibereken man bangsa Yahudi saja, tapi man kerinakalak/bangsa.



APLIKASI
Pinakit sidendeni daging kula manusia, e pe merupaken sada perbeben man manusia, sebab erkiteken pinakit me aktivitasta banci terganggu, bagepe erkiteken pinakit banci kote dagingta ras kinitekenta pe banci terganggu. Erkiteken sie me, adi ateta malem maka la bo masalah siakap ertambar seh ku luar negeri, janah lit ka pe sindahi guru si baso ras ndarami tambar-tambar alternatif, rsd. Memang lit simalem lit ka si lang. Tapi ingetlah adi kita ertambar ku guru sibaso ras ingan-ingan tertentu banci kita erdosa man Tuhan. Memang ibas hal-hal tertentu iblis banci pepalem kalak sakit, Tapi enda ibahanna gelah kita banci jadi pengikutna. Situhuna enda la jadi masalah adi enda kin sijadi pilihenta Ateta nggeluh ibas persadan ras iblis. Tapi situhuna Tuhan siisembah kita eme Tuhan si dem kuasa, singasup pepalem erbage-bage pinakit si lit bas daging kulanta. Kita banci malem adi kita ertoto ras mindo penampat man Tuhan. Memang lit ka pinakit si la malem, amin gia kita enggo ertoto ras mindo penampat man Tuhan, bagepe enggo si dilo pendeta ras serayan Tuhan sideban. Enda harus ka sisadari, labo berarti la lit kuasa Tuhan ije, ntah pe kuasa Tuhan la ngasup pepalem pinakit e. Tapi harus sisadari maka lit rencana Tuhan ibas kegeluhenta. Hal sibagenda ula kita mis frustrasi ntah pe stres, dungna sidarami ingan-ingan tertentu guna mindo penampat man bana.
Bagepe harus ka sisadari ibas kegeluhenta, mekatep lit pinakit bawaan ntah pe cacat lahir (nen = fisik ras mental). Pinakit sibagenda me siharus lit penanganen khusus, isamping sie kita harus mindo penampat man Tuhan Dibata.
Kehadiran gereja GBKP simerupakan alat Tuhan nehken kekelengen man manusia enggo majekken Yayasan Kristen Penyandang Cacat (YKPC). Ibas YKPC enda anak-anakta sisakit mental ididik gelah ia banci mandiri. Saja siterjadi eme lit denga anggota jemaat sianakna seharusna ididik i YKPC la babana ku je. Begepe lit ka keluarga (kita) silenga ngasup ngaloken anak-anak alumni YKPC enda. Lepas arah enda kerina gereja GBKP arah YKPC enggo mentranfer ntah pe mengaplikasiken kekelengen Yesus man anak-anak si cacat mental. Amin gia situhuna ibas penanganan enda lenga maksimal, tapi sipaling penting eme uga perhatin gereja nandangi anak-anak si cacat mental. Emaka siniharapken kita kerina ngawan perpulungen. Ikut muat bagin guna nampati YKPC enda gelah ermajuna. Alu bage erteremna kalak muji Tuhan. Situhuna alu kita nggit muat bagin ibas pelayanen khususna nampati YKPC, maka kita alu sendiri enggo ikut ersaksi kerna kuasa ras kelengen Tuhan man doni enda. Teklah ibas penjemba kuasa Yesus, ngasup nge kita erbahan sibage.

Pdt. Steven Kumenit, STh.,M.Min.

Tema : Mehamat Ras Erkemalangen Man BaNa. (Kuan-Kuanen 1:1-7)

BAHAN PJJ GEREJA GBKP
TANGGAL 30 OKTOBER – 5 NOPEMBER 2011.
=======================================
KUAN-KUANEN 1:1-7.

Tema : Mehamat Ras Erkemalangen Man BaNa.

LATAR BELAKANG
1. Secara umum banci sikataken kitab Kuan-Kuanen enda merupaken sada kumpulen tulisen alu erbage-bage gaya sierbeda-beda. Kinierbagen enda ncidahken ruang lingkup si cukup mbelin ibas masyal (Amsal) Ibrani. Janah tujun kitab Kuan-Kuanen enda gelah kegeluhen bangsa Israel nggeluh ibas keberhasilen. Erkiteken sie me adi siperdiateken kitab Kuan-Kuanen enda rusur ikutip kerna kebiasaan nggeluh si negatif ras si positif gelah bangsa Israel banci meteh kerna akibatna alu bage bangsa Israel banci milih nggeluh positif, ntah pe nggeluh alu lagu langkah simehuli. Ibas kegeluhen bangsa Israel, si paling penting nggeluh ibas hukum kekelengen. Enda erkiteken kerina bangsa Israel ngenen Hukum Dibata e sebage sada kewajiban guna idalanken alu kesetiaan ras ketaatan. Erkiteken sie me mbiar ras erkemalangen man Tuhan merupaken palas ndatken kepentaren. Jadi secara sederhana tujun kitab Kuan-Kuanen enda eme nuriken alu cermat, tepat ras gampang iinget kerna kai siimaksudken alu siap ngelai Tuhan.
2. Khusus oratenta sendah, Teridah alu jelas Kuan-Kuanen enda asalna ibas raja Salomo nari. Ate raja Salomo gelah bangsa Israel nggeluh ibas kepentaren. Janah enda merupaken sada pendilo man bangsa Israel guna nggeluh ibas kepentaren. Erkiteken sie me bangsa Israel harus mbiar ras erkemalangen man Tuhan. Enda merupaken syarat mutlak man bangsa Israel guna ndatken kepentaren. Enda ikatakenna sebab kepentaren rehna Ibas Dibata nari (band. 2 Kronika 1:10-12). Alu ndatken kepentaren maka bangsa Israel tuhu-tuhu jadi bangsa Dibata. Bangsa Israel la merupaken bangsa si bodoh. Sebab kebodohan erbahanca bangsa Israel ermusuhen ras Tuhan. Engkai, erkiteken bangsa Israel meremehken prinsip-prinsip moral ras kesalehan alu sengaja. Emaka terjadi me kemorosotan moral, benena tanggungjawab rohani ras la lit kepekaan sosial (band. Yesaya 32:6).
3. Pendilo kepentaren man bangsa Israel erbahanca kalak jadi pentar, ngelakoken pengajaren simehuli, ngantusi ranan simbages ertina, nggeluh ibas kepentaren, kebujuren, adil dingen benar. Janah kalak si lenga erpengalamen pe banci cerdik. Bagepe kalak si nguda jadi pentar ras kalak sipantas. Kepentaren pe banci nambahi pemeteh. Alu bage hal-hal siterbuni banci talang.
4. Ate Kuan-Kuanen enda ngataken maka manusia banci jadi pentar alu erlajar ras mampu erkembang ibas pengertin, jadi la otomatis jadi sendiri. Erlajar kepentaren la perlu arah sekolah formal (pendidiken).
5. Kuan-Kuanen enda nekanken peran para guru sicukup penting guna ngajarken kalak jadi berhasil. Sebab karir sisukses ibas pelayanen menuntut perukuren simehuli guna muat keputusen. Enda kerina erkiteken mbiar ras erkemalangen man Tuhan.

APLIKASI
Seharusna min kita sierkiniteken man Yesus Kristus selaku Tuhan ras Juru Selamat ncidahken nggeluh ibas kepentaren, janah harus jadi karakter geluhta. Tapi siidah cukup nterem kita sila nggeluh ibas kepentaren. Erkiteken sie me perbahanen-perbahanen si la ngena ate Dibata lalap silakoken eme erbahan kinilabujuren, la lit kekelengen, la lit keadilen, la ngasup mbedaken sibenar ras si salah, rsd. Jadi penungkunen engkai maka bage. Enda jadi erkiteken la kita mehamat ras mbiar man Tuhan Dibata. Sebab adi kita mehamat ras mbiar man Tuhan maka teridah kegeluhenta nggeluh ibas kekelengen. Tandana kita mehamat ras mbiar man Tuhan maka perbahanen-perbahanen singena ate Tuhan nge siibahan kita. Sebab la ateta ncurnaken gelar Tuhan ras la ateta ndatken hukumen ibas Dibata nari.
Kepentaren merupaken pemere Dibata. Emaka kalak sierkemalangen ras mbiar man Tuhan saja nge singaloken kepentaren ras ngasup ndalanken kepentaren e ibas perbahanenta tep-tep wari. Jadi penungkunen man banta, uga carana gelah kepentaren enda jadi orat geluhta. Sipaling penting man banta lebe, sitandai ise kin situhuna kita. 1).Kita enda tinepa Dibata ras kita enda Imago-Dei. 2). Kegeluhenta harus mpermuliaken Tuhan. 3). Harus nggeluh ibas kata Dibata.

Pdt. Steven Kumenit, STh.,M.Min.

Kalak Si Tek Tetap Ibereken Dibata Gegeh Guna Ersaksi (Perbahanen Rasul-Rasul 16:16-24)

BAHAN PJJ GEREJA GBKP
TANGGAL 23-29 OKTOBER 2011.
==================================
Perbahanen Rasul-Rasul 16:16-24.

Tema : Kalak Si Tek Tetap Ibereken Dibata Gegeh Guna Ersaksi

LATAR BELAKANG
1. Kejadin ibas bahan oratenta sendah eme i kuta Pilipi, janah siidah ibas pelayanen Paulus i kuta enda la saja meriah ukur erkiteken lit sekalak diberu gelarna Lidia ras kerina isi jabuna tek ras iperidiken kenca ibegikenna pengajaren Paulus (ayat 14-15), tapi pe Paulus ndatken tantangen arah sekalak diberu si lit jinujungna.
2. Diberu si lit jinujungna enda i ikut-ikutna Paulus seh piga-piga wari dekahna, janah ibas pudi nari alu sora megang nina, kalak enda kerina persuruhen Dibata si meganjang. Iturikenna man bandu dalan keselamaten. Kai siibahanna enda erbahanca kesabaren paulus bene, sebab iidah Paulus enda pendahin setan (iseluki setan), emaka alu erkusur Paulus, isergangina setan e nina ibas gelar Jesus Kristus kusuruh kam ndarat ibas diberu e nari. Ibas paksa e pe minter ndarat setan ibas diberu e nari. Kai siibahan diberu teridah tempah-tempah ersaksi ras nampati Paulus ras Silas, tapi kepeken lit sura-sura sideban eme: 1). Adi la megegeh kiniteken Paulus ras Silas maka Paulus ras Silas banci meganjang ukur, sebab terjadi pujian. Apalagi paksa sie cukup nterem kalak sinulak pendahin Paulus. 2). Gelah kalak sideban ernembeh ate man Paulus sebab isekelewet Paulus ras Silas la sada kiniteken ras Paulus ras Silas.
3. Adi siperdiaten kerna pendahin setan maka banci sisimpulken la meriah akapna adi lit kuasa Terang ras keselamaten tuhu-tuhu i kuta Pilipi, erkiteken sie me atena nggangalkenca, janah perbahanen setan e bali kal paksa setan e atena nggagalken pendahin Yesus Kristus (band. Lukas 4:33-35; 41). Siidah ijenda, setan pe tandaina ise Yesus, ras pendahin kuasa Terang, termasuk kalak sitek man Yesus Kristus. Jadi enda situhuna bentuk perlawanen setan simerupaken kuasa kegelapen man kuasa Dibata.
4. Jinujung si lit ibas diberu e nggo cukup ndekah ngiani kula diberu e, janah jinujungna e asalna ibas Junani nari. Jinujung e gelarna Pythoon simerupaken pe gelar seekor naga, janah menurut ajaran Junani penjaga Orakel Delphi i Junani tengah. Jenari Pythoon ipergunaken guna roh-roh simeramalkan masa si reh. Roh-roh enda menguasai jelma, janah alu perantaraan jelma ia ngerana. Jadi merupaken sada bentuk kerasuken setan. Orakel Delphi eme ingan ersembah kalak Delphi.
5. Kepeken arah perbahanen diberu e nggo cukup melala tuanna dat keuntungen, tapi kenca ipelawes Paulus setan e, enggo akap tuan e lanai nari lit pemasukenna, lanai banci ia dat duit arah diberu e, emaka itangkapna Paulus ras Silas janah isarenna ku bale i tiga guna iadili i lebe-lebe pemerintah alu tuduhen erbahan guntar ras ngajarken adat sibertentangen ras undang-undang Roma, janah jelma sinterem pe terikut. Erkiteken sie me Paulus ras Silas iligas prajurit (hukum cambuk). Situhuna penghukumen model sibagenda enggo peempatkaliken ialoken Paulus, amin gia ibas bentuk sideban, (band. 2 Korinti 11:25). Tapi amin bage gia Paulus tetap ndalanken tanggungjawabna nehken Berita si meriah man kalak si labo kalak Yahudi

APLIKASI
Harus sipahami sekali enda labo khusus kita ngerana kerna pelawes setan tapi kerna ersaksi. Janah kegeluhen kalak kristen eme nuriken perbahanen-perbahanen Dibata simbelin (band. 1 Petrus 2:9). Alu kata sideban kita harus ersaksi kerna Yesus Kristus selaku Tuhan ras Juruselamat manusia, (PI ke luar dan ke dalam, bersaksi secara pribadi arah kata ras perbahanen). Sijadi masalah genduari eme iblis. Ija kenca iblis italuken Yesus arah kekekenNa, iblis tetap erdahin seh genduari. Ate iblis nggagalken upaya-upaya kalak sitek guna ersaksi gelah jelma sinterem ras doni enda terkelin. Erbage-bage bentuk ras cara siibahan iblis gelah kalak si tek la pang ras talu ibas pelayanenna (mekisat, kesibuken, kurang semangat, la lit kiniersadan, bagepe tantangen ndarat nari – kuasa-kuasa kegelapen, rsd).
Seharusna kecibal enda harus iteh min kalak sitek, janah lanai perlu aru atena ras mbiar. Janah harus ka sisadari adi sipergunaken gegeh ras kepentarenta, la bo kita ngasup naluken kuasa setan, sebab gegehen me kuasa setan e asangken kita. Adi ateta tetap ngasup “tedis” ras ndalanken kerna kata Dibata ibas kerina kegeluhenta, maka la banci lang harus sipake ras siandalken kuasa Yesus Kristus. Sebab alu kuasa Yesus Kristus maka kerina kuasa si lit ibas doni enda banci sitaluken (band. Perbahanen 16:18; Matius 28:20). Bagepe Kesah Si Badia harus ngkuasai kita gelah kai pe perbeben ras kiniseran sireh, ngasup kita ngalakenca. Alu bage ngasup kita ersaksi, ngasup situriken kerna kebenaren si erpalasken kata Dibata arah kata ras perbahanen. Sebab banci kita ngerana kerna kebenaren, tapi ibas perbahanen la bage.
Cukup nterem kalak si tek, la ngasup ersaksi arah kata ras perbahanen, erkiteken aru atena ras mbiar, emaka ibahanna hal-hal si la ngena ate Tuhan (nen = KKN, erbahan kinilabujuren, penindasen, rsd.). Tapi adi dirinta ikuasai Kesah Si Badia maka ngasup kita ersaksi kerna Yesus Kristus selaku Tuhan ras Juruselamatta. Memang ibas kita ersaksi, banci saja sijumpai kuasa-kuasa kegelapen, emaka harus silawan. Enda salah sada bagin ngenca ibas kita ersaksi. Labo enda sijadi tujun. Janah perlu siteh enda iangkat gelah lit min semangat man banta guna ersaksi, nehken Berita si Meriah.
Perlu siteh kuasa siibereken Yesus, labo saja guna pelawes setan, tapi kuasa si pang ersaksi (band. Erbage-bage pemere Kesah Si Badia man banta).

Pdt. Steven Kumenit, STh,M.Min.

Kiniersadan Bas Ngawan Ni Perpulungen Guna Nampati Si Kurang Megegeh (Roma 15:25-29)

BAHAN PJJ GEREJA GBKP
TANGGAL 9 – 15 OKTOBER 2011.
============================
Roma 15:25 – 29.

Tema : Kiniersadan Bas Ngawan Ni Perpulungen Guna Nampati Si Kurang Megegeh.

LATAR BELAKANG
1. Enggo cukup ndekah lit sura-sura Paulus guna reh ku Roma, sebab paksa sie Roma merupaken pusat dunia. Lalap sura-sura Paulus la seh erkiteken pendahin Rasul Paulus selaku rasul. Paulus lalap ndahiken Berita si Meriah man kalak si lenga tek man Yesus Kristus selaku Tuhan ras juru selamat manusia. Tapi kenca lanai lit ingan erdahin, ate Paulus reh ku Roma, tapi kepeken lit dahin siharus idahikenna, selain dahin Beritaken Berita Si Meriah eme mbaba penampat man kalak si tek i Yerusalem si sangana dat perbeben ras kiniseran. Perlu siteh dahin rasul Paulus eme mbuka “lahan baru”, labo erdahin bas si enggo idahiken kalak.
2. Penampat kemanusiaan siipepulung rasul Paulus ibas daerah Makedoni ras Akhaya nari, erkiteken enda itugasken rasul-rasul i Yerusalem man Paulus (Galati 2:10). Emaka kenca terpepulung penampat e, Rasul Paulus simbabasa sendiri ku Yerusalem. Dahin enda me sierbahanca Paulus la banci reh ku Perpulungen Roma. Padahal i perpulungen Roma ate Paulus banci jumpa ras perpulungen ras ercakap-cakap ras perpulungen, bagepe gelah lebih mendalam penandaina kerna eksisten perpulungen Roma ras Paulus sendiri.
3. Kai siidahiken Paulus kerna pepulung dana, lebo ngenca erkite-kiteken keleng atena man perpulungen i Yerusalem si enggo musil e, tapi Paulus erpengakap Kolekte e sebage sarana guna mengukuhken persadan sapih-sapih kristen ras non kristen. Emaka teridah dungna kerna nggeluh selaku gereja si utuh, simerupaken kula ni Kristus. Erkiteken sie me perpulungen i daerah Makedoni ras Akhaya mereken penampat alu meriah ukur.
4. Kai siibahan perpulungen i daerah Makedoni ras Akhaya erkiteken kewajibanna, sebab perpulungen i daerah Makedoni ras Akhaya enggo dat bagin ibas erta pertendin kalak Yahudi.
5. Perlu siteh bangsa Yahudi eme bangsa pilihen Dibata ras bangsa pemilik erta pertendin, janah ibas Kristus simerupaken kalak Jahudi pe, “mbagi-mbagiken erta e seh ku kalak non Jahudi, emaka perpulungen i daerah Makedoni ras Akhaya rutang guna nehken kekelengen man kalak Yahudi (Yerusalem) alu erta doni.

APLIKASI
Nggeluh ibas gereja, berarti kita nggeluh ibas sada kula, emaka selaku sada kula kita rutang guna sisampat-sampaten. Erkiteken sie me selain hukum kekelengen (band. Matius 22:37-40), lit pe sada hal siberlaku ibas gereja, eme simegegeh nampati kalak si la megegeh, janah perbahanen enda me sierbahanca kegeluhen gereja tetap eksis ras ngena ate kalak man kegeluhen gereja.
Selaku sada kula, sigejapken gegeh ras buatenta ntah pe pemere Dibata la seri, janah pe ibas sada paksa lit anggota perpulungen nggeluh ibas perbeben ras kiniseran. Tentuna kita selaku gereja harus mbuka matanta ras pe pusuh peratenta guna ngasup kita erdiate ras mediate man senina turangta si butuh kal penampatta. Sebab alu kita mereken penampat man senina turangta simbutuhken, maka igejapkenna lias ras perkuah ate Tuhan si maler man bana, janah kita pe harus ngejapken kai siibahan kita enda, erkiteken Tuhan make kita guna jadi alatna nampati kalak sideban, bagepe gelah kita nggeluh ibas sekeleng-kelengen. Kita tuhu-tuhu rutang nggeluh sikeleng-kelengen.
Persadan merupaken gegeh ibas perpulungen guna ngasup ndahiken dahin-dahin kai pe, termasuk dahin kekelengen. Emaka si paling penting man banta eme kita harus nggeluh ibas persadan. Sebab ibas kita nggeluh ibas persadan melala sibanci sibahan, diantarana eme mereken diakoni man kalak si kurang mampu, jadi orang tua asuh man anak sekolah si kurang mampu, njaga lingkungen, rsd. Janah enda la saja terjeng anggota gereja saja, tapi adi enggo ngasup banci sisehken man ise saja. Emaka guna ngasup ndalanken sienda, sipaling penting, hal-hal sincedai persadan harus ibuniken (singkirken), iantarana eme egois, status sosial, cian, rsd.

Pdt. Steven Kumenit, STh,M.Min.

Kiniersadaan Ras Kebadiaan Bas Jabu Kalak Kristen (Kolose 3:12-17)

BAHAN PJJ GEREJA GBKP
TANGGAL 2 – 8 OKTOBER 2011
===========================
Kolose 3 : 12-17.

Tema : Kiniersadan Ras Kebadian Bas Jabu Kalak Kristen

LATAR BELAKANG
1. Rasul Paulus arah suratna enda mpersingeti perpulungen Kolose alu ngataken, perpulungen Kolose eme sikerajangen Tuhan, janah enda erkiteken pilihen Tuhan, erkiteken sie perpulungen Kolose enggo nggeluh ibas kebadiaan ras keleng ate Tuhan. Erkiteken sie me perpulungen Kolose ituntut gelah makeken paken kekristenan. Janah paken kekristenan enda merupaken hal si la banci lang harus idalanken.
2. Erkiteken sie Rasul Paulus mereken daftar perbahanen-perbahanen siseharusna jadi paken kalak kristen. Lit siwah bentuk siharus idalanken kalak kristen eme perkuah ate, mehuli, rukur meteruk, lemah lembut, saber, ola pergelut dingen sialem-alem salah adi kitik ukurndu ibahan kalak, sikeleng-kelengen, nggeluh ibas kedamen, ras harus ngataken bujur. Bagepe nggeluh ibas kepentaren, janah siajar-ajaren ibas kepentaren, janah endekenlah ende-enden pujin, masmur, ras ende-enden pertendin, janah bahanlah e kerina ibas gelar Yesus Kristus. Enda itekanken Paulus gelah perpulungen Kolose banci nggejapken ndube gelahna la bage, tapi erkiteken keleng ate Tuhan me maka genduari perpulungen Kolose enggo ijadiken badia, emaka ula nari erbahan si la ngena ate Tuhan, tapi tetaplah ngataken bujur man Tuhan.
3. Gelah Perpulungen Kolose tetap jadi sikerajangen Kristus maka sipaling penting, Kata Kristus si dem alu kebayaken harus nggeluh ibas pusuh peraten perpulungen Kolose. Enda penting itekanken Paulus sebab ate Paulus lebih menekenken kerna Kristus. Janah guna ndatken perbahanen-perbahanen simehuli Kata Kristus harus tetap ringan ibas pusuh peraten. Sebab ibas pusuh peraten merupaken inti kegeluhen gelah kita banci ngelakoken simehuli ras singena ate Dibata, Ibas pusuh peraten enda me manusia “ikontrol”.
4. Enda itekanken Paulus man perpulungen Kolose gelah perpulungen Kolose banci berkembang ibas pemahaman ndalanken moral simehuli, janah moral enda berbeda kal ras kalak si deban si la nandai Yesus Kristus selaku Tuhan ras Juru selamat manusia, erkiteken sie me nina Paulus Kata Kristus harus ringan ibas pusuh peraten.
5. Bagepe penekanen Paulus gelah perpulungen kolose harus berpusat man Yesus saja. Sebab paksa sie lit anggota perpulungen Kolose sienggo terikut ibas ajaren sipapak, termasuk soal ersembah. Piga-piga perpulungen enggo ersembah alu salah eme ersembah man malaikat alu paksaan, meteruk ukur alu pekulah-kulah, bagepe nakiti kula (band. Kolose 2:23). Ajaren enda ibas Yunani nari. Enda me siitentang Paulus alu mereken dokrin (ajaren) si tuhu-tuhu man perpulungen Kolose. Guna mengantisipasi enda, maka perpulungen harus nggelu sikeleng-kelengen, nggeluh ibas siajar-ajaren alu kepentaren, ngelakoken simehuli, subuk kata bagepe perbahanen erpalasken gelar Tuhan ras rende alu mehuli. Siimaksudken endekenlah masmur, ende-enden pujin ras ende-enden pertendin, janah harus rende alu ngataken bujur ibas ukurndu. Enda kerina maksudna ula alu keterpaksaan, janah rende lagu-lagu mazmur (masmur PL), janah rende ibas ende-enden pujin eme ncidahken kerna kuasa Dibata ras keleng ateNa, janah tujunna eme ngajarken kalak.

APLIKASI
Adi kita ngerana kerna keluarga eme kita ngerana kerna pendilo Tuhan ras persadan sienggo ijadiken Tuhan. Alu bage keluarga enda ijadiken Tuhan alu kebadiaan. Janah siniharapken ibas keluarga-keluarga kristen harus nggeluh ibas moral simehuli. Keluarga kristen harus berbeda ras keluarga-keluarga sideban, emaka sipaling penting bas keluarga-keluarga kristen eme kata Kristus harus nggeluh i tengah-tengah keluarga kristen. Sebab ibas Tuhan njadiken kita selaku keluarga kristen lit sada tujunna eme gelah kita jadi alat Tuhan guna nehken kekelengenNa.
Gelah teridah maka kita enda eme keluarga-keluarga kristen simehuli, harus min sicidahken paken kristen simehuli eme nggeluh ibas sikeleng-kelengen, ukur meteruk, rsd. Janah sipaling penting man banta keluarga-keluarga kristen eme harus ersembah man Tuhan alu payo, emaka ciptakenlah kebaktin-kebaktin keluarga (soal waktu ras jam kita singatursa), gelah tuhu-tuhu keluarganta nggeluh ibas pasu-pasu Tuhan.
Persoalen silit ibas keluarga-keluarga kristen eme kerna kiniersadan ras kebadiaan sikurang, emaka adi reh perbeben ras kiniseran mekatep stres kita, janah lit keluarga pe sisirang. Guna ngatasisa enda, kita keluarga kristen harus nggeluh bujur, meteruk ukur, sikeleng-kelengen ras nggeluh ibas ersembah man Tuhan, alu bage kita ikuasai Kesah Si Badia, janah iajarina kita guna tetap nggeluh ibas persadan ras kebadiaan.

Pdt. Steven Kumenit, STh,M.Min.

PEKAN DOA (WARI 7) - Ertoto Guna Meningkatken Spiritualitas Pemimpin Gereja Ras Pemerintah Ibas Kerina Tingkaten

BAHAN PEKAN DOA
GEREJA GBKP
WARI VII, SABTU 1 OKTOBER 2011.
===============================
Introitus : O TUHAN , dengkehken min pemindonku perdiateken min sorangku tangis, ola tadingken aku. Bali ras kerina nini-niningku, kentisik ngenca aku kesilang ras Kam (Mazmur 39:13).
Ogen : II Raja-Raja 20:2-5.
Khotbah : Mazmur 72:1-20.
Tema : Ertoto Guna Meningkatken Spiritualitas Pemimpin Gereja Ras Pemerintahen Ibas Kerina Tingkatenna.

LATAR BELAKANG
1. Mazmur enda merupaken Mazmur pertoton raja Daud. Janah ibas pertoton enda, Daud ertoto guna kelangsungan kerajaan si ideal. Enda ipenangkihna erkiteken iidah Daud kerajaan simehuli (ideal) banci teridah adi Dibata ikut campur tan, ntah pe adi Dibata masu-masu bangsana. Erkiteken sie guna dat kerajaan si mehuli, si kin bangsa pilihen Tuhan, maka Daud mindo gelah Tuhan masu-masu raja, gelah raja banci ndalanken keadilen man raja, bagepe gelah raja banci sukses ibas kepemimpinanna, bagepe gelah raja banci ihormati bangsa-bangsa si deban ras gelah kegeluhen raja ipasu-pasu Tuhan gelah raja nggeluh ibas mejuah-juah.
2. Erkiteken bangsa Israel eme bangsa pilihen Tuhan emaka, masyarakat Israel harus nggeluh sejatera, janah erkiteken raja Israel eme bekas pilihen Tuhan, janah raja Israel merupaken wakil Dibata, maka raja harus ndalanken fungsi Dibata ibas kepemimpinenna, raja harus mereken keadilen ras kedamen, sebab e merupaken sipat Dibata.
3. Raja harus mperdiateken kegeluhen kalak musil dat perlakun siadil, alu bage situhuna raja mengejawantahkan (mengaplikasi) keadilen ilahi situhu-tuhu mereken keadilen si sama rata man bangsaNa. Jadi hukum ras keadilen harus itegakkan i tengah-tengah bangsa Israel alu la memandang status kegeluhen.
4. Enda iangkat guna menegaskan sada perbedaan simutlak antara kepemimpinen raja ibas bangsa Israel, ras kepemimpinan raja ibas bangsa i darat bangsa Israel. Kepimpinen raja ibas bangsa Israel menekankan kerna mperdiateken ras mimpin alu bujur ras adil, bagepe la atena masyarakatna, termasuk kalak musil la ndatken keadilen. Tapi ibas raja i luar bangsa Israel em kepemimpinenna nggeluh ibas “kelaliman ras otoriter”.
5. Alu kepemimpinen sibagenda me maka masyarakat nggeluh alu sejahtera, emaka raja-raja si deban reh ras meteh kern bangsa Israel e ise, janah mindo pasu-pasu Dibata nari, gelah kegeluhen kerajaan ras masyarakatna bali ras kegeluhen bangsa Israel, nggeluh bujur ras adil ras masyarakatna nggeluh ibas mejuah-juah.

APLIKASI
Cita-cita bangsa Indonesia eme gelah masyarakat nggeluh ibas kesejahteraan, emaka perangkat siiciptaken ibas pemerintah mengarah ku je. Janah pemimpin negara, mulai ibas presiden nari se ku tingkat si meteruk harus ndalanken roda pemerintahan simehuli, gelah tercipta me keadilan , kedamen ras kesaejahteraan. Tapi siidah genduari, enda ndauh denga bas kegeluhenta ibas berbangsa ras bernegara. Praktek-praktek kinilabujuren justru ipraktekken piga-piga kalak si la bertanggungjawab, emaka siidah nterem denga rakyat si musil bas negaranta, janah hukum ras keadilen lenga kal itegakkan alu mehuli.
Memang kegeluhen sibagenda mbaba masyarakat jadi apatis (masa bodoh), emaka siterjadi nggo lanai diate rakyat kal dungna mendukung kebijaken pemerintah, tempa-tempa masyarakat lanai mperdiateken norma-norma kegeluhen selaku berbangsa ras bernegara. Perbahanen sibagenda tentuna la mereken dalan keluar si mehuli. Amin gia lit denga pemerintah si la nggit megiken sora penderkuh masyarakat nari. Tapi tek kita, Dibata berkarya denga bas kegeluhen bangsa Indonesia enda. Emaka ula kita putus asa, emaka ertotolah kita man Tuhan, pindo gelah pemimpin gereja ula “terhisap” ras erteman ras pemerintah si la mperdiateken kesejahteraan bangsana, ras la ndalanken hukum ras keadilen si tuhu-tuhu. Ibas kita ertoto guna pemimpin gereja, maka pemimpin gereja banci tetap ndalanken sora kenabianna. Janah ertoto pe kita man pemerintah si lit genduari, sebab ibas pemahaman kinitekenta, pemerintah e me wakil Dibata kap (band. Roma 13). Emaka tentuna ibas kita ertoto guna pemerintah, pemerintah banci ndalkanken pemerintahen sibujur ras mperdiateken kesejahteraan masyarakatna.

Pdt. Steven Kumenit, STh,M.Min.

PEKAN DOA (WARI 6) - Ertoto Guna Meningkatken Spiritualitas Kerina Kalak Karo

BAHAN PEKAN DOA
GEREJA GBKP
WARI VI, JUMAT 30 SEPTEMBER 2011.
================================
Introitus : Adi kalak bujur mandang dingen ngukum aku, tama kiniulin kap e man bangku. Tapi pujin i bas kalak jahat nari la kualoken, sabap aku usur ertoto ngelawan perbahanenna si jahat (Mazmur 141:5).
Ogen : Bilangen 21:6-9.
Khotbah : Nehemia 1:1-10.
Tema : Ertotot Guna Meningkatken Spiritualitas Kerina Kalak Karo.

LATAR BELAKANG
1. Nehemia eme sekalak kalak Yahudi si erdahin i Istana kerajaan Persia selaku juru minem raja. Tapi amin gia Nehemia enggo nggeluhb sikap ije, tetap denga nge perukurenna ku Yerusalem, khususna kerna kegeluhen bangsa Yehuda. Erkiteken sie me tupung reh seninana eme Hanani ras piga-piga kade-kadena i Yerusalem nari, isungkunna kerna perkembangen kegeluhen kalak Yahudi kenca mulih ibas pembuangen. Idatna sada berita kepeken bangsa Yahudi enggo gia mulih ibas pembuangen nari tapi tetap nggeluh ibas perbeben ras kiniseran. Enda jadi erkiteken, tembok Yerusalem enggo sontar ras bangsa i sekelewetna megombang nandangi bangsa Yahudi. Perlu siteh maka tembok Yahudi cukup penting ibas kegeluhen bangsa Yahudi.
2. Kegeluhen siinanami bangsa Yahudi “genduari” iidah Nahemia berhubungen ras Dibata, sebab bangsa Yahudi merupaken bangsa Tuhan. Erkiteken sie me Nehemia reh ku Tuhan Alu pertoton. Nehemia la saja ertoto, tapi pe erpuasa piga-piga wari dekahna, iturikenna isi pusuhna ras keadaan bangsa Yahudi. La saja e, ertoto Nahemia kerna sebab akibat adi bangsa Israel erbahan dosa, ras uga kekelengen Tuhan seh man bangsa Israel adi bangsa Israel jera ibas dosa nari. Situhuna ibas pertoton Nehemia man Tuhan gelah Tuhan mulahi bangsa Israel ibas kiniseran nari, bagepe gelah ibahan Tuhan mekuah ate raja Persia eme Artaserses kempak Nehemia, sebab lit sura-surana reh ku Yerusalem guna mbangun tembok Yerusalem.
3. Ertoto Nehemia man Tuhan, sebab enda sada pendahin si cukup mbelin ras muat resiko si cukup mbelin ka, sebab la saja harus ngelawan bangsa-bangsa i sekelewet bangsa Israel, tapi pe harus ngelawan kibijaken raja, sebab enggo pernah iperentahken raja gelah pembangunan tembok Yerusalem ipengadi, erkiteken iakap, adi enggo dung tembok Yerusalem, bangsa Israel banci mberontak man kerajaan Persia. Emaka perbeben Nehemia enda, iendeskenna man Tuhan gelah Tuhan “meluluhken” pusuh raja ras nabut mulihi kebijakan raja e.
4. Tindaken Nehemia guna nampati pembangunan tembok Yerusalem ras kegeluhen bangsa Israel, erkiteken iidah Nehemia, bangsa Israel enggo cukup ndekah tading i Yerusalem kenca mulih i Babel nari, tapi tetap denga nggeluh selaku bangsa si ceda, subuk kegeluhenna, bagepe tembok Yerusalem. Erkiteken sie me tergerak pusuh Nehemia guna mbangun kerina e, tapi enda kerina ipindona man Tuhan gelah Tuhan nehi sura-surana e.
5. Isamping sie, pertoton Nehemia sibersifat pemindon man Tuhan, gelah perkuah ate Tuhan seh man bangsa Israel.

APLIKASI
Kalak Karo eme bagin si la terpisah ibas bangsa Indonesia keseluruhenna. Janah kalak Karo labo saja tading i kabupaten Karo (kuta Karo), tapi merap ija pa pe. Tapi siniharapken man kerina kalak Karo ijapa pe ia tading lit min biak guna mbangun kuta, subuk i ja ia tading, bagepe i kuta kemulihenna. Kalak Karo la banci egois, sebab ibas pembangunan kota, tentuna mbaba kemajun ras kesejahteraan man kalak Karo sendiri. Saja isadari adi spiritualitas kalak Karo kurang mehuli, maka la terjadi perkembangen pembangunan ras kesejahteraan, subuk i kuta bagepe kesejahteraan pribadi.
Siniharapken bas kerina kalak Karo eme lit keterpanggilenna bagi Nahemia guna mbangun kuta kemulihenna. Kita kerina kalak Karo harus ertoto ras bertindak, sebab ate Dibata kita la saja mindo man baNa, tapi kita harus erdahin (Band. Jakup 2:17). Teklah kita ibas kita ertoto pasti isampati Tuhan, janah pe pemerintah pe ikuit Tuhan pusuhna guna ikut mperdiateken pembangunan ras kesejahteraan masyarakat Karo. Si penting lit min upaya kalak Karo guna ngukurken kern sie.
Kita kalak Karo harus ertoto gelah, Dibata mpedauh kiniseran ibas kalak Karo nari, janah mpedauh sipat nggeluh egois ras rangap (KKN), sebab enda kerina erbahanca perkembangan pembangunan ras kesejahteraan kuta terhambat. Jadi ibas kita ertoto, berarti tek kita man Tuhan si erkuasa singasup erdahin guna kita, bagepe ateta nggeluh ibas kebujuren ras nggit erdahin guna Tuhan.

Pdt. Steven Kumenit, STh,M.Min

PEKAN DOA (WARI 5) - Ertoto Guna Meningkatken Spiritualitas Isiu Kuta Ija GBKP Enggo Ipajekken.

BAHAN PEKAN DOA
GEREJA GBKP
WARI V, KAMIS 29 SEPTEMBER 2011.
=================================
Introitus : Ertotolah guna keperlun kuta e sabap adi sikap ia kam pe ikut sikap (Jeremia 29:7b).
Ogen : Jeremia 29:4-11.
Khotbah : Perbahanen Rasul-Rasul 8:15-17.
Tema : Ertoto Guna Meningkatken Spiritualitas Isi Kuta Ija GBKP Enggo Ipajekken.

LATAR BELAKANG
1. Perkembangen kelak si tek man Yesus enggo seh ku Samaria,
janah cukup nterem kalak si tek i Samaria, termasuk Simon
simerupaken guru si baso. Enda jadi erkiteken lit penghambatan ras
penganiayaan man kalak si tek i Yerusalem.
2. Erkiteken enggo nterem kalak si tek i Samaria, maka Petrus ras Yohanes reh i Yerusalem nari sebage utusen ku je guna ngenen perkembangen kalak si tek i je. Kepeken inenna tuhu kalak si tek enda enggo iperidiken ibas gelar Yesus, tapi Kesah Si Badia lenga nusur man kalak si tek. Emaka ertoto Petrus, janah itamakenna tanna ku babo kalak Samaria e, emaka minter kalak Samaria e ngaloken Kesah Si Badia.
3. Amin gia Petrus ras Yohanes rasul, janah enggo icinepi Kesah Si Badia (band. Wari nusurna Kesah Si Badsia/ Pentakosta), tapi isadari Petrus ras Yohanes karunia Kesah Si Badia rehna ibas Dibata nari. Erkiteken sie me Petrus ras Yohanes ertoto guna mindo Kesah Si Badia gelah nusur pe ku kalak Samaria si enggo tek. Pemahaman enda, guna lebih menegasken kern pemahaman Lukas pemere Kesah Si Badia ibas Dibata nari. Sebab ibas kesaksin Lukas, rehna Kesah Si Badia man kalak si tek, adi ipindona alu ertoto (Lukas 11:13).
4. Jadi ibas Petrus ras Yohanes ertoto, janah “menumpangkan tan, e berarti Petrus ras Yohanes sangana mindo man Tuhan gelah Kesah Si Badia nusur man kalak Yahudi. Bagepe ipihak sideban ngatakenca ibas litna penumpangan tan i babo kalak Yahudi maka kalak Yahudi nggeluh ibas persadan ras Yesus Kristus, ras ndalanken misi keselamatan alu la mbiar.
5. Kenca rehna Kesah Si Badia man kalak Samaria, e berarti Dibata nemani kegeluhen kalak si tek i Samaria, ras ate Dibata alu litna Kesah Si Badia, kalak Samaria banci nehken pelayanan.

APLIKASI
Sisadari maka perkembangen gereja GBKP enggo cukup mbelang kal. Gereja GBKP merap i sebagin negara Indonesia enda. Janah isadari ka kegeluhen gereja GBKP la terlepas ibas kegeluhen berbangsa ras bernegara, khususna uga nciptaken kedamen. Amin gia situhuna perkembangen gereja secara keseluruhen ndatken tantangen si cukup mberat, tapi labo berarti misi pelayanen gereja ngadi, lang. Gereja, termasuk GBKP harus tetap ndalanken misina, ras njadiken bangsa Indonesia, bangsa si aman ras dame. Erkiteken sie gereja GBKP harus njadiken dirina banci ialoken masyarakat isekelewetna lebe, kenca sie gereja GBKP harus ndalanken misina. Pengalamen piga-piga runggun, ija la teraloken masyarakat isekelewetna, erkiteken gereja GBKP lenga jadi sira ras terang, ntah pe lenga kal ternanami kehadirenna man kalak sideban.
Kehadiren gereja (kalak) si tek man Yesus Kristus, tuhu nggeluh ibas tanah perlajangen, tapi la ka terpungkiri maka seh kal serana dat status ras ibas beraktifitas. Tapi ibas pengalamen kiniteken, Dibata tetap nge erdahin ras nemani kalak sierkiniteken man baNa. Janah kuasa Tuhan tetap erdahin ibas situasi siugapa pe, termasuk man kegeluhen gereja si dat tantangen si cukup mberat i Indonesia enda. Emaka siharus idalanken kita ibas kegeluhen bermasyarakat eme sitoto-toton lah kita, gelah kita ngasup dingen megegeh ngaloken situasi enda. Si peduaken erkiteken ibas negara enda pemerintah kap sierkuasa, maka kita pe harus notoken pemerintah, gelah pemerintah ndalanken tanggungjawabna alu mehuli. Sipeteluken, kita harus tetap beraktivitas alu mehuli, janah harus ncidahken moral si melebihi kalak sideban. Teklah maka kita ngasup erbahan si bagenda kerina erkiteken bas kita lit Kesah Si Badia, bagepe erkiteken Tuhan nemani kita. Emaka alu kita ndalanken sibagenda rupana, kehadiren gereja GBKP teraloken kalak si deban.

Pdt. Steven Kumenit, STh.,M.Min

PEKAN DOA (WARI 4) - Ertoto Guna Meningkatken Spiritualitas Kerina Ngawan Ni Perpulungen (Sinodal) GBKP

BAHAN PEKAN DOA
GEREJA GBKP
WARI IV, RABU 28 SEPTEMBER 2011.
================================
Introitus : Ngaloi Jesus nina, "Lit kap tersurat i bas Pustaka Si Badia: Labo alu roti saja manusia enggeluh, tapi arah tep-tep kata si ibelasken Dibata (Matius 4:4).
Ogen : Matius 7:7-12.
Khotbah : Kolose 1:9-14.
Tema : Ertoto Guna Meningkatken Spiritualitas Kerina Ngawan Ni Perpulungen (Sinodal) GBKP.

LATAR BELAKANG
1. Perkembangen kiniteken perpulungen Kolose, erbahanca meriah ukur rasul paulus. Tapi lit sada kearun atena man perpulungen erkite-kiteken lit berkembang sada pengajaren si papak, sincedai pengajaren situhu-tuhu. Erkiteken sie Paulus la erngadi-ngadi notoken perpulungen Kolose gelah tetap ibas pengajaren si tuhu-tuhu. Kepentaren si lit ibas perpulungen harus ipake gelah nggeluh ibas si ngena ate Tuhan, ras lit buah simehuli janah erbagesna min penandai perpulungen Kolose kerna Tuhan. Pertoton Paulus enda ipesehna man Perpulungen, gelah perpulungen banci metenget nandangi pengajaren si la tuhu.
2. Paulus pe mindo man perpulungen gelah perpulungen Kolose ngataken bujur man Tuhan alu ermeriah ukur, sebab erkiteken Dibata me maka perpulungen metunggung i lebe-lebe Dibata janah tentuna nggeluh ibas keselamaten. Jadi situhuna labo erkiteken gegeh ras kengasupen perpulungen, tapi erkite-kiteken lias ras perkuah ate Tuhan nge. Erkiteken Tuhan maka perpulungen lanai nggeluh ibas dosa, sebab dosa erbahanca manusia lanai metunggung i lebe-lebe Dibata, janah erkiteken dosa me maka manusia dat penghukumen Tuhan. Tapi erkiteken perkuah ate Tuhan maka perpulungen lanai nggeluh ibas dosa, sebab enggo ibersihken Tuhan arah Yesus Kristus i kayu silang. Emaka ise si tek man Yesus nggeluh ibas keselamaten. Jadi perpulungen Kolose wajib nge ngataken bujur man Tuhan saja.
3. Isamping sie Paulus menekanken kerna kinirajaan Kristus. Alu maksud erkiteken Perpulungen Kolose enggo terbebas ibas kuasa dosa maka perpulungen Kolose enggo nggeluh ibas kuasa Kinirajaan Anak. Paulus ngenara kerna Yesus Kristus., sebab ibas Yesus Kristus, Dibata mereken kerina kuasa subuk i surga bage pe i doni (band. Matius 28:18). Jadi merupaken sada keriahen tersendiri man perpulungen erkiteken perpulungen Kolose enggo nggeluh ibas kinirajaan Yesus Kristus.
4. Ate Paulus gelah ibas kerina kegeluhen perpulungen Kolose tetaplah nggeluh bagi sura-sura Dibata, ras tetap nggeluh ibas Yesus Kristus.
5. Paulus sengaja ngataken man perpulungen Kolose kerna kinirajaan Terang ras kuasa sigelap. Subuk kinirajaan Terang ras kuasa gelap saling bertentangan. Janah Paulus mbukaken perukuren perpulungen Kolose, ija nai perpulungen Kolose nggeluh ibas kuasa gelap, nggeluh ibas perbudaken, tapi erkiteken kuasa Dibata arah Yesus Kristus, maka genduari perpulungen nggeluh ibas kinirajaan Terang, eme keselamaten. Lanai perpulungen nggeluh ibas perbudaken, tapi enggo nggeluh ibas kemerdekaan.

APLIKASI
Harus siinget kenca Dibata ndilo kita ibas gelap nari bengket ku bas terang, e berarti kita nggeluh ibas sada komunitas (gereja). Ibas sada komunitas enda me harus teridah buah-buah Kesah si Badia. Ibas erti kata kita selaku gereja harus tuhu-tuhu tetap erpengarapen man Tuhan ras ndalanken kai singena ate Tuhan ibas kerina dampar kegeluhenta. Tapi ibas ndalanken enda, lit kepe si la meriah ukur, eme si iblis. Emaka iciptaken iblis erbage-bage cara guna nirangken kita ibas persadan, subuk persadan ras sapih-sapih kita kalak kristen, bagepe persadanta ras Tuhan.
Iblis tuhu-tuhu lebih pintar asangken kita manusia, e terbukti manusia si pemena Adam ras Hawa ndabuh ku bas dosa erkiteken iblis. Iteh iblis nge kai situhuna sura-sura manusia, emaka itawarkenna man banta. Bagepe ibas kegeluhen anak-anak Dibata sideban, ndabuh ku bas dosa erkiteken iblis. Tentuna enda merupaken sada persinget man banta selaku ngawan GBKP, kita harus metenget ula sempat kita kena siding si iblis. Uga carana gelah kita la kena siding iblis. Carana kita harus ertoto man Tuhan Dibata gelah isampati Tuhan kita. Mari sinen upaya iblis ncubai Yesus. Sangana Yesus erpuasa i padang gurun, reh iblis ncubai Yesus, tapi erkiteken Yesus eme Dibata, maka la ngasup iblis nalukenken Yesus. Emaka ibas erbage-bage perbeben ras kiniseran tetaplah reh ku Yesus pindolah kai siiperluken kita, alu bage ipasu-pasu Tuhan me kita. Janah isamping sie ula min kita ertoto guna dirinta saja, tapi ertotolah guna temanta si sada kiniteken, ras erbahan simehuli guna temanta, sebab enda me singena ate Dibata. Alu bage ibas kita ertoto ipengasup Tuhan kita guna ndalanken simehuli singena ate Tuhan. Emaka kemajun gereja GBKP reh dekahna reh ngenana ate Tuhan, erkiteken anggota perpulungen mbiar man Tuhan.

Pdt. Steven Kumenit, STh.,M.Min.

PEKAN DOA (WARI 3) - Ertoto Guna Meningkatkan Spiritualitas Kerina Anggota Ngawan Ni Perpulungen.

BAHAN PEKAN DOA
GEREJA GBKP
WARI III, SELASA 27 SEPTEMBER 2011.
====================================
Introitus : Adi kalak mehuli ertoto, ibegiken TUHAN pertotonna, tapi la diateNa pe kalak jahat (Kuan-Kuanen 15:29).
Ogen : Mazmur 5:2-8.
Khotbah : Perbahanen Rasul-Rasul 2:42-47.
Tema : Ertoto Guna Meningkatken Spiritualitas Kerina Anggota Ngawan Ni Perpulungen.

LATAR BELAKANG
1. Bahan khotbahta merupakan sada reaksi ibas jelma sinterem kerna khotbah ras jawaban Petrus (ayat 14-40). Ibas reaksi jelma sinterem eme iberekenna dirina guna iperidiken, tanda enggo jera.
2. Erkiteken kalak siiperidiken ertambah-tambah, maka jumlah kalak sitek pe enggo telu ribu kalak. Enda ngatakenca cukup nterem kalak Yahudi si tek man Yesus Kristus. Alu bage jelma sinterem enda merupakan penerus ibas bangsa pilihen Tuhan. Sebab ibas sejarah, seh ku Yesus kristus mate, sulit kal erbahanca kalak Yahudi tek man Yesus Kristus selaku Mesias si enggo ipadanken Dibata man bangsa Israel.
3. Cara nggeluh perpulungen teridah ibas sikeleng-kelengen, Persadan silit eme ncidahkan sada perukuren ras sada penggejapen sierbahanca kalak si lit bas ia la nggit ngenen temanna sada persadan nggeluh ibas kekurangen, emaka ibas penjemba Kesah Si Badia kai si lit bas ia idayakenna janah iberekenna man rasul-rasul guna ibagiken man si memerluken, sebab perpulungen e iteruh pimpinen rasul-rasul, bagepe persadan enda tutus pulung ibas rumah pertoton ras I rumah-rumah sapih-sapih ia, ras nggeluh ibas kiniteruken ukur.
4. Meriah ukur perpulungen, sebab ibegikenna khotbah ras pengajaren rasul-rasul kerna Yesus Kristus si enggo keke ibas simate nari janah ibas kuasaNa tetap masu-masu perpulungen. Jadi tuhu ibas kuasa pentakosta begepe kuasa kekeken Yesus Kristus perpulungen nggeluh ibas keriahen. Em situhuna siimaksudken rasul Paulus adi Yesus Kristus la keke ibas si mate nari maka sia-sia me kinitekenta (band.1 Korinti 15:14).
5. Sisampat-sampaten eme bentuk kesaksin kalak si tek man Yesus Kristus, labo saja ibas persadan e sendiri tapi pe i darat persadan e, emaka ngena ate kalak ngenen sie, emaka bengket ia ku bas persadan e (band. Perb. 2:47). Janah enda me hal simbaru ibas kegeluhen kalak Yahudi. Jadi tuhu-tuhu erkiteken Kesah Si Badia mereken pemahaman simbaru kerna makna kegeluhen kalak si tek man Tuhan.

APLIKASI
Adi sibandingken cara nggeluh perpulungen sigenduari ras perpulungen si pemena, tentuna ndauh kal perbedaanna. Spiritualitas teridah kal man perpulungen si pemena. Ibas erti kata makna pertobatan ras nggeluh ersada ras Yesus Kristus mpeturah kekelengen si murni, erkiteken sie, la ia merasa rugi adi i dayakenna kai lit bas ia guna kebutuhan kalak sideban. Tapi genduari adi kita ngerana kerna kekelengen ras nampati, enggo ndauh kal urakna. Bahkan Diakoni gereja simerupaken simbol kekelengen ras sisampat-sampaten lenga kal berfungsi alu mehuli. Bagepe lit nge diakoni si ibahan jadi alat “menghukum”.
Tuhu ibas perkembangen doni sigenduari, sipat individualitis reh teridahna. Emaka bagi si mesera sitik ndalanken kekelengen. Padahal adi siperdiateken kerna perkembangen gereja si pemena erkiteken kekelengen ras sisampat-sampaten, bagepe nggit pulung ras-ras, nggit ertoto ras-ras maka ngena ate kalak si deban man persadan e, emaka ertambah-tambah jumlah persadan e. Jadi intina erkiteken pulung ras ertoto.
Memang siidah ibas kebaktin minggu, bagepe PA si lit, sue ras penelitian siibahan GBKP, kehadirenta terjeng 40 persen saja. Janah ibas 40 persen enda lit denga nge si la tutus kal ndalanken kata Dibata. Bagepe minim denga kalak siertoto ntah pe sierbahan kebaktin keluarga. Padahal enda merupaken sada hal sipenting bas kita. Emaka ibas paksa enda marilah kita kerina ras-ras pulung ras ertoto subuk ibas gereja, PJJ, PA, bagepe ibas rumahta masing-masing (harus ada doa pribadi). Bagepe harus ikuit ibas Lakon persadan Si Badia. Alu bage perpulungen nggeluh ibas keriahen ras nggeluh ibas kekelengen ras sisampat-sampaten.

Pdt. Steven Kumenit, STh,M.Min.

PEKAN DOA (WARI 2) - Ertoto Guna Meningkatkan Spiritualitas Anggota Sektor.

BAHAN PEKAN DOA
GEREJA GBKP
WARI II, SENIN 26 SEPTEMBER 2011
==================================
Introitus : Tapi kalak si ernalem kempak Dibata, tetap ipelimbaruiNa gegehna. Desken rajawali kabang, lalap ia reh ganjangna. Kiam ia, tapi la ia ngelabuh, erdalan ia tapi la akapna latih (Yesaya 40:31).
Ogen : Yesaya 40:28-31.
Khotbah : Pilipi 1:9-14.
Tema : Ertoto Guna Meningkatken Spiritualitas Kerina Anggota Sektor.

LATAR BELAKANG
1. Sijadi bahan khotbah sekali enda eme pertoton Paulus guna perpulungen Pilipi, gelah perpulungen Pilipi tetap nggeluh sue ras singena ate Dibata (nggeluh alu badia). Sekaligus merupaken motivasi man perpulungen Pilipi gelah tetap ndahiken karya keselamaten Tuhan eme nehken Berita si Meriah.
2. Pertoton Paulus ibas penjara nari eme bentukna pemindon gelah perpulungen Pilipi lalap ertambah-tambah ibas pemeteh ras pengalaman ku simehuli. Pemindon Paulus enda gelah pe perpulungen Pilipi tetap nggeluh badia seh kerehen Kristus. Perpulungen Pilipi harus nggeluh ibas buah-buah kebenaren si rehna arah Yesus Kristus.
3. Enda itekanken Paulus man perpulungen Pilipi erkiteken paksa sie lit sada pengajaren si reh i tengah-tengah perpulungen Pilipi si berbeda ras pengajaren Kristus siibaba rasul Paulus. Pengajaren enda erbahanca perpulungen bingung. Pengajaren siibaba kelompok e me kerna keselamaten. Tuhu keselamaten e enggo seh man perpulungen Pilipi, tapi situhuna e lenga kuh kal, emaka adi nggeluh ibas keselamaten situhu-tuhu maka si paling penting man perpulungen Pilipi eme ndalanken hukum taurat, khususna sunat. Ibas pemeteh si lit man perpulungen siniharapken ngasup min perpulungen mbedaken kerna si mehuli ras si la mehuli.
4. Sangana Paulus nuratken surat enda ras ertoto man perpulungen Pilipi, Paulus sangana i penjara. Paulus ipenjara erkiteken Berita si Meriah. Tapi semangat guna nehken berita si meriah la erpeltep-peltep ibas Paulus, minimal Paulus njaga perpulungen si enggo tek man Yesus Kristus. Lit sada hal siitekanken Paulus, maka akap kalak simemenjaraken ia, dahin mberitaken berita si meriah banci ngadi, tapi justru la banci. Sebab ibas ia ipenjaraken, justru nterem kalak sitermotivasi guna nehken berita si meriah. Janah enda me siikatakenna man Perpulungen Pilipi. Jadi justru ipenjaraken, maba keuntungen bagi penyebaran berita si meriah.
5. Pemahaman Paulus kerna penyebaran injil arah ia dipenjaraken eme 1). Istana banci meteh kerna injil. Sebab ibas persidangen Paulus ngataken kerna Injil. 2). Kalak simeteh kerna sienda, lanai ia mbiar, termotivasi ia nehken berita si meriah. Jadi enda me situhuna gegeh berita si meriah sierdahin ibas kerina keadaan, termasuk ibas Paulus ipenjaraken.

APLIKASI
Peranan sektor ibas gereja GBKP cukup penting, erkiteken sie me siniharapken bas sektor-sektor lit min aktivitasna selain PJJ, gelah gereja Tuhan tuhu-tuhu banci ncidahken aktivitasna. Janah perlu siteh sektor eme sada bagin si la terpisahken ras gereja keseluruhen (runggun). Masalah si lit i tengah-tengah sektor eme, lit denga anggota perpulungen sikurang aktiv ibas kegiatan-kegiatan sektor, memang melala penyababna, lit erkiteken sibuk ibas pendahina, tapi cukup nterem erkiteken kiniteken si monce-once denga, sierbahan mekisat reh ku perpulungen. Bagepe lit denga masalah-masalah sideban. Guna ngenen sienda maka pelayanen i tengah-tengah gereja khususna sektor agak terhambat. Erkiteken sie siharus ilakoken gereja eme la erngadi-ngadi notoken sektor, gelah pengurus sektor nggeluh ibas ketetapen ukur ras tambah motivasina, amin gia lit perbeben soal kegeluhen i tengah-tengah sektor, gelah la sempat kendor semangatna guna ngelai. Bage pe ertoto min kita man Tuhan saja, sebab ibas kita ertoto man Tuhan, maka Tuhan ngkuasai kegeluhenta. Gegeh kuasa Tuhan erdahin bas sektor, emaka tambah semangat kita guna tetap ndahiken dahin Tuhan.
Perlu siteh lit sada tanggungjawab sektor ibas pelayanen i tengah-tengah gereja Tuhan eme gelah persadan ras nggeluh ibas kebadiaan tetap nggeluh ibas perpulungen. Emaka tentuna la banci lang kita harus ertoto gelah lit min gegeh ras semangat ibas anggota sektor guna tetap erkemalangen man Tuhan. Alu bage kerina kegeluhen ikuasai Tuhan, emaka kegeluhen ibas sektor la erleja-leja erbahan si mehuli ras si ngena ate Tuhan.

Pdt. Steven Kumenit, STh,M.Min.

Ertoto Guna meningkatkan Spritualitas Isi Jabu ( 2 Samuel 7:25-29)

BAHAN PEKAN DOA
GEREJA GBKP
WARI I, MINGGU 25 SEPTEMBER 2011
==================================

Introitus : "Mulihlah alu dame," nina Eli, "ibereken Dibata Israellah man bandu kai si ipindondu (1 Samuel 1:17)
Ogen : 1 Samuel 1:10-17.
Khotbah : II Samuel 7 : 25-29.
Tema : Ertoto Guna Meningkatken Spiritualitas Seisi Jabu.

LATAR BELAKANG
1. Enda merupaken sada rangkaian ibas ayat sada nari. Janah amin gia enda merupaken pertoton raja Daud, tapi situhuna enda jadi erkiteken respon raja Daud erkiteken kai sura-sura raja Daud la ibere Dibata. Sebab lit sada sura-sura raja Daud eme majekken rumah Dibata sipermanen, sebab paksa sie rumah Dibata berbentuk kemah denga (kemah si badia). Janah sura-sura raja Daud enda ipesehna man Nabi Natan, Tapi ibas sada berngi reh Dibata man nabi Natan guna mpeseh kerna sura-sura Dibata. Nina Dibata labo Daud siharus mbangun rumahNa, tapi Salomo.
2. Pertoton Daud enda merupaken pertoton mindo pemasu-masun man Tuhan nandangi keluarga, gelah keluarga Daud tetap nggeluh sue ras singena ate Tuhan. Pemindon Daud man Tuhan erkiteken palas kinitekenna, sebab idahna karya keselamaten Tuhan man bangsa Israel, sekaligus uga Tuhan mperdiateken kegeluhen Daud. Situhuna Daud ras keluargana la bo kai pe i lebe-lebe Tuhan, tapi Tuhan mperdiateken ia. Emaka amin gia Tuhan la mere Daud mbangun rumah pertoton, Daud la kecewa, sebab e merupaken hak Dibata. Saja siipindokenna gelah ula Dibata ngelupaken keluargana, sebab lit janji Dibata nandangi keluargana.
3. Pemindon pasu-pasu ibas Dibata nari nandangi keluarga Daud, ras ula min Dibata ngelupaken padanNa, enda situhuna sada pemindon gelah Dibata nepati padanNa sekaligus gelah kesusuren Daud tetap “kokoh” seh rasa lalap.
4. Tapi pe Daud sadar, padan Tuhan akan tersehi, khususna nandangi keluarga Daud gelah tetap kokoh seh rasa lalap adi keluarga Daud tetap nggeluh setia ras nggeluh bagi si ngena ate Tuhan. Jadi alu kata sideban kursi tahta Daud si lit i Yerusalem tetap jadi sikerajangen Daud ras kesusurenna (raja Yehuda) adi ia kerina nggeluh setia man Tuhan, adi lang, padan Tuhan e la seh man keluarga Daud ras kesusurenna.
5. Amin gia lit hak Daud guna “menuntut” kerna padan Dibata e, tapi tetap Daud sadar kerina e merupaken hak preogatif Tuhan.

APLIKASI
Pertoton merupaken kesah kegeluhen kalak sierkiniteken man Tuhan Yesus Kristus selaku Tuhan ras keselamaten manusia. Adi kita lanai ertoto berarti kinitekenta mate, padahal kegeluhen manusia itentuken alu kita tek man Yesus saja, sebab si teh Yesus eme ulu kegeluhen (band. Yohanes 14:6).
Pertoton merupaken penghubung antara kita ras Tuhan. Janah sada padan Dibata kai pe sipindo iberekenNa nge. Emaka situhuna adi siperdiateken enda, maka Dibata enggo meteh kern kegeluhenta, emaka selaku manusia si terbatas butuh penampat ibas Dibata nari. Janah ibas kita mindo man Dibata maka pemeliharan ras perlindungen Tuhan pasti seh man banta ras keluarganta. Kuasa Tuhan berkarya ibas kerina kegeluhenta.
Kita ertoto erkiteken siteh Tuhan e Tuhan si perkeleng ras erkuasa, emaka Tuhan ngasup berkarya ibas kerina kegeluhenta, termasuk ibas keluarganta.
Amin gia pertoton merupaken penghubung ras kesah kegeluhenta, tapi labo berarti kenca kita ertoto mis ibereken Tuhan kai siiperluken kita, lang. Tuhan mereken kai siipindoken kita adi kita ertoto alu tutus ras dem kiniteruken ukur.
Ibas perkembangen kegeluhen sigenduari, keluarga-keluarga kristen tuhu-tuhu dat tantangen si cukup berat, janah enda situhu mbaba perbeben tersendiri man keluarga kristen. Apakah e perbeben kerna ekonomi, pergaulan anak, perkembangen IPTEK (internet), bagepe soal hubungen keharmonisan keluarga, Bagepe lit keluarga nggo cukup ndekah erjabu tapi le dat tuah, rsd. Kerina enda adi siukuri la bo kita ngasup “bendungsa” saja siharus lit man banta eme uga maka kita ngasup mpertahanken nilai-nilai kiniteken, gelah kerina isi jabu la ndabuh kubas dosa. Ijenda me maka sipindo penampat man Tuhan. Janah adi kita ngerana kern mindo penampat man Tuhan berarti harus lit waktu sikhusus man banta keluarga-keluarga kristen guna ertoto man Tuhan. Alu bage maka kita selaku keluarga harus tutus ertoto man Tuhan. Si bagenda me mekatep kurang bas keluarga-keluarga kristen. Padahal perkembangen dunia si genduari semakin mencemaskan kita.
Adi tutus kita ertoto maka kuasa Dibata erdahin bas kerina kegeluhenta, janah iajari Dibata kita arah Kesah Si Badia gelah kita banci nggeluh setia ras badia. Kegeluhen keluarganta, nggeluh alu mehuli, sebab keluarganta ipasu-pasu Tuhan. Alu kata sideban bas keluarganta nggeluh spiritualitas. Bagepe selaku orang, tutus min ertoto, gelah anak jabu banci nggeluh bujur ras badia.

Pdt. Steven Kumenit, STh.,M.Min.

Sikap Kegeluhen Kalak Kristen Ibas Ngalaken Situasi Kegeluhen Si La Bagi Ukur (Habakuk 3:17-19).

BAHAN PJJ GEREJA GBKP
TANGGAL 18 – 24 SEPTEMBER 2011
================================

Habakuk 3 : 17 – 19.

Tema : Sikap Kegeluhen Kalak Kristen Ibas Ngalaken Situasi Kegeluhen Si La Bagi Ukur.

LATAR BELAKANG
1. Secara umum nabi Habakuk enda berbeda kal ras nabi-nabi si deban, sebab adi nabi-nabi sideban ngerana kerna persinget kerna dosa-dosa bangsa Israel, berita pelepasan ras berita penghukuman, tapi nabi Habakuk la bage. Nabi Habakuk lebih terfokus man dirina sendiri. Uga jababan Tuhan nandangi perbeben Habakuk ras uga nabi Habakuk ncidahken kinitekenna man Tuhan.
2. Sijadi oratenta sekali enda eme sada bagin si la terpisahken ras pasal 3. Janah enda merupaken pertoton nabi Habakuk. Bagepe ibas pertoton enda, merupaken sada ungkapen kiniteken nabi Habakuk man Tuhan kerna kuasa Dibata. Alu kata sideban enda merupaken sada klimaks perbeben nabi Habakuk kerna Tuhan. Sebab, tangtangna igejapken nabi Habakuk tempa Dibata mpediat saja bangsaNa erbahan kai si jahat, bagepe engkai maka Dibata mpediat bangsa si deban guna ngukum bangsa Yehuda. Padahal bangsa Kasdim (Babel) eme bangsa si la nandai Dibata, bangsa si lebih erdosa asangken bangsa Yehuda. Tapi kenca iukurina maka kalak bujur saja siate Dibata selamat. Perbahanen-perbahanen Tuhan guna nelamatken kalak sibenar saja.
3. Ibas pemahaman sibagenda me maka kiniteken nabi Habakuk ngerana kerna kai pe siterjadi ibas kerina kegeluhen enda, termasuk pe nggeluh ibas perbeben ras kiniseran, kegeluhen ibas doni enda pe “terancam” erkiteken lanai lit ketersediaan pangan, tapi nabi Habakuk hanya mpermuliaken Tuhan saja erkiteken keselamaten siibereken Tuhan man bana.
4. Isamping sie, enda jadi erkiteken nabi Habakuk enggo merenungken kerna karya keselamatan Tuhan man bangsaNa. Emaka amin gia lit penyerangen musuh, bagepe bangsa Tuhan nggeluh iteruh jajahan bangsa Kasdim siberarti lit kehancuren ras kelihen tapi kiniteken nabi Habakuk la pernah mobah. Perlu siteh biasana negara si ikepung musuh harus mengerahkan para petanina guna jadi tentera, bagepe tentera musuh memakan hasil panen negeri siiserangna.
5. Kesimpulan kiniteken nabi Habakuk enda me sierbahanca turah pengakun ras responna. Alu kata sideban kalak sibenar katawari pe mengandalken Tuhan ras ngasup tedis ras erdalan ibas situasi siugapa pe. Janah enda kerina erkiteken ipengasup Tuhan. Kalak benar pasti banci mentasi situasi kai pe.

APLIKASI
Kenca manusia ndabuh ibas dosa maka perbeben ras kiniseran nggeluh isekelewetta, janah sada paksa ngkenai kita. Janah genduari adi sisungken ibas kegeluhenta tep-tep wari, pasti kita kerina enggo pernah ngenanami perbeben ras kiniseran, ise pe ia, sebab perbeben ras kiniseran la mengenal status sosial.
Memang secara real adi banci min kiniseran ras perbeben e ula min ngkenai kita, saja la kap banci bagi sura-suranta, sada paksa pasti ngkenai kita. Janah adi siperdiateken ibas berita-berita si lit, subuk ibas koran bagepe televisi ras radio, erbage-bage bentuk kalak si talu ntah pe si la ngasup naluken perbeben ras kiniseran e. Lit sindarami alu cara doni enda (pinakit masyarakat; judi, pinangko, rsd. Lit si bunuh diri, rsd). Tentuna enda kerina la ngena ate Tuhan.
Kita selaku kalak kristen tentuna meteh maka Tuhan kap sierkuasa ras dem perkeleng, si tetap mperdiateken kegeluhenta, emaka tentuna tetap nge kegeluhen anak-anankNa inenNa singgeluh ibas perbeben ras kiniseran janah pasti isampatiNaiNa. Sebab la ateNa kita nggeluh ibas perbeben ras kiniseran, tapi adi e reh man banta iberekenNa tanNa guna natang kita. Janah perlu ka siteh la pernah ate Dibata mereken kemalun man banta, emaka lalap ipersingetina kita, adi kita nggeluh ibas perbeben ras kiniseran reh man baNa. Nina Yesus :"Marilah kam si latih janah beraten, maka Kubereken pengadi-ngadinndu (Matius 11:28). Bagepe harus siinget ibas kerina kegeluhenta Dibata erdahin guna mereken kiniulin man banta (Roma 8:28). Alu bage situhuna meriah ukurta ras malem ateta erkiteken kita er-Tuhanken Yesus Kristus. Jadi adi reh man banta si la bagi ukurta mislah reh ku Tuhan. Pasti isampatiNa kita. Janah perlu siinget kalak si la nandai Dibata alu payo nge si la nggit reh man Tuhan guna mindo penampat. Tapi kita si nandai Tuhan alu payo, tentuna la jadi sada masalah kal man banta, adi sada paksa reh man banta si la bagi ukurta eme perbeben ras kiniseran sebab siteh nge lit Tuhan sinampati kita.
Tuhu memang perbeben ras kiniseran si reh man banta, mekatep pe mereken kegagalan man banta, tapi siingetlah, enda kerina guna mengintropeksi dirinta, maka kita enda manusia si dem alu keterbatasan. Sipeduaken kerina e guna lebih mempererat hubungenta ras Tuhan. Jadi ula mis kita kecewa ras putus asa adi reh man banta si la bagi ukurta.

Pdt. Steven Kumenit, STh.M.Min.

Tanggungjawab Warga GBKP Ibas Diakonia (Roma 12:9-13)

BAHAN PJJ GEREJA GBKP
TANGGAL 11 – 17 SEPTEMBER 2011
==================================
Roma 12 : 9 – 13.

Tema : Tanggungjawab Warga GBKP Ibas Diakonia

LATAR BELAKANG
1. Ibas oratenta Paulus menekanken kerna kekelengen. Kekelengen siharus iaplikasiken ibas kegeluhen kalak Kristen tep-tep wari. Kekelengen simerupaken undang-undang man kalak Kristen harus teridah ibas eksistensi kalak Kristen.
2. Penekanan Paulus kerna kekelengen ertujun guna njaga kiniersadan perpulungen Roma, ras nggeluh saling mperdiateken sada ras sidebanna. Alu kata sideban kekelengen eme pengerakut simpersadaken perpulungen.
3. Erkiteken sie perpulungen Roma harus mpedauh diri ibas kekelengen eros, janah menerapken kekelengen agape. Kekelengen Eros penekanenna eme cinta manusiawi. Ija ibas cinta manusiawi enda lit sada campuren hawa nafsu, perasaan tertarik ras upaya mencari kesenangen. Penerapen kekelengen enda banci ncedai persadan perpulungen. Erkiteken sie perpulungen harus menerapken kekelengen si murni. Sebab kekelengen simurni tentuna ngangkat wibawa Kristus selaku palas kekelengen manusia ras perpulungen. Erkiteken kekelengen me maka Kristus ngurbanken diriNa guna keselamaten manusia. Kekelengen siiterapken Kristus eme tuhu-tuhu terbuka, banci inen ras igejapken kalak. Kekelengen siiterapken Kristus tuhu-tuhu kekelengen sincidaken karakter Dibata, emaka Kristus la bergaul ras kejahaten. Ibas erti kata, kekelengen e la atena kejahaten. Emaka adi perpulungen Roma menerapken kekelengen sipekulah-kulah, ras ergaul ras kejahaten maka siilakoken perpulungen Roma eme ncedai perkuah ate Dibata simeganjangna kal eme pemere-pemere kesah ras ncedai biak Kesah Si Badia. Sebab perpulungen Roma eme sikerajangen Dibata (band. Epesus 4:30).
4. Bagepe nina Paulus man perpulungen Roma, kekelengen e harus iterapken ntah pe iamalkan ibas hubungen antar sesama anggota perpulungen. Hubungen enda harus teridah bagi keluarga siharmonis. Bagepe hubungen sesama anggota jemaat la saja itandai alu nggeluh harmonis tapi pe harus lit sikap hormat menghormati sada ras sidebanna. Sebab bageme biak kalak Kristen siseharusna. Emaka situhuna guna menerapken enda nggeluh ibas kiniteruken ukur me si harus ilitken.
5. Lebih ndauh Paulus menekanken kerna ngelai Tuhan. Memang ibas ngelai Tuhan melala pengertinna, tapi ijenda itekanken Paulus eme selain saling memberi hormat tapi pe nggeluh ibas keriahen, nggeluh ibas erpengarapen, tutus erdahin, megenggenglah ibas kiniseran ras ertotolah man Dibata alu la erngadi-ngadi, bagepe raskenlah kiniliten si lit bas kita ras teman si sada kiniteken, janah alokenlah kalak sikesilang ibas rumahta. Pelayanen enda la banci kendor, ntah pe perpulungen Roma la banci mekisat ndahiken dahin Tuhan. Sebab enda kerina merupaken pengaplikasian ibas kekelengen.

APLIKASI
Sekali enda kita ngerana kerna diakonia. Diakonia eme salah sada bentuk pengaplikasian kekelengen. Ibas sejarah gereja, erkiteken ije nggeluh kekelengen, maka tambah warina reh teremna anggotana. Bagepe erkiteken diakonia me maka anggota perpulungen lebih banci nggejapken kekelengen Tuhan. Sebab diakonia enda iterapken/idalanken erkiteken mengacu ku bas diakonia Kristus jine. Enda me diakonia simeganjangna kal i bas kegeluhen kalak sierkiniteken. Emaka adi gereja la ndalanken diakonia maka gereja e lenga ikataken gereja si murni.
Guna ndalanken diakonia ibas gereja enda me, maka ibas gereja, termasuk GBKP ngelitken serayan Tuhan khusus membidangi diakonia eme diaken. Bagepe gelah erdalan alu mehuli maka ibentuk me program-program diakonia. Janah adi siidah program-programta ertujun guna simegegeh nampati si kurang megegeh, ikut nggejapken keberaten senina turangta si erceda ate ras simberat baban geluhna, bagepe guna mulahi senina turangta si geluhna ibas kemusilen ras mulahi ibas kebodohan nari, rsd.
Amin gia enda merupaken program gereja, labo berarti kerina e tanggungjawab serayan Tuhan pelin-pelin, tentu lang. Enda kerina tetap jadi tanggungjawab kerina anggota perpulungen. Kerina anggota perpulungen harus ertanggungjawab ras ikut terlibat ibas diakoni secara langsung, subuk diakonia karitatif, diakonia usaha bersama ras diakonia transformasi. Emaka adangen-adangen diakonia harus isehken, bagepe anggota perpulungen harus ndahi kalak sakit, sierceda ate, sierbeban berat rsd. Janah enda kerina harus idahiken alu meriah ukur, ula alu keterpaksaan entah pe pekulah-kulah. Sebab alu ndalanken sienda kerina maka kita enda enggo menerapken hubungen siharmonis sada ras sidebanna ras kita pe nggeluh selaku keluarga Kristen siermeriah ukur. Alu bage terpuji gelar Tuhan.
Harus siinget diakonia labo sada alat guna ngukum kalak. Bagepe, ula min tujunta erdiakonia guna nambahi anggota perpulungen, tapi erkiteken penerapen kerna kekelengen simerupaken undang-undang Dibata (band. Matius 22:37-40). Ibas perbahanenta sibagenda maka ngena me ate kalak man banta, man gereja Tuhan (band. Perbahanen Rasul-Rasul 2:43-47 ; 4:36).

Pdt. Steven Kumenit, STh.,M.Min.

Permata GBKP Si Malang Man Tuhan (Kuan-Kuanen 23:12-21)

BAHAN PJJ GEREJA GBKP
TANGGAL 4 – 10 SEPTEMBER 2011
=============================

Kuan-Kuanen 23:12-21

Tema : Permata GBKP Si Malang Man Tuhan.

LATAR BELAKANG
1. Enda merupaken sada pengajaren sekalak orang tua entah pe sekalak guru man anak ntah pe murid. Tujunna eme gelah sekalak anak banci nggeluh berhasil, emaka guna nggeluh berhasil siharus ihindar eme megiken ajar orang tua ras ndalanken simehuli. Pengajaren orang tua harus ibegiken erkite-kiteken orang tua melala pengalamenna ras enggo inenna erbage-bage model kegeluhen.
2. Sijadi bahan oratenta eme bagin ibas kuan-kuanen kepentaren. Janah guna nggeluh ibas kepentaren maka pendidiken harus nggeluh ka. Hikmat banci ipelajari alu megi ras ndalanken kai siibegina. Jadi kepentaren mbaba sekalak anak nggeluh ibas keberhasilen.
3. Bagepe enda merupaken sada anjuren sekalak orang tua man anak, gelah anak banci terhindar ibas bahaya kecedaan. Erkiteken sie sekalak anak harus menghindarken dirina ibas anggur ras biak perkisat, sebab pemabuk ras perkisat pereh kemusilan ngenca, tapi guna ndatken keberhasilen maka la banci lang harus erkemalangen lebe man Tuhan. Sebab bena-benana kepentaren eme erkemalangen man Tuhan (Kuan-Kuanen 1:7). Jadi unsur-unsur simereken kecedan nggeluh, termasuk pe ije nggelanggar pelanggaren sosial (pemabuk, ras merangap). Siimaksudken eme nilai dosa eme kegeluhen si sementara ntah pe gendek, tapi kalak sierkemalangen man Tuhan ndatken pasu-pasu ibas wari-wari si reh, sebab Dibata masu-masu kalak sierkemalangen man baNa.
4. Kuan-kuanen enda pe la bo saja menekanken kerna keberhasilen sekalak anak, tapi kerna keriahen ukur orang tua adi sekalak anakna jadi pentar. Em sierbahanca meriah ukurna. Bagepe merupaken sada kewajiban ras tanggungjawab sekalak orang tua guna mereken keberhasilen man anakna. Emaka labo salah adi orang tua mekpek anakna alu alasen ngajarken anak e, labo erkiteken pekpek maka anakna mate, tapi adi ipediat orang tua me anak e erbahan si la mehuli, nggelangger pelanggaren sosial bagepe la erkemalangan man Tuhan maka ikut ka peran orang tua meneken anakna ku kematen. Anak la jadi “jelma”. Sebab la itehna kai sibanci ibahanna guna keberhasilenna, erkiteken sie me anak nggeluh ibas “cengkeraman” kinirajaan maut.
5. Sijadi oratenta enda, ngangkat sada kepentaren. Kepentaren eme gegeh sibanci mereken keberhasilen man anak. Emaka anak ula mengabaiken kerna kepentaren, janah kepentaren e lit ibas pendidiken.

LATAR BELAKANG
Keluarga eme institusi sicukup penting ibas pembentukan mental ras spiritualitas anak jabu, bagepe pusat pendidikan, emaka peranan orang tua guna ngontrol ras mereken pendidiken man anak cukup penting. Enda tentuna sedalan ras sura-sura orang tua nandangi anak-anakna, eme gelah anak-anakna banci nggeluh berhasil, subuk intelektualna, moral etikana ras meteh adat. Memang la mesukah guna seh ku je, tapi labo berarti la banci, banci, sipenting lit min keseriusan orang tua.
Memang tuhu, ibas perkembangen doni genduari erbahanca orang tua lit ibas kearun ate ras kebiaren man anak, sebab cukup nterem nge anak-anak mental ras spirtualitasna terganggu, bagepe anak-anak nggeluh ibas hal-hal si la mehuli, si la ngena ate Tuhan. Praktek-praktek sie, erkiteken anak enggo ididik doni enda. Enda kerina banci teratasi adi peranan orang tua lebih intens mperdiateken anak-anakna. Ibas erti kata ibas keluarga harus min tercipta kegeluhen siharmonis, alu bage anak jadi “betah” ras keleng atenaa man keluargana. Bagepe kontrol social orang tua harus lit, labo kebutuhen jasmani ngenca. Enda labo nampati kubas perkembangen anak ku simehulina, tapi justru kebalikenna. Tapi orang tua harus pebelin-belin anak-anak alu keleng ate. Biasana adi anak la ndatken kekelengen ibas jabu, anak e ndarami konpensasi-konpensasi ibas doni enda, enda me sierbahanca anak ndabuh ku bas hal-hal si la mehuli.
Perkembangen IPTEK, khususna komunikasi memang lit ibas dua sisi, eme positif ras negative, janah enda wajar nge. Sijadi kebiaren orang tua eme pengaruh negatife enda. Jadi penungkunen, engkai maka anak banci terpengaruh ku je. Ibas erti kata, anak memanfaatkan perkembangen IPTEK enda ras mpraktekkenca ku si la mehuli, erkiteken spiritualitas anak kurang mehuli. Kita la banci mpersalahkan perkembangen IPTEK, khususna dunia komunikasi, sebab enda la banci terbendung perkembangenna. Siharus lit man orang tua eme njadiken anak-anak erkemalangen man Tuhan. Sebab alu anak erkemalangen man Dibata, kiniteken e sendiri simengontrol anak-anak e. Alu bage anak la nggit makeken kemajun IPTEK ras dunia komunikasi ku hal-hal si la mehuli, tapi banci ipergunakenna kemajun e ku perkembangen mental ras spiritualitasna bagepe ku masa depan kegeluhenna.
Sekali enda kita ngerana kerna anak, erkiteken HUT Permata pe 63 tahunken. Permata iharapken tuhu-tuhu jadi tongkat estafet gereja ras bangsa. Emaka ula min permata terjerumus ku bas pinakit masyarakat, sebab banci membahayaken kegeluhen permata sendiri. Adi ate permata periahken orang tuana, maka lakokenlah hal-hal si mehuli si ngena ate Dibata, alu nggeluh erkemalangen man Tuhan. Alu bage katawari paksa pe permata ipasu-pasu Tuhan.

Pdt. Steven Kumenit, STh.,M.Min.

Rurat Ibas Kristus (Kolose 2:6-10).

BAHAN PJJ GEREJA GBKP
TANGGAL 28 AGUSTUS – 3 SEPTEMBER 2011.
=======================================
Kolose 2:6-10

Tema : Rurat Ibas Kristus

LATAR BELAKANG
1. Kata persinget rasul Paulus man perpulungen Kolose, tujunna gelah perpulungen kolose tetap nggeluh ibas Kristus Yesus ras tetap jemak pengajaren siibereken Paulus ndube kerna kiniteken. Pengajaren Paulus eme nggeluh ibas Tuhan ras tetap mengandalken Tuhan, bagepe nggeluh ibas keriahen ibas Tuhan. Erkiteken kegeluhen sibagenda me maka perpulungen erbuah.
2. Enda itekanken Paulus sebab paksa sie, perpulungen Kolose lit ibas perbeben ras tantangen si cukup berat, khususna kerna Yesus Kristus. Sebab lit piga-piga anggota perpulungen singatakenca ia perlu ngenanami kerna keselamaten simbagesna, janah guna seh ku je lit piga-piga pilihen, Yesus Kristus salah sada pilihen ngenca. Jadi Kristus eme salah sada ngenca ibas manifestasi (perwujudan) Dibata.
3. Kai sura-sura perpulungen kerna ndatken keselamaten sisempurna, ijelasken Paulus. Penjelasen Paulus eme kerna eksistensi Yesus jine. Nina Paulus biak Dibata serta kap ibas diri Yesus Kristus. Janah erkiteken persadan ras Yesus me maka perpulungen nggeluh. Kegeluhen siimaksudken Paulus eme perpulungen enggo bebas ibas dosa nari erkiteken keselamatan siibereken Dibata arah Yesus Kristus.
4. Erkiteken sie me, inasehati Paulus man perpulungen Kolose gelah metenget ntah pe tetap njaga kegeluhen e. Maksudna gelah perpulungen ula sempat kena tipu ibas erbage-bage pengajaren si la tuhu (band. Ayat 8).
5. Tujun sideban Paulus mpersingeti perpulungen Kolose gelah perpulungen la terbaba ibas ajaren – ajaren si la tuhu (filsafat-filsafat kosong), ajaren si lit menekanken kerna pemeteh, tapi perpulungen harus tek ras nggeluh ibas Kristus.

APLIKASI
Kristus eme Dibata jine, i bas Kristus kita banci nggeluh, janah Kristus eme perkuah ras perkeleng, bagepe la lit dibata-dibata ibas doni enda si seri ras Kristus, sebab ibas Kristus biak Dibata nggeluh me. Alu pengangkan sibgenda tentuna malem ateta ibas kita erkiniteken man Tuhan Yesus. Saja ibas kegeluhenta tep-tep wari, kita, khususna Mamre kurang ncidahken kegeluhen sierkiniteken man Tuhan, sebab cukup nterem Mamre terlibat ibas perbahanen si la mehuli si la ngena ate Dibata subuk ibas pendahinna bagepe ibas Mamre bersosialisasi i tengah-tengah masyarakat. Bagepe ibas keluarga, peranen Mamre selaku imam kurang teridah, apai ka ibas bergereja. Ibas bergereja Mamre kurang nterem reh ku gereja ras PA Mamre, talu adi ibandingken ras keaktifen Moria. Memang lit erbage-bage sebab, maka Mamre kurang kehadirenna ibas kebaktin minggu ras PA, rsd. Lit erkiteken sibuk, bagepe lit erkiteken mekisat, rsd. Kecibal sibagenda, jadi perbeben tersendiri man keluarga ras gereja, sebab gerejanta cukup mbelin pengaruh partria hart (garis keturunen bapa/dilaki).
Ibas minggu enda, bahanta lebih terfokus ku Mamre erkiteken HUT Mamre. Alu bage enda jadi sada perenungen man Mamre selaku anak-anak Tuhan, Janah selaku organisasi, Mamre jadi ingan pelayanen guna meningkatken spiritualitas Mamre.
Ngenen situasi genduari enda maka peranen Mamre erpentingna. Emaka Mamre gelah jadi Mamre situhu-tuhu min eme jadi imam ras jadi teladan ibas jabu ras masyarakat bagepe gereja, Mamre harus rurat ibas Kristus. Pengajaren kerna Kristus harus irealisasiken ibas kegeluhen Mamre tep-tep wari. Sebab ibas Mamre rurat ibas Kristus kai pe perbeben ras tantangen si reh man Mamre, Mamre tetap nggeluh ibas Yesus ras nggeluh mpraktekken persadanna ras Yesus ibas kegeluhenna tep-tep wari. Emaka amin gia lit perbeben ras kiniseran, Mamre tetap ngataken bujur man Tuhan subuk arah kata bagepe arah perbahanen. Bagepe ibas Mamre rurat ras Kristus, maka siterjadi eme “pertumbuhen” kiniteken, sebab Kristus eme Tuhan singgeluh, janah iajariNa kita erbahan kai singena ateNa arah pendahin Kesah Si Badia.

Pdt. Steven KUmenit, STh., M.Min.