Ndehara Si Maba Kemalemen Ate (Kejadian 24:57-67)

PERPULUNGEN JABU-JABU

GEREJA GBKP

TANGGAL 30 SEPTEMBER – 6 OKTOBER 2018.

Kejadin 24: 57 – 67.

Tema : Ndehara Si Maba  Kemalemen Ate

LATAR BELAKANG

1.     Sijadi bahan oratenta sendah eme kerna Ribka jadi ndehara Isak. Janah enda berawal ibas sura-sura Abraham. Ate Abraham ope denga ia mate Isak nggo erjabu. Bagepe Isak la banci ngempoi diberu kalak Kanaan. Erkiteken sie me isuruh Abraham suruh-suruhenna si metuana (nen = orang kepercayaan Abraham = Elieser) ku negeri asalna ndube, ku keluargana, gelah suruh-suruhen dat singuda-nguda guna jadi ndehara Isak. Emaka berkat suruh-suruhen Abraham ku bagin utara Mesopotami, janah i je me ia jumpa ras Ribka anak Betuil. Betuil eme anak Nahor, janah Nahor senina Abraham. 

2.     Perjumpan Ribka ras Isak merupaken rencangan Dibata. Janah enda pe iueken suruh-suruhen Abraham, Betuil ras Laban. Erkiteken sie me amin gia lit sura-sura keluarga gelah Ribka tading sepuluh wari nari ras keluarga, tapi erkiteken kerina enda ibas sura-sura Tuhan, maka la tertahanken keluarga Ribka, Ribka arus berkat ku Kanaan ku Jabu Abraham. Bagepe Ribka ngueken sura-sura Tuhan ibas dirina. Emaka ibas perberkat Ribka, keluarga Ribka masu-masu Ribka gelah Ribka jadi nande erjuta-juta kalak ras kesusuren Ribka banci pagi naluken.

3.     Ngangkai kerna kininggiten Ribka ikut ku Kanaan jadi ndehara Isak, labo erkite-kiteken Abraham la nggit Isak ngempoi diberu kalak Kanaan. Tapi  rencana ras rancangan Tuhan kerna keselamatan doni nggo erdahin man Abraham. Kenca sie rencana keselamatan erdahin man keluarga Isak ras Ribka. Erkiteken sie me Ribka jadi ndehara simehuli nandangi Isak, emaka ngena ate Isak man Ribka.

4.     Ngena kal ate Isak man Ribka erkiteken sie terapul me Isak. Perlu siteh kenca kematen nandena, ceda kal ate Isak. Sebab keleng kal Isak man nandena. Tapi erkiteken perbahanen Ribka sebage ndehara mehuli maka terapul me Isak. 

5.     Isamping sura-sura Tuhan erdahin ibas Abraham ras Ribka, Tapi Abraham selaku Bapa kalak sierkiniteken ngenen kiniteken man Tuhan merupakan syarat siutama selaku ndehara Isak. Bage me siicidahken Ribka ras keluargana. Bagepe siidah arah Abraham la ate Tuhan lit percampuran darah antara umatNa ras ras bangsa Kanaan. Ate Tuhan ibas kemurnian sada dareh maka dat sada bangsa sipatuh man baNa saja. Isak merupakan penerus padan Dibata. Emaka ndehara Isak pe harus kalak simehuli ras nggit patuh man Isak selaku Bapa sindalanken peraten Tuhan.

APLIKASI

            Keluarga kristen eme keluarga siijadiken Tuhan alu erpalasken sura-sura ras rancanganNa. Erkiteken sie keluarga kristen arus patuh ibas sura-sura Tuhan e. Gelah keluarga kristen tuhu-tuhu nggeluh erkemalangan man Tuhan, maka penting keluarga kristen nggeluh ibas erkiniteken man Tuhan.

            Ibas keluarga kristen sipaling penting harus icidahken eme keleng ate antara perbulangan ras ndehara. Keluarga sindalanken keleng ate tentuna nggeluh ibas kemalemen ate. Perlu siteh adi nggeluh keleng ate ibas keluarga maka nggeluh keluarga nggeluh alu sisampat-sampaten ras kesetiaan. Gelah seh ku keluarga sempabu (nen = kemalemen ate) maka peranan perbualangan ras ndehara arus teridah. Ibas keluarga lit fungsi masing-masing. Erkite-kiteken  sekali enda HUT Moria pe 61tahun ken, maka penting ngenen peranan Moria selaku ndehara ibas jabuna masing-masing. Kehadiran ndehara ibas keluarga ngasup min jadi kemalemen ate ibas perbulangan ras keluargana. Bagi Ribka min ndehara e singasup ngapuli ras mereken kemalemen ate nandangi perbulangenna.

            Posisi ndehara ibas jabu penting kal. Emaka ndehara harus pentar ras erkemalangan man Tuhan. Alu bage ndehara ngasup ngelakoken simehuli singena ate Tuhan ibas keluargana. Amin gia ndehara e lit pendahinna ras kesibukenna i luar rumah. Melala aktifitasna, tapi selaku ndehara arus tetap idalankenna tanggungjawabna ibas jabuna. Bagepe sipenting eme litna kepatuhen ndehara nandangi perbulangenna. Itehna min posisi perbulangan ibas jabuna. Ibas perbahanen ndehara ibas jabuna sierpalasken mbiar man Tuhan maka ipasu-pasu Tuhan jabuna. Alu bage jabuna nggeluh ibas kemalemen ate.

Pdt. Steven Kumenit, STh.M.Min.






















  

Totokenlah Serayan Tuhan (Efesus 6:19-20)

PERPULUNGEN JABU – JABU

GEREJA GBKP

TANGGAL 23 – 29 SEPTEMBER 2018.

EPESUS 6:19-20.

Tema : Totokenlah Serayan Tuhan.

LATAR BELAKANG

1.     Sijadi bahan oratenta sendah eme pemindon Paulus man perpulungen Epesus gelah perpulungen Epesus notoken ia ibas pelayanenna, gelah Dibata mereken kata-kata sipayo guna ngerana, pang ngerana dingen mpetangkas rahasia Berita Si Meriah.

2.     PemindonPaulus gelah perpulungen aktif ras mperdiateken Paulus ibas pertotonna, sebab bagi Paulus toto eme sada hal sipenting ibas pelayanan. Bagepe alat guna mindo penampat Tuhan, gelah kuasa Tuhan erdahin man Paulus.Igejapken Paulus erkite-kiteken pelayanan Berita Si Meriah merupaken dahin Dibata maka, guna ngangkai kerna sura-sura Dibata arus mindo kuasa Dibata gelah Dibata sipetangkas ras mereken kinipangan man Paulus guna ngerana kerna Berita Si Meriah. Ate Paulus gelah gegeh ras kepentaren manusia la ngkuasai ia, sebab banci gagal Berita Si Meria ate make gegeh ras kepentaren manusia.

3.     Pelayanan Paulus guna mberitaken Berita Si Mariah melala tantangan. Lit tantangan ibas pengajaran Yudaisme (taurat ras sunat), kiniseran ras uga gelah kalak kafir banci tek man Yesus Kristus selaku Tuhan ras Juruselamat. Tantangan-tantangan enda banci iatasi adi gegeh ras kepentaren Tuhan erdahin bas diri Paulus. Emaka pindona gelah perpulungen ikut notoken ia gelah Dibata simasu-masu Paulus. Alu Bage berita Si Meriah banci tersehi ku belang-belang doni enda, khususna nandangi kalak kafir (si la kalak Yahudi) simerupakan tujun utama pendilo Paulus jadi serayan.

4.     Berita Si Meriah eme kuasa Dibata guna nelamatkan kerina jelma (bdk. Roma 1:16). Janah erkiteken keselamatan kerina jelma e, ia nggo idilo Tuhan jadi serayanNa. Bagepe Berita Si Meriah merupakan sada misteri (rahasia) siarus italangi guna ipeseh man jelma sinterem gelah jelma sinterem tek man Yesus Kristus. Erkiteken sie me peranan Kesah Dibata penting kal, emaka perlu ras penting perpulungen notoken ia gelah tangkas kerna sura-sura Dibata e. 

5.     Sihidapai Paulus ibas mpeseh Berita si Meriah la saja masalah fisik (penindasan, ipenjaraken, sakit, rsd), tapi pe ras kalak sibeluh kerna undang-undang Musa, bagepe filsuf Yunani (kalak kafir). Tentuna Kata Dibata arus jelas man bana gelah iangkaina alu payo Berita Si Meriah e. Emaka kata-kata si payo sierpalasken Kata Dibata arus lit man Paulus. Termasuk pe tupung Paulus iadili, banci Paulus  mbela diri alu mereken kata-kata sipayo. Alu bage tangkas man kerina jelma kerna Berita Si Mariah e.

APLIKASI

            Secara umum kita kerina eme serayan Tuhan. Apai kah teologi pelayanan gereja GBKP eme kerina perpulungen eme subjek pelayanan. Tapi secara khusus serayan Tuhan guna ngelai ras mbimbing anggota perpulungen gelah tetap nggeluh ibas persadan ras Yesus Kristus, nggeluh ibas persadan ibas gereja, nggeluh alu harmonis. Serayan siertugas sibage rumapana  eme Pendeta, Diaken ras Pertua.

            Sigejapken tantangan siihadapi serayan Tuhan cukup melala, emaka penting man perpulungen guna notoken serayan Tuhan, gelah serayan Tuhan ngasup ndahiken dahinna alu mehuli. Alu meriah ukur teraturkenna pelayananna alu mehuli. Alu kata sideban ibas kesibukan-kesibukan pribadina sebagai pegawai ntah pe ibas dahin-dahin siibereken Dibata man bana, banci ngejapkenna Dibata nggo ndilo ia guna ngelai ibas gereja, emaka iaturkenna dahinna alu mehuli. Bagepe serayan Tuhan mpersiapken diri alu maksimal guna mpeseh Berita Si Meriah. Seraya Tuhan mengandalkan gegeh kuasa Dibata. Kepentaren Dibata tuhu-tuhu nggeluh man serayan Tuhan.

            Ibas perpulungen rusur notoken serayanNa, maka pelayanan gereja erulina, sebab keakun serayan Tuhan itutupi alu kuasa Dibata. Bagepe ibas perpulungen rusur notoken serayanNa, igejapken perpulungen maka pelayanan ibas gereja la saja “sesaat” tapi berkelanjutan, termasuk uga perpulungen ngenen pemilihan serayan Tuhan (pertua ras Diaken). Perpulungen tuhu-tuhu menggumuli ibas toto gelah pemilihan serayan banci erdalan alu mehuli. Perpulungen notoken gelah serayan siterpilih pagi nggit ngelai, bagepe BPMR mpersiapkan pemilihan alu mehuli. Termasuk uga BPMR mengangkat panitia ras ngelakoken pembinaan man panitia ras serayan Tuhan siterpilih.

Pdt. Steven Kumenit, STh.M.Min.

Maba Perdamen (Yakobus 3:13-18)

PERPULUNGEN JABU-JABU

GEREJA GBKP

TANGGAL 16 – 22 SEPTEMBER 2018.

Jakup 3: 13-18.

Tema : Maba Perdamen.

LATAR BELAKANG

1.     Ibas oratenta sendah Jakup ngerana kerna kepentaren. Kalak silit bas kepentaran arus teridah ibas perbahanen simehuli singena ate Tuhan ibas kegeluhenna tep-tep wari. Adi enda la lit, maka ia lenga ikategoriken pentar. Emaka kalak kristen arus lit kepentaren ibas Surga nari. Sebab kepentaren ibas Surga nari                                                                                            erbahanca kalak kristen nggeluh alu perbahanen simehuli ras meteruk ukur, bersih pusuh peraten, nggit erdame, lemah lembut, la megogoh, dem perkuah ate, la rayo-ayo ras tangkas ukur tangkas kata. Tapi adi biak doni, binatang ras setan eme si la mehuli si la ngena ate Tuhan siibahanna eme percian, ngukuri diri saja, perbual, percian, lit erbage-bage perubaten ras perjengilan. Jadi alu ndalanken kepentaren ibas surga nari siteridah ibas perbahanen tep-tep wari, maka kalak kristen banci igelari kalak pentar.  

2.     Jakup ngerana soal kepentaraen sebab idahna ibas perpulungen kristen lit perjengilan, egois, perubatan ras meganjang ukur, rsd. Bagepe lit guru-guru sibeluh ngerana tapi ibas praktek ndalanken simehuli la lit bas ia. Keadaan enda la mejile ibas kegeluhen persadan gereja, bagepe hubungan sapih-sapih manusia. Erkiteken sie me Jakup mpersingeti man dua kelompok sibertikai ras man guru-gurur gelah sadar, janah tetap nggeluh ibas kepentaren ibas surga nari, ula pake biak doni, binatang ras setan.

3.     Jakup mereken sada pengertin kerna kepentaren. Kepentaren e la terjeng beluh ngerana ras ngangkai kai siikataken kita ras kalak sideban. Tapi kepentaren eme merupakan keutuhan perukurenm pusush bras perbahanen. Kita banci meteh kepentaren sesekalak jelma arah perbahanenna. Erkite-kiteken kepentaren ibas surga nari, tentuna simehuli ras singena ate Tuhan siilakoken ibas perbahanen-perbahanen tep-tep wari. Bagepe erkiteken kita nggeluh ibas sada komunitas, maka kepentaren erbuahken perdamen. Maksudna erkite-kiteken nggeluh bas manusia kepentaren maka selaku manusia singgeluh ibas sada komunitas, la lit bas ia biak cian ate, dirina saja siiukurina, bermegah diri (sombong), tapi singgeluh bas ia eme perdamen.

4.     Alu ncidahken kerna kepentaren situhu-tuhu, maka kalak kristen nggo ncidahken kiniteken siteridah arah perbahanen. Alu bage kepentaren  njaga persadan tetap nggeluh, sebab ibas  kepentaren kita banci nggeluh ibas penyatuan pusuh ras kata-kata. Alu kata sideban kita banci nggeluh siangkan sada ras sidebanna, la nggit kita ncedai persadan singgo lit.

5.     Tujun Jakup ngerana kerna kepentaren gelah persadan kristen la pecah. Tapi arah kepentaren terbangun perpulungen sidewasa ras mbuahken perdamen. Alu sendirina Jakup ngerana kerna prinsip kiniteken man perpulungen. Prinsip kiniteken eme lit perbahanen simehuli. Alu bage kalak kristen nggo ncidahken buah-buah simehuli ibas kiniteken nari. Alu kata sideban erkiteken ngelakoken simehuli maka perdamen me siirani kalak kristen.

APLIKASI

            Dame eme karakter kinirajaan surga. Janah tentuna kita kerina nggit nggeluh ibas kedamen, sebab adi nggeluh ibas kedamen berarti kita banci ngenanami kinirajaan surga e. Tapi siidah nciptaken kedamen ibas kegeluhen keluarga, gereja ras masyarakat tempa-tempa meserah. Engkai. Sebab la kita nggeluh ibas kepentaren si reh ibas surga nari.

            Nina Yesus : Ketuahen kalak sierbahan perdamen sebab iakui Dibata me ia anakNa (Matius 5:9). Yesus ngidah ibas doni enda la lit kedamen. Melala terjadi perubaten, la siangkan, cian ate, penindasan, rsd. Erkiteken sie me merupakan sada keharusan man anak-anak Dibata, ibas kegeluhenna harus maba kedamen. Adi lit idahna kalak rubat, maka sebage anak Dibata harus berusaha mendamaikenca. Bagepe ibas kegeluhen tep-tep wari harus nggeluh ibas kedamen, cinta akan kedamaian. Ibas kita maba kedamen maka lit ulih sialoken kita eme sipemena kita nggeluh ibas ketuahen. Sipeduaken kita iakui Dibata sebage anakNa.

            Kita arus maba perdamen sebab kita nggo leben iperdameken Yesus Kristus. Erkiteken sie me kita nggo nggeluh ibas keselamatan. Emaka kita pe berkewajiban guna nggeluh ibas perdamen. Alu bage kepentaren ibas surga nari harus nggeluh bas kita. Janah marilah sicidahken ibas perbahanenta tep-tep wari kerna kepentaren tuhu-tuhu nggeluh bas kita. Gelah kita banci nggeluh ibas perdamen situhu-tuhu.

Pdt. Steven Kumenit, STh.M.Min.

Nanami Masa Ngudandu, Tapi Inget Si Nepa Kam (Pengkhotbah 11:9-12:1)

KHOTBAH MINGGU

TANGGAL 9 SEPTEMBER 2018

GEREJA GBKP

Invocatio :    Anak si pentar, malem ate bapana ibahanna, tapi anak si lenge la iergakenna nandena (Kuan-kuanen 15:20).

Ogen        :    Lukas 15:11-24 (Tunggal)

Khotbah   :    Pengerana 11:9-12:1 (Tunggal).

Tema        :    Nanami Masa Ngudandu, Tapi Inget Si Nepa Kam.

LATAR BELAKANG

1.     Merupakan kata persinget man kalak si nguda denga ibas ndalani kegeluhenna tep-tep wari. Tuhu selaku anak nguda tentuna jiwa kengudaanna maba keriahen, ras alu la isadarina lupa ise situhuna ia. Perlu siteh kegeluhen i doni nenda sea-sea kap, emaka adi anak nguda la sadarina enda maka kegeluhenna pagi nggeluh ibas kesea-sea ka. Nggeluh ibas doni kematen. 

2.     Kalak nguda ipersingeti kerna Tuhan. Lit Tuhan simperdiateken kegeluhen manusia, janah Tuhan singadili manusia rikutken perbahanen-perbahanen manusia, termasuk anak si nguda denga. Emaka anak singuda denga arus sadari erkiteken Tuhan singadili manusia, maka perbahanen-perbahanen anak nguda arus simehuli singena ate Tuhan. Alu ingetna lit Tuhan, maka anak nguda la isea-seakenna kegeluhenna guna erbahan kebodohan ntah si la ngena ate Tuhan.

3.     Masa waktu kengudaan lit batasna, janah adi sioge terdauhen “kohelet” menggambarkan kerna masa tua. Masa tua dem alu kiniseran. Erkteken sie me maka tupung nguda denga, arus sipake alu meriah ukur. Ula nggeluh ibas kearun ate. Tuhu-tuhu sinikmati masa nguda alu dem keriahen. Kejolak kengudaan arus icidahken. Tapi amin gia nina “kohelet” lakokenlah kai siatendu lakoken, dingen ikutkenlah sura-sura pusuhndu, labo berarti suruhna ngelakoken si la mehuli. Kalak nguda arus sadar lit Tuhan singadili kerina perbahanen-perbahanen, emaka kalak nguda ibas kengudaanna arus tetap sadar ia tinepa Dibata arus ndalanken kai sura-sura Tuhan. Labo sura-sura manusia. Alu bage ibas pengadilan Dibata kalak nguda banci bebas ibas penghukuman Dibata nari.

4.     Masa nguda eme pemere Dibata, bali ras masa tua. Erkite-kiteken masa nguda enda merupaken pemere Dibata, maka arus idalani alu meriah ukur. Lakoken kai siate arus ilakoken, ula mbiar. Maksud kai siarus ilakoken eme perbahanen-perbahanen simehuli singena ate Tuhan. Sebab alu lakoken simehuli alu la mbiar maka ngena ate Tuhan. Emaka amin gia kegeluhen doni enda sea-sea, tapi erkite-kiteken simehuli singena ate Tuhan ilakoken anak singuda denga, maka kegeluhen anak singuda denga eme mehuli. Isambarina si la mehuli jade mehuli.

5.     Koholet pe mpersingeti man anak singuda denga gelah tetap inget Tuhan. Inget Tuhan sinepa ia. Harus siinget erkiteken Tuhan sinepa ia, maka harus siinget ka makna penciptaan eme  simehuli. Alu bage, ate Dibata doni ras manusia arus nggeluh ibas simehuli. Bagepe arus siinget banci mehuli erkiteken kepentaren Dibata. Janah kepentaren Dibata nggeluh bas anak singuda ka,  emaka kepentaren Dibata e me jadi kepentaren anak singuda guna ngeloken kai siatena lakoken ibas kengudaanna, gelah mehuli kerina.

APLIKASI  

            Genduari kita ngerana kerna anak singuda denga erkiteken tanggal 12 September PERMATA genep 70 tahun (HUT PERMATA).

            Erkite-kiteken PERMATA merupakan bagin si la terpisahken ibas pelayanan gereja, emaka kegeluhen PERMATA arus ncidahken PERMATA situtus simehuli singena ate Tuhan. Apai ka siidah kegeluhen sigenduari melala si la mehuli, emaka adi terjerumus ku si la mehuli tentuna la mehuli man PERMATA (Bdk. Ogen). Gelah enda la terjadi maka sipemena : PERMATA arus mbentengi dirina alu kiniteken. Mbiar man Dibata ras tutus ersembah man Tuhan. Siimaksudken tutus ersembah man Tuhan, labo saja tutus ku gereja, PA PERMATA ras PJJ, tapi tutus ndalanken kai simehuli singena ate Tuhan. Jadi ersembah secara formal arus berdambak ras teridah ibas ersembah non formal eme ndalanken kegeluhen tep-tep wari. Amin gia PERMATA denga, arus siinget lit tanggungjawab siarus idalanken PERMATA eme keterpanggilan guna mberitaken Berita Simehuli arah kata ras perbahanen.

Permata ibas kengudaanna la pernah ibatasi Tuhan bagepe orang tua ras gereja. Silahkan saja PERMATA mengekspresikan kengudaan ibas kegeluhenna tep-tep wari. Tapi arus ka siinget ekspresi kengudaan arus ibas konteks kai singena ate Tuhan. Adi sidalanken maka teridah kepentaren sireh ibas Dibata nari singerajai PERMATA. Alu bage PERMATA la nggeluh ibas pinakit sosial. Bagepe perbahanen sibagenda rupana mbaba kemalemen ate man orang tua, sierbahanca gedang umur orang tua. Sipeduaken, orang tua arus mengontrol kegeluhen anak-anak. Peranan orang tua sebage guru agama ibas keluarga arus idalanken, gelah anak bertumbuh ibas kiniteken sibenar ras ngelakoken simehuli singena ate Tuhan.

Pdt. Steven Kumenit, STH.M.Min.

Budaya Dalan Nehken Berita Si Meriah (1 Korintus 9:19-23)

SERMON PERPULUNGEN JABU-JABU

TANGGAL 9 – 15 SEPTEMBER 2018.

GEREJA GBKP

1 Korinti 9:19-23.

Tema : Budaya Dalan Nehken Berita Si Meriah.

LATAR BELAKANG

1.     Perpulungen Korinti rasul Paulus simantekisa, tapi kenca piga-piga dekahna Paulus nadingken perp[ulungen Korinti, lit kelompok sireh ku perpulungen Korinti janah ihasutna perpulungen Korinti gunan ngelawan Paulus. Emaka nggo lit anggota perpulungen Korinti singgo jadi pengikutna. Kelompok enda mpertanyakan kerasulan ras dahin Paulus mberitaken Berita Si Meriah. La iakui kalak enda kerasulan Paulus. Bagepe pelayanan Paulus nehken Berita Si Meriah la murni, ndarami sen saja ate Paulus.

2.     Kai siikataken kelompok e merupaken tuduhen si la mendasar. Erkiteken sie ituriken Pualus kerna kerasulenna ras pelayanan nehken Berita Si Meriah. Khusus kerna nehken Berita Si Meriah, merupakan sada tanggungjawab siiendesken Dibata man Paulus, janah enda labo pilihen Paulus. Erkiteken merupakan kearusen ras sada tanggungjawab siiendesken Dibata, maka erdahin Paulus alu la ngarapken upah. Alu tutus ate Paulus Mberitaken Berita Si Meriah gelah kalak si la nandai Yesus Kristus banci tek man Yesus Kristus. Nggeluh ia ibas keselamatan.

3.     Ibas palas mpetandaken Yesus Kristus gelah tek kalak man Yesus, alu bage nggeluh ia ibas keselamatan, maka Paulus nehken Berita Si Meriah erpalaskan situasi ras kondisi. Bagepe ijadiken Paulus dirina budak nandangi kerina jelma gelah nterem dat Paulus kalak sitek man Kristus. Alu kata sideban, alu sukarela Paulus melepaskan kemerdekaan pribadinya guna mberitaken berita simeriah. Emaka nandangi kalak Jahudi, bagi kalak Jahudi Paulus. Uga kalak Jahudi patuh nandangi undang-undang Musa, bage ka ibahan Paulus. Man kalak si la lit bas ia undang-undang Musa, nggeluh Paulus bagi ia. Nandangi kalak simerampek kinitekenna, ibahan Paulus dirina bagi kalak si merampek kinitekenna. Enda ibahan Paulus erkiteken Berita simeriah, gelah Paulus pe dat pasu-pasu ras bagin ibas Berita Si Meriah eme keselamatan.

4.     Pelayanan Paulus eme pelayanan si menyesuaikan diri alu keadaan. Kelompok ntah jelma siuga siijumpaina, tuhu-tuhu Paulus ngasup menyesuaikan dirina. Sebab alu ngasup menyesuaikan diri ngena ate kalak man Paulus, janah nggit ia megiken Berita simeriah siipeseh Paulus. Bali ras ibahan Paulus nandangi kalak Jahudi. Kalak Jahudi tuhu-tuhu patuh nandangi undang-undang Musa. Nggeluh ibas adat istiadat hukum Taurat. Amin gia Paulus nggo tek man Jesus Kristus, janah lanai terikat ntah lanai lit kewajibanna guna patuh man hukum Taurat, tapi ibahanna bagi kalak Jahudi sipatuh. Bagepe nandangi kalak si la lit bas ia undang-undang Musa (Hukum Taurat) eme kalak si la tek man Tuhan (kalak kafir). Gelah tek ia man Yesus maka Paulus menyesuaikan diri, sambil mpetandakan Yesus eme Tuhan ras keselamatan manusia. La ipetandakan Paulus kerna undang-undang Musa, tapi tek man Yesus Kristus. Bagepe pe siibahanna nandangi kalak simerampek kinitekenna.

5.     Berita Si Meriah arus seh man kerina jelma, suku ras bangsa. Ibas palas enda Paulus mereken dirina jadi budak, emaka selaku budak ia arus ndalanklen sura-sura Dibata, bagepe la ndarami upah ibas dahiken mberitaken Berita Si Meriah. Ndahiken Berita si Meriah eme upahna. Bagepe idahiken Paulus enda erkite-kiteken respon ibas keselamatan siialoken Paulus ras persuruhen Yesus Kristus man Paulus ibas nehken Berita Si Meriah.

APLIKASI

            Berita Si Meriah eme kuasa Dibata guna nelamatken kerina jelma (bdk. Roma 1:16). Emaka Berita Si Meriah arus ipeseh. Janah kita me alat Tuhan guna mpeseh Berita Si Meriah e.

            Perlu siteh ibas kegeluhenta, banci sikataken lit 2 model kecibal manusia, eme kalak si la tek man Yesus Kristus ras kalak si merampek denga kinitekenna. Tentuna tanggungjawabta eme gelah ia banci tek man Yesus Kristus alu erbage cara siisikapken Tuhan man banta, bagepe kepentaren singgo ibereken Tuhan man banta.

            Budaya la saja cara nggeluh siberkembang ras imiliki secara bersama salah sada kelompok, janah diwariskan generasi ku generasi, tapi budaya eme pemere Dibata man banta. Janah budaya ibereken Dibata man kalak kristen guna jadi salah sada alat nehken Berita Si Meriah. Erkiteken budaya merupakan salah sada alat nehken Berita Si Meriah maka selaku gereja, subuk institusi, bagepe pribadi arus memanfaatkan budaya secara maksimal guna mpeseh Berita Si Meriah. Emaka kita arus ngkelengi budayanta sendiri, sebab alu kita ngkelengi ras ikut muat bagin ibas budaya e, ngasup kita mpeseh Berita Si Meriah e. Jadi ula kita anti pati man budaya.

            Kita arus ngataken bujur man Dibata sebab ipenahang Dibata ndahinta Mberitaken Berita Si Meriah. Engkai ? sebab Dibata nggo njadiken budaya jadi salah sada alat Mberitaken Berita Si Meriah. Cuba sinen khususna pesta nereh empoh, simate-mate, rsd. Nggo itenahken keluarga jelma sinterem, kita tading ngerana sue ras tegunta sekalak-sekalak. Ibas tegunta e me banci sipake guna mpeseh Beita Si Meriah. Bagepe lit ka budaya si ncidahken kekelengen. Mari kita muat bagin ras ncidahken kekelengen ibas Yesus Kristus nari. Ibas perbahanen-perbahanen simehuli tentuna ngena ate kalak man banta, janah jelma sinterem banci megiken kata Dibata. Perlu siteh kiniteken banci turah, salah sada eme arah megi. Emaka adi lit cupingta begikenlah Kata Dibata si ipeseh senina turangta.

-->

Pdt. Steven Kumenit, STh.M.Min.