Persembahkenlah Ulih Peraninndu (2 Korintus 9:11-15)

KHOTBAH MINGGU, 2 JULI 2017.

GEREJA GBKP

Invocatio    :    Inget lah maka kalak si sitik ngerdangken benih, sitik ka iperanina; kalak si melala ngerdangken benih, melala ka iperanina (2 Korinti 9:6).

Ogen          :    Ulangan 16:13-15 (Tunggal).

Khotbah     :    2 Korinti 9:11-15 (Tunggal).

Tema          :    Persembahkenlah Ulih Peraninndu.

LATAR BELAKANG

1.       Kalak kristen si lit i Judea lit ibas kiniseran erkite-kiteken kelihen si mesangat (bdk. Perbahanen 11:28-29). Emaka nterem kalak kristen jadi musil. Erkiteken sie me tanggungjawab kalak kristen eme nampati kalak si lit ibas kiniseran. janah enda me tandana sada kula. Ibas erti kata adi lit anggota kula sideban si suin, maka anggota kula sideban pe ikut nggejapken kinisuin e. Bagepe kalak si megegeh nggit nampati kalak si la megegeh. Tujunna gelah kalak si la megegeh e muji Dibata. Ibas rangka si e me Paulus reh ku perpulungen-perpulungen si la kalak Yahudi (propensi Akaya ras Makedoni), selain nehken berita si meriah, ipindona gelah perpulungen-perpulungen e pepulung kolekte guna nampati kalak kristen singgo jadi musil si lit i Yudea.

2.      Nandangi itaruhken penampat e man kalak kristen si musil i Yudea, kepeken perpulungen Korinti lenga ndalaken tanggungjawabna, lenga ipedalanna kolekte e. Padahal himbauan pepulung kolekte enda nggo sada tahun dekahna (2 Kor.8:10-11).  Erkiteken sie me Paulus mereken sada pengajuk man perpulungen Korinti gelah perpulungen Korinti alu meriah ukur ndalanken kolekte guna nampati senina turangna si lit ibas perbeben ras kiniseran e.

3.      Pengajuk Paulus sierpalaskan kata Dibata gelah perpulungen Korinti talang ukurna ras ersura-sura mere. Sebab tanggungjawab kalak singgo ngaloken erbage-bage pemere Dibata, eme mbagiken man kalak siberkekurangan. Jadi dahin kalak kristen singgo ngaloken perkuah ate Tuhan eme merefleksiken (ncidahken) perkuah ate Tuhan e man kalak simbutuhken penampat, tandana tempa-tempa sangana ngelai Tuhan.

4.      Ibas penampat e, lit tujun teologis eme gelah kalak singaloken penampat e ngataken bujur man banta, janah ipujina Tuhan. Bagepe itotokenna kita alu dem keleng ate. Alu bage Dibata imuliaken, sebab ipake Tuhan perpulungen guna mpeseh keleng ateNa man kalak simbutuhken penampatNa. Jenari sinampati nggeluh ibas mejuah-juah, sebab ipasu-pasu Tuhan ia.

5.      Tujun Paulus mereken pengajukman perpulungen la saja gelah perpulungen Korinti ergia-gia pepulung kolekte guna iendesken ku Yudea, tapi gelah perpulungen Yudea tehna tanggungjawab kalak singgo ngaloken Berita si meriah, ras singgo  ngaloken erbage-bage pemere ibas Dibata nari. Alu bage lit bas perpulungen Korinti pelayanan keleng ate simerupakan refleksi kiniteken ras nggeluh ibas persadan kalak kristen.

APLIKASI

            Minggu enda merupaken minggu kerja rani. Janah sekali enda kita isingetken maka lit tanggungjawabta selaku anggota ngawan guna nehken persembahen kerja rani. Ibas kita nehken persembahen kerja rani gejaplah kai si lit bas kita erkite-kiteken bekas pasu-pasu Tuhan. Alu bage ibas kita nehken persembahen e, la tergantung ibas situasi ras latar belakang ekonomi, sierbahanca tempa-tempa berat kita nehken persembahen. Tapi searusna min perpadanenta ras Dibata tupung kita ngawan ndube, bagepe erkiteken kinitekenta man Tuhan, ngasup kita nehken persembahen alu ukur meriah ras ngataken bujur. Jadi ngataken bujur la saja arah kata, tapi arah ulih peranin eme hasil juma, hasil usaha, hasil binaga, gaji, rsd. Enda me siipersembahken kita. Tapi amin bage gia arus siinget kai siikataken pustaka si badia eme kalak si sitik ngerdangken benih, sitik ka iperanina. Kalak si melala ngerdangken benih, melala ka iperanina (2 Kor. 9:6).

             Fungsi kerja rani eme uga kita ngerayakan pasu-pasu Tuhan ras ikut muat bagin ntah pe sirasken ras kalak sideban. Siimaksudken ngerasken ras kalak sideban, la saja ibas ngerayakan kerja rani e, tapi ulih kerja rani e banci iaturken guna pelayanan gereja. Alu bage guna keselamatan jelma sinterem. Jadi ibas kita nehken persembahen kerja rani, kita nggo ikut menopang pelayanan gereja. Bagepe ipihak sideban erkite-kiteken Dibata nggo nemani ibas perdalanen geluhta, emaka banci kita berhasil. Ibas keberhasilenta e, kita iajuk guna ngataken bujur.

            Harus pe siteh persembahen kerja rani berbeda ras persembahen sideban, khususna persembahen persepuluhen. Persembahen kerja rani eme hasil sipemena ras siterulin siipersembahken man Tuhan janah enda ipestaken. Tapi persembahen persepuluhen eme 10 persen ibas hasil siidat kita ipersembahken man Tuhan. Amin gia berbeda tapi secara kiniteken eme respon ibas perentah Tuhan man banta.

            Ibas kita nehken persembahen kerja rani, janah ulih kerja rani ipake guna pelayanan, maka kalak singgejapken pelayanan-pelayanan gereja banci ia ngataken bujur ras muji Tuhan.

Pdt. Steven Kumenit, STh.M.Min.[[-p;;

Siajar-Ajaren Radu Pentar (Mazmur 78:1-8)

PERPULUNGEN JABU-JABU (PJJ)

GEREJA GBKP

TANGGAL 2 – 8 JULI 2017.

Mazmur 78 : 1-8.

Tema : Siajar-Ajaren Radu Pentar.

LATAR BELAKANG

1.      Bangsa Israel eme bangsa siipilih ras siikususken Dibata guna jadi alatNa nehken keselamatan man kerina bangsa. Emaka selaku bangsa Tuhan, bangsa Israel arus nggeluh erkemalangan ras patuh ndalanken kai siiperentahkenNa. Gelah ibas bangsa Israel erkemalangan ras patuh ndalanken perentahNa, bangsa Israel nggo nehken tanggungjawabna peseh keselamatan nandangi kerina bangsa.

2.      Ibas rangka sie, ende-enden Asap enda nuriken kerna perbahanen-perbahanen Dibata singgo ipesehNa man bangsa Israel tupung bangsa Israel i Mesir ras ndarat i Mesir nari ku Taneh Kanaan. Ende-enden Asap enda bentukna pengajaren, gelah lit tanggungjawab kalak Israel guna nuriken man kesusurenna kerna perbahanen-perbahanen Dibata e. Alu bage kalak Israel banci meteh kerna perbahanen-perbahanen Tuhan si mejin siisehkenNa man bangsa Israel, janah mbiar ia ras nggit ndalanken perentah-perentah Tuhan. Bangsa Israel tuhu-tuhu jadi bangsa sierkemalangan man Tuhan. Alu kata sideban, bangsa Israel tek man Tuhan ras lanai jadi bangsa pemberontok bagi icidahken nini ninina ndube.

3.      Bangsa Israel arus jadi bangsa sierkemalangan man Tuhan ras ndalanken kerina perentah-perentahNa. Emaka la ngena ate Tuhan adi bangsa Israel jadi bangsa pemberontak man Tuhan. Sebab adi jadi bangsa pemberontak pasti ihukum Tuhan. janah enda me sijadi man nini nini bangsa Israel, i ja tupung bangsa Israel la megiken kata Dibata kerna muat leto asa cukupna, sebab lit si muat leto melala, emaka ipeturah Tuhan pinakit emaka nterem si mate (Kel. 16:14-20; Bil: 11:32-34). Bagepe tupung Musa i deleng Sinai, ndekahsa akapna Musa nusur i deleng Sinai nari, emaka ibahanna sada lembu emas jadi dibatana, ras atena mimpin ia ibas perdalanen ku taneh Kanaan. Lembuh emas e jadi gancih Musa selaku pemimpin, emaka ihukum Tuhan ia kerina (bdk. Kel.32; Bil.14:1-30; 16, 25). Bangsa Israel ibas kesusuren simbaru enda la banci bage. Emaka  bangsa Israel arus megiken pengajaren Tuhan. Inti pengajaren e me nuriken kerna kuasa Tuhan ras perbahanenNa si mejin, bagepe tanda-tanda kuasa siilakoken Tuhan. bagepe hukumen Tuhan man bangsa Israel. Pengajaren enda arus iajarkan angkatan ku angkaten (generasi ku generasi). Kerina kuasa Tuhan ras perbahanenNa si mejin, bagepe tanda-tanda kuasa Tuhan, ras  hukumen Tuhan banci sioge ibas ayat 12-67).

4.      Kerina kuasa Tuhan ras perbahanenNa simejin, bagepe tanda-tanda kuasa Tuhan ras penghukuman Tuhan, tujunna guna nelamatkan bangsa Israel ras ngaloken pasu-pasu ibas Dibata nari. Emaka kerina enda arus ituriken ku generasi selanjutna.

5.      Pengajaren nggeluh ibas kepatuhen ras ndalanken pedah Dibata eme perentah Tuhan. Emaka bangsa Israel arus ndalanken perentah Tuhan enda. Jadi pengajaran enda labo terjeng nuriken perbahanen-perbahanen Tuhan singgo lewat. Tapi lebih asangken sie, gelah bangsa Israel banci meteh adi la nggit megiken kata Dibata, ihukum Dibata ia.

APLIKASI

            Lit piga-piga cara gelah kita banci jadi pentar eme arah ngoge (tulisan) ras megi (mendengar). Fungsi jadi pentar gelah kita banci ngelakoken simehuli singena ate Tuhan. Jadi salah adi terjeng meteh keadaan doni enda ras gelah la itokohi kalak ngenca.

            Lit sekalak pahlawan nasional gelarna Sam Ratulangi nina : Sitou Tou Tumo Tumou Tou si ertina manusia memanusiakan manusia. Jadi kita manusia bertanggungjawab ngajarkan man temanta manusia gelah temanta e jadi manusia, jadi pentar. Alu bage kita iajarkan gelah kita la jadi kalak egois. Pemeteh si lit bas dirinta arus ibagiken man kalak sideban.

            Adi kita pentar la saja negara jadi makmur, tapi pe negara e nggeluh ibas kedamen, keadilan ras mpraktekken keleng ate. Bagepe gereja nggeluh ibas kedewasaan kiniteken. Sebab fungsi gereja nehken kai singena ate Tuhan ibas doni enda, em siidalanken kita. Bagepe nggeluh kita ibas kerembaken man Tuhan. Janah silakoken kai singena ate Tuhan ibas kegeluhenta tep-tep wari. Emaka adi lit cuping begikenlah (bdk. Markus 4:23). Enda me sierbahanca malem ateta. Emaka mari kita siajar-ajaren ibas simehuli gelah radu pentar kita. Janah perlu siteh ibas kita mbagiken kepentarenta man kalak sideban, berarti kita nggo jadi pancur pasu-pasu Tuhan man kalak sideban. Tapi perlu siteh siimaksudken siajar-ajaren i jenda, la saja kita singajarken man kalak sideban, tapi pe kita nggit megiken pengajaren kalak sideban.

            Situhuna adi siperdiateken kai singgo ilakoken gerejanta (GBKP), khususna Perpulungen Jabu-Jabu (PJJ), je lit siajar-ajaren, sebab radu kita nuriken penggejapen.

            Perlu siteh ibas kita nehken siajar-ajaren, berarti kita saling membagi pemeteh ras pengelaman. Sebab siteh lit keterbatasan bas kita. Tapi pemeteh sidat kita arus ka sipraktekken ku bas kegeluhenta. Alu bage siajar-ajaren enda arus nggeluh ibas kiniteruken ukur.

            Jadi kalak pentar merupakan sura-suranta kerina, emaka mari kita nggeluh siajar-ajaren. Adi sinen ibas kamus Karo-Indonesia, tulisan Darwin Prinst, nina : Pentar bali ras pintar. Bahasa Karo Pentar, bahasa Indonesiana pintar.

Pdt. Steven Kumenit, STh.M.Min.

Sehkenlah Kehamaten Man Tuhan (Imamat 22:1,2, 31-33)

PERPULUNGEN JABU-JABU (PJJ)

GEREJA GBKP

TANGGAL 25 JUNI – 1 JULI 2017.

Imamat 22:1-2, 31-33.

Tema : Sehkenlah Kehamaten Man Tuhan.

LATAR BELAKANG

1.      Kenca bangsa Israel bebas ibas taneh perbudaken, taneh Msir nari, ibas perdalanenna ku taneh Kanaan, taneh siipadanken man bangsa Israel, seh me bangsa Israel i deleng Sinai. Janah i deleng Sinai ipajekken bangsa Israel kemah perjumpan (rumah pertoton). Kenca pajek kemah perjumpan, itangkuhken Dibata Harun ras anak-anakna jadi imam. Fungsi imam eme jadi kelang-kelang bangsa Israel  ras Dibata. Imam arus nehken persembahan bangsa Israel man Tuhan. Erkiteken sie me ngerana Tuhan man Musa, gelah Musa ngataken man Harun. Nina Tuhan gelah Harun ras anak-anak arus mehamat man Tuhan ibas ia nehken persembahan man Tuhan.

2.      Persembahen siisehken bangsa Israel man Tuhan merupaken persembahen si badia. Sebab persembahen e ikhususken ras nggo itotoken guna Tuhan. Bagepe persembahen e merupaken peraturen siibereken Tuhan man bangsa Israel.  Emaka imam pe harus badia. Adi imam la badia (la bersih), maka persembahen e pe dungna lanai jadi badia.

3.      Dibata e Dibata sierkuasa ras sierdolat emaka merupaken sada kewajiban man bangsa Israel arus mehamat man Dibata. Emaka tanggungjawab imam-imam (Harun ras kesusurenna) njaga kehamaten e, arah pelayananna selaku imam ibas kemah perjumpan, bagepe ibas imam muat bagin kai sijadi sikerajangenna, eme man persembahan siiberekenna man bana. Emaka man imam-imam arus njaga kebersihen kulana, ula sempat la bersih (najis) erkite-kiteken bersentuhen ras kalak si la bersih, bersentuhan ras mayat, man daging asuh-asuhen si mate bana, ntah i bunuh asuh-asuhen si meliar. Bagepe imam sangana ndarat air manina, rsd.

4.      Tujun Dibata mbebasken bangsa Israel ibas taneh perbudaken nari eme gelah bangsa Israel ersembah man Tuhan, ras Dibata si badia e jadi Dibatana. Emaka tanggungjawab imam eme njaga kebadiaan Dibata e. Alu bage bangsa Israel tetap mehamat man Dibata.

5.      Kebadian bangsa Israel, erkiteken Tuhan eme Badia.

APLIKASI

            Sehkenlah kehamatan man Tuhan. Enda labo pilihen tapi enda me orat nggeluh kalak kristen.

            Sehkenlah kehamatan man Tuhan labo saja soal materi, tapi ibas ketutusen ibas ndalanken kai singena ate Tuhan, khususna ibas dahin-dahin gereja. Ibas erti kata ibas kerina totalitas ras aktivitas arus min teridah kita nggo nehken kehamatan man Tuhan. Terdauhen ibas kita njaga kebadiaan/bersih maka je me kita nggo nggeluh ibas mehamat man Tuhan. Alu bage kita arus njaga kebadian nggeluhta. Kita arus ngelakoken kai si mehuli singena ate Tuhan. ula kita ngelakoken sierbahanca ceda hubunganta ras Tuhan. sebab adi nggo ceda berarti kita lanai mehama man Tuhan. Kita enda me perpanjangan Tuhan gelah kalak sideban banci mehamat man Tuhan. Emaka kita me jadi model gelah kalak sideban mehamat man Tuhan. Kita banci muat bagin ibas kita nehken persebahan alu mehuli. Siimaksudken mehuli eme kuantitas, kualitas ras carana. Tapi siidah kita lenga seh ku je. Emaka marilah kita mere sue ras kinilitenta. Ula kita mbiar sebab Dibata pasti masu-masu kita. Ibas kualitas. melala denga simereken uang persembahan si “male”. Bagepe lit denga kita lenga pas caranta mereken persembahen. Contoh : lenga kita mpersiapken uang persembahenta alu notoken persembahen e. Lit denga simekarus. Emaka perlu sipekena kerina enda. Emaka ibas kita nehken perbahanen ras persembahen simehuli berarti kita nggo mehamat man Tuhan. Alu bage kalak sideban pe banci mehamat man Tuhan.  Tandana ia mehamat, banci ia muat bagin ras nampati pelayanan gereja.

            Sistim gereja kerna keuangan eme centralisasi. Janah nggo lit aturenna eme 60% guna runggun, 40% guna sinodal. Ibas kita patuh ibas aturen enda maka kita nggo mehamat man Tuhan. Emaka Majelis runggun arus njaga kerina enda.  Tapi adi la kita patuh nandangi aturen enda maka kita la mehamat man Tuhan.

Pdt. Steven kumenit, STh.M.Min.

Erdahin Eme Perentah Tuhan (Kejadian 1:28-29)

KHOTBAH MINGGU TANGGAL 25 JUNI 2017.

GEREJA GBKP

Invocatio    :    Kalak Malas Jadi Musil Kap, Tapi kalak mejingkat, kebayaken jadi ulihna (Kuan-Kuanen 10:4).

Ogen          :    Kolose 3: 22-25 (Antiponal).

Khotbah     :    Kejadin 1:28-29 (Tunggal).

Tema          :    Erdahin Eme Perentah Tuhan.

LATAR BELAKANG

1.      Sijadi bahan khotbahta sekali enda eme pasu-pasu ras persuruhan Tuhan man manusia, kenca Tuhan njadiken doni ras kerina isina, bagepe manusia.

2.      Ibas konteks Kejadin pasal 1 enda teridah maka, ope denga Dibata njadiken manusia sisentuduh ras tempasna (Imago-Dei) – Tselem ras Demuth, leben Dibata njadiken doni ras kerina isina. Emaka situhuna puncak ibas penciptaan Tuhan lit bas manusia. Fungsi manusia ijadiken eme ibas rangka njagai ras ngusahai tinepa Dibata. Erkiteken si e me kenca ijadiken Dibata manusia, minter ipasu-pasu Tuhan gelah ertua bayak gelah jadi nterem. Siimaksudkan jenda eme gelah manusia melahirkan sinursurna siertanggungjawab, situhu-tuhu bagi tempas Dibata.  Bagepe gelah ndat gegeh guna mpengasup manusia ngelakoken perentah Tuhan. Bagepe Tujunna gelah manusia banci ndemi ras naluken doni enda. bagepe banci ngkuasai kerina nurung, perik-perik i awang-awang, bagepe kerina rubia-rubia  daraten. Jadi manusia ibas gelar Dibata ngelakoken dahin i tengah-tengah doni enda. Manusia jadi pelaksana tugas Dibata ibas doni enda.

3.      Pengertin taluken ras kuasai labo ibas pengertin harafiah eme kerina doni ras rubia-rubia bagepe perik-perik harus italuken ras ikuasai, emaka banci manusia ate-ate man doni ras tenepa Tuhan si deban. Tapi pengertinna eme erkiteken manusia eme pelaksana tugas Dibata ibas doni enda maka, manusia arus ngurus, njaga ras melestarikan doni enda ras kerina isina. Alu bage masa depan doni ras kerina isina lit man manusia.

4.      Tuhu manusia ibereken Dibata kedudukan seorang tuan sierkuasa nandangi tinepa doni ras kerina isina. Tapi ipihak sideban manusia arus ibereken tugas guna erdahin sebagai hamba ras pelayan Dibata, sebab kai siidahinken manusia erkite-kiteken persuruhen Dibata. Alu kata sideban, manusia erdahin guna Dibata. Sebab lit rencana Dibata, eme kerina simehuli singgo ijadikenNa arus ijagai ras ilestarikan.

5.      Dibata la saja njadiken manusia ras naruken manusia ibas doni enda bage-bage saja, tapi erkite-kiteken manusia eme tinepa Dibata sisempurna janah merupakan puncak ibas tinepa Dibata, janah merupakan perpanjangan tanganNa ibas doni enda. Tentuna Dibata nggo leben njadiken doni enda ibas rangka kemuliaanNa, bagepe gelah manusia banci erdahin sue ras mandat singgo iberekenNa. Emaka pemeliharan Dibata man manusia teridah arah : a). Waktu. Ibas waktu enda manusia banci erdahin. Lit penunjuk man manusia. Emaka lit waktu istirahat (gelap/berngi) ras lit waktu erdahin (siang). Jadi situhuna Dibata njadiken siang ras berngi/gelap labo saja terjeng mbedakan  siang ras berngi e, tapi pe jadi tanda man manusia. b). Dibata mereken pangan arah tinepaNa (buah). Guna ndatken enda tentuna manusia arus erdahin ras erusaha.

APLIKASI.

            Erdahin   labo merupaken hukuman Tuhan erkiteken dosa manusia. Tapi erdahin merupakan pendilo ras perentah Tuhan gelah njagai ras ngusahai kerina tinepa Dibata. memang, kenca manusia ndabuh ku bas dosa maka itafsirkan erdahin sebage hukuman, sebab teridah sebagai beban. Padahal erdahin erkiteken keriahen ndalanken perentah Tuhan. janah enda me siibahasakan Paulus maka erdahin enda guna Tuhan. Tempa erdahin kutuk, padahal tambah saja gegeh erdahin manusia, sebab manusia arus latih erdahin, arus igegehi erdahin alu ncurcur panasna. Enda ilakoken manusia gelah manusia banci ndatken kebutuhen manusia. erdauhna ibas kita erdahin berarti kita banci memuliakan Tuhan ras menghapus kutuk siibereken Tuhan. (bdk. Jhon of berk – de me).

            Manusia ipasu-pasu Tuhan guna erdahin. Janah erdahin labo saja terjeng ncukupi kebutuhen jasmaninta (makanan minuman), tapi guna nciptakan si lenga lit jadin  lit guna kemulian Tuhan.

            Erdahin eme merupaken keharusan guna kelangsungan nggeluh. Bagepe erdahin guna ertanggungjawab man Tuhan. Bagepe erdahin eme anugerah siarus ipertanggungjawabkan man Tuhan. kerja e pendilo. Emaka ise si la nggit erdahin ihukum Tuhan (bdk. Johanes Calvin).

            Erdahin arus kerja keras bertanggungjawab ras merupakan pelayanan ras ibadah. Alu bage kita arus erdahin alu mbiar man Tuhan. Emaka la kita ngelakoken si la mehuli si la ngena ate Tuhan. Kita ula ikuasai dosa, gelah ula lit bas kita rangap. Ula mamon jadi Dibatanta, tapi Dibatalah jadi Dibatanta.

Pdt. Steven Kumenit, STh.M.Min.