Kamis, 14 September 2017

Kepentaren Dibata Nerangi Budaya (Kolose 2:6-10)



KHOTBAH MINGGU 17 SEPTEMBER 2017
GEREJA GBKP
Invocatio :    Tuhan kap simereken kepentaren, ibas Ia nari kap manusia ndatken pemeteh ras pengertin (Kuan-Kuanen 2:6).
Ogen        :    Kejadin 1:26-28 (Tunggal).
Khotbah   :    Kolose 2:6-10 (Antiponal).
Tema        :    Kepentaren Dibata Nerangi Budaya

LATAR BELAKANG
1.      Ibas perpulungen Kolose lit bahaya ajaran sipapak, sibanci ncedai pengajaren situhu-tuhu, sialoken perpulungen Kolose tangtanga ia jadi Kristen. Ajaran sipapak e me ajaran gnostik. Lit ajaran gnostik simenyangkal kerna eksistensi Yesus Kristus. Ajaran gnostik ngataken Jesus eme Jesus tokoh terakhir perantara antara manusia ras Tuhan, janah Jesus bali ras perantara-perantara sideban si pernah lit. Bagepe pengajaren sipapak singataken guna nandai Dibata gelah ndatken kegeluhen situhu-tuhu, tep-tep kalak arus nembah man kesah-kesah ras kuasa-kuasa si lit i awang-awang. Bagepe manusia arus patuh nandangi adat sunat ras adat peraturan-peraturan si deban.
2.      Paulus mereken kata persinget man perpulungen Kolose, sekaligus ngelawan pengajaren si papak e. Ikataken Paulus, Kristus Jesus eme Tuhan. Janah enda bali ras tangtangna tupung kam perpulungen tek man Jesus Kristus. Erkiteken Jesus eme Tuhan, maka Ia me ulu kegeluhen. Alu bage perpulungen arus rurat ibas Kristus. Maksudna ibas perpulungen rurat ibas Kristus, maka perpulungen banci bertembuh ku simehuli, janah la gampang terpengaruh ibas si la mehuli. Kiniteken perpulungen Kolose arus ergegehna nandangi Kristus, ras arus tetap ngataken bujur man Dibata.
3.      Ibas kegeluhen ersada ras Jesus Kristus simerupaken Tuhan ras keselamatan manusia, maka perpulungen Kolose ula min terpengaruh ibas ajaran-ajaran sipapak sibanci erbahanca perpulungen Kolose lanai nggeluh ibas keselamatan. Pengajaren sipapak enda reh ibas kepentaren manusia. Erkiteken sie me nina Paulus ula ise pe nebu-nebu kam alu kepentaren si la erguna si dem alu taki pacik.
4.      Tuhu Kristus Jesus eme manusia. Tuhu secara umum kemanusiaan Jesus e bali ras manusia pada umumnya. Tapi lit perbedaan secara signifikan antara kemanusia Jesus ras kemanusiaan secara umum. Sebab sada pihak Jesus eme manusia, ipihak sideban Jesus eme Tuhan. Ibas erti kata biak Dibata siserta e lit bas Jesus. Erkiteken sie kuasa isurga bagepe i doni nggo lit man Jesus (bdk.Matius 28:18). Ibas palas enda me maka kalak si tek man Jesus ndatken kegeluhen siserta. Alu kata sideban kalak singgeluh ibas persadan ras Jesus Kristus ndatken kegeluhen serta (selamat).
5.      Ibas rangka memotivasikan perpulungen kolose gelah tetap setia ras tek man Jesus Kristus, maka Paulus mereken pengertin kerna eksistensi Jesus Kristus. Jesus Kristus eme ganjangen asangken kerina kuasa-kuasa  ras kerina pemerintah-pemerentah si la teridah. Bagepe ibas Jesus Kristus lit biak Dibata siserta. Janah erkiteken perpulungen nggo tek man baNa, maka perpulungen Kolose nggo dat kegeluhen siserta eme keselamatan.

APLIKASI
            Harus siteh budaya ras manusia merupakan satu kesatuan si la terpisahkan sada ras sidebanna. Budaya lit erkite-kiteken manusia. Janah makna budaya eme ibas rangka “mengatur” kegeluhen manusia. Amin gia budaya e melekat ibas diri manusia, tapi ia la mengikat ras mengatur man kerina manusia e. Ibas erti kata budaya e banci berbeda ibas daerah ras inganna.
            Melala budaya siberkembang ibas kegeluhenta mehuli, tapi lit ka budaya  sibanci ncedai persadanta ras Jesus Kristus, sibanci mpengaruhi keselamatenta. Ibas erti kata budaya banci mbaba pengaruh si la mehuli ibas kegeluhenta selaku kalak kristen. Janah perlu siteh budaya e la statis. Budaya e lalap berkembang sue ras peradapan kita manusia. Emaka genduari lit budaya modern ras post modern.
            Mekatep terabaikan budaya modern ras post modern e, padahal adi sinen perkembangenna genduari, budaya modern ras post modern e singerina kal. Tapi amin bage gia, la banci siapaikan budaya tradisional. Emaka subuk budaya modern, post modern ras tradisonal kita arus ngenen alu kaca mata kiniteken.
            Kerina budaya e hasil ciptaan manusia. Sebab Dibata mereken kepentaren man banta (bdk.Invocatio) ibas rangka gelah kita banci nggeluh ratur. Banci nggeluh erkemalangan man Tuhan. Tuhu  Budaya e berkembang lalap, sebab kita eme manusia si rukur. Ibas palas enda kita banci memanfaatkan budaya e ibas rangka keselamatan kita ras doni enda.
            Dibata njadiken kita sentudu ras tempasNa ibas rangka naluken ras kuasai doni enda. Alu pengertin budaya-budaya si la mehuli, subuk budaya modern,post modern ras tradisional arus iterangi alu kata Dibata.
            Dibata nggo mereken kepentaren man banta, alu bage ngasup kita meteh apai situhuna budaya simehuli sibanci ikembangken, ras simasapkan. Perlu siteh gereja GBKP eme gereja simengembangkan ras melestarikan budaya. Jadi gereja GBKP la alergi kerna budaya. Guna sie me kita selaku gereja sipakeken kepentaren Dibata e ibas rangka naluken si la mehuli e.  Melala budaya si lit bas doni enda, kenca siterangi kepentaren Dibata, banci sipake guna kemulian Tuhan. Tapi melala ka budaya siarus ibeneken.
            Memang siidah nterem kalak kristen siterikut ibas budaya si la mehuli. Jadi penungkunen man banta, engkai maka bage ? enda erkite-kiteken la kita rurat ibas persadan ras Yesus Kristus. Emaka la kita bertumbuh ibas kepentaren Dibata. Adi rurat kita bas Ia, janah megegeh kinitekenta, ugapa pe hebatna pengaruh budaya (silamehuli), la kita terpengaruh ngikutkenca, tapi sebalikna ngasup kita nerangi budaya si la mehuli e. Perlu siinget Jesus Kristus selaku Tuhanta nggo mereken man banta kegeluhen siserta. Emaka ula erkiteken budaya si la mehuli kegeluhen siserta e bene bas kita.

Pdt. Steven Kumenit, STh.M.Min.

Selasa, 12 September 2017

Pengerakut Kiniersadan (Pilemon 1:8-20)



PERPULUNGEN JABU-JABU (PJJ)
GBKP KLASIS MEDAN KUTA JURUNG
TANGGAL 17-23 SEPTEMBER 2017.
Pilemon 1:8-20.

Tema : Pengerakut Kiniersadan.

LATAR BELAKANG
1.      Sijadi bahan orantenta sendah eme surat Paulus ibas penjara nari guna mindo gelah Pilemon ngaloken Onesimus ntah pe si Erguna jadi seninana. Alu bage Pilemon la ngukum si Onesemus/  Erguna.
2.      Onesimus/erguna kiam mbaba erta tuanna Pilemon. Ibas pelarianna e, jumpa ia ras Paulus.Tupung sie Paulus ibas penjara Roma. Ibas perjumpaan e, dungna Onesimus/ Erguna jadi kalak si tek man Jesus Kristus, bagepe jadi anak Paulus ibas kiniteken. Janah perlu siteh salah sada alasan budak melarikan diri eme gelah banci ia jadi bebas.
3.      Pilemon eme kalak bayak i Kolose, nterem budakna. Salah sadana eme Onesemus/ Erguna. Janah enda salah sada aset man tuan. Selaku tuan nandangi budak-budak, tuan lit hak istimewa. Bahkan banci sikataken kegeluhen budak lit man tuanna. Emaka merupakan sada konsekwensi adi budak kiam ibas tuanna, maka lit hukuman sibanci ibereken tuanna. Janah hukuman e nggo iatur ibas hukum kerajaan Romawi. Janah ibas kerajaan Romawi abad sipemena perbudakan merupakan hal sibiasa.
4.      Iteh Paulus tanggungjawabna, subuk sebagai warga negara, bagepe sebage kalak kristen, gelah Onesimus/Erguna mulih ku tuanna Pilemon. Sebab ibas undang-undang pemerintah Romawi, adi lit sibuniken budak-budak sikiam maka ia iancam hukuman i kekaisaran Romawi. Ibas pihak sideban adi tetap Onesimus/Erguna tetap ras ia, maka banci ikatan persahabatan kristiani singgo terjalin sedekah e ceda. Situhuna enda alasan praktis.
5.      Alasan sideban eme a). Onesemus/Erguna kenca ia jadi kristen,la saja terjeng budak tapi ndauh ganjangan asangken budak eme senina kekelengen. Amin bage gia labo berarti Onesemus/Erguna nggo bebas. Enda lebih menekanken kualitas hubungan ikaten keleng ate ibas Yesus Kristus. Jadi mindo Paulus man Pilemon gelah Pilemon ngaloken ras jadiken Onesimus senina kekelengenna. b). Adi akap Pilemon Paulus temanna, maka alokenlah Onesimus/Erguna bagi pengaloken Pilemon man Paulus. Perlu siteh budak banci bebas adi lit uang tebusan. c). Adi lit utang Onesimus/Erguna, Paulus nggalarisa. Kerna sienda isingetken Paulus, situhuna lit utang Pilemon man Paulus. Utangna eme Pilemon nggo jadi kalak si tek man Jesus erkite-kiteken Paulus. d). Adi ialoken Pilemon si Onesimus/Erguna maka la saja senang ukur Paulus, tapi ikaten ersinana ibas Kristus tetap terjaga. Janah enda ilakoken Pilemon erkite-kiteken Tuhan. Pemindon Paulus enda, labo berarti lit unsur pemaksaan, lang. Tapi erkite-kiteken kewibaan sekalak rasul cukup iergai ras ihamati tupung sie.

APLIKASI
            Ibas gereja kita irakut ibas persadan. Amin gia kita irakut ibas persadan, labo berarti latar belakang status sosial ibeneken. Lang. tapi latar belakang status sosial lanai jadi penghalang man banta ibas kita nggeluh i tengah-tengah gereja.
            Sierbahanca pengerakut kiniersadanta megegeh eme kiniteken man Jesus Kristus. Ibas kita erkiniteken man Jesus Kristus, maka kita nggo nggeluh mbaru. Biak nggeluh mbaru litna karakter Kristus eme kekelengen. Ibas karakter Kristus si lit bas kita, maka si idah temanta sideban eme senina turangta.
            Ibas kalak Karo lit singerakut persadanta eme budaya. Tentuna suku sideban lit ka. Ibas budaya Karo lit orat nggeluh eme merga si lima, rakut siteluh, tutur siwaluh, perkade-kaden 12+1. Ergegehna persadan enda adi kekelengen siiterangi Kata Dibata nggeluh. Erkiteken sie me gereja tetap melastarikan budaya Karo alu tetap mperdiateken prinsip-prinsip kekristenan. Erkiteken sie me siidah gereja nggo mbue berperan ibas budaya Karo. Contoh, adi lit keluarga anggota perpulungen erceda ate, janah kalimbubu ntah anak beru keluarga lenga reh maka anggota gereja banci berperan sebage anak beru ras kelimbu, bagepe senina nandangi keluarga si erceda ate.
            Ibas perenungan Pilemon 1:12-14 eme, amin gia kita iergai ras ihamati kalak, tapi labo berarti adi lit kalak sisalah janah reh ia man banta, erkiteken mekuah ateta, tempa-tempa sibuniken ia. Tapi justru kita arus mereken dalan keluar, ras mindo man temanta guna banci pupur sage.   
           
Pdt. Steven Kumenit, STh.M.Min.

Selasa, 05 September 2017

Kerina Tinepa Dibata Pujilah (Mazmur 104:1-9)



PERPULUNGEN JABU-JABU (PJJ)
GEREJA GBKP
TANGGAL 10 – 16 SEPTEMBER 2017.
Masmur 104:1-9.

Tema : Kerina Tinepa Dibata Pujilah.

LATAR BELAKANG
1.      Pemazmur muji tinepa Dibata, erkite-kiteken jilena. Janah kerina tinepa Dibata e patuh nandangi Tuhan. Kerina tinepa e ijadiken Dibata alu ratur.  Terdauhen kerna pujin pemazmur kerna tinepa Dibata enda merupaken pengakun kiniteken pemazmur sendiri kerna kuasa Dibata.
2.      Tinepa Dibata simejilena e, ngataken la bo Baal sinjadiken doni ras kerina isina, bagi kiniteken kalak Kanaan. Sebab kalak Kanaan tek doni ras kerina isina baal sinjadikenca. Tapi Tuhan sinjadiken doni ras kerina isina. Doni enda lume denga ras la lit tempasna. Ibas kuasa Dibata kerina ijadiken Tuhan ibas 5 wari dekahna (bdk. Kejadin 1).
3.      Tinepa Dibata enda, idah pemazmur la bo saja patuh ras ngelai Tuhan, tapi tinepa Dibata enda saling mbutuhken sada ras sidebanna. Bagepe Lau simerawa, tapi kenca isergangi Tuhan, lau e kiam ku ingan siisikapken Tuhan. Emaka lau e lanai namburi doni enda. Siimaksud Tuhan sergangi lau eme iperintahken Tuhan gelah lau e ku ingan singgo isikapken Tuhan.
4.      Ibas pengakun kiniteken pemazmur, kenca inenna tinepa Dibata maka isimpulkenna : a). Dibata eme Raja. b). langit eme kemah ras ipajekken Tuhan RumahNa i babo lau i datas langit. c). Embun ijadiken gereta Tuhan. d). Angin jadi persuruhen Tuhan. e). litna kepatuhan man Tuhan. Arah enda ate pemazmur ngatakenca kerina tinepa Dibata si mejile e ibas kendali Tuhan.
5.      Ibas kiniteken pemazmur banci isimpulkenna maka arah tinepa Dibata, kuasa Dibata teridah. Emaka pemazmur mereken sada motivasi nandangi tendinna gelah pujilah Tuhan. Tuhan saja sipatut ipuji.

APLIKASI
            Adi siperdiateken kerna tinepa Dibata siisaksiken ibas Kejadin 1. I je ikataken kerina siijadiken Tuhan mejile. Janah Tuhan nggo masu-masu ras mereken mandat man banta guna taluken ras kuasai doni enda serta isina. Tapi siidah mandat enda isalah pergunaken kita. Siidah kita rate-ate ndalanken mandat taluken ras njagai doni enda. Makna taluken ras kuasai doni enda eme ibas rangka njagai ras merawat tinepa Tuhan.
            Genduari erkiteken kerangapenta, maka tinepa Tuhan sideban nggo ceda. Padahal memuliaken Tuhan la saja sekerajangen manusia, tapi ikut pe tinepa Tuhan sideban. Maksudna ibas tinepa Tuhan ndalanken fungsina eme ekosistim terjaga, je me bentuk tinepa Tuhan sideban muji Tuhan. Maksudna lingkungan alam simehuli, si saling mbutuhken, je me ia muji Tuhan. Tapi genduari subuk lingkungan alam, bagepe lingkungen inganta tading nggo ceda. Nggo melala lingkungan alam ceda, lingkungen inganta tading pe ceda eme buang sampah semberangan, terjadi ilegal loging, emaka adi nggo kenca udan minter reh bancir. Sungai pe la nai mejile. Nurung-nurung si lit I sungai bagepe i lawit nggo melala bene, sebab lit simuat nurung alu la bertanggungjawab, make racun ras pukat harimau, rsd.
            Adi nggo ceda ? kai siarus sibahan ntah pe silakoken kita gelah tinepa Tuhan si deban banci mehuli kerina. Tentuna siarus lit bas kita eme meteh kerina Tinepa Tuhan, emaka kita arus njaga ras ngerawat mulihi. Arus sipekena-kena mulihi kai singgo ceda. ibas perbahanen sibage rupana, ngataken kita mbiar man Tuhan ras mandat singgo ibereken Tuhan ndube man banta silakoken alu mehuli.

Pdt. Steven Kumenit, STh.M.Min.