Selasa, 15 April 2014

Ukumenta Itanggung Yesus (Lukas 23:33-43)



SKHOTBAH JUMAT SIMBELIN 18 APRIL 2014
GEREJA GBKP
Introitus   :    Tapi si tuhuna ia nge si maba kiniseranta, ia nge si mersan si mesuita. Kiniseranna iakap kami mbarenda ukumen si ibereken Dibata man bana (Yesaya 53:4).
Ogen        :    Mazmur 22:2-12 (Responsoria)
Khotbah   :    Lukas 23:33-43 (Tunggal).
Tema        :    Ukumenta Itanggung Yesus.

LATAR BELAKANG
1.      Salah sada bentuk hukuman mate siilakoken pemerintah Romawi nandangi kalak jahat eme ipakuken i kayu persilang. Yesus raduken dua kalak penjahat ibaba ku bas ingan takal-takal guna iukum mate ntah pe ipakuken i kayu persilang. Ibas sienda maka Yesus ipeseri ras kalak jahat, padahal Yesus la erbahan sijahat, emaka la patut Yesus ihukum matei (band. Kai nina sekalak kalak jahat isamping Yesus- ayat  41).
2.      I datas kayu persilang Yesus ertoto man bapaNa nina o Bapa alemi min kalak enda sebab la iangkana kai siibahanna enda. Yesus ertoto guna kalak sinalibken Ia. Sebab adi tehna kai siilakoken kalak sinterem e tentuna Yesus la iukum mate. Enda me sada bentuk keleng ate siicidahken Yesus nandangi kalak singelaksanakan hukuman  mate e. termasuk guru-guru agama, pemimpin kalak Yahudi ras kalak Farisi.
3.      Bentuk penghukuman siidat Yesus amin gia seri ras kalak jahat eme  i pakuken i kayu persilang, tapi siidah lebih kejam perbahanan prajurit man Yesus asangken man dua kalak jahat siisamping Yesus. Yesus tuhu-tuhu isiksa ras iihina.
4.      Kai siinanami Yesus kerna kiniseran i kayu  persilang merupaken sada pengrealisasian ibas kerina nubuat nabi-nabi ras pengenehenen Yesus. Janah enda pe nggo ituriken Yesus man ajar-ajarNa. Emaka  la bo merawa Yesus kerna kai siibahan prajurit bagepe sekalak kalak jahat e man baNa.
5.      Ibas kayu persilang teridah maka ise sitek man Yesus selaku Raja, maka man bana ibereken nggeluh ibas keterkelinen. Nggeluh ras Yesus i Pardis. Enda me siikataken Yesus man salah sada kalak jahat siisampingna erkiteken iakukenna Yesus selaku Raja, tek ia ibas kerehen Yesus pagi.

APLIKASI
            Hukumen Yesus sada bukti keegoisan ras kiniganjangan ukur manusia. Adi iangka manusia kerna ise Yesus, tentuna la kap Yesus ihukumna i kayu persilang, tapi ukur sibersih nggo itutupi kuasa si iblis maka Yesus ihukum I kayu persilang.
            Dosa singelengketi manusia me si erbahanca, Tuhan reh ku tengah-tengahta guna nelamatken kita. Emaka adi sinen kerna kesalahan ras dosa siibahan kita, maka sepatutna kita nge si harus lit i kayu persilang e, labo Yesus. Yesus i kayu persilang ibas rangka ncidahken uga keleng ate Tuhan man manusia. Sebab ate Tuhan, kita selaku tinepaNa nggeluh ras Ia.
            I Kayu persilang teridah tuhu-tuhu Yesus ngkelengi kita, emaka ula kita mbiar adi kita jumpa perbeben ras kiniseran, sebab Tuhan pasti nampati kita. La ate Tuhan kita nggeluh ibas dosa, emaka ipulahi Tuhan me kita ibas erbage-bage perbeben ras kiniseran. Emaka ula bene pengarapenta man baNa. Teklah kita maka Tuhan pasti nampati kita.

Pdt. Steven Kumenit, STh.M.Min.

Tuhan Yesus Enggo Keke, Beritakenlah ! (Kisah Para Rasul 10:34-43)



KHOTBAH TANGGAL 20 APRIL 2014
GEREJA GBKP
Introitus   :    "O kematen, i ja kemenangenndu? O kematen, i ja bisandu? (1 Korinti 15:55).
Ogen        :    Mazmur `118:1-2; 14-24 (Anthiponal).
Khotbah   :    Perbahanen Rasul-Rasul 10:34-43 (Tunggal)
Tema        :    Tuhan Yesus Enggo Keke, Beritakenlah !

LATAR BELAKANG
1.      Sijadi oratenta sendah eme sada khotbah  Petrus i tengah-tengah rumah/jabu Kornelius, kenca Kornelius ndatken pengenehenen. Khotbah enda sekaligus nuriken kerna pengenenehen siidah Kornelius bagepe Petrus sendiri.
2.       Kornelius ndatken pengenehenen erkiteken tek ia man Tuhan, amin gia ia labo kalak Jahudi, janah perbahanenna mehuli, isampatina kalak siperlu man sampaten (ayat 2).
3.      Petrus selaku kalak Yahudi, lit denga bas ia konsep, maka keselamatan enda hanya milik kalak Yahudi, tapi erkiteken kai sijadi ibas Kornelius, maka turah pengangkanna simbaru kerna keselamatan. Kepeken keselamaten e pe ibereken man sesekalak jelma, adi ia erkemalangan man Dibata ras ngelakoken kai simehuli (band. Ayat 35). Jadi i lebe-lebe Dibata manusia la erdobahan. Kerina bangsa seri nge kerina i lebe-lebe Tuhan.
4.      Petrus la saja nurikenken kerna hakekat manusia i lebe-lebe Dibata, tapi pe ituriken Petrus kerna perbahanen keselamatan siilakoken Yesus i tenga-tengah doni enda, eme nehken perbahanen simehuli, pelawes setan, bagepe kerna kematen ras kekeken Yesus ibas simate nari. Bagepe kerna eksistensi rasul-rasul. Ija kenca Yesus keke ibas simate nari, isuruhna rasul-rasul ersaksi, janah ise si tek ialemi Dibata me dosa-dosana. Jadi khotbah Petrus endanuriken silengkap kerna hubungen manusia ras Tuhan, bagepe kerna eksistensi Yesus i tengah-tengah doni enda.
5.      Kekeken Yesus eme sada kejadin situhu-tuhu, sebab ajar-ajar (rasul-rasul) naksiken langsung kejadin e ntah pe jadi saksi.

Aplikasi
            Banci saja lit kalak sisangsi/ la tek kerna kekeken Yesus. Tapi kita selaku kalak kristen harus tek, sebab lit saksina eme rasul-rasul. Erkiteken tek kita maka Yesus nggo keke, berarti tek ka kita maka kematen sijadi kebiaren manusia nggo italuken Yesus. Emaka kalak sitek man Yesus ndatken kegeluhen sirasa lalap/keselamatan.
            Ibas kekeken Yesus simereken keselamatan man banta, enda seharusna jadi keriahen tersendiri man banta, emaka kita harus ngataken bujur man Tuhan. Sebab siteh lit Tuhan sierkuasa. Kuasa Tuhan melebihi kuasa iblis/setan. Enda teridah ibas doni kematen simerupaken kinirajaan iblis, Tuhan pe erkuasa i je, sebab nggo keke Tuhan ibas doni kematen nari.
            Ibas palas enda me maka lit sada tanggungjawabta eme mberitaken kerna kekeken Yesus. Kekeken Yesus mereken kemenangan man manusia, sekaligus mereken pergegeh man manusia. Memang ibas kita mberitaken kerna kekeken Yesus harus ibas dua dampar, eme 1). Arah kata. 2). Perbahanan. Janah dua dampar enda la banci ipisahkan.
            Makna kalak singgeluh ibas kekeken Yesus eme lanai lit bas kita kuk/budak dosa, tapi ndalanken simehuli singena ate Tuhan, gelah kita ndatken pasu-pasuNa.

Pdt. Steven Kumenit, STh.M.Min.

Selasa, 08 April 2014

Anakku Eme Kehaganku (Kuan-Kuanen 15:20-24).



BAHAN PJJ GEREJA GBKP
TANGGAL 13 – 19 APRIL 2014.
Kuanen - Kuanen 15: 20-24.

Tema : Anakku Eme Kehaganku

LATAR BELAKANG
1.      Secara umum kitab Kuan-kuanen bengket ibas kumpulan kitab kepentaran, sinjelasken kerna moral ras etika kegeluhen manusia. Memang ibas budaya timur tengah, kepentaren eme bagin kegeluhen rohani ras budaya siiergai kal. Janah secara umum kitab kuan-kuanen enda mereken sada pengertin man manusia gelah manusia banci nggeluh alu mehuli sue ras peraten Dibata. Erkiteken sie me ibas kitab enda rusur icidahken dua hal eme simehuli ras si la mehuli, alu sada tujun manusia banci milih simehuli.
2.       Ibas oratenta, Salomo mereken sada pengajaren nandangi anak, gelah mperdiateken ras ngergai orang tua. Sebab orang tua  mempunyai peranan sipenting ibas kegeluhen bangsa Israel. Salah sada peranan orang tua eme uga mendidik anak gelah anak erkemalangan man Tuhan (band. Ulangan 6:6), bagepe nggeluh ibas kemalemen ate. Emaka orang tua ibas kerina kesempaten ngajarken anak kerna mbiar ras erkemalangan man Tuhan. Erkiteken sie me anak harus tuhu-tuhu  ngergaken orang tua alu erbahan simehuli singena ate Tuhan. Sebab alu ndalanken simehuli tentuna mbaba kemalem ate man orang tua, sebab kai siiajarken orang tua iikutken anak.
3.      Kegeluhen anak, harus nggeluh ibas kepentaren gelah kai siisuraken anak banci she/tersehi. Sebab adi  nggeluh ibas kepentaren dungna banci ia mbedaken kai simehuli ras si la mehuli ras dalankenna si mehuli. Bagepe adi lit kepentaren man anak, maka mbiar ia ndalanken kai si la mehuli, sebab si la mehuli mperehken kematen. Erkiteken sie me selaku anak harus menghindari kegeluhen si lenge. Sebab kegeluhen si lenge la bo tehna kerna simehuli, emaka guna menghindari kebodohan, anak harus mperdiateken kepentaren.
4.      Guna nggeluh ibas kepentaren berarti anak la banci lang erkemalangan man Tuhan. Sebab adi anak pentar maka idalankenna kai sibenar singena ate Tuhan. Kalak pentar, tentuna tehna kerna simehuli la saja dat arah pengajaran/didikan arah sekalak jelma, tapi pe arah megiken poengajaran kalak sideban, ntah pe pertenget/nasehat kalak sinterem. Sebab alu megiken kata pertenget maka tentuna anak banci meteh simehuli. Enda me siikataken Raja Salomo. Emaka adi sinen kerna kegeluhen raja Salomo, melala penasehatna, janah penasehatna eme kalak sierkemalangan man Tuhan.
5.       Kepentaren mabai manusia nggeluh ibas pengangkan simehuli, emaka kegeluhen manusia nggeluh ibas perdalanen kembak kegeluhen. Kalak pentar ihindarina kegeluhen kempak kematen.

APLIKASI
            Lit pepatah ngatakenca anak eme masa depan keluarga. Siimaksudken masa depan keluarga tentuna anak mbaba kehagan man keluarga. Guna seh i je tentuna peranan orang tua harus lit. Orang tua ibas pebelin-belein anakna, harus erpalasken mbiar man TUhan. Sebab adi anak mbiar man Tuhan maka  bas anak e pe lit kepentaren. Adi anak lit ibas kepentaran maka anak banci terhindar ibas kerina perbahanen si la mehuli, ntah pe pinakit masyarakat siberkembang genduari enda.
            Tanggungjawab orang tua, la bo saja mabai anak gelah erpemeteh/beluh ibas pendidikan formal, tapi pe anak harus tuhu-tuhu mbiar man Tuhan, emaka pendidikan rohani i tengah-tengah keluarga harus ilitken. Janah enda nggo nge ipesingeti gereja, paksa orang tua mbaba anakna ku lakon peridin Si Badia. Ibas pengajaren peridin si badia je ikataken maka orang tua erpadan alu penampat Kesah Sibadia  ngepkep anak alu tutus, ngiahken ras naruhken anak ku bas pengajaren kerna Kata Dibata gelah itandaina Tuhan Yesus. Tapi kenyataanna pengakun enda terjeng ibelasken ngenca, sebab  nterem nge orang tua la bo ndalanken sienda.

Pdt. Steven Kumenit, STh.M.Min.

Selasa, 01 April 2014

Serayan Tuhan Singelai Rikutken Sura-SuraNa (Hakim-Hakim 6:1-16)



BAHAN PJJ GEREJA GBKP
TANGGAL 6 – 12 APRIL 2014.
Hakim – Hakim 6:1-16.

Tema : Serayan Tuhan Singelai Rikutken Sura-SuraNa.

LATAR BELAKANG
1.      Salah sada tantangan ras godaan bangsa Israel kenca bengket ras ngiani tanah Kanaan eme dibata-dibata kalak Kanaan. Erkiteken sie me arah sepuluh pedah Dibata ipersingeti Tuhan bangsa Israel gelah ula ersembah man Dibata-dibata sideban. Bagepe langsung Tuhan ngerana man bangsa Israel. Tapi kinatana kenca bangsa Israel ngiani tanah Kanaan, terpengaruh ia ersembah man dibata-dibata kalak Kanaan,erkiteken sie merawa Tuhan man bana, emaka ipediat Tuhan bangsa Median merentah ia sedekah pitu tahun. Sedekah pitu tahun e, la lit kuasa bangsa Israel guna mpertahanken kegeluhenna ras kinilitenna (sinuan-sinuan ras biri-biri), sebab ibuat ras ikernepken kalak Median, bangsa Amalek ras suku-suku siringan ibas gurun pasir. Tuhu-tuhu bangsa Israel lanai ngasup erbahan kai pe, dingen lanai lit kebebasan guna erdahin.
2.      Ibas situasi sibage  me erlebuh bangsa Israel mindo penampat man Tuhan, gelah Tuhan nampati ia ngelawan bangsa Median. Pemindon bangsa Israel enda ialoi Tuhan alu nuruh sekalak nabi ku tengah-tengah bangsa Israel. Tapi ope denga ipelepas Tuhan ia, ipebetehken Tuhan ngkai maka bangsa Israel iperintah bangsa Median. Kerina enda erkiteke-kiteken kinilapatuhan bangsa Israel megiken perintah Tuhan. Jadi kinisuin bangsa Israel erkite-kiteken ia sendiri sierbahanca.
3.      Situasi ras kondisi simesera erbahanca bangsa Israel inget Tuhan. Bangsa Israel nggejapken maka Tuhan singasup mulahi ia, emaka erlebuh ia man Tuhan. Adi nggo isampati Tuhan ia maka bangsa Israel lanai cebuni i gua-gua ras deleng-deleng si deban guna menghindari serangan bangsa Median ras sekutuna sikatawari pe banci reh.
4.       Kenca nabi Tuhan pebetehken kerna keberdosaan bangsa Israel, alu sada tujun gelah bangsa Israel nggejapken maka ia nggo erdosa ras harus jera ibas dosana nari, maka  Tuhan nuruh MalaikatNa guna  ndilo Gideon gelah mulahi bangsa Israel. Tantangna lit sada komplen ibas Gideon nari man Tuhan, bagepe lit sada keraguan  ntah pe sada pengakap maka situhuna ia la bo tokoh sipas guna mulahi bangsa Israel, sebab sukuna sikitikna ras la bo ia sekalak si meherga ibas keluargana. Tapi erkiteken sada motivasi ras pergegeh siibereken Tuhan, ija Gideoan isampati Tuhan maka nggit me Gideoan ngalokenca dahin e.  Ibas erti kata Tuhan nemani Gideon ibas dahin mulahi bangsa Israel ibas tan bangsa Median nari.
5.      Pemilihan Gideon selaku alat Tuhan guna mulahi bangsa Israel labo itentukan alu kriteria ja nari asalna, apakah ibas suku simbelin nari ntah arah kalak simeherga nari, tapi kriteria siipake Tuhan eme sada “kepekaan” nandangi permasalahan bangsa Israel, bagepe sada kepatuhan guna megiken kata Tuhan.

APLIKASI
            Sigejapken nge tuhu maka perpulungen Tuhan lit ibas erbage-bage tantangan nggeluh, sierbahanca anggota perpulungen lit ibas perbeben. Tentuna enda harus jadi perhatin man serayan Tuhan, la saja Pendeta tapi pe Pertua ras Diaken. Sebab makna serayan Tuhan eme ibas rangka mpegegehi ras tetap mereken motivasi man kerina anggota perpulungen gelah tetap nggeluh ibas ketetapen ukur, bagepe tetap mbiar ras ernalem man Tuhan saja.
            Ibas tahun enda tepatna bulan April – September 2014 enda, kita ipake Tuhan guna milih Serayan Tuhan. Emaka sipaling penting man banta eme milih serayan Tuhan erpalasken “kepekaan ngelai/pendilo guna ngelai” ras mbiar man Tuhan. Jadi labo erpalasken kade-kade. Bagepe harus siinget jadi serayan Tuhan, berarti erdahin guna Tuhan, ras rikutken sura-sura Tuhan. Emaka serayan Tuhan harus kalak situhu-tuhu lit spiritulitasna, sebab ia harus tetap berkomunikasi Ras Tuhan. Kalak sibagenda me  ipilih Tuhan. Jadi pertimbangen siutama ibas kita mulih serayan Tuhan eme soal spiritulitas.

Pdt. Steven Kumenit, STh.M.Min.