Rabu, 01 Juli 2015

Dibata Simasu-Masu Pendahinta (Ulangan 28:1-6)



BAHAN PERPULUNGEN JABU-JABU
GEREJA GBKP
TANGGAL 5-11 JULI 2015.
Ulangan 28 : 1-6.

Tema : Dibata Simasu-Masu Pendahinta.

LATAR BELAKANG
1.      Secara umum banci sikataken  kitab Ulangan enda eme pedah Musa man bangsa Israel sisangan ngadi-ngadi i dataren Moab, nandangi bengket ku taneh Kanaan. Kata pedah enda ipeseh Musa man bangsa Israel erkite-kiteken : 1). Bangsa Israel sisangana ngadi i dataren Moab eme angkaten simbaru. Angkaten si berkat i Mesir nari tading piga-piga nari singgeluh. Emaka pedah-pedah Tuhan siisehkenNa tupung bangsa Israel i Deleng Sinai, banci sikataken  labo itehna. 2). Taneh Kanaan siibereken Tuhan man bangsa Israel, lit penduduk ras agama si la seri ras bangsa Israel. Emaka dibatana pe labo seri.
2.      Pedah Musa man bangsa Israel eme gelah tetap ngikutken Tuhan ras tutus ersembah man Dibata saja, bagepe gelah bangsa Israel tetap ndalanken kerina perentah-perentahNa, maka bangsa Israel nggeluh mejuah-juah i tanah Kanaan. Siimaksudken nggeluh mejuah-juah eme 1). Ijadiken Tuhan bangsa Israel jadi bangsa simbelin, belinen asangken bangsa-bangsa sideban  i babo doni enda. 2). Ipasu-pasu Tuhan juma ras kutana. 3). Ertuah, bayak, nterem pupus, 4). Melala page, lembu ras biri-biri. 5). Tuhan masu-masu kerina pendahin bangsa Israel.
3.      Kata persinget siibereken Musa man bangsa Israel enda gelah bangsa Israel nginget lit sada perpadanan antara bangsa Israel ras Tuhan. Isi Perpadanan eme bangsa Israel arus ersembah ras ngikutken perentah-perentah Tuhan saja, jenari bangsa Israel ngaloken pasu-pasu idur Tuhan nari. Enda me siarus idalanken bangsa Israel sedekah tading i taneh Kanaan. Jadi bangsa Israel arus tetap ersembah man Tuhan saja (band. Monoteisme).
4.      Bagepe mpebagesi pengangkan bangsa Israel kerna pasu-pasu ras kemalemen ate. Pasu-pasu ras kemalemen ate ndatken ibas Tuhan ngenca. Emaka adi ate bangsa Israel nggeluh ibas pasu-pasu ras kemalemen ate, maka si arus ilakoken  bangsa Israel sedekah tading ras nggeluh i Taneh Kanaan eme nggeluh erkemalangan ras tutus ndalanken perentah-perentahNa. Alu bage kegeluhen bangsa Israel nggeluh ibas kebadiaan. Tuhu-tuhu bangsa Israel nggeluh selaku bangsa pilihen Tuhan. Jadi situhuna sada pihak bangsa Israel nggeluh ibas kebadiaan, tapi ipihak sideban bangsa Israel ituntut gelah nggeluh ibas kepatuhen man Tuhan saja.
5.       Pasu-pasu Tuhan siiberekenNa man bangsa Israel adi bangsa Israel tetap tutus ndalanken kerina perentah-perentahNa, maka  la saja bangsa Israel ndatken melala gandum ras asuh-asuhenna, bagepe itemani ras ijagai Tuhan kegeluhenna alu mereken keamanaan, bagepe kegeluhen bangsa Israel iangkatken, emaka iergai dingen ipehagaken kalak ia. Alu bage kalak sideban banci meteh ras ersembah man Tuhan saja.

APLIKASI
            Selaku kalak kristen arus ngangkai maka pendahinta e bekas pemere Tuhan. Emaka arus sikataken bujur man Tuhan. Bagepe ibas dahinta arus min iertiken maka ibas kerina dahinta lit sura-sura Tuhan, eme gelah terpuji gelar Tuhan.
            Secara manusia arah pendahinta kita banci iergai ras ihamati kalak. Bagepe arah pendahinta banci teridah kerna pasu-pasu Tuhan. Sebab adi mehuli kita erdahin, bagepe seh sura-suranta, situhuna labo erkiteken gegeh ras kepentarenta, tapi kerina erkite-kiteken pasu-pasu Tuhan.
            Alu bage erkiteken pendahin  eme pemere Dibata man banta, maka searusna, ope  kita erdahin arus lebe kita ertoto. Fungsi kita ertoto eme : 1). Gelah kita tetap lit ibas sehat-sehat ibas ndalankenca. 2). Sidahiken alu ukur meriah ras maksimal. 3). Gelah Dibata simasu-masu pendahinta.  Alu bage terjadi me etos kerja simehuli man banta.

Pdt.Steven Kumenit, STh.M.Min

Rabu, 24 Juni 2015

Etika Kerja Kalak Kristen (Amsal 20:13; Kejadian 3:17-19)



PERPULUNGEN JABU-JABU
GEREJA GBKP
TANGGAL28 JUNI – 4 JULI 2015.
Kuan-Kuanen 20:13; Kejadin 3:17-19.

Tema : Etika Kerja Kalak Kristen

LATAR BELAKANG
A.    Kuan – Kuanen 20:13.
  1. Salah sada tujun kitab Kuan-kuanen eme gelah lit sada keberhasilan, sebab kitab Kuan-kuanen enda nuratken piga-piga petunjuk guna nggeluh ibas keberhasilan. Gelah she ku je, maka kitab Kuan-kuanen enda rusur ncidahken hal si positif ras negatif, gelah simegi (anak) banci meteh simehuli ras ndalanken simehuli, sebab si mehuli e mpereh keberhasilan.  Ipihak si deban tujun  Kuan-kuanen enda guna mendidik anak-anak.
  2. Ibas oratenta pengamsal mereken sada kata pejemba man  anak-anak gelah mperdiateken waktu. Waktu e penting ibas kesuksesan. Sebab waktu berhubungen ras erdahin. Emaka kalak simpergunaken waktu simehuli guna erdahin, ia me kalak si mejingkat. Ulin kalak simejingkat erdahin eme cukup nakanna. Emaka isehken  man anak-anak gelah ula dekahen   medem  asangkan waktu erdahin. Sebab adi dekahan medem, ulihna eme kemusilen.

B.     Kejadin 3:17-19.
  1. Manusia (Adam ras Hawa) nggo ngelakoken dosa. Nggo ipanna buah kayu si lit i tengah peken, siilarang Tuhan. (band. Pohon pengetahuna yang baik dan jahat). Erkiteken sie merawa Tuhan, emaka ihukunma manusia alu 1).  Erdahin guna ngusahai kidekah geluh manusia. 2). Dukut-dukut ras Sinuan-sinuan erduri turah ibas taneh enda. 3). Arus gegehina erdahin alu curcur panas seh mate gelah dat hasil. Maksudna segedang-gedang geluh manusia, kebutuhenna tergantung  ku bas taneh nari.
  2. Manusia erdahin gelah manusia banci ndatken kebutuhen-kebutuhenna tep-tep wari. Memang ope denga manusia erdosa. Paksa ia tading i peken Eden. Kebutuhen-kebuthenna terpenuhi kerina, janah la perlu manusia erdahin alu latih. Isekitarna nggo tersedia, dahinna terjeng njaga ras ngusahai ngenca.
  3.  Hukuman siibereken Tuhan man manusia, gelah manusia sadar maka adi erdosa man Tuhan lit hukumenna. Emaka ibas ia erdahin ndarami ras ndatken kebutuhen geluhna, manusia arus nggeluh patuh ras erkemalangan man Tuhan, gelah ipasu-pasu Tuhan kegeluhenna.

APLIKASI
Ibas pemahaman Calvin kerna erdahin eme kalak siipilih Dibata teridah ibas kegeluhenna sitep-tep wari, termasuk ibas erdahin. Emaka kalak si tutus erdahin, aktif bekerja keras, ncidahken bukti man dirina sendiri ras man kalak sideban maka ia eme kalak siterpilih, tapi sebalikna kalak sibiasa-biasa saja ras ncidahken kemalasan banci sipastiken ia sekalak sikena sumpah/kutuk.
Ibas zaman sigenduari teridah reh teremna kalak siperkisat, janah adi ia erdahin, siibahanna eme si la ngena ate Dibata, eme korupsi ntah pe erbahan si la bujur. Enda tentuna la mehuli. Memang perlu kita sen, tapi ula min erkiteken sen e sirang kita ras Tuhan. Tapi marilah selaku kita kalak kristen harus erdahin, lapangan pekerjaan melala, janah adi erdahin kita arus sidahiken alu mehuli, sebab ibas kita erdahin berarti kita enggo patuh man Tuhan, janah erdahin merupaken sada ibadah man Tuhan.
            Jadi ibas kita erdahin, la saja guna kita, tapi guna kemulian Tuhan. Emaka ibas kita erdahin, arus sicidahken etika erdahin eme 1). Tutus erdahin. 2). Jujur. 3). Tepat waktu. 4). Erdahin alu meriah ukur.5). rsd.

Pdt. Steven Kumenit, STh.M.Min.

Minggu, 14 Juni 2015

Erti Ras Makna Liturgi (Yesaya 6:1-8)



PERPULUNGEN JABU-JABU
GEREJA GBKP
TANGGAL 21-27 JUNI 2015.
Jesaya 6:1-8.

Tema : Erti Ras Makna Liturgi

LATAR BELAKANG
1.      Bangsa Yehuda selaku bangsa Tuhan nggo nggeluh erbana-bana, lanai mbiar man Tuhan. Ibas kegeluhen bangsa Jehuda, la lit keadilan, kalak sierkuasa menindas si lemah, pejabat erbahan koropsi, nembah man berhala, bagepe tupung bangsa Mesir ras Samaria atena nerang bangsa Yehuda, padin akapna mindo penampat man bangsa Asyur asangkan man Tuhan. Kegeluhen sibage, searusna la lit man bangsa Yehuda. Erkite-kiteken sie  maka merawa Tuhan man bana. Emaka Ate Tuhan menghukum bangsa Yehuda. Emaka guna mpeseh berita penghukuman enda, Tuhan ndilo Yesaya jadi nabiNa.
2.      Ibas pendilo Tuhan man Jesaya, ibenaken alu sada pengenehenen Jesaya. Iidah Jesaya Tuhan ras malekatNa ibas Rumah Pertoton. Erkiteken  nggo idahna Tuhan maka igejapna maka sekali enda, ia mate, sebab la saja erkite-kiteken ia erdosa, tapi pe Jesaya tading ras bangsa sierdosa. Bagepe Tuhan sendiri singatakenca ise pe singidah Ia, maka ia arus mate (band. Keluaran 33:20). Tapi reh Maleket Serafim,  ibuatna rara ibas batar-batar persembahen  nari, jenari ikuitna bibir Jesaya alu rara e, emaka dosa-dosa Jesaya nggo masap. Kenca Jesaya ipebadiaken, ibegina sora Tuhan, nina: ise ndia Ku suruh? Ise ndi nggit maba berita ibas aku nari ? emaka ialoi Jesaya : enda aku suruhlah aku.
3.      Jesaya nggit iutus erkite-kiteken lit kesadaran diri guna jadi alat Tuhan ras mperobahi kegeluhen bangsa Jehuda singgo erdosa man Tuhan. 
4.      Jesaya ibadiaken Tuhan, sebab selaku nabi arus nggeluh badia gelah lajadi batu antuken nandangi bangsa Jehuda. Kegeluhen si badia mereken sada kinipangen guna nehken sura-sura Dibata man bangsa Jehuda.
5.      Pengenehenen Jesaya enda terjadi ibas Rumah pertoton tupung kebaktin.

APLIKASI
            Seh genduari lit denga anggota perpulungen sikurang denga pengangkanna kerna liturgi. Akapna liturgi eme ngoge pustaka Si Badia, bagi siterjadi ibas kebaktin Natal. Padahal liturgi ipahami ibas 2 hal, eme : 1). Pelayanan kita, ntah pe pengabdian kita man Tuhan guna kiniulin doni enda. 2). Tata cara ibas kebaktin. Janah 2 pengertin enda la banci ipisahkan. Sebab kenca kita ersembah man Tuhan ibas kebaktin, maka selanjutna, kita arus ncidahken ntah pe mengaplikasikan ibas kegeluhenta si tep-tep wari.
            Liturgi ibas kebaktinta arus merupaken sada ikaten siutuh ras berkesinambungan. Sebab adi la lit keutuhan ras ikaten siberkesinambungan, maka kebaktinta la lit ertina. Bagepe penempatan ende-enden arus cocok ras unsur-unsur liturgi. Emaka liturgi penting ibas kebaktin.
            Erbahan liturgi kebaktin, la kerina banci. Kalak singgo ndatken pendidikan teologi ngenca sibanci erbahan liturgi kebaktin. Sebab kalak si nggo ndatken pendidikan teologi, nggo tehna susunan liturgi simehuli. Bagepe adi anggota perpulungen ngikuti kebaktin alu unsur-unsur si lit ibas liturgi, bagepe kai siikataken ibas liturgi e, maka anggota perpulungen pasti ndatkenna kemalemen ate. Salah sada contoh eme anggota perpulungen arus ngikuti kebaktin ibas votum nari seh ku pemasu-masun. Bagepe kai siikataken ibas liturgi eme tedis ras kundul, rsd. Arus iikuti anggota perpulungen. Sebab kerina e lit makna.
            Adi siperdiateken oratenta, maka si la banci lang siarus lit ibas liturgi eme 1). Puji-pujin man Dibata, erkiteken Dibata e Badia. 2). Lit penggejapen, kita enda kalak si erdosa/Pengakun Dosa bas kita nari. 3). Pengalemi Dosa ibas Tuhan nari. 4). Ndengkehken Kata Dibata. 5). Pendilo guna iutus. 6). Ngendesken diri ibas pendilo ras pengutusen Dibata.
            Ngenen sienda maka ibas kebaktinta, arus terjadi sibage, emaka kegeluhenta ersembah man Tuhan, la terjeng ibas kebaktin saja, tapi kenca kita dung kebaktin, nggit kita ngelakoken simehuli singena ate Tuhan, tandana kita nggo iutus Tuhan.

Pdt. Steven Kumenit, STh.M.Min.   

Selasa, 09 Juni 2015

Nehken Persepuluhen Alu Pusuh Si Bujur (Matius 23:23)



SERMON PJJ GBKP RUNGGUN KAMPUNG SUSUK
TANGGAL 14 – 20 JUNI 2015.
Matius 23 :23.

Tema : Nehken Persepuluhen Alu Pusuh Si Bujur.

LATAR BELAKANG
1.      Yesus ngerana man jelma sinterem ras man ajar-ajarNa, sekaligus mengkritik kegeluhen guru-guru agama. Sebab lit “kekecewaan” Yesus man guru-gurur agama.  ras kalak Farisi. Kekecewaan Yesus eme searusna min guru-guru agama ras kalak Farisi simeteh kerna hukum Taurat arus nggeluh mehuli, tapi kinatana lang. Erkite-kiten sie me, nina Yesus cilaka me kam guru-guru agama ras kalak Farisi. Adi si oge mulai ayat 13 – 27, lit 7 kali Yesus ngataken cilaka man guru-guru agama ras kalak Farisi. Janah sijadi oratenta, cilaka sipelimaken
2.       Yesus ngataken Cilaka man guru-guru agama ras kalak Farisi erkite-kiteken kemunafikenna. Perbahanenna la sue ras perkatanna. Melala siiajarkenna, tapi la bo ipraktekenna. Perbahanen-perbahanenna terjeng gelah iidah kalak , ia kalak simehuli, kalak situtus ibas beragama. Ibas  perbahanen-perbahanan sipekula-kula, siicidahken guru-guru agama ras kalak Farisi e, nggo iola-olangi kalak gelah ola bengket ibas Kinirajaan Surga.
3.      Khusus ibas oratenta, kerna persembahen persepuluhen siipersembahken guru-guru agama ras kalak Farisi, enggo iaplikasikenna seh ku rempah-rempah/bumbu dapur, sienda la salah. Tapi siikritik Yesus eme kerna sipenting ibas undang-undang lanai iperdiatekenna eme nehken keadilan, keleng ate ras kinibujuren la idalankenna.
4.      Guru-guru agama ras kalak Farisi ibas kegeluhen agama Jahudi eme ipercayaken ngerunggui masalah-masalah siterjadi ibas kalak Jahudi. Tapi ibas kinatana, la irungguina alu bujur. Erkiteken sie me hak sesekalak jelma guna ndatken keadilan lanai lit.
5.      Ate Yesus gelah jelma sinterem ras ajar-ajarNa banci meteh maka nehken persembahen persepuluhen aruslah iikuti perbahanen simehuli. Sebab sia-sia me persepuluhen siisehkenna adi la idalanken keadilan, keleng ate ras kinibujuren. Guru-gurur agama ras kalak Farisi mpraktekken kinilaadilen, la lit kekelengen ras la lit kebujuren bas ia.

APLIKASI
            Arah oratenta sekali enda, kita ipersingeti gelah ibas kita nehken persepuluhen arus rikutken pusuh sibujur ras perbahanen simehuli.
            Adi ngerana kita kerna idealna nehken persepuluhen, eme sada ibas sepuluh nari, ntah sepuluh persen. Tapi ibas kinatana, kita lenga pang nehken persepuluhen alu cara sibage. Padahal ibas kita nehken persepuluhen i je lit pengataken bujur man Melkisedek (band. Kej.14:20), gelah lit persediaan nakan ibas Rumah Tuhan (Maleaki 3:6-12), guna Tuhan (Imamat 27:30). Janah kegunan  persepuluhen e ibereken man kalak Lewi (Bilangan 18:21,24; Ulangan 18:1-8), bagepe man kalak pertandang, anak melumang ras diberu balu-balu (Ulangan 14:29; 26:12). Tapi man gerejanta (GBKP) persepuluhen lanai iendesken bagi siikataken ibas pustaka Si Badia ndai, tapi kerina enda ipakeken ku bas pelayanan gereja GBKP.
            Erkite-kiteken persebahan persepuluhen merupaken ketetapen Tuhan, maka kita selaku kalak kristen arus ngendesken persepuluhen man Tuhan arah gerejaNa, gelah sipake guna pelayanan-pelayanan gereja Tuhan. Persoalenna nterem denga kita masih mpersoalken kerna nehken persepuluhen. Lit simpersoalken kerna  bruto ntah netto ibas penghasilanta nari. Bagepe kerna jumlah. Tapi erkite-kiteken nggo ndekah kita mpraktekken persepuluhen enda, emaka ula nari min kita mpersoalken kerna sie. Tapi marilah sibuat baginta guna nehken persepuluhen simulai ibas kejujuren ras pusuh simeciho nehken persepuluhen e, gelah kita ipasu-pasu Tuhan, bagepe pelayananta gereja banci erdalan. Alu bage termulia Tuhan ibas kita nehken pesepuluhen.

Pdt. Steven Kumenit, STh.M.Min.