Jumat, 12 Januari 2018

Politik: Erti Ras Ulihna (Kejadian 41:48-57)



PEKAN PENATALAYANAN
GEREJA GBKP
WARI II, SENIN 22 JANUARI 2018.
Introitus :    To pepulunglah kerina kalak Jahudi si lit I kuta Susan enda; ertoto dingen erpuasalah kam kerina guna aku. Ola kai pe pan the inemndu telu wari telu berngi dekahna. Aku ras suruh-suruhenku sidiberu pe bage ibahan kami. Kenca bage lawes aku ndahi raja, aminna gia e ngelanggar aturen. Adi terpaksa kin aku mate kerna si e; mate pe labo dalih (Ester 4:16).
Ogen      :    Matius 2:16-18.
Kotbah   :    Kejadin 41: 48-57.
Tema      :    Politik: Erti Ras Ulihna.

LATAR BELAKANG
1.      Yusup labo kalak Mesir, tapi erkiteken kepentaren si lit bas ia, khususna ngasup ngoge kai erti nipi raja maka Yusup iangkat jadi wakil raja. Jabatan selaku Wakil raja cukup penting, sebab Jusup bertanggungjawab langsung man raja, jenari selaku wakil raja,  ise pe la banci erbahan kai pe adi la nungkun lebe man Yusup.
2.      Pengangkatan Yusup jadi wakil raja Mesir ertujun guna ngaturken bangsa Mesir gelah nggeluh adil ras makmur, apai ka ibas menghadapi sada kiniseran ibas 7 tahun si reh, eme kelihen si mesangat. Sebab ibas nipi raja Mesir, singgo ioge ntah pe iantusi Yusup ngataken maka bangsa Mesir 7 tahun nggeluh alu riba-iba pangan, janah pitu tahun kenca sie, bangsa Mesir nggeluh ibas kiniseran.
3.      Selain Yusup iangkat jadi wakil raja ras nggo ibereken raja otoritas penuh (kuasa) guna merentah, bagepe gelar Yusup isambari alu gelar kalak Mesir  eme Sapnat Panea, siartina Dibata ngerana, Ia nggeluh, bagepe ibereken raja sekalak diberu guna jadi ndehara Yusup eme Asenat, siertina Milik Neit (Dewi kalak Mesir).
4.      Ibas umur telu puluh tahun Yusup nadingken istana raja guna erdahin mpesikap gelah rakyat Mesir la kelihen kenca bangsa Mesir bengket ku bas pitu tahun kiniseran (nggeluh ibas kelihen). Cara kerja ntah pe teknik siilakoken Yusup e me bagi siikatakenna man raja eme mpepulung seperlima ibas ulih peraninna guna jadi persediaan. Ipepulung Yusup kerina bahan pangan e,  janah itamaken ku lumbung si lit ibas tep-tep kuta. Emaka kenca reh bencana kelihen singkenai bangsa Mesir ras bangsa-bangsa sidebanna, bangsa Mesir nari ngenca sitetap lit persedian panganna, bangsa Mesir la nggeluh ibas kelihen sebab lebih nggo persediaan panganna.  Erkiteken tersedia kerina bahan pangan ibas bangsa Mesir, maka situasi enda terberita seh ku bangsa – bangsa sideban, emaka reh me  kerina bangsa-bangsa sideban  guna nukur nakan ku Mesir.
5.      Ngenen kai siilakoken Yusup nandangi bangsa Mesir, situhuna pengrealisasian ibas sura-sura Dibata nandangi bangsa Mesir, khususna man Yusup. Sebab alu la igejap raja Mesir, peraten Tuhan nggo erdalan. Tuhan make bangsa Mesir guna mengrealisasikan rencana Tuhan simbelin eme pemeliharaan man anak-anakNa (nen 45:5-8; 50:19-20).

APLIKASI
            Ngerana kerna politik bas gereja GBKP situhuna nggo dung, sebab nggo lit pengakun iman gereja GBKP kerna politik, janah salah sada point eme politik merupakan upaya untuk menata kehidupan masyarakat demi kesejahteraan bersama. Tapi persoalenna genduari eme lit kalak sindalanken politik e me guna kepentingen pribadi ras la guna kesejahteraan masyarakat. Jadi penungkunen man banta ngkai maka nterem kita sisalah ngertiken politik e. Selaku kalak kristen enda arus ngenen ibas kaca mata kiniteken. Nterem kalak sisalah ngertiken politik e erkite-kiteken lenga bages bas ia kiniteken e. Sebab adi nggo mbages kiniteken bas ia maka lit bas ia kepentaren ibas Dibata nari. Alu bage iangkana maka tanggungjawab kita, khususna pemimpin eme guna mensejahterahkan masyarakat.
            Selaku pemimpin, lit kuasa bas ia. Arah kuasa enda tentuna ergampangna ndalanken politik guna kesejahteraan masyarakat. Sebab kuasa e si lit bas pemimpin pasti ibegiken masyarakat. Emaka penting man pemimpin ngenen kuasa si lit bas ia eme erkiteken pemere Dibata janah guna kepentingan masyarakat. Emaka selaku pemimpin ula kuasa negatif siipakena eme kuasa otoriter ras kuasa “membunuh” masyarakat, i ja adi la seh sura-surana nembeh ras merawa pemimpin e, bagepe masyarakat si la mendukung ia nembeh ras merawa atena masyakat e, dungna la iperdiatekenkerna kesejahteraan masyarakatna. Tapi siarus lit eme kuasa simbangun ras mperdiateken kesejahteraan masyarakat luas, amin gia lit si la senang ras tempa-tempa la milih ia tupung pemilihen ndube.
            Nggeluh ibas kesejahteraan berarti masyarakat sejahtera ibas kesehatan ras ekonomi. Emaka adi masyarakat sejahtera tentuna bangsanta pe ikut sejahtera.
            Guna ndatken kesejahteraan penting kal man pemimpin ndalanken politik alu mehuli.

Pdt. Steven Kumenit, STh.M.Min.

Rabu, 10 Januari 2018

Kemulian Dibata Ibas Manusia (Roma 2:1-11)



PEKAN PENATALAYANAN
GEREJA GBKP
WARI 1, 21 JANUARI 2018
Invocatio :    Arah Ia ersinalsal terang kemuliaan Dibata, janah Ia tuhu-tuhu gambar Dibata. Ia me sinatang kerina sinasa lit alu kataNa si erkuasa. Kenca ibersihkenNa manusia ibas dosa-dosa nari, kundul Ia i Surga arah kemuhen Dibata simada kuasa si meganjangna (Heber 1:3).
Ogen         :    Mazmur 8:1-10.
Kotbah     :    Roma 2:1-11.
Tema        :    Kemulian Dibata Ibas Manusia.

LATAR BELAKANG
1.       I perpulungen Roma lit sada masalah eme kalak kristen siasalna la kalak Jahudi nari (kalak kafir), ikataken kalak kristen asalna kalak Jahudi nari la selamat erkite-kiteken perbahanen-perbahanenna ope denga ngaloken Kristus eme melket. Lagu langkahna la sue ras peraten Dibata, emaka erdosa ras najis ia. Erkiteken erdosa ras najis maka la banci ideheri ras bengket i rumah kalak kristen siasalna la kalak Jahudi nari, sebab adi ndeher ras bengket i rumah kalak kristen siasalna la kalak Jahudi nari jadi najis. Alu bage kalak kristen Jahudi nggo ngukum kalak kristen siasalna la kalak Jahudi nari.
2.       Ibas palas enda ipersingeti Paulus kalak kristen siasalna Jahudi nari, gelah banci ngenen ise kin ia situhuna. Tuhu kalak Jahudi merupaken bangsa pilihen Tuhan ras nggeluh ibas perpadanen ras Dibata. Tapi ibas perbahanen-perbahanenna tep-tep wari la teridah kalak Jahudi nggeluh ibas perpadanen Dibata. Lagu langkahna la ngena ate Dibata. Emaka kegeluhen kalak kristen asal Jahudi nari bali nge ras kegeluhen kalak kristen siasalna la kalak Jahudi nari (kafir). Alu bage kalak kristen siasalna Jahudi nari sitetap mpertahanken Taurat ras nggejapken dirina badia iukum Dibata pagi. Ibas perbahanen sibage rupana, kalak kristen siasalna Jahudi nari alu la igejapna nggo mpepulungna pernembeh ate Tuhan.
3.       Kalak kristen asal Jahudi nari arus ngenen kerna kiniulin ras keleng ate Tuhan. Mehuli ras keleng ate Tuhan, bagepe kesabaren Tuhan arus iergai, sebab ibas kiniulin, keleng ate  ras kesabaren Tuhan gelah manusia jera ibas kegeluhenna si la ngena ate Tuhan, termasuk kalak kristen si asalna Jahudi nari.
4.       Penghukumen ras keselamaten merupaken hak preogatif Tuhan. Emaka kalak kristen asal la kalak Jahudi nari ras kalak kristen si asalna Jahudi nari arus la erleja-leja erbahan simehuli singena ate Tuhan gelah datna kegeluhen si tuhu-tuhu si la ermasap-masap. Emaka ula kepentingen diri saja siiukuri. Jadi kalak sindalanken simehuli alu la erleja-leja ndatken kemulian, kehamaten ras kemalemen ate.
5.       I lebe-lebe Dibata la lit manusia sikusus, tapi seri kerina. Emaka kalak singelakoken simehuli alu la erleja-leja me ibereken Dibata kemulian, kehamaten ras kemalemen ate.

APLIKASI
            Adi ngerana kita kerna Kemulian Dibata, berarti kita ngerana kerna keagungan, kuasa, mejile, kiniulin, kebadian, bagepe kerna kehadiran Dibata i tengah-tengah kegeluhen manusia (kita). Janah kemulian Dibata e, man Ia ngenca si lit.
            Apakah kemulian Dibata lit bas manusia. Tangtangna nari kemulian Dibata lit man manusia. I ja kenca Dibata njadiken manusia sentudu ras tempasNa, bagepe i hempusken Tuhan kesahNa man manusia, emaka nggeluh manusia e, je me situhuna kemulian Tuhan ibas manusia. Bagepe ibas kerehen Jesus Kristus ibas doni enda merupakan kemulian Tuhan sebab i je kita banci ngidah kuasa ras keleng ate Tuhan secara langsung. Bagepe i selamatkenNa kita ibas dosa arah kayu persilang merupakan tanda kemulian Tuhan. Jadi kita nggo ibereken Tuhan kemulian (kuasa, mejile, kiniulin ras keagungan), e  maka kita harus ngataken bujur man baNa.  Tapi ibas Roma 2:7 nina Paulus man kalak sindarami kemulian ras kehamatan labo guna kegeluhen sigenduari enda saja tapi pe guna kegeluhen si reh, eme alu la erleja-leja erbahan simehuli, man kalak sibage ibereken Dibata kegeluhen situhu-tuhu si la ermasap-masap. Situhuna kemulian Tuhan nggo lit bas kita, tapi i jenda, ate Paulus guna ndatken kegeluhen situhu-tuhu arus nggeluh ibas tek man Jesus Kristus ras nggeluh ibas keselamatan singgo iberekenNa man banta. Alu bage situhuna kemulian Dibata nggo nggeluh bas kita eme keselamatan. Emaka kemuliaan Dibata ibas manusia eme nggeluh badia, meteruk ukur ras saber, bagepe nggeluh ibas kiniulin eme ndalanken kai singena ate Tuhan siteridah ibas kegeluhenta tep-tep wari eme mpekena-kena lingkungan ras ncidaken keleng ate man temanta manusia.

Pdt. Steven Kumenit, STh.M.Min.

Dibata Si Erkuasa Nelamatken Kita(Keluaran 6:1-7)



KOTBAH MINGGU, 14 JANUARI 2018
GEREJA GBKP
Invocatio   :    Aku kap Dibata si meganjang dingen badia si erkuasa seh ras lalap (Jesaya 57:15a).
Ogen         :    Johanes 10:24-30 (Tunggal)
Kotbah      :    Keluaren 6:1-7 (Tunggal)
Tema         :    Dibata Si Erkuasa Nelamatken Kita.

LATAR BELAKANG
1.      Tangtangna bangsa Heber tading i Mesir alu senang, tapi erkite-kiteken pergantin raja, janah raja simemerintah bangsa Mesir lanai ingetna perbahanen Jusup nandangi bangsa Mesir, bagepe nggo nterem kalak Heber, maka raja mesir nuruh kalak Heber erdahin (kerja paksa). Emaka bangsa Heber nggeluh mesera. Ibas kegeluhen sibage me iutus Tuhan Musa guna mimpin bangsa Heber ndarat i Mesir nari ku taneh singgo ipadanken man bana. Tapi kenca Musa ras Harun ngadap man raja Mesir, mindo gelah raja mere bangsa Heber ndarat i Mesir nari, ersuina kegeluhen kalak Heber ibahan raja Mesir. Emaka jungut-jungut kalak Mesir man Musa.
2.      Situasi ras keadaan bangsa Heber singgeluh mesera e ituriken Musa man Tuhan, tapi ijabab Tuhan, tuhu nggo Ku petandaken ise situhuna Aku man Abraham, Isak ras Jakup. Aku me Dibata sierkuasa, tapi man bangsa Heber lenga. Bagepe sada padan mereken taneh Kanaan man bana pe lang. Emaka isuruh Tuhan man Musa gelah kataken man bangsa Heber kerna penderkuhna nggo ibegi Dibata. Nggo inget Dibata padanNa ndube emaka ate Tuhan nelamatken ia ibas bangsa Mesir nari janah ngukum bangsa Mesir. Jenari, ate Dibata njadiken bangsa Heber jadi bangsaNa.
3.      Tuhu bangsa Heber nembeh ras merawa man Musa, bagepe mbiar ia man raja Mesir sebab ate raja Mesir munuh kalak Heber si la erdahin alu tutus, erkite-kiteken kalak Heber lenga nandai Dibata situhu-tuhu alu payo.
4.      Ate Tuhan kenca Musa mpetehken ise situhuna Tuhan e janah nggo iperdiateken Tuhan kerna kiniseran ras penderkuhna, maka bangsa Heber lanai jungut-jungut ras la nai mbiar, sebab isampati Tuhan ia. Kegeluhen bangsa Heber isalihken Tuhan. Kegeluhen budak isalihkan jadi bangsa simerdeka. Jadi kalak Heber termotivasi mulihi nggeluh alu mengandalkan Tuhan. Memang kegeluhen ibas keniseran tuhu-tuhu ncedai semangat nggeluh, emaka tempa-tempa nggo pasra ia ibas kegeluhenna sibage.
5.      Dibata mpetandaken kuasaNa man bangasa Heber gelah bangsa Heber meteh la lit kuasa sideban sibanci nampati ia asangken Dibata jine. Kuasa ibas doni enda termasuk kuasa raja italuken Dibata. Emaka ernalem ras erpengarapen man Dibata saja. Bagepe mindo penampat man Dibata saja.

APLIKASI
      Dibata e Dibata sierkuasa janah ngasup nelamatken kita. Ibas sejarah keselamatan manusia, Dibata ngenca singasup nelamatken kita. La lit Dibata sideban ntah pe kuasa-kuasa si deban sinelamatken kita. Termasuk iselamatkenNa kita ibas dosa-dosa nari.
      Keselamatan kita memang ibas rencana Dibata. Emaka reh me Ia ku tengah-tengahta ibas rangka nelamatkan kita. Emaka nina Jesus man kalak Jahudi, kam la biri-biringku erkiteken kam la tek. Tapi biri-biri Jesus eme itandaina soraNa janah iikutkenna Jesus alu bage dat me ia kegeluhen si rasa lalap.
      Genduari kita nggo nggeluh ibas keselamatan, janah pe nggo nggeluh ibas tahun pemere Tuhan, tahun 2018. Tentuna ibas kita ndalani wari-wari ibas tahun 2018 enda banci saja sijumpai sila bagi ukurta, tapi ula kita mbiar sebab Dibata sierkuasa pasti nampati kita. Bagepe ibas kita ndalani wari-wari enda ula siandalkan kuasa-kuasa sideban, tapi marilah kita andalkan kuasa Dibata si banci nelamatkan kita ibas erbage-bage persoalan ras kiniseranta. Tapi kita banci ngandalkan Tuhan adi tek ras nandai Jesus Kristus selaku Tuhan alu payo.

Pdt. Steven Kumenit, STh.M.Min.