Jabu Nepa Orat Geluh Permata (Epesus 6:1-4)

PERPULUNGEN JABU – JABU

GEREJA GBKP

TANGGAL 2 – 8 SEPTEMBER 2018.

EPESUS 6 : 1-4.

Tema : Jabu Nepa Orat Geluh Permata

LATAR BELAKANG

1.    Kota Epesus merupaken pusat agama kafir. I kota Efesus lit kuil Dewi Artemis (Diana). Kuil enda galang, janah salah sada bangunan ajaib dunia purba. Emaka kerina penduduk kota Epesus beragama kafir. Tapi kenca Paulus mberitaken kata Dibata, nterem kalak Efesus jadi kristen termasuk 2 guru sibaso agama kafir.

2.    Erkite-kiteken latar belakang perpulungen Epesus eme kalak kafir maka pengajaran Paulus eme a). Kristus pusat kegeluhen kalak kristen emaka man Kristus ngenca perpulungen ersembah. b). Ibadah formal (ersembah man Yesus Kristus), janah kai siibegi arah pengajaran arus teridah ibas kegeluhen tep-tep wari, termasuk ibas berkeluarga. Kegeluhen keleng ate erpalaskan keleng ate Kristus arus ipraktekkan ibas kegeluhen keluarga kristen, khususna hubungan orang tua ras anak.

3.    Selaku anak ibas keluarga arus ikutken kai siajarken orang tua. Ibas anak-anak ngikuti kai siiajarken orang tua maka lit dua hal sijadi eme, Sipemena : anak-anak eme bagin ibas perpulungen si badia siarus ndalanken kai singena ate Tuhan. Sipeduaken : Anak-anak la saja ngenen singajarken ia e eme orang tua tapi Tuhan sendiri. Jadi ibalik orang tua, situhuna Tuhan singajarken kerna simehuli man bana. Bart, Markus : Anak la banci ngkelengi Tuhan adi la ngkelengina sapih-sapihna, khususna orang tua. Orang tua eme wakil Tuhan, emaka anak arus patuh man orang tua. Bagepe la saja anak isuruh gelah ngikuti ajar orang tua tapi harus mpehagaken orang tua. Ibas anak mpehagaken orang tua berarti anak nggo ndalanken hukum pe 5 ken ibas sepuluh pedah Dibata. Jadi adi la nghamati orang tua berarti anak banci ihukum Tuhan. Tapi sebalikna adi anak-anak ngikuti ajar orang tua ras pehagaken orang tua, maka kegeluhen anak eme mejuah-juah ras ndekah nggeluh ibas doni enda. Enda me pemere Dibata nandangi anak-anak sipatuh ras pehagaken orang tuana.

4.    Tanggungjawab orang tua eme, sipemena: orang tua la banci pesega-sega anak-anak, sebab adi orang tua pesega-sega anak-anakna maka “putus semangat” anak-anak ibas kegeluhenna. Ipihak sideban anak-anak banci emosi ras merawa sidungna erdosa. Bagepe kenca anak-anak emosi turah perlawanan  anak nandangi orang tua. Alu bage perlawanan anak la man orang tua tapi man Tuhan. Emaka orang tua harus menghindarkan kerina e gelah anak-anak nggeluh ibas kepatuhen man Tuhan. Sipeduaken: Pebelin-belin anak ibas pengajaren ras mbiar man Tuhan bagepe tegu-tegu anak bagi singena ate Tuhan. Orang tua arus ngajarken ras negu-negu anak ibas Kristus. Pengajaren Kristus nari harus isehken

5.    Ibalik kepatuhan anak nandangi orang tuana ras anak mpehagaken orang tuana bagepe keweajiban orang tua ngajarken anak-anakna, lit sada makna eme njadiken keluarga-keluarga kristen keluarga sierkemalangan man Tuhan ras nggeluh ibas kepatuhan man Tuhan.

APLIKASI

            Harus sipahami kelurga kristen eme keluarga siijadiken Tuhan. Janah lit sura-sura Tuhan nandangi doni enda siarus ibenaken ibas keluarga nari. Emaka penting orang tua ras anak memahami fungsi ras kewajiban masing-masing.

            Arah bahan PJJ nta sekali enda, kita ngerana kerna Jabu Nepa Orat nggeluh Permata.Kita ngerana kerna permata sebab berhubungan ras HUT Permata pe 70 ken ibas tanggal 12 September 2018. Ateta Permata la saja berhasil ibas pendidikan formal. Meganjang pemetehna. Tapi pe berhasil ibas orat nggeluh. Banci saja orat nggeluh sidat arah pendidikan formal (sekolah), tapi enda terbatas. Bagepe arah ceramah-ceramah, rsd. Tapi i jenda kita isingetken kerna peran keluarga, khususna orang tua. Orat nggeluh siutama siarus iajarken orang tua eme uga kerna ngkelengi Tuhan ras sesama manusia (orang tua), janah enda la saja terjeng pemeteh tapi harus idalanken anak ibas kegeluhenna tep-tep wari. Permata arus sadar orang tua eme wakil Tuhan ibas keluargana, emaka berkewajiban anak eme ngikutken ajar orang tua ras mpehagaken orang tuana. Tapi gelah anak Permata megiken ajar orang tua ras mpehagaken orang tua, maka kewajiban orang tua eme la banci pesega-sega anak-anakna. Bagepe orang tua arus sadar ia eme wakil Tuhan ibas keluarga.

Pdt. Steven Kumenit, STh.M.Min.

Bapa Si Paguh Erkiniteken (Kisah Para Rasul-Rasul 10:1-8)

PERPULUNGEN JABU-JABU

GEREJA GBKP

TANGGAL 19 – 25 AGUSTUS 2018.

PERBAHANEN RASUL – RASUL 10 : 1 – 8.

Tema : Bapa Si Paguh Erkiniteken.

LATAR BELAKANG

1.     Sijadi bahan oratenta sendah eme bagin ibas turi-turin Kornelius ras isi jabuna tek man Yesus Kristus. Perlu siteh lebe, Kornelius eme sekalak perwira Roma siasalna Itali nari, janah sebage perwira ras komendan ibas pasuken Romawi siigelari Pasukan Itali. Kornelius la tek man Yesus Kristus sebab la saja ia kalak Jahudi, tapi pe ia kalak Itali sibeda kinitekenna. Bagepe amin gia Kornelius la kalak Jahudi, tapi peribadatan agama Jahudi iikutina alu la iproselit (i Jahudiken/ isunat). Kornelius ersembah man Dibata, ertoto ras nehken keleng ate (nen = berdiakonia), isampati Kornelius kalak Jahudi simusil. Emaka Kornelius igelari kalak situtus ibas beragama. Perlu siteh man kalak Jahudi kerna nampati kalak musil berarti nggo ndalanken hukum Dibata.

2.     Erkiteken Kornelius la erngadi-ngadi ertoto man Dibata maka ibegiken Tuhan pertotonna, emaka ibas jam 15.00 (banci saja Kornelius sangana ertoto) ndatken pengenehenen. Alu tangkas idahna malaikat Dibata reh ndahi ia, janah ibegina “sapaan” Malaikat : “o Kornelius” janah ijabab Kornelius ia Tuan. Je me ikataken Malaikat kerna kai nina Tuhan man bana. Nggo ibegiken Tuhan kerna pertotonna, bagepe nggo idah Tuhan kerna perbahanen singgo ibahan Kornelius nandangi kalak musil, emaka iperintahken Tuhan gelah Kornelius nuruh piga-piga kalak guna ngelegi Petrus sisangana i Jope. Emaka kenca lawes Malaikat, isuruh Kornelius juak-juakna ras sekalak situtus man Tuhan eme ajudanna gelah ku Jope njumpai Petrus.

3.     Lit dua bentuk kalak sindatken pengenehenen eme tupung medem ras la medem (banci sangana ertoto). Pengenenehen eme reh Kesah Si Badia ntah pe persuruhen Dibata (Malaikat) ngerana ibas pusuh ntah pe seh ku pusuh mpeseh sura-sura Dibata guna idalanken. Ibas makna enda me Kornelius ndatken pengenehenen guna ilakoken Kornelius. 

4.     Pertoton sipenangkih Kornelius bagi sada persembahen tutungen siipersembahken man Tuhan. Persembahen e merupaken persembahen pengataken bujur sue ras aturen ibas agama Jahudi. Erkiteken persembahen e merupaken persembahen simehuli maka merim persembnahen e seh ku Dibata, emaka meriah ukur Dibata, jenari ialoken Tuhan persembahen e. Bage me pertoton Kornelius. Pertoton Kornelius nggo seh man Dibata jenari nggo idah Dibata perbahanen kornelius simehuli, emaka inget Dibata me Kornelius (bdk. Roma 12:1). Siimaksudken inget Dibata eme Dibata nggo mperhitungken Kornelius janah nggo ialokenna sebage anakNa. Erkiteken nggo ialoken Dibata Kornelius sebage anakna maka isuruhna gelah ku Jope njumpai Petrus, rasul Tuhan. Maksud Tuhan suruh Kornelius (arah juak-juak ras ajudanna) gelah reh Petrus ngajarken terdauhen kerna ersembah man Tuhan ras tek man Yesus Kristus. Bagepe Kornelius ras isi jabuna iperidiken. Emaka Kornelius ras isi jabuna la iproselitkan (ijahudiken) jade kalak sitetap nimai kerehen Mesias, tapi Kornelius ras isi jabuna nggo tek man Yesus. Alui bage nggeluh ibas penggenapan ras nggeluh ibas nimai kerehen Yesus Kristus peduakaliken. 

5.     Ketutusen sekalak bapa situhu-tuhu erkiniteken man Tuhan banci mpengaruhi jabuna guna ersembah man Tuhan. Emaka Kornelius babaina isi jabuna ersembah man Dibata. Kornelius jadi nahkoda bas jabuna. Erkiteken Kornelius tutus maka jabuna pe jadi tutus, alu bage ketutusen Kornelius ras isi jabuna dat pasu-pasu ibas Dibata nari eme ibegiken Dibata pertotonna ras jadi kalak sitek man Jesus alu tuhu-tuhu.

APLIKASI

            Bapa eme kepala ibas jabu. Bapa merupaken nahkoda ibas jabu. Ibas erti kata adi bapa bas jabu lit denga maka peranan bapa ibas minpin jabuna harus icidahken. Kepemimpinen sekalak bapa harus erpalasken mbiar ras erkemalangan man Tuhan. Bapa simbiar ras erkemalangan man Tuhan alu sendirina berdampak ibas jabuna. Isi jabuna nghamati ia ras ikut ibas ersembah man Tuhan alu tutus.

            Adi kita ercurmin ibas kesalehan Bapa kalak Jahudi maka siidah peranan bapa ibas jabu penting kal. Fungsi bapa eme ngajarken anak ras isi jabuna gelah tetap erkemalangan man Tuhan. Fungsi bapa la saja terjeng naruhken anak-anakna sue ras aturen agama, formalitas, tapi tuhu-tuhu kesalehan nggeluh iajarken man anak ras isi jabuna. Erekiteken sie megegeh kegeluhen keluarga sebab ipasu-pasu Tuhan. Arah enda labo berarti kita harus jadi kalak Jahudi lebe, lang. sepenting man banta eme uga sekalak bapa situtus banci mpengaruhi isi jabuna gelah erkemalangan man Tuhan.

            Kornelius jadi model man perbapan, emaka ibas mperingeti HUT MAMRE GBKP pe 23 tahunken, perbapan ipersingeti gelah jadi Bapa Si Paguh Erkiniteken (nen = tema). Bapa la saja jadi kalak si tek man Tuhan Yesus selaku ulu keselamatan. Tapi bapa arus jadi kalak sierkiniteken eme teridah min kiniteken perbapan e ibas kegeluhenna tep-tep wari, alu tutus ku perpulungen, jabuna pe tutus ku perpulungen, tutus ertoto, bagepe meriah ukurna nehken keleng ate eme nggit nampati ise saja simbutuhken penampat. Uga pa pe kecibal geluh sireh, termasuk si la bagi ukurta, bapa arus tetap erkemalangan man Tuhan. Moto Mamre eme MAMRE ERDIATE, MAMRE ERPEMERE teridah min ibas kegeluhen perban tep-tep wari. Adi Bapa paguh erkiniteken man Tuhan ulihna eme ipasu-pasu Tuhan bapa ras isi jabuna, sebab pertoton bapa nggo seh ku Tuhan ras iidah Tuhan kerina perbahanen siibahan bapa.

Pdt. Steven Kumenit, STh.M.Min

Tuhan Mbebasken Bangsanta (Ulangan 6:20-25)

PERPULUNGEN JABU-JABU

GEREJA GBKP

TANGGAL 12 – 18 AGUSTUS 2018

Ulangan 6: 20 – 25

Tema : Tuhan Mbebasken Bangsanta.

LATAR BELAKANG

1.     Tupung bangsa Israel ngadi-ngadi i dataran Moab, nandangi bengket ku taneh Kanaan, janah taneh Kanaan e lit pendudukna, bagepe lit agama ras dibatana, maka ngerana Musa man bangsa Israel. Ipersingeti Musa gelah bangsa Israel ngajarken man anak-anakna kerna undang-undang Tuhan, siisina eme ersembah ras nembah man Tuhan simbebasken bangsa Israel (bdk. Monoteisme = sada Tuhan).

2.     Ibas khotbah Musa man bangsa Israel enda pe, ipersingeti Tuhan gelah adi kune anak-anak nungkun, engkai maka iperentahken Tuhan bangsa Israel ngikutken kerina undang-undangNa, maka orang tua berkewajiban mereken penjelasan sekaligus ngajarken man anak-anak kerna kuasa ras keleng ate Tuhan si nggo seh man bangsa Israel. Orang tua arus nuriken man anak-anak uga tanda-tanda sengget siibahan Tuhan man bangsa Israel. I ja tupung bangsa Israel budak denga i taneh Mesir, janah guna mbebasken bangsa Israel, Dibata mereken sepuluh marah man bangsa Mesir (nen = Keluaren 7:14-11:10). Bagepe ibas perdalanen, ijagai Tuhan bangsa Israel ibas “pengajaran” raja Firaun ras tentara-tenterana, janah tupung bangsa Israel seh ku lawit merah, ibelah Tuhan lawit e, emaka erdalan bangsa Israel i tenga-tengah lawit terbelah, tapi paksa tentera-tentera bangsa Mesir seh i tengah lawit e ibahan Tuhan maler mulihi lau lawit e, emaka mate kerina tentera Mesir singayaki bangsa Israel (Kel. 14:1-28). Bagepe Tuhan  mereken binangun api tupung berngi gelah bangsa Israel la mate bergehen, tapi tupung suari si seh kal lasna, ibereken Tuhan binangun embun (Kel.13:22). Bagepe icukupi Tuhan kebutuhen jasmani bangsa Israel. Tuhan mereken manna ras leto jadi pangan man bangsa Israel (Kel. 16:1-36). Tuhu-tuhu Tuhan simbebasken bangsa Israel ibas taneh perbudaken, Mesir nari.

3.     Makna undang-undang Tuhan, la terjeng pedoman peraturan, tapi mbages kal pengertinna eme bimbingen ntah pe perentah Tuhan man bangsa Israel gelah patuh man Tuhan ras nggeluh badia. Emaka nandai Tuhan la terjeng patuh ngenca, tapi ibas ndalanken undang-undang Tuhan pasti igejapkenna perhatin ras keleng ate Tuhan ibas kegeluhen secara pribadi bagepe sada bangsa.

4.      Ibas orang tua nuriken kerna kuasa ras keleng ate Tuhan man bangsa Israel, alu sendirina orang tua nggo mereken kesaksin man anakna kerna Tuhan sendiri. Bagepe la saja nuriken kerna sejarah keselamatan bangsa Israel, tapi gelah bangsa Israel tetap nggeluh ibas perpadanan eme bangsa Israel njadiken Tuhan simbebasken ia ibas taneh perbudaken Mesir nari jadi Tuhanna, janah Tuhan masu-masu kegeluhen bangsa Israel.

5.     Ngenen enda maka teridah orang tua kalak Israel berkewajiban njaga ras mbelinken anak-anakna alu mbiar man Tuhan, sebab alu inuriken kerna kuasa ras keleng ate Tuhan, maka sijadi man anak-anak eme mbiar man Tuhan ras ndalanken kai simehuli singena ate Tuhan ibas kegeluhen tep-tep wari.

APLIKASI

            Selaku masyarakat kita harus ngataken bujur man Tuhan, sebab bangsanta nggo berumur 73 tahun. Bangsanta nggo merdeka. Selaku bangsa singgo merdeka teridah min ibas kegeluhenta tep-tep wari. Ibas erti kata kita harus mengisi kemerdekaan enda alu dem pengataken bujur arah saling menghargai sada ras sidebanna, bertanggungjawab selaku masyarakat, janah sihindari bas pusuh ras ukur sierpengakap “kita” saja sibanci nggeluh ibas Indonesia enda. 

            Ibas sejarah bangsa Indonesia alu jelas ikataken maka kemerdekataan Indonesia idat erkiteken perjuangan rakyat Indonesia, labo erkiteken pemere bangsa sideban, ntah pe erkiteken piga-piga jelma ras kelompok tertentu. Amin gia ulih perjuangan kerina bangsa Indonesia, tapi situhuna Tuhan seberkarya ras mulahi bangsa Indonesia ibas perbudaken/ jajahan bangsa sideban nari.

            Erkiteken kita nggo merdeka, janah kemerdekaan bangsa Indonesia iakui bangsa internasional, maka la banci bangsa sideban menjajah bangsanta. Sebab adi ijajahna, maka bangsa e pasti berhubungan ras bangsa internasional. Tapi amin gia kita nggo merdeka tapi melala denga siharus ipekena ras ibangun gelah kita nggejapken kerna kemerdekaan situhu-tuhu.

            Gelah kita merdeka situhu-tuhu maka kita selaku orang tua harus erkemalangan man Tuhan, janah selaku orang tua berkewajiban nuriken kerna kuasa Tuhan simbebasken ras memerdekakan Indonesia. Harus sisadari secara angkatan perang kita talu, tapi erkiteken pasu-pasu Tuhan man banta maka kita banci mbebas/ merdeka. Emaka marilah selaku bangsa singgo merdeka, mental kemerdekaan e harus teridah eme ngelakoken pembangunan, nggeluh kerjasama. Ula lit bas kita negatif thingking simenghambat laju pembangunan.

Pdt. Steven Kumenit, STh.M.Min.

Momokenlah Kiniulin Dibata (Mazmur 52:10-11)

PERPULUNGEN JABU-JABU

GEREJA GBKP

TANGGAL 5 – 11 AGUSTUS 2018.

Mazmur 52:10-11.

Tema : Momokenlah Kiniulin Dibata.

LATAR BELAKANG

1.      Sijadi bahan oratenta sendah merupaken bagin si la terpisahken ibas ayat sada nari. Tapi khusus bahan oratenta sendah, pemazmur eme Daud ncidahken kerna keleng ate Tuhan sinemani ia. Erkiteken keleng ate Tuhan sitetap nemani ia maka ate Daud momoken man kalak situtus ate man Tuhan.

2.      Ipeseri Daud dirina ras batang saitun si meratah bulungna. Maksudna, kalak singikutken perentah Tuhan tetap nggeluh, adi pe itabah kalak batang saitun e, lit tunas mbaru simereken kegeluhen. Kalak sirusur nggeluh ibas rumah pertoton, tentuna ipasu-pasu Tuhan (bdk. madin sada wari ibas rumah Tuhan asangken seribu wari ibas ingan sideban. Madin tedis ibas gerbang Rumah Dibatangku asangken ringan ibas rumah kalak jahat – Mas. 84:11).

3.      Iangka Daud tuhu-tuhu arah ernalem man Tuhan saja maka lit kegeluhen. Janah kegeluhen e kegeluhen si la ermasap-masap. Erkiteken sie me ate Daud momoken kiniulin Tuhan man kalak erkeleng ate man Tuhan, gelah kalak sierkeleng ate man Tuhan tetap nggeluh mengandalkan Tuhan.

4.      Kegeluhen siernalem man kuasa ras jabatan ugapa pe mate me ia erkiteken ihukum Tuhan.  Enda merupaken bentuk  langsung ngataken Saul simembentengi dirina ibas penghukumanTuhan nari mate me pagi ihukum Tuhan. Perlu siteh Saul nggo itulak Tuhan jadi raja. Daud ipilih Tuhan jadi raja bangsa Israel. Keputusan Tuhan e la teraloken Saul, emaka ate Saul mbunuh Daud. Erkiteken sie me Daud cebuni. Daud erpindah-pindah ingan seh Daud i karangen Heret janah reh Daud ku imam Ahimelek guna mindo man, sebab biasana selaku imam lit persediaan nakan erkiteken lit bagin imam ibas kalak ersembah i rumah pertoton. Janah tupung sie i je lit Doek kalak Edom sekalak tentra (perwira) Saul. Ipebetehkenna man Saul kerna Daud si lit i rumah Ahimelek. Nina man Saul, reh Daud men Ahimelek guna mindo pasu-pasu ibas Tuhan nari. erkiteken sie merawa Saul janah idilona Ahimelek ras imam-imam sideban, janah ibunuhna Ahimelek ras imam-imam e. lit 85 imam simate, bagepe kerina kalak si lit i kuta Nop, subuk dilaki bagepe diberu, danak-danak bagepe simbaru tubuh, lembuh, kelede ras biri-biri kerina ibunuh. Erkiteken sie me iandingken Daud, baba Doek e bagi piso cukur sintelap (bdk Masmur 52:4). Akap Saul alu bunuhna imam-imam ras anak kuta Nop, ia banci selamat ibas penghukumen Tuhan nari. Lang.

5.      Keleng ate Tuhan simerupaken kiniulin Tuhan mbentengi Daud, emaka ate Daud rasa lalap ngataken bujur man Tuhan ras momoken kerna sie man kerina kalak ertutus ate man Tuhan.

APLIKASI

            Ibas minggu enda kita ngerana kerna HUT Saitun. Secara  kategorial umur Saitun 3 tahun denga, tapi adi sinen terdauhen ope denga gelarna Saitun, gelarna lansia denga, nggo lit aktivitas lansia tahun 1991 nari. Jenari me ihitung umur lansia. Emaka umur lansia genduari eme 27 tahun.

            Tupung gelarna lansia denga, lansia iteruh bidang diakonia, emaka lansia merupaken salah sada objek pelayanan gereja. Lansia isampati ras ilayani, emaka adi lit natal, subuk natal umum, PJJ ras natal lansia, majelis runggun ras panitia natal mereken luah man lansia. Tapi kenca gelar lansia nggo jadi Saitun janah ia iteruh bidang Koinonia, maka Saitun lanai jadi objek pelayanan tapi nggo jadi subjek pelayanan. Ertina lansia pe selaku warga gereja harus ikut ibas pelayanan. Saitun bali ras kategorial sideban siikut terlibat langsung ibas pelayanan gereja. Tapi siidah perubahan enda lenga erdalan alu mehuli.

            Lenga kerina kita banci seh umur saitun, emaka man kam orang tua kami Saitun harus ngataken bujur man Tuhan, sebab enda merupaken pemere Tuhan simbelin ibas kegeluhen Saitun. Keleng ate Tuhan simbelin enda me harus simomoken man kerina kalak siertutus ate man Tuhan. Bagepe momoken  sebab Tuhan mereken kesempaten man Saitun guna ngelai Tuhan asa ngasup ras gegeh si lit man Saitun. Bagepe gelah tuhu-tuhu nggeluh bagi Saitun simerata bulungna, simelala manfaatna maka Saitun harus nggeluh erngena ate man Tuhan. tutus ku gereja, PJJ ras PA Saitun.

            Secara psikologi, lit sura-sura sierbahanca malem ate orang tuanta (Saitun), emaka tanggung jawab kita bagepe gereja eme erbahan malem ate orang tua, banci arah mereken kue ulang tahun, man ras-ras, bagepe gawa-gawa ras orang tua, rsd.

Pdt. Steven Kumenit, STh.M.Min.