Erlajar Arah Perberita Si Meriah (Kisah Para Rasul-Rasul 14:8-20)

PERPULUNGEN JABU-JABU (PJJ)

GEREJA GBKP

TANGGAL 23 – 29 APRIL 2017.

Perbahanen Rasul – Rasul 14:8 – 20.

Tema : Erlajar Arah Perberita Si Meriah.

LATAR BELAKANG

1.      Paulus ras Bernabas si i Listera erkite-kiteken i Ikoni lit sada penolaken si mesangat nandangi rasul-rasul simeritaken Berita si Meriah.

2.      I Listera Paulus ras Barnabas mpeseh Berita Si Mehuli ras erbahan tanda-tanda sengget. Tanda sengget siibahan Paulus ras Barnabas eme pepalem sekalak dilaki sitangtang tubuh nari la banci erdalan (lumpuh). Ipepalem Paulus, sebab iperdiateken ras iidah Paulus ia nggo tek man Yesus. Nterem kalak sinaksiken Paulus pepalem sekalak dilaki si la banci erdalan e, emaka ersurak ia ibas cakap Likaoni. Dewa-dewa nggo nusur ku tengah-tengahta bagi rupa manusia.

3.      Ibas Paulus pepalem sekalak dilaki si la banci erdalan e, mpeturah semangat beragama man kalak Listera. Sebab akapna kutana dat sada perlakuan siistimewa ntah pe iperdiateken dewa-dewa simeganjangna ia, emaka nusur dewa-dewa e ibas rupa manusia. Ibas pengangkan sibage me maka Barnabas katakenna penjelmaan dewa Zeus. Zeus eme dewa simaganjangna man bangsa Yunani. Paulus ikatakenna penjelmaan dewa Hermes eme dewa sipeseh berita ibas dewa-dewa sideban nari. Paulus ikataken dewa Hermes sebab Paulus rusur ngerana.

4.      Erkiteken meriah ukur kalak enda, emaka reh imam dewa Zeus ibas rumah pertotonna nari, ibabana lembu jenggina ras bunga ku pintu gerbang kuta, atena erbahan persembahen man Paulus ras  Barnabas, sebab akapna Paulus ras Barnabas dewa. Tapi kenca ibegi ras iteh Paulus ras Barnabas kerina enda, ceda kal ukurna emaka kiam Paulus ras Barnabas guna ngelarangsa. Lit 2 hal siikataken Paulus ras Barnabas eme 1). Paulus ras Barnabas manusia biasa bali ras ia kerina. 2). Paulus ras Barnabas reh ku Listera guna meritaken Berita Si meriah gelah kalak Listera tek man Dibata singgeluh. Dibata sinjadiken langit, doni, lawit ras kerina isina, ras Dibata siperkeleng, gelah ulanai ilakokenndu perbahanen si sia-sia. Tapi erkite-kiteken nggo reh piga-piga kalak Jahudi i Antiokia, i daerah Pisidi nari ras Ikoni, janah iajuk-ajukna jelma sinterem gelah ikutkenna katana, emaka jelma sinterem mbeterina Paulus ras Barnabas alu batu, janah iserenna ku darat kuta.

5.      Amin gia lit penolakan si mesangat i Listera, tapi nggo lit buah ntah hasil ibas Paulus ras Barnabas mpeseh Berita Si Meriah, sebab nggo lit kalak si tek i je. Kalak si nggo tek enda me sincidahken perhatin ras mediate man Paulus ras Barnabas, tupung Paulus ras Barnabas “ampar” menam mate i darat kuta.

APLIKASI

            Meritaken berita simeriah eme merupaken salah sada dahin siidahiken ajar-ajar, rasul-rasul bagepe kerina kalak si tek seh ku kedungen jaman, janah jadi palasna eme Matius 28:19-20. Alu kata sideban meritaken berita si meriah eme dahin kerina kalak kristen. Tapi siidah ibas kita ndahiken meritaken berita si meriah la mesukah. Lit masalah-masalah, apakah masalah darat nari ( lit penolakan, lit kalak si la senang, ingan ndauh, rsd), ntah pe ibas kita nari (mekisat, keluarga, pendahinta, rsd). Uga pa pe perbeben ras kiniseran ibas kita er-PI, arus min sidalanken alu meriah ukur. Siluangken waktunta guna er-PI.

            Ibas tanggal 18 April 2017, GBKP nggo berumur 127 tahun. Janah mari sinen kerna perberita simeriah ku kalak karo eme Pdt.H.C. Kruyt, Nikolas Pontoh, Pdt.J.K. Wijngaarden, Pdt. J.H. Neuman, Pdt. M. Joustra, rsd. Kerina pe ngenanami kiniseran ibas meritaken berita simeriah. Amin bage gia tetap ia megenggeng, ulihna GBKP nggo galang secara institusi, bagepe kalak karo nggo “pentar” ras nggo banci bercocok tanam, rsd.

            Semangat er-PI ula ngadi man banta. Erkiteken sie me orang tuanta nggo nciptaken lagu ulih latih semerdang gelah kita tetap termotivasi er-PI. Harus siteh sasaran keselamatan eme kerina isi doni enda. Emaka kita arus ersikap ras ndalanken perintah Tuhan eme meritaken Barita Si Meriah ku kerina bangsa. Guna keselamatan kerina bangsa, gereja GBKP lit istilah PI keluar ras PI ke dalam, emaka isamping kita PI keluar, arus ka kita er-PI  ke dalam. Arus siiinget melala denga si lenga ngaloken Yesus Kristus eme Tuhan ras Juru selamat manusia. Bagepe nterem denga senina turangta simonce-once kinitekenna. Emaka dahinta mpetetap ukurna ras sehken man bana nggeluh ibas erpengarapen man Tuhan. Ula kita mbiar sebab ibas kita ndahiken dahin Tuhan la sia-sia kerina e, sebab Dibata pasti ikut ras kita. Tapi perlu ka siinget maka ibas kita beritaken berita si meriah, kuasa ras keleng ate Yesus Kristus ras keselamatan ibas Yesus Kristuslah siiberitaken kita, gelah kalak si lenga tek, jadi tek man Yesus Kristus. Bagepe tetap ukurna ibas nggeluh erpengarapen man Tuhan.

            Gelah terorganisasi alu mehuli maka, BPMR arus mbentuk seksi PI ras ban programna, bagepe libatkan secara berkala/rutin PJJ muat bagin ibas er-PI ntah pe ndalanken pelayanan alu kerjasama antar runggun ras klasis. Janah er-PI la saja terjeng nehken kata Dibata, tapi pe pengobatan masal, nonton film, ceramah ras nehken bea siswa, rsd. Bagepe tim PI ras si er-PI arus sibekali kerna kata Dibata, skil ras situasi kondisi ingan siituju kita.

Pdt. Steven Kumenit, STh.M.Min

Dibata Tetap Rembak Ras Aku (Mazmur 16:1-11)

KHOTBAH MINGGU, 23 APRIL 2017.

GEREJA GBKP

Invocatio    :    Malem me ate kalak si la megiken pedah kalak jahat, si la ngusih perbahanen kalak perdosa si la erteman ras kalak megombang man Dibata (Mazmur 1:1).

Ogen          :    1 Petrus 1:3-9 (Tunggal).

Khotbah     :    Mazmur 16:1-11 (Responsoria).

Tema          :    Dibata Tetap Rembak Ras Aku.

LATAR BELAKANG

1.      Sijadi bahan khotbahnta sekali enda eme respon kiniteken pemazmur nandangi Tuhan. Pemazmur ngenen Tuhan eme sierkuasa ras perkeleng, bagepe sinampati pemazmur eme raja Daud.

2.      Erkiteken Tuhan ngenca sijadi andalan pemazmur, maka reh pemazmur i rumah pertoton guna mindo penampat ras nuriken isi pusuhna. Man pemazmur (raja Daud), rumah pertoton eme sada ingan sibanci mereken ketenangen ras kemalemen ate (bdk. Mazmur 84:11). Sebab rumah pertoton eme rumah Dibata. Jadi rumah pertoton banci mereken ketenangen ras kemalemen ate man Daud, erkite-kiteken rembak ras nggeluh ibas Tuhan.  Enda jadi erkite-kiteken ibas kegeluhen pemazmur, nggo igejapkenna erbage-bage pemere Dibata, subuk materi bagepe perlindungen Tuhan ibas erbage-bage mara bahaya nari (iayaki Saul ras peperangan). Khususna ibas mara bahaya nari banci Daud ndatken kematen. Tapi erkiteken keleng ate Tuhan, ipulahi Tuhan Daud ibas kuasa kematen nari. Bagepe enda kerina erkite-kiteken kiniteken ras kepatuhen Daud man Tuhan saja.

3.      Bangsa Israel eme bangsa Dibata, emaka selaku bangsa Dibata, kegeluhenna arus nggeluh ibas kepatuhan man Tuhan saja. Emaka tugas raja eme njaga ras mabai bangsa Tuhan tetap nggeluh ibas kepatuhan man Tuhan saja, gelah bangsa Tuhan nggeluh ibas penjagan ras pasu-pasu Tuhan. Erkiteken sie me raja Daud la nggit ikut muat bagin ibas kurban persembahen kalak si la tek man Tuhan. Kalak si nehken kurban persembahen man dibata-dibata sideban. Sebab ibas pengidah Daud, ngikuti dibata-dibata sideban melala ndatken kesusahen-kesusahen. Kurban persembahen man dibata-dibata sideban eme dareh. Dareh ipake ibas upacara-upacara keagamaan guna ersembah man dibata-dibata sideban, subuk arah mencurahkan i datas mezbah ntah arah minem darah e. Tapi bangsa Israel ilarang minem dareh (Imamat 7:26-27, 17:10-14, 19:26; Ulangan 12:23-24, 15:23). Daren asuh-asuhen ipake imam-imam ibas rangka pengalemi dosa (Imamat 1:5, 3:2).

4.      Bangsa Tuhan (Israel) amin gia nggeluh i sekelewet bangsa si la tek man Tuhan, tapi erkite-kiteken bangsa Tuhan patuh ras nggit ngikuti pengajaren Tuhan, maka sialoken bangsa Israel eme pasu-pasu Tuhan. Enda me sierbahanca meriah ukur Daud.

5.      Selaku kalak si tek ras patuh man Tuhan, kematen menjadi kebiaren. Sebab adi mate berarti sirang ras Tuhan. Tapi enda la terjadi man Daud. Ipulahi Tuhan Daud ibas kuasa kematen nari. Sebalikna, ituduhken Tuhan man Daud dalan kempak kegeluhen. Tuhu-tuhu Tuhan ndeher ras Daud.

APLIKASI

            Pemazmur nggejapken ras nuriken maka adi ndauh ras Tuhan, adi la rembak ras Tuhan maka pemazmur la ngasup memaknai kegeluhenna, labo idatkenna keriahen ras labo lit simehuli. Dibata ngenca ulu kegeluhen ras keriahen. Adi ras dibata-dibata sideban maba kesusahen ngenca.

            Amin kai pe persoalen siiperhadapken man banta, aminken ras imani maka kerina e merupaken sada proses, ujin guna mengasah kinitekenta. Emaka ula fokus ku bas masalah tapi fokuslah ku bas keleng ate Yesus Kristus singgo mereken kegeluhen simbaru man banta. Ibas erti kata mekatep kita jumpa perbeben ras kiniseran, bagepe melala tawaran-tawaran doni enda. kerina enda maba perbeben ras kiniseran man banta, sebab kita arus erbebe ngelawan kerina e. Lit ka si talu erkiteken la tahan nggeluh ibas kiniseran ras la ngasup ngelawan tawaran – tawaran doni enda. Mari sinen kerna Yesus Kristus singgo mate ras keke ibas simate nari. Yesus Singgo keke ibas simate nari ncidahken kuasaNa si langasup ilawan kuasa-kuasa sideban. Emaka adi kita ras Tuhan maka malem ateta, sebab kuasa Tuhan banci nampati kita.

            Kita kerina nggo ngaloken Paskah, makna sideban ibas kita ngaloken paskah eme kita bagi anak simbaru tubuh. Siertina kita singgo nggeluh ibas keselamatan arus ndalanken kesemalatan e. Sipeduaken : Muas melihe min kita kerna ndalanken kata Dibata (susu pertendin si la lit campurna, bdk 1 Petrus 2:2). Emaka sibereken ras sidalanken kerna kai singena ate Tuhan. janah kata Dibata sibanci pebelinken kita ibas simehuli ras singena ate Dibata. Bagepe ngataken kerna ketidak mampuan manusia, siarus isampati alu kata Dibata. Manusia arus ipebelinken arah Kata Dibata gelah jadi dewasa ras nggeluh ibas keselamatan. Jadi kita nggeluh ibas ketergantungan man Dibata saja. Emaka adi jumpa perbeben ras kiniseran, maka reh kita mindo penampat man Tuhan.

            Rembak ras Tuhan, ndatken keriahen. Tapi siidah ntarem kita sakit stres, strok, rsd, enda erkiteken kurang kita rembak ras Tuhan. Temanta ngetakenca Dibata tetap rembak ras aku, tapi siidah nterem denga kita lenga rembak ras Tuhan. maksudna lenga kita ernalem ras tergantung man Tuhan.

            Perlu siteh mulihi, Yesus reh ku doni enda ibas rangka pertaktaken Yesus ras doni enda, termasuk manusia. Alu bage mabai kita nggeluh ibas keselamatan. Adi Dibata nggo mereken keselamatan man banta, maka ateNa gelah ibas perdalanen geluhta la kita tabuh ku bas dosa. Emaka tetap Ia rembak ras kita. Berimanuel Tuhan ras kita. Dibata arah Kesah Si badia mereken gegeh man banta gelah kita tetap ras Ia.  

            Adi Dibata rembak ras kita, maka kita pe arus rembak ras Ia, gelah tetap isampatiNa kita. Emaka tupung kita jumpa perbeben ras kiniseran, ula kita kiam ku ingan-ingan sideban, ntah pe dibata-dibata sideban, tapi ngandung ras mindo penampatlah kita man Dibata.

Pdt. Steven Kumenit, STh.M.Min.

Nggeluh Ibas Pengarapen (1 Petrus 3:17-20)

PERPULUNGEN JABU-JABU (PJJ)

GEREJA GBKP

TANGGAL 9 – 15 APRIL 2017.

1 Petrus 3:17-20.

Tema : Nggeluh Ibas Pengarapen.

LATAR BELAKANG

1.      Surat Petrus enda merupakan surat guna mpegegehi kalak kristen si lit ibas taneh perlajangen i Asia kitik (Pontus, Galati, Kapadokia,  Asia ras Bitinia) erkite-kiteken arus mpertahanken kinitekenna. Sebab kalak kristen tading i sekelewet kalak si la tek man Yesus Kristus, bagepe kalak kristen nggeluh ibas kiniseran erkite-kiteken ndatken penganiayaan.

2.      Selaku bangsa pilihen ras bangsa sikerajangen Dibata (bdk. 1 Petrus 2:9), kalak kristen nggo berbeda ras kalak sideban, termasuk kalak Yahudi. Tuhu kalak Yahudi eme bangsa pilihen Dibata, tapi gagal ia ncidahken selaku bangsa pilihen, emaka kalak kristen ipilih Tuhan jadi bangsaNa gelah tujun keselamatan nandangi kerina bangsa banci idalanken arah kata ras perbahanen (lagu langkah).

3.      Erkiteken kalak kristen eme bangsa pilihen ras bangsa sikerajangen Tuhan, maka amin gia nggeluh ibas kiniseran ras nggeluh i sekelewet bangsa si la tek man Tuhan, lagu langkah kalak kristen arus tetap ncidahken simehuli singena ate Tuhan. Kalak kristen arus tetap erbahan simehuli singena ate Tuhan. Kalak kristen la perlu mbalas kejahaten alu si jahat, tapi kalak kristen arus saber ras meganggeng. Sebab adi la saber ras megenggeng, kalak kristen tabuh ku bas dosa. Adi nggo ndabuh ku bas dosa, maka penghukuman siialoken. Kalak kristen la ibaba Yesus Kristus guna nggeluh rembak ras Dibata.

4.      Tole ipersingeti Petrus maka la lit nari kematen Yesus peduakaliken guna mbebasken ras nelamatken kalak perdosa. Kematen Yesus sada kali ngenca. Ibas kematen Yesus kalak kristen iselamatken erkite-kiteken tek man Yesus Kristus ras ndalanken kai singena ate Tuhan. Bagepe kenca Yesus Kristus mate , maka ibas kuasa Kesah Si Badia Yesus mberitaken berita ibas Dibata nari nandangi tendi-tendi sitertaban, eme kalak si la erkemalangan man Dibata. Alu bage ia banci selamat.

5.      Memang kegeluhen kalak kristen si tuhu-tuhu nggeluh mbiar ras rembak ras Dibata, lit saja si la meriah ukurna nandangi kalak kristen, termasuk pemerintah Roma. Amin bage gia, ula enda jadi alasan kalak kristen mbiar erbahan simehuli. Mbiar ncidahken kai singena ate Tuhan, subuk arah kata ras perbahanen. Kalak kristen ibas situasi sibage rupana arus tetap nggelu saber, megenggeng ras nggeluh ibas pengarapen. Nggeluh ibas pengarapen enda me merupaken sada kehebatan kalak kristen. Sebab ibas wari pendungi pagi, kalak si tutus ndalanken kai singena ate Tuhan saja nge, ibaba Yesus Kristus nggeluh rembak ras Dibata. Kalak kristen nggeluh ibas keselamatan. Bagepe nggeluh ibas keselamatan, arus tetap patuh ndalanken kai siiperentahken Tuhan.

APLIKASI

            Kita eme bangsa pilihen Dibata, janah genduari kita sangana nimai kerehen Yesus Kristus peduakaliken i doni enda. Kerehen Yesus peduakaliken eme salah sadana eme ibas rangka ngeranaken kalak singgeluh ras singgo mate. Alu bage la lit alasan kalak si nggo mate, nggo dung sikerajangenna. Tetap ngge ibas wari pendungi pagi (kerehen Yesus Kristus peduakaliken), kalak si nggo mate ipegeluh mulihi guna iadili. Emaka man banta singgeluh denga arus tetap ndalanken kai singena ate Tuhan. Sebab adi nggo mate la lit kesempaten guna jera ras erbahan simehuli. Tupung kita nggeluh denga, kesempaten ndalanken kai singena ate Tuhan ibereken Tuhan man banta.

            Genduari kita sangana nimai kerehen Yesus Kristus. Kerehen Yesus Kristus eme sada kepastin, sebab ibas pustaka si badia, bagepe ibas pengakun kiniteken ngatakenca reh me Ia pagi. Memang ibas kerehenNa la ikataken katawari tapi pasti.  Alu bage, meriah ras malem ateta sebab kita nimai hal si pasti. Isamping sie, arus lit bas ukur ras pusuhta ngatakenca, Yesus Kristus pasti reh, bagepe kita ibaba Yesus guna iperembaken ras Dibata. Bagepe ibas kita nimai kerehen Yesus Kristus, kita arus tetap ndalanken kai singena ate Tuhan, amin gia kita jumpa perbeben ras kiniseran. Bahanlah tempa-tempa kerehen Yesus Kristus kari ntah pagi reh. Emaka kita tetap semangat ras tetap termotivasi guna ndalanken kai singena ate Tuhan.  Enda me siikataken nggeluh ibas pengarapen.

Pdt. Steven Kumenit, STh.M.Min.        

SilangNdu Kumuliaken (1 Yohanes 2:21-25)

PERPULUNGEN JABU – JABU (PJJ)

GEREJA GBKP

TANGGAL 2 – 8 APRIL 2017.

1 Yohanes 2 : 21-25.

Tema : SilangNdu Kumuliaken

LATAR BELAKANG

1.      Perpulungen kristen ibas abad-abad sipemena ndatken  sada perbeben kerna kinitekenna, sebab lit ajaran sipapak siibaba guru-guru perguak singatakenca, Yesus e labo Mesias siipadanken Dibata. Guru-guru perguak enda tangtangna kalak kristen, tapi nggo itadingkenna persadan kalak kristen.

2.      Guru-guru perguak singgo ndarat ibas persadan kalak kristen mesera akapna ngakuken Yesus eme Mesias ras Anak Dibata. Amin gia la isangkalna Yesus nggo ndatken kuasa Dibata, emaka Yesus e labo tuhu-tuhu manusia, sebab lit biak Dibata si la ermasap-masap silit bas Yesus. Terjeng bage ngenca si lit bas Yesus. Lebih asangken sie la lit.

3.      Ibas situasi sibage, Yohanes mereken pergegeh man perpulungen gelah perpulungen banci meteh kerna ajaran situhu-tuhu. Nina Yohanes, Kalak singataken Yesus la bo Mesias ras Anak Dibata, ia me situhuna perguak, janah nggo itulakna Bapa (Dibata). Sebab, Yesus Kristus eme Anak Dibata, merupaken sada kesatuan si la terpisahkan Bapa (Dibata). Amin gia situhuna Yesus Anak Dibata, tapi situhuna Yesus e me Dibata jine. Yesus Anak Dibata erkite-kiteken Yesus reh ku doni enda jadi seri ras manusia guna nelamatkan doni enda. Emaka adi lit singataken Yesus labo anak Dibata, situhuna nggo itulakna Dibata e.

4.      Tole, isingetken mulihi kerna kegeluhen situhu-tuhu si la erkeri-kerin. Nina Yohanes guna ndatken kegeluhen si tuhu-tuhu si la keri-kerin, perpulungen arus tetap buniken ibas ukurna kerna berita sitangtangta ibegina.  Jadi penungkunen, kai berita e. Berita e me Yesus Kristus eme Anak Dibata ras tuhu-tuhu manusia ras singgo mate guna mbersihken dosa-dosa manusia.

5.      Ibas kata pergegeh ras persinget siibereken Yohanes enda, ate Yohanes gelah perpulungen la terpengaruh ibas ajaran si papak, ras tetap nggeluh ibas pengajaren situhu-tuhu ras tetap ngelakoken kebenaren e ibas perbahanenna tep-tep wari. Jadi, pengakun kerna Yesus anak Dibata ras manusia, bagepe si nggo nelamatken manusia arah kayu persilang arus teridah ibas kegeluhen ras perbahanen tep-tep wari.

APLIKASI

            Nggeluh ibas persadan ras Kristus arus teridah ibas persadan sapih-sapih kalak kristen. Ibas erti kata, kita selaku kalak kristen arus nggeluh megegeh, sikeleng-kelengen ras sisampat-sampaten, sebab siteh ibas kegeluhen sigenduari melala ajaren-ajaren sipapak, bagepe melala tawaran-tawaran doni enda siatena nirangken kita ibas persadan ras Yesus Kristus. Tuhu selaku manusia sitading ras nggeluh ibas doni enda, melala kebutuhen-kebutuhen jasmani. Tapi labo berarti erkite-kiteken kebutuhen-kebutuhen jasmani e, kita si nai nggo ibersihken Tuhan arah kayu persilang nirangken kita ras Yesus Kristus. lang.

            Mari sinen kerna makna silang Yesus. Silang Yesus e ngataken maka nai kegeluhenta, nggeluh ibas dosa, kita la banci nggeluh ibas keselamatan adi sipake gegeh ras kepentaren manusia. Sura-sura ukur manusia la ngasup nelamatkan manusia. Tapi erkiteken lias ras perkuah ate Tuhan. Dibata nusur ku doni enda, jadi seri ras manusia. Dibata merealisasiken padanNa guna nelamatkan manusia. Keselamatan siibereken Dibata eme Mesias. Emaka Dibata si nusur ku doni enda singgo jadi manusia eme Yesus Kristus, Ia me Mesias. Tapi erkite-kiteken la teraloken nterem kalak Yahudi, guru-guru agama ras kalak Farisi, Mesias e i tulakna. Janah puncak penulaken e me Yesus mate i kayu persilang. Jadi penungkunen man banta, apakah Yesus Kristus simerupaken Dibata sendiri nggo talu ? lang. Tapi ibas kematen Yesus Kristus i kayu persilang mpereh keselamatan man banta.

            Ibas keselamatan siipahami kalak Yahudi, keselamatan e banci i dat arah nehken persembahen tutungen ras pengemalemi dosa. Ibas erti kata, dosa-dosa singgo ibahan manusia, banci ialemi Tuhan adi bangsa Israel nehken persembahen tutungen ras pengalemi dosa. Emaka banci mulih-ulih persembahen e. Ibas makna enda, Yesus Kristus singgo mate i kayu persilang merupaken persembahen anak domba Allah guna nelamatkan kita ibas dosa-dosa nari. Janah kematen Yesus eme sada kali ngenca.

            SilangNdu kumuliaken (tema), labo berarti kita memuliaken silang e. Tapi ngataken maka ibas kayu persilang, Yesus nggeluh ibas kiniseran ras kematen. Erkiteken sie maka salah sada simbol silang man kalak kristen eme kiniseran. Alu bage ibas kita ngenen ras nggecapken kerna silang Yesus, kita arus mpermuliaken Yesus. Kita arus nggeluh saber ras megenggeng amin gia kita ndatken perbeben ras kiniseran. sebab siteh ibas kita tetap nggeluh ibas persadan ras Yesus Kristus, ras tetap saber ras megenggeng amin gia kita sangana ndatken perbeben ras kiniseran, pasti kita ndatken kegeluhen situhu-tuhu si la erkeri-kerin. Jadi ibas kegeluhen  sibage me kita nggo mpermuliaken silangNa (kiniseran ras kematen Kristus). Makna sideban ibas kita nggo memuliaken silangNa eme aru nghamati, “menjunjung tinggi kehormatan”, bagepe tetap ncikep Yesus e Anak Dibata sinelamatken kita, arah kata ras perbanahenta tep-tep wari.

Pdt. Steven Kumenit, STh, M.Min.