Ergiah-Giah Makeken Si Lit Guna Tuhan (2 Tawarik 31:1-10)

PERPULUNGEN JABU-JABU (PJJ)

GEREJA GBKP

TANGGAL 30 JULI – 5 AGUSTUS 2017.

2 Kronika 31 :1-10.

Tema : Ergiah-Giah Makeken Si Lit Guna Tuhan.

LATAR BELAKANG

1.      Bangsa Juda selaku bangsa Dibata nggo ndalanken praktek-praktek erlua-lua ibas ia ersembah man Tuhan, sebab nggo lit dibata-dibata si deban bas ia. Padahal selaku bangsa Tuhan, kegeluhen badia ras ersembah man Tuhan saja arus nggeluh bas ia. Erkiteken sie me Tuhan mereken sepuluh pedah Dibata man bana.

2.      Raja bangsa Israel, iangkat Tuhan, la saja terjeng merentah secara politik ras mereken kesejahteraan man bangsana, tapi arus mabai bangsa e erkemalangan man Tuhan. Ibas palas enda me raja Hiskia mpekena rumah pertoton singgo ceda, bagepe italangina pintun-pintun gerbang rumah pertoton. Rumah pertoton ingan Dibata, ingan Dibata ngajari bangsana gelah nggeluh badia ras ndalanken kai singena ateNa. Rumah pertoton eme central kegeluhen bangsa Israel.  Bagepe ipepulung raja Hiskia imam-imam ras kalak Lewi lako mbersihken dirina selaku imam rumah pertoton rikutken aturen agama. Jadi terjadi pembaharuan agama, simerupakan palas ndatken pasu-pasu Tuhan.

3.      Raja Hiskia ngenen kai singgo ibahan bangsa Juda lepak. La patut bangsa Juda ersembah man gana-gana, ras la banci lit gana-gana ibas kegeluhenna. Emaka ipelimbarui raja Hiskia me kegeluhen bangsa Israel, termasuk kegeluhen eragama. Kerina bangsa Israel idilo guna ngeradaskan batar-batar ingan ersembah kalak perbegu, bagepe ipecahken kerina tugu-tugu batu, ras ibulakken kerina  gana-gana siipajekken guna dewi Asera. Momen kenca dung wari raya ibahan raja Hiskia, sebab kenca dung wari raya panen, kalak Israel arus erdahin, arus merdang. Gelah ipasu-pasu Tuhan sinuan-sinuan, kerina gana-gana, termasuk gana-gana siipajekken guna dewi Asera arus ibulakken. Ula nari kalak Israel mindo penampat man Dewi Asera. Perlu siteh Dewi Asera eme dibata Asyur (Babel), simerupakan dewi kesuburan. Dibata ngenca sipeturahsa ras Dibata ngenca simasu-masu bangsa Israel. Emaka man Dibata saja bangsa Israel mindo penampat, tupung ia erdahin selaku perjuma.

4.      Gelah bangsa Israel Israel ersembah alu ratur ibas rumah pertoton, iaturken raja Hiskia mulihi dahin imam ras kalak Lewi i rumah Pertoton. Lit pembagin tugas ma imam-imam ras kelak lewi. Janah lit pe tugas khusus siarus ilakoken imam-imam ras kalak Lewi eme mpersembahken persembahen tutungen, persembahen perdamen, ras ikut muat bagin ibas kebaktin i rumah pertoton ras mereken puji-pujin ibas ingan tertentu i rumah Pertoton. Bagepe iajuk raja Hiskia gelah kalak siringan i Jerusalem mereken kai sijadi tanggungjawabna man imam-imam ras kalak Lewi. Emaka ibereken kalak Jerusalem persembahen pengataken bujur man imam-imam ras berekenna persepuluhen man kalak Lewi. Emaka ngataken bujur imam simbelin simewakili kerina imam-imam man raja Hiskia, nina nggo bias nakan kami, enda kerina erkite-kiteken Tuhan si masu-masu bangsaNa.

5.      Raja Hiskia la saja terjeng merentah, tapi jadi contoh simehuli, sebab tep-tep wari iberekenna persembahen tutungen guna ipersembahken tep-tep erpagi-pagi ras keraben. Alu bage kalak Juda termotivasi janah ergia-gia mereken persembahen ras persepuluhenna.

APLIKASI

GBKP njayo ibas tanggal 23 Juli 1941 (76 tahun). GBKP arus ngurusi kerina keperlun pelayananna i 3 tugas gereja (Marturia, Koinonia, Diakonia), ras pembangunan gereja. GBKP lanai tergantung man kalak sideban, ntah organisasi sideban. Tentuna ibas ngurusi pelayanan-pelayanan e tujunna gelah anggota GBKP seh ku tingkat kedewasaan siserta, tetap nggeluh ibas keselamatan. Bagepe ibas pelayanan GBKP kalak sideban nggeluh ibas keselamatan. Gelah seh ku je, kemandirian daya (Manusia), dana (keuangan) ras teologi  ibutuhken kal. Tapi siidah GBKP lenga seh ku je. Amin bage gia labo berarti ngambati pelayanan GBKP, lang. Asa gegeh ras kengasupen, janah ibas pengarak-ngarak Kesah Si Badia, GBKP tetap ndalankan pelayananna i tengah-tengah doni enda, termasuk melayai kita kerina.

GBKP eme kita kap. Sebab kita enda me gereja situhu-tuhu. Dibata sindilo kita guna ngelai i tenga-tengah doni enda. Jadi penungkunen man banta, ngkai kita (GBKP) amin gia kita (GBKP) nggo 76 tahun nggo njayo, tapi tempa lenga lenga njayo ? kai sibanci ipelimbarui ibas kegeluhen eragama? Siutama kal ibas kita mpelimbarui kegeluhen eragama eme erkiniteken man Tuhan. sebab ibas kita erkiniteken man Tuhan, lit bas kita kepentaren nggeluh ibas gereja GBKP. Kita ngasup ngenen maka pelayanan-pelayanan ibas gereja GBKP arus idalanken, janah kita sindalankenca. Bagepe arus sidukung arah dana. Uga ka carana. Carana eme kenca siangka  Tuhan simasu-masu kegeluhenta, maka sirespon pemasu-masun Tuhan e arah tutus kita ku gereja, PA ras kegiatan gereja sideban siiaturken gereja GBKP. Kenca sie sirespon ka arah nehken persembahan simehuli man Tuhan. Adi mehuli tentuna la saja kualitas siibereken kita, tapi pe kuantitas (jumlah). Sebab  nggo siangka salah sada sibanci menunjang pelayanan gereja eme arah keuangan. Keuangan GBKP, banci sikataken rehna arah persembahen-persembahenta (kolekte minggu, PJJ, persepuluhen, kerja rani, pemgataken bujur, rsd). Ibas litna keuangan bas gereja, tentuna GBKP banci ngaturken pelayanan-pelayanan singgo isusun per tahun. Isamping sie ka serayan Tuhan (Pdt, Vic, Pt,Dk) arus tutus ngelai, gelah anggota perpulungen tambah ergia-gia nehken persembahen. Alu bage lit sada pengakun Moderamen,si bali ras pengakun Asaria, Imam simbelin man raja Hiskia eme nggo bias nakan kami, janah melala denga ibana. Bagepe nina Moderamen ibas laporan keuangan, erkite-kiteken pasu-pasu Tuhan man kerina perpulungen maka keuangan gereja nggo bias ibas sada tahun enda. Nggo banci idalanken kerina pelayanan gereja ibas tahun enda, janah lebih pe, bujur Tuhan.

Ibas kita nggeluh erkemalangan man Tuhan, maka ibas kita nehken persembahen ibas kebaktin, persembahen kerja rani ras persembahen persepuluhen la terjeng formalitas saja, ntah sipenting nggo sibereken, ntah lit pengaruh ibas darat nari eme ngenen pelayanan serayan sikurang tutus erbahanca kita pe kurang ntah pe la nggit nehken persembahen. Arus siteh keselamatanta la tergantung man kalak sideban. Bagepe sigejaplah maka ndube paksa kita ngawan, nggo siakuken man Dibata  si isaksiken perpulungen, i lebe-lebe gereja kita ngataken nggit kita nanggung tangungenta selaku ngawan i tengah-tengah gereja GBKP. Emaka genduari sisehkenlah pengakunta e ibas kita erkiniteken man Tuhan, gelah pelayanan-pelayanan gereja terealisasi. Alu bage GBKP situhu-tuhu nggo njayo teridah ras tergejap man banta kerina.

Pdt. Steven Kumenit, STh.M.Min.

Sembahlah Dibata saja (Wahyu 14:6-12)

KHOTBAH MINGGU TANGGAL 30 JULI 2017.

GEREJA GBKP

Invocatio    :    Kerina kalak si nembah gana-gana ijuruken me, saksi ras kalak si megah iakapna kerna berhala-berhala, kerina dibata-dibata erjimpuh i adep-adepen TUHAN (Masmur 97:7).

Ogen          :    Kejadin 31:31-35 (Tunggal).

Khotbah     :    Ketangkasen 14:6-12 (Tunggal).

Tema          :    Sembahlah Dibata saja

LATAR BELAKANG

1.      Lit masalah simbelin siihadapi kalak kristen ibas perkembangan kekristenan abad-abad si pemena, khususna i daerah kekuasaan Romawi eme kerina kalak kristen isuruh nembah man Kaisar (kaisar Domitianus).

2.      I Pulau Patmos, Yohanes dat pengenehenen kerna kuasa Kaisar Romawi ras wari pendungi pagi, bagepe kegeluhen kalak sisetia ersembah man Dibata ras Yesus Kristus.

3.      Lit 3 pengenehenen Yohanes kerna Malaikat simbaba berita man kerina jelma eme Sipemena : Reh Malaikat nehken berita si meriah si la ermasap-masap guna iberitaken i doni enda. Nina malaikat ersembahlah man Dibata, sebab nggo seh paksana Dibata ngadili manusia. Maksudna adi manusia jera ras ersembah man Dibata, maka manusia ndatken keselamatan. Sipeduaken : Malaikat sipeduaken, alu sora megang nina : Enggo tombang, enggo tombang negeri Babilon simbelin. Perlu siteh, Roma ipebali ras Babilon. Babilon eme simbol kiniganjangan ukur manusia, bagepe kemajun peradapan doni. Kerajaan Romawi tupung sie merupakan kerajaan simegegeh ras peradapan manusia maju kal. Bagepe ibas kegeluhen kota Roma si mewah, lit mengalir moral si la mehuli nandangi bangsa-bangsa jajahanna. Ibas erti kata, erkite-kiteken kerina bangsa-bangsa jajahanna arus ersembah man kaisar Roma saja. Emaka kalak kristen ipaksa gelah ersembah man Kaisar saja. Enda jadi kiniseran man kalak kristen, sebab  adi ersembah man kaisar Roma selaku Tuhan, berarti kalak kristen nggo nggeluh erlua-lua. Sipeteluken : Malaikat sipeteluken alu sora megang ngataken ise siersembah man rubia-rubia ras man gana-gana, ihukum Dibata pagi. Kalak siersembah man rubiah-rubiah ras gana-gana isiksa ibas api ras ibas kertah i lebe-lebe Malaikat ras Anak Biri-Biri. Enda jadi “peringatan” nandangi kalak kristen.

4.      Kalak kristen arus ngenen ersembah man rubiah-rubiah ras gana-gana merupakan kesalahan ras dosa. Emaka kalak singgo ndalanken ras mpraktekken kegeluhen erlua-lua ibas eragama arus jera. Adi lang nandangi ihukum Tuhan, sebab kerehen Tuhan Yesus peduakaliken ibas doni enda nggo ndeher. Janah kerehenna radu ras penghakiman ras penghukuman. Adi la nggit jera ibas dosa nari ndat penghukman ibas Tuhan nari.

5.      Yohanes mereken sada pergegeh man kalak kalak kristen si setia gelah tetap ncikep kinitekenna. Nggeluh ibas kesetiaan ndalanken pedah-pedah Dibata. Bagepe arus megenggeng ibas ngenanami kiniseran e. Emaka kalak kristen la perlu mbiar nolak pengajuk ras perintah pemerintah Roma guna ersembah man Kaisar. Sebab adi pe mate, lit ingan man kalak kristen si setia ndalanken pedah-pedah Dibata eme nggeluh ras Yesus. Jadi lit ketuahen man kalak si mate, si mate ibas kiniteken.

APLIKASI

            Temanta : Sembalah man Dibata saja. Enda merupaken sada perintah man kalak kristen gelah nggeluh monoteis. Nggeluh ibas sada Dibata saja eme Dibata ibas Yesus Kristus. Jadi penungkunen man banta. Ngkai maka kita arus ersembah man Dibata saja. Engkai la banci ersembah man Dibata sideban? Kita ersembah man Dibata saja, erkite-kiteken Dibata e patut isembah. Dibata siisembah kita eme Dibata sinjadiken langit ras doni, bagepe kerina isina. Dibata singgo nelamatkan kita ibas dosa nari, ras tetap nemani ibas kerina kegeluhenta. Adi ersembah man Dibata sideban, siidat kita eme kesenangen-kesenangen doni ngenca, tapi e kerina sesaat ngenca.

            Tuhu ibas kita ersembah man Dibata perlu kesetiaan ras kebadiaan nggeluh, emaka kegeluhen-kegeluhen sipereh kematen, arus iambengken. Emaka adi la ngasup ndalanken kai singena ate Tuhan, arus lit pilihen man banta eme ersembah man Tuhan ntah man dibata-dibata sideban (bdk. Josua 24:15). Saja kalak siersembah man dibata-dibata sideban (gana-gana) ihukum Tuhan me ia pagi ibas kerehen Yesus peduakaliken i doni enda.

            Nggeluh ibas doni tempa mesera, emaka lit sindarami dalan pintas eme ersembah ia man dibata-dibata doni enda (gana-gana). Adi perjuma ia, ibahanna gana-gana pengiani juma. Adi perbinaga ia, ibahanna pelaris. Lit ka siersembah man Mamon, emaka la akapna malem, adi la lit sen bas ia, emaka duit jadi dibatana, rsd.

            Sura-sura daging banci mbaba kita ersembah man dibata-dibata doni enda. Emaka arus silawan alu kita ersembah man Dibata saja. Gana-gana sincedai hubungenta ras Tuhan arus siambengken. Bagepe anggota keluarga sisetia man Tuhan, arus pang ngelawan ras ambengken gana-gana siipake keluarga (bdk. Ogen). Sebab ibas ersembah man gana-gana berarti memanifestasiken bentuk sikap ras praktek guna ndatken tujun. Jadi gana-gana e alatta ngenca. Tapi arus siinget pagi kerina ia ersembah man Dibata saja (bdk. Ivocatio), erkite-kiteken sie Tuhan saja sipatut isembah, gelah ula lit penyesalan man banta. Genduari nggo seh paksana kita arus muat keputusan eme Dibata saja sisembah kita. La lit dibata sideban bas kita ras keluarganta. Ersembah man Dibata saja, la saja terjeng tek ras ngikuti kebaktin minggu, PJJ ras PA, tapi arus teridah ibas kegeluhenta tep-tep wari. Ersembah man Tuhan arus totalitas nggeluhta. Emaka si lit bas kita eme mehamat ras nggeluh ketergantungan man Tuhan saja.

Pdt. Steven Kumenit, STh.M.Min.

Lawanlah Iblis (1 Petrus 5:8-11)

PERPULUNGEN JABU-JABU (PJJ)

GEREJA GBKP

TANGGAL 23 – 29 JULI 2017.

1 Petrus 5:8-11

Tema : Lawanlah Iblis

LATAR BELAKANG

1.      Secara umum banci sikataken surat Petrus enda itujuken man kalak kristen si  merap i belang-belang bagin utara Asia kitik, sisangana ngenanami kiniseran. Ibas situasi enda ate Petrus mereken sata kata persinget, gelah kalak kristen nggeluh megegeh. Sebab jadi kalak kristen, tentuna berbeda ras kalak sideban. Jadi kalak kristen amin gia nggeluh ibas perbeben ras kiniseran, arus ncidahken kegeluhen sierkiniteken man Tuhan. Emaka selaku kalak kristen arus meteh uga carana nghadapi percuban ras kiniseran, sierpalaskan kiniteken man Tuhan.

2.      Pencobaan ras kiniseran banci erbahanca kalak kristen ndabuh ku bas dosa, ntah pe nila ibas ajaran situhu-tuhu, sebab ibas pencobaan ras kiniseran e banci imanfaatkan iblis. Iblis e pintar asangkan manusia. Iblis e ngasup ngenen kalak kristen sisangana nggeluh ibas percuban ras kiniseran, janah ipengaruhina kalak kristen alu erbage-bage “tipu muslihatna”, sidungna adi kalak kristen la tahan ibas percuban ras kiniseran e, ndabuh me ibas dosa.

3.      Secara khusus, Pemimpin gereja (pertua) arus ngenen enda, emaka Petrus mereken sada kata persinget man pertua-pertua gelah ndalanken ndahinna selaku serayan Tuhan siibereken Tuhan guna ngepkep perpulungen alu meriah ukur, bagepe arus jadi usihen man anggota perpulungen. Sebab ibas pelayanan erpalaskan meriah ukur ras guna jadi usihen man anggota perpulungen, anggota perpulungen termotivasi tetap ncikep kinitekenna ras ndalanken kai singena ate Tuhan, amin gia nggeluh ibas kiniseran.

4.      Kuasa Tuhan, la ngasup itandingi kuasa-kuasa doni ras iblis. Bukti ibas kerina e, icidahken Yesus ibas pelayananna eme pepalem kalak sakit (Matius 8:1-4; Lukas 5:24-25; Lukas 7:1-10, rsd). Naluken kuasa alam (Matius 8:26), mpelawes setan (Matius 9:32-33), naluken kuasa kematen (Matius 28:1-20), rsd. Emaka uga pa gegehna kiniseran ras kuasa iblis, adi serayan Tuhan, bagepe anggota perpulungen ernalem ras mindo penampat man Tuhan, pasti imenangkan Tuhan. Ibas palas enda me Petrus mpersingeti man Pertua-pertua gelah ibas ngelai tetap teneng ras tetap metenget, sebab amin gia iblis nggo italuken Yesus ibas kematen ras kekekenNa, tapi tetap denga iblis e gawah-gawah ku jah ku je bagi sada singa si erngaung ndarami si man jerngemenna. Iblis e imbang pertua ras kalak sitek, emaka arus ilawan.

5.      Guna mereken motivasi tole man pertua-pertua, maka nina Petrus, la saja kam singenanami kiniseran tapi teman-temanndu sisada kiniteken i belang-belang doni enda pe ngenanami kiniseran. Tapi erkiteken megenggeng ibas kiniseran ras tetap ernalem man Tuhan, maka kiniseran e salih jadi kemalemen ate. serta ibahan Dibata man kalak kristen sisetia man baNa. Alu kata sideban kalak kristen arus tuhu-tuhu tek man kuasa Tuhan, sebab la lit kuasa sideban, termasuk kuasa iblis singasup naluken kuasa Tuhan. Janah Dibata ulu kekelengen mpegegehi kalak si tek man baNa guna naluken kuasa iblis. Ibas kuasa Tuhan, kalak kristen mbebas ras ngasup naluken kuasa iblis, sidungna kalak kristen nggeluh ibas persadan ras Tuhan, ras nggeluh ibas kemalemen ate.

APLIKASI

            Temanta sendah eme “lawanlah Iblis”. Enda merupaken kata pengajuk man banta si tek man Yesus Kristus, sekaligus merupaken kata persinget. Sebab siidah ibas kinata kegeluhen, amin gia situhuna iblis nggo italuken Yesus Kristus, kepeken la nggit ia nyerah. Genduari lit strategi sideban siibahan iblis eme naluken kalak kristen. Sebab adi kalak kristen nggo talu, berarti kegeluhen kalak kristen lanai nggeluh ibas persadan ras Yesus Kristus, tapi nggo nggeluh ibas kuasa iblis. Enda ibahanna erkite-kiteken lanai ia ngasup naluken Yesus Kristus.

            Iblis e gawah-gawah ku jah ku je bagi sada singa si erngaung ndarami si man jerngemenna. Tehna ise si man jerngemenna. Emaka arus kita metenget. Kuasa iblis e la siidah (bdk. Pengertin okultisme. Okultisme eme paham ras mpraktekken kuasa-kuasa kegelapen), emaka banci sikataken menam ibas kerina dampar kegeluhen je ia. Emaka adi siidah lit kalak kristen keseluk setan, lit kalak kristen korupsi, lit kalak kristen erjimat-jimat, ngandalkan kuasa sedan ibas erjuma, erbinaga, kebal badan, lit kalak kristen si kena hipnotis, rsd. Gelah kita la italuken kuasa iblis, maka arus silawan. Kita arus ngelawan alu makeken kuasa Tuhan. Kita arus mindo penampat man Tuhan, gelah iberekenNa gegeh ras kengasupen guna ngelawan kuasa iblis. Janah sipenting bas kita eme kegeluhenta tep-tep wari arus nggeluh ibas persadan ras Yesus ras tetap ngandalkan Ia.

Pdt. Steven Kumenit, STh.M.Min

Ngaturken Kiniliten Alu Mehuli (Kejadian 41:47-49, 53-57)

KHOTBAH MINGGU, 23 JULI 2017

GEREJA GBKP

Invocatio    :    Si peduaken bali ras si ndai e me, 'Kelengilah temanndu manusia bagi kam ngkelengi dirindu (Matius 22:39).

Ogen          :    Matius 14:13-21 (Tunggal).

Khotbah     :    Kejadin 41:47-49, 53-57 (Tunggal).

Tema          :    Ngaturken Kiniliten Alu Mehuli.

LATAR BELAKANG

1.      Tangtangna Jusup sekalak budak ras ipenjarakan erkite-kiteken ituduh ras ifitna ndehara Potifar, Jusup mperkosa ia. Tapi erkite-kiteken kepentaren  siibereken Dibata man bana ras ngasup ngantusi nipi, maka ngasup Jusup nerangken erti nipi raja Mesir (Firaun). Raja Firaun erpengakap nipi sekali enda berbeda ras nipi nipi sideban, sebab 2 kali ia ernipi, alu nipi siberbeda. Emaka kenca medak raja lanai tenang ukurna. Sebab tek raja Firaun 2 nipi e lit ertina,  emaka idilo raja kerina guru-guru sibaso ras kalak sierpemeteh i mesir, tapi ia kerina la ngasup ngantusi nipi raja. Tapi sekalak singaturken inemen man raja ngataken lit  anak perana  kalak Heber si lit ipenjara ngasup ia ngantusi nipi. Emaka idilo raja me si Jusup, janah ituriken raja kerna 2 nipina e. Nina Raja, tempa-tempa aku tedis i tepi Lau Nil. Kuidah pitu lembu mbur, mejile, ndarat i bas lau e nari, jenari nggagat ia. Kenca bage ndarat ka pitu lembu kertang-kertang. Idahina lembu si mejile ras mbur ndai ku tepi lau. E maka ipangani lembu si kertang-kertang e lembu si mbur ndai seh keri. Kenca bage medak aku. Kenca bage tunduh ka aku, ernipi ka mulihi aku. Kuidah i bas sada ngkebena pitu ruhi page perngis.Jenari turah ka pitu ruhi page si lambang ras melus iembusken angin si melas.E maka pituna ruhi page lambang ndai nelen pituna page si perngis ndai. Nina Jusup man raja, "Duana nipi e seri antusenna; enggo ikataken Dibata man bandu, kai atena ilakokenNa. Pituna lembu si mbur e, e me pitu tahun, pituna ruhi page si perngis e, e pe pitu tahun; duana seri ertina. Pituna lembu kertang-kertang e si reh arah pudi, bage pe pituna ruhi page si lambang ras melus iembus angin si melas e, e me pitu tahun kelihen. Bagi si kukataken ndai, maka Dibata enggo nuduhken kai ateNa si ibanNa. Pitu tahun dekahna riba-iba pangan i belang-belang Mesir. Kenca bage jadi me pitu tahun dekahna kelihen, e maka tahun-tahun si lepas e ilupaken kalak, erkiteken kelihen e ncedaken negeri e. Paksa nakan riba-iba ilupaken kalak kerina, erkiteken kelihen e tuhu-tuhu seh serana. Kam ernipi dua kali, ngatakenca maka kerina kejadin e enggo itetapken Dibata. Pasti ilakokenNa i bas paksa si lanai ndekah.Genduari arus ipilihndu sekalak si erpemeteh ras pentar guna ngaturken negeri enda. Arus pe iangkat kam pegawai-pegawai si deban guna pepulung seperlima i bas ulih peranin tupung paksa nakan riba-iba si pitu tahun e.Suruh pepulungna kerina pangan sanga paksa riba-iba si reh enda, janah bereken man bana kuasa muniken pangan e i tep-tep kuta, ras njagaisa. Pangan e jadi persedian man negeri enda, i bas paksa kelihen si pitu tahun i Mesir gelah rayat la mate kelihen i bas paksa mesera."

2.      Jusup la saja ngasup ngantusi nipi, tapi pe kepentaren ibereken Dibata man bana, janah kepentaren enda me siipaduken Jusup ras ngasup ngatusi nipi. Kenca iterangken Jusup erti nipi e, maka Jusup mereken masukan kerna langkah-langkah antisipasi guna terhindar ibas bahaya kelihen sinandangi reh.

3.      Erkiteken payo akap Raja, emaka iangkat raja Jasup jadi wakilna guna nguturken negeri Mesir. Kuasa Jakup meganjang kal. Sebab kenca kuasa raja Mesir, kuasa Jasup simbelin kal. Kerina rayat arus patuh man Jasup. Emaka minter ilakoken Jasup bagi kai siikatakenna man raja. Emaka kenca reh kelihen pitu tahun, negeri-negeri nggo keliehn kerina, Mesir ngenca si lang. Sebab minter italangi Jusup kerina lumbung ingan nimpan pangan. Bagepe erkite-kiteken lanai lit pangan ibas negeri-negeri sideban, maka reh ia nukur pangan man Jusup.

4.      Kuasa Dibata guna njadiken bangsaNa jadi bangsa simerdeka,bangsa si lit ingan sitetap, bangsa silanai jadi bangsa erpindah-pindah (nomade), ibenai arah nipi raja Firaun, ras irealisasiken Jasup. Sebab kenca jadi kelihen pitu tahun, reh Jakup orang tua Jusup, bagepe senina seninana ku Mesir, janah ibereken raja sada ingan man Jakup ras keluarga guna nginani ingan e. Ibereken raja Firaun tanah Gosyen guna jadi ingan tading Jakup ras kerina keluargana. Tuhu terjadi perlindungan Tuhan man Jakup ras keluargana, si dungna pagi jadi bangsa Israel.

5.      Ibas Jusup ngasup ngantusi nipi raja Firaun, dungna raja Firaun ngakui ras mehamat man Tuhan. Sebab kai siiantusi ras langkah-langkah strategis mengantisipasi bahaya kelihen siibahan Jusup, iteh raja Firaun kerina e ibas Dibata nari (bdk. Ayat 38-39).

APLIKASI

            Ngaturken (manajeman) keuangan bas keluarganta masing-masing penting kal. Sebab ibas kita ngaturken keuanganta, bagepe kerina erta-ertanta maka ngasup kita “nggeluh”. Terhindar kita ibas erbage-bage masalah keuangan, termasuk kemiskinan.

            Siidah ibas lit senina turangta melala erta bas ia, subuk erta penading orang tua, bagepe bekas ulih ncarina, tapi kerina e banci keri kerinana. Enda kerina erkite-kiteken la beluh kita ngaturken kiniliten alu mehuli. Perlu siteh kegeluhenta, kita sendiri singaturkenca, labo kalak sideban. Emaka arus beluh kita ngaturken kinilitenta alu mehuli. Bagepe perlu siteh kerina kinilitenta e pemere Dibata kap. Sebab ate Tuhan kita kerina arus nggeluh ibas erkecukupen. Emaka ibas pertoton Tuhan, je iajarken Yesus gelah ngasup kita mindo man Dibata kecukupan (bdk. Pertoton Tuhan : ...... bereken man kami nakan cukup ibas wari sendah enda.....). Bagepe nina ibas Kuan-Kuanen 30:8c-9 : bereken man bangku kai si kuperluken. Sebab kune bayak aku banci jadi maka la aku perlu Kam. Jadi adi musil aku banci jadi nangko aku seh maka juru Dibatangku.

            Erkite-kiteken kinilitenta ibas Dibata nari, tentuna sura-sura Dibata pemereNa e labo guna ipake kita secara pribadi, ate Dibata arah kinilitenta, kita banci jadi pancur pasu-pasu Tuhan man kalak sideban. Kita banci nampati kalak sideban simbutuhken penampatta. Tapi gelah kita ngasup jadi pancur pasu-pasu Tuhan, leben kita arus mbiar man Tuhan, janah lit bas ukurta, kai si lit bas kita ibas Tuhan nari. Sipeduaken ; arus lit bas kita keleng ate. Sebab ibas lit bas kita keleng ate maka, turah bas kita mekuah ate, adi kita ngenen temanta manusia simbutuhken penampat. Sipeteluken : ngenen kalak sideban eme dirinta jine. Alu bage termotivasi lalap kita guna nanpati kalak sideban.

Pdt. Steven Kumenit, STh.M.Min.