Teologi Persembahen (2 Raja-Raja 12:4-5)

PERPULUNGEN JABU-JABU (PJJ)

GEREJA GBKP

TANGGAL 21-27 MEI 2017.

II Raja-Raja 12:4-5.

Tema : Teologi Persembahen.

LATAR BELAKANG

1.      Tanggungjawab raja bangsa Juda la saja minpin ras ngerajai bangsa Juda alu politik ras mereken kesejahteraan i bidang ekonomi, tapi pe ertanggungjawab secara spiritual. Raja arus mbaba umatna tetap erkemalangan ras patuh man Tuhan. Tanggungjawab selaku kalak siberagama arus isehkenna.

2.      Ibas kegeluhen agama Juda, nggo lit iaturken tanggungjawab selaku anggota, termasuk tanggungjawab nggalar adangan guna keperlun-keperlun kemah perjumpan/rumah pertoton (bdk. Kel.30:16). Bagepe persembahen ukur meriah guna imam-imam, rsd.

3.      Rumah pertoton arus ipekena (renovasi). Guna mpekena rumah pertoton e, raja Joas endesken tanggungjawab e man  Imam. Rumah pertoton arus ipekena sebab rumah pertoton merupaken sentral/pusat kiniteken bangsa Juda, sebab Dibata ringan i je. Bangsa Juda reh ku rumah pertoton la saja ersembah man Tuhan tapi nehken persembahen ras mindo pengalemi dosa.

4.      Ibas rangka tanggungjawab mpekena rumah pertoton e, para imam arus ngenen piga-piga hal eme : 1). Para imam arus nimpan duit siigalari kalak asum ia erbahan persembahen ibas rumah pertoton. 2). Tetap-tep imam arus ertanggungjawab kerna duit siipersembahkan kalak sireh man bana asum imam ertugas. 3). Duit siipersembahkan kalak arus ipake guna pekena-kena rumah pertoton.

5.      Bangsa Juda arus ertanggungjawab nehken persembahen guna keperlun-keperlun rumah pertoton, emaka adi reh ku rumah pertoton arus nehken tanggungjawabna arah imam.

APLIKASI

            Persembahen merupakan  karakter kita selaku kalak kristen. Jadi penungkunen man banta. Persembahen e nggo kin e sue ras teologi persembahenta. Sebab siidah nterem denga kita nehken persembahen meros denga.

            Perlu siinget, Tuhan siisembah kita, eme Dibata sierkuasa ras siperkeleng. Bagepe erkiteken keleng ateNa man banta, maka Yesus Kristus jadi kurban persembahen guna nelamatken kita. Palas enda me kita nehken persembahen.

            Bas kita melala bentuk persembahen, lit persembahen umum ibas kebaktin, persembahen persepuluhen, persembahen kerja rani, rsd. Kerina enda merupaken respon kinitekenta, erkite-kiteken kita nggo ipasu-pasu Tuhan. Jadi persembahen siipersembahken kita, labo ibas rangka menyogok Tuhan, tapi erkite-kiteken nggo leben Tuhan masu-masu kita. Janah arus siinget, persembahen siipersembahken kita ibas rangka keperlun-keperlun pelayanan i tengah-tengah gereja Tuhan (bdk. Marturia, Koinonia, Diakonia ras pembangunan gereja, bagepe guna serayan Tuhan).

            Perlu siinget, tupung kita ngakuken kinitekenta i lebe-lebe Tuhan ras isaksiken perpulungen, je kita erpadan nanggung tanggunganta ibas gereja GBKP. Alu bage ibas gereja GBKP lit aturen perduiten. Janah kerina nggo lit pos-posna ras rapen rabel. Janah singaturken perduiten ibas tingkat sinodal eme Moderamen, tingkat klasis eme BPMK, tingkat runggun eme BPMR. Jadi pengaturen keuangan jelas bas kita GBKP.

            Erkite-kiteken persembahen siipersembahken kita eme ibas rangka pengataken bujur man Tuhan, sebab sigejapken melala pasu-pasu Tuhan man banta, maka ibas kita nehken persembahken, persembahkenlah persembahen simehuli ras mejile. Bagepe persembahenta sue ras pendilo kinitekenta min. Perlu siinget ibas kita ibas kita nehken persembahan ipasu-pasu Tuhan kita, emaka la kita banci jadi musil erkite-kiteken kita nehken persembahen.

            Pelayanan gereja eme tanggungjawabta. Kita eme gereja, selaku gereja maka kita arus ertanggungjawab ibas pelayanan ras perduiten gereja. Emaka marilah sisehken persembehen sue ra kinitekenta ras sehkenlah persembahen alu mehuli ras simejile min. Ibas kita nehken persembahen sibenar ras erkiteken palas kiniteken ras pengataken bujur man Tuhan, maka ibas kita nehken persembahen la mpertimbangken kerna mejile pelayanan gereja, ntah mejile khotbah pdt, pt, dk. Tapi sue ras pasu-pasu Tuhan siseh man banta.

           

Pdt. Steven Kumenit, STh.M.Min.

Ertotolah Ngataken Bujur (Mazmur 66:8-20)

KHOTBAH MINGGU, TANGGAL 21 MEI 2017.

KLASIS MEDAN KUTA JURUNG

Invocatio    :    Bage me pe Kesah Dibata reh nampati kita, kita si kote enda. Sabap la sieteh kuga arusna kita ertoto; Kesah e me ertoto kerna kita man Dibata alu kelsehen si la terbelasken (Roma 8:26).

Ogen           :    Perbahanen Rasul-Rasul 17:22-31(Tunggal).

Khotbah      :    Mazmur 66:8-20 (Responsoria).

Tema          :    Ertotolah Ngataken Bujur.

LATAR BELAKANG

1.      Secara umum sijadi bahan khotbahnta sekali enda eme ende-enden pengataken bujur erkite-kiteken kuasa Tuhan si mbelin, sierbahanca musuh ras kerina doni nembah mungkuk man Tuhan. erkiteken sie me pemazmur ngajuk kerina bangsa-bangsa muji Dibata kalak Israel. Ende-enden pengataken bujur enda iendeken ibas kebaktin, janah ibas rangka mperingeti kerna pembebasan bangsa Israel ibas taneh i Mesir nari.

2.      Dibata sierkuasa e me Dibata siperkeleng. Emaka la atena pelepas bangsa Israel mate. Ibas keleng ateNa, i jagai ras ipegeluhna bangsa Israel. Amin gia situhuna igejapken bangsa Israel, ibas perdalanen bangsa Israel ku taneh Kanaan, arus mbentasi padang gurun, janah melala musuh-musuh siatena naluken bangsa Israel ibas erbage-bage cara, tapi Tuhan tetap njaga ras nemani bangsa Israel. Ibas keselamatan siibereken Tuhan enda me jadi palas bangsa-bangsa si deban reh mungkuk ersembah man Tuhan.

3.      Perdalanen simesera, bagepe ancaman-ancaman pembunuhan musuh nari, tapi bangsa Israel banci selamat. Kerina enda inen pemazmur merupaken sada pengujin man bangsa Israel, gelah bangsa Israel jadi bangsa situhu-tuhu mbiar ras ernalem man Tuhan saja. Sebab adi nggo seh i taneh Kanaan, tentuna bangsa Israel jumpa  kiniteken ras cara ersembah kalak Kanaan man dibatana. Adi kiniteken bangsa Israel megegeh maka bangsa Israel la terpengaruh ibas situasi i taneh Kanaan. Jadi bangsa Israel bali ras ngane pirak ibas api. Kenca itutung ibas api, dat me pirak si mehuli. Bagepe bangsa Israel, amin gia ibas perdalanen ndatken erbage-bage perbeben ras kiniseran, tapi ibas penemani Tuhan, itaruhken Tuhan ku ingan kemalemen ate. Alu kata sideban ibas bangsa Israel ndatken erbage-bage perbeben ras kiniseran, simerupaken ujin man bangsa Israel, e kerina merupaken proses gelah bangsa Israel ersembah man Tuhan saja.

4.       Pemazmur la saja ncidahken keselamatan universal man bangsa Israel ras man bangsa-bangsa. Tapi pe keselamatan individu pemazmur. Igejapken pemazmur lit perbeben ras kiniseran siinanamina. Amin bage gia pemazmur la reh ku dibata-dibata sideban tapi reh ku Dibata saja guna mindo penampat. Bagepe ibas pemazmur reh mindo penampat man Tuhan, lit pe padan siibelaskenna. Padan enda labo merupakan sada bentuk sogok man Tuhan, tapi sada bagin ibas kiniteken pemazmur. Emaka kenca selamat, reh pemazmur ibas rumah pertoton ersembah man Tuhan ras mereken padan singgo ibelaskenna. Kepeken la saja maba kai singgo padankenna man Tuhan, tapi pe babana bajar ras lembu guna jadi persembahen tutungen.

5.      Idengkehken Tuhan pertoton pemazmur, tupung pemazmur lit ibas perbeben ras kiniseran, erkite-kiteken pemazmur la ersura-sura erbahan sijahat. emaka keleng kal ate Dibata man pemazmur.

APLIKASI

            Patut sikataken bujur man Tuhan, sebab ibas lias ras perkuah ateNa kita nggo iselamatken arah Yesus Kristus. Kristus mate ras keke guna kita kerina. Tapi amin gia kita nggo nggeluh ibas keselamatan, nggo merdeka kita ibas kuasa setan nari, kepeken la pediatna kita bebas ngenanami keselamatan e. Bagepe amin gia kita nggo selamat ras merdeka, labo berarti kegeluhenta nggeluh aman-aman saja. Bagi kita erdalan ibas dalan tol. Tapi banci saja kita jumpa perbeben ras kiniseran. janah selaku kalak kristen kita arus metenget nggeluh ibas perbeben ras kiniseran. Sebab banci saja erkiteken la kita tahan nggeluh ibas perbeben ras kiniseran, ndabuh kita ibas dosa.

            Selaku kalak kristen arus nandai Tuhan alu tuhu-tuhu. Sebab ibas kita nandai Tuhan alu tuhu-tuhu, kita banci nggeluh. Siimaksudken kita banci nggeluh eme kai pe perbeben ras kiniseran sijumpai kita, ku Tuhan saja kita reh mindo penampat. Sebab kita meteh maka Tuhan e, Tuhan sierkuasa ras perkeleng. Emaka ibas kita jumpa perbeben ras kiniseran la kita merawa, la kita jungut-jungut ras la kita mpersalahken Tuhan. Tapi dat ibas sada kesimpulan, kerina perbeben ras kiniseran siijumpai kita guna kiniulin man banta. Emaka amin gia la bagi ukurta, banci kita ertoto ngataken  bujur man Tuhan. Bagepe erkiteken kita nggeluh ersada ras Tuhan maka, amin gia mberat siakap perbeben ras kiniseran, tampa-tempa la kita ngasup ertoto, tapi erkiteken keleng kal ate Tuhan man banta, maka Kesah Dibata nampati kita. Kesah Dibata nampati kita uga arusna kita ertoto man Tuhan.

            Kita ertoto ngataken bujur man Tuhan, la saja terjeng kita ndatken keberhasilan, ntah pe nggeluh ibas keriahen, tapi pe ibas kita ndatken perbeben ras kiniseran, banci kita ertoto ngataken bujur. Sebab ibas kita ndatken perbeben ras kiniseran, sigejapken kepeken kita enda kalak si lemah. Lalit gegehta. Tuhan e erkuasa ras perkeleng, meka ibas perbeben ras kiniseran kita reh man Tuhan guna mindo penampat ras gegeh guna naluken ras mbentasi perbeben ras kiniseran. Bagepe selaku kalak kristen sipatuh ras erkemalangan man Tuhan, ngenen kerina perbeben ras kiniseran, terjeng pengujin man banta saja. Alu bage ibas penemani ras pengkelengi Tuhan man banta, kerina perbeben ras kiniseran salih jadi kemalemen ate. Sebab kerina sinen alu kaca mata positif, alu kacamata kiniteken, kerina e terjeng pengujin, guna ndatken kiniteken si murni man banta.

            Guna ngenen minggu rogate enda. Kita isingetken, ibas kita ertoto ngataken bujur, la saja terjeng kita ndatken kesuksesan, keberhasilan, nggeluh ibas meriah ukur, tapi kita harus ertoto ngataken bujur tupung kita ndatken perbeben ras kiniseran.

Pdt. Steven Kumenit, STh.M.Min.

Ibereken Dibata Kemenangan, Pujilah Ia (1 Petrus 2:4-10)

KHOTBAH MINGGU, 14 MEI 2017.

GEREJA GBKP

Invocatio    :    Endekenlah ende-enden si mbaru, o doni kerina, rendelah man TUHAN (Mazmur 96:1).

Ogen          :    Mazmur 22:23-32 (Responsoria).

Khotbah     :    1 Petrus 2:4-10 (Tunggal).

Tema          :    Ibereken Dibata Kemenangan, Pujilah Ia.

LATAR BELAKANG

1.      Sijadi bahan oratenta sendah eme kata pergegeh, bagepe mereken sada pengangkan kerna status kalak sitek man Yesus. Tujunna la saja gelah kalak si tek simerap i belang-belang bagin utara Asia kitik ndatken pergegeh, tapi pe gelah tehna kerna Statusna siberbeda ras kalak si la tek man Yesus Kristus.

2.      Rasul Petrus ngutip telu bagin ibas padan sindekah kerna simbol batu eme : Sipemena : mazmur 118:22. Batu siiambengken tukang e kap jadi batu palas. Sipeduaken : Yesaya 28:16,  Enggo ku pilih batu simeherga, sikutamaken i Sion jadi batu palas, janah ise si tek man baNa la ndigan pe kecewa. Batu siikataken Jesaya eme kerna bangsa Israel. Singgambarkan kerna batu palas si ncidahken hubungan ras Dibata ras bangsaNa, hubungan siterus menerus seh ku puncakna ibaskerehen Mesias. Sipeteluken : Yesaya 8:13-14.  Enda me batu sierbahanca pagi kalak tertuktuk, batu sierbahanca kalak jongkang. Ertina Yesus  mpersembahken diriNa man kerina manusia. Kalak singaloken Ia, Yesus Kristus jadi teman ras Juruselamat, tapi man kalak sinulak Ia, Yesus Kristus jadi kutuken.

3.      Lit piga-piga status kalak si tek man Tuhan eme 1). Bangsa pilihen Tuhan. Nai Dibata nggo milih bangsa Israel jadi bangsa pilihenNa. Tuhu bangsa Israel nai ipilih Tuhan guna jadi pancur keselamatan man kerina bangsa, tapi gagal. Puncak kegagalan bangsa Israel eme penolakan man Yesus Kristus selaku Mesias. Kalak kristen jadi bangsa pilihen Tuhan, maka kalak kristen arus jadi pancur keselamatan nandangi doni enda.Genduari ipilih Tuhan kalak si tek man Yesus jadi bangsaNa. Pemilihen Tuhan man kalak sitek jadi bangsaNa, erkite-kiteken ate Dibata kerina kalak sitek man Yesus Kristus jadi anggota simbaru ras ngelambangkan kerajaan Dibata. Emaka selaku bangsa pilihen Tuhan, labo itonjolken kerna negara yang berdaulat ras politikna, tapi sada persadan si tuhu-tuhu tek ras patuh ibas kepemimpinen Tuhan. 2). Imam-Iman Raja. perlu siteh ibas kegeluhen bangsa Israel si banci jadi imam ras melayani man Tuhan eme keturunen Lewi ngenca. Janah siipersembahkan imam eme asuh-asuhen.  Tapi genduari, kenca nggo tek man Tuhan, ijadiken Tuhan kerina kalak sitek jadi imam. Maksudna kerina kalak si tek banci melayani Tuhan ras ndeher man Tuhan, bagepe banci mpersembahkan pujin ras keleng ate nandangi sapih-sapih manusia man Tuhan. Bagepe kalak kristen ijadiken imam-imam Raja. Perlu siteh Raja eme Yesus Kristus. Alu bage fungsi selaku imam eme ngelai Raja e. Janah enda merupaken penggenapen, kai siikataken ibas keluaren 19:6. 3). Kalak kristen eme bangsa sikerajangen Tuhan. Erkiteken Tuhan similih ras ndilo ibas keselamatan, maka kalak kristen merupaken bangsa sikerajangen Dibata, sekaligus anak-anak Dibata. Fungsi anak Dibata eme dat bagin ibas erta-erta siisikapken Tuhan. Anak-anak Dibata merupaken hak waris Tuhan. Anak-anak Dibata si ipilih guna meritaken perbahanen-perbahanen Dibata simbelin. Kalak si tek man Yesus Kristus nggo nggeluh ibas keluarga Tuhan. Tuhan jadi Bapa, kalak si tek jadi anak. Tapi jadi anak arus ndalanken persuruhen Bapa, eme mberitaken perbahanen Tuhan simbelin. Melala perbahanen Tuhan simbelin, iantarana eme uga Tuhan reh ku doni enda guna nelamatkan manusia. Bagepe Yesus Kristus nggo mate ras keke ibas simate nari, ras lit tanda-tanda sengget siibahan Dibata gelah kita terkelin, rsd.

4.      Petrus mereken sada pengertin, maka kalak si tek nggo nggeluh ibas keselamatan. Nai ope tek man Yesus Kristus, kita nggeluh ibas kegelapan (dosa : perbahanen-perbahanen si la ngena ate Tuhan). Tapi erkiteken perkuah ate Tuhan, kita nggeluh ibas keselamatan (Terang). Nina Yesus : Aku me Tarang Doni (Yoh. 9:5). Emaka nggeluh ras Yesus berarti nggeluh ibas terang (keselamatan). Alu kata sideban perbahanen si la ngena ate Tuhan nggo itadingken. Sebab perbahanen-perbahanen sibage rupana mpereh kematen ras nggeluh penghukuman Tuhan. Gelah nggeluh ibas keselamatan maka iajukperpulungen gelah nggeluh ibas batu singgeluh si nai itulak ras la iergaken manusia. Perlu siteh, Batu singgeluh enda eme Yesus Kristus. Amin gia itulak ras la iergaken manusia, tapi Batu singgeluh e ipilih dingen iergaken Dibata.

5.      Nggeluh ibas terang (keselamatan), berarti arus ndalanken perbahanen-perbahanen Terang (moral/etika). Ibas erti kata, kalak si tek man Yesus Kristus la banci ngelakoken praktek-praktek kegelapan, sebab kalak si tek nggo idilo ras nggo nggeluh ibas terang. Kenca kalak si tek nggo nggeluh ibas Terang (batu Singgeluh e), maka lit kepentaren bas ia. Alu bage iangkana maka ia banci selamat erkiteken perkuah ate Tuhan.

APLIKASI

            Patut sikataken bujur man Tuhan, sebab ibas keleng ateNa kita iatanken nggeluh ibas keselamatan. Kita ijadiken bangsa pilihenNa, bangsa sikerajangenNa ras jadiken imam-imam Raja. Ibas erti kata kita si nai nggeluh ibas dosa, ndalaken kai si la ngena ate Tuhan, ndauh ibas keselamatan, tapi erkiteken perkuah ate Tuhan, kita ijadiken bangsana. Emaka la banci lang kita arus muji Tuhan.

            Perlu siteh tupung kita nggeluh ibas dosa, kita iteruh kuasa setan/iblis. Tuhu-tuhu kita ikendaliken ras ipinpin kuasa setan. Emaka siibahan kita perbahanen-prbahanen si la ngena ate Tuhan. lalap dosa siibahan kita. Tapi erkiteken keleng ate Tuhan, batu singgeluh, sinai itulak kalak, tapi erkiteken tek kita man baNa, maka kita nggeluh ibas kemerdekaan. Kita nggeluh ibas keselamatan. Emaka tandana kita nggo nggeluh ibas keselamatan, kita arus muji Dia. Siimaksudken kita muji Dia, la saja arah kata-kata tapi arus icidahken arah perbahanen. Sebab kegeluhen kalak kristen, kerina guna kemulianNa (Gloria Day). Adi enda sidalanken, maka enda me  tandana kita muji Dia, maka kita tetap ipasu-pasuNa. Janah puji-pujin siisehken kita, merupaken pengataken bujur ras persembahenta singgeluh man Tuhan Dibata.

Pdt. Steven Kumenit, STh.M.Min.

Aku Gereja Kam Pe Gereja (1 Korintus 12:25-31)

PERPULUNGEN JABU-JABU (PJJ)

GEREJA GBKP

TANGGAL 14 – 20 MEI 2017.

1 Korinti 12:25-31.

Tema : Aku Gereja Kam Pe Gereja

LATAR BELAKANG

1.      Ibas oratenta sendah, Paulus mempersingeti man perpulungen Korinti kerna makna sada kula. Nina Paulus, ibas analogi kula, sada kula berarti sada kerinana. Amin gia melala ringring ibas kula e, labo berarti ringring e nggeluh sida-sisada, tapi kerina ringring nggeluh ibas sada kula si saling mbutuhken sada ras sidebanna. Kerina ringring lit fungsina ras nggeluh sisampat-sampaten gelah kerina berfungsi sue ras fungsina masing-masing. Alu bage relasi antar ringring tuhu-tuhu nggeluh. Perpulungen Korinti eme kula ni Kristus.

2.      Paulus ngerana bagenda, erkite-kiteken i perpulungen Korinti lit ibas erbage-bage latar belakang anggota. Bagepe erbage-bage pemere Kesah.  Lit siasalna kristen Yahudi, kristen siasalna la kalak Yahudi, kalak bebas ras budak. Tapi amin gia lit berbedaan status, tapi erkiteken kerina nggo iperidiken ibas sada kesah maka kerina ipersada ibas sada kula.

3.      Ibas sada kula, lanai iperhitungkn kerna status sosial, tapi kerina irakut ibas rangka mengfungsikan ring-ring gelah seh sura-sura Dibata ibas doni enda. Emaka ringring e ngelakoken sue ras kiningasupenna. Tapi adi lit ringring sikurang ngasup ndahiken dahinna, maka ringring sideban arus nampatisa. Erkiteken sie me adi lit ringring si mesui, maka kerina ringring ikut nggejapken kinisuin e. Alu bage kerina lit ibas sada penggejapen.

4.      Amin gia kerina ringring lit fungsina sekalak-sekalak, tapi ibas perpulungen nggo itetapken Dibata sekalak-sekalak ibas dahinna eme rasul, nabi, ras guru. Bagepe lit ka pemere-pemere kesah sibanci pepalem kalak sakit, jadi pemimpin, ras nampati kalak sideban ntah pe banci ngerana alu cakap kesah (glosolalia). Enda kerina fungsina eme guna ngelai ibas kula  ni Kristus. Tapi secara khusus, fungsi rasul eme duta guna mberitaken kerna Yesus singelai ibas doni enda, Yesus simate ras keke ibas simate nari ras Yesus sinangkih ku surga (band. Rasul-rasul eme ajar-ajar Yesus ras Paulus). Nabi eme mpeseh kerna sura-sura Dibata. Alu kata sideban nabi berfungsi guna ernubuat gelah kalak tek man Tuhan. Bagepe kalak nggejapken lit dosana, alu bage ceda atena, emaka jera ia. Bagepe alu kata Dibata kalak terapul ras megegeh nggeluh ibas doni enda. Guru eme berfungsi ngajarkan man perpulungen kerna inti kiniteken singgo iajarken Yesus, ras siterusken rasul-rasul. Jadi arah guru perpulungen banci meteh kerna kebenaren situhu-tuhu.

5.      Paulus ngataken enda, gelah ibas perpulungen Korinti lanai lit simaganjang ukur ras meremehkan kalak sideban. Sebab nggo lit ibas perpulungen, kenca idatna pemere-pemere Kesah, ia nggo seh ku tingkat kesempurnaan kiniteken, emaka akapna kalak sideban iteruhna. Padahal kai siidatna erkite-kiteken pemere Dibata, labo erkiteken kebeluhenna. Alu bage ibas persinget Paulus enda, perpulungen Korinti, nggeluh ibas ikaten persadan kula Kristus ras ndahiken dahin Tuhan sue ras pendilo Tuhan man bana. Emaka kegeluhen siharmonis ras sisampat-sampeten nggeluh ibas perpulungen Korinti.

APLIKASI

            Gereja eme persadan kalak sierkiniteken man Tuhan. Tuhan sindilo kita kerina guna bengket ibas kula ni Kristus. Tuhu selaku  gereja, kita reh ibas erbage-bage latar belakang sosial. Tapi perlu siinget takal gereja eme Yesus Kristus. Emaka i lebe-lebe Yesus seri kita kerina. La lit perbedaan status sosial. Erkite-kiteken seri kita i lebe-lebe Yesus, maka tanggungjawabta ibas gereja seri ka. La lit ibas gereja kelas 1 ras kelas 2. Ntah pe kelompok prioritas ras la prioritas.

            Fungsi ras tanggungjawab gereja eme ueken pendilo Tuhan i tengah-tengah doni enda. Gereja eme pancur pasu-pasu Tuhan nandangi doni enda. Ibas ngangkai enda, igejapken maka melala tantangan-tantangan gereja ibas pelayanan. Emaka selaku gereja arus nggeluh ibas persadan ras nggeluh ibas pelayanan alu ratur ras mejile. Ibas pemahaman  enda me Calvin : gereja-gereja arus iatur alu mehuli gelah banci menghadapi kerina tantangan-tantangan gereja, subuk darat nari, bagepe bas nari.

            Erkiteken gereja eme persadan kalak sieriniteken man Tuhan, janah takal gereja eme Yesus Kristus. Maka situhuna ibas gereja nggeluh keselamatan, emaka i luar gereja la lit keselamatan (bdk. Calvin). Emaka tanggungjawabta selaku gereja situhu-tuhu eme jadi pancur keselamatan nandangi kalak sideban. Kerina kita selaku gereja arus ngelai sue ras pemere Dibata si lit bas kita. Tuhu ibas persadan gereja secara institusi, lit pemimpin-pemimpin gereja (Pdt, Pt ras dk.). Tapi tugas ras tanggungjawab pemimpin eme ibas rangka mendewasakan kiniteken perpulungen alu program-program ras visi, misi gereja. Tapi erkiteken kita kerina gereja, maka tanggungjawabta eme muat bagin ibas pelayanan-pelayanan gereja. Jadi arus sigejapken kita enda la bo penumpang ibas gereja, tapi kita me gereja situhu-tuhu. Kita me bagin ibas gereja. Emaka mari simanfaatkan pemere-pemere Tuhan si lit bas kita guna pelayanan-pelayanan gereja, gelah termulia Tuhan.

                                                
 Pdt. Steven Kumenit, STh.M.Min.