Padanku Ngikutken PerentahNdu (Mazmur 119 : 57 - 64).

PERPULUNGEN JABU – JABU

GEREJA GBKP

TANGGAL 3 – 9 FEBUARI 2019.

Masmur 119 : 57 – 64.

Tema : Padanku Ngikutken PerentahNdu.

LATAR BELAKANG

1.     Sijadi oratenta sendah eme bagin ibas masmur kepentaren janah ate pemasmur guna ngajuk gelah kalak patuh man undang-undang Tuhan. Patuh ras ndalanken undang-undang Tuhan eme bagin ibas kepatuhenta man Tuhan. Bagepe undang-undang merupaken tendang ras terang ibas perdalanen geluh manusia si erkemalangan man Tuhan. Kalak singikuti undang-undang, geluhna dat kemalemen ate (bdk. Masmur 1:2-3).

2.     Undang-undang Tuhan eme bentuk pengajaren Tuhan nandangi bangsaNa, gelah bangsaNa banci nggeluh bujur, adil ras erkemalangan man Tuhan. Bagepe kalak singgeluh iteruh undang-undang Tuhan bas ia lit kepentaren, meteh adat ras ngasup nggeluh bujur, adil i tengah-tengah masyarakat.

3.     Pemasmur ngenen lit ulih nandangi kalak singgeluh iteruh undang-undang Tuhan. Erkiteken sie me pemasmur erpadan gelah geluhna tetap ngikuti undang-undang Tuhan saja. Amin gia sada paksa pemasmur ndatken perbeben ras kiniseran tapi undang-undang Tuhan la ilupakenna. 

4.     Pemasmur nggo muat sada keputusan ibas kegeluhenna, janah keputusan enda erpalaskan kegeluhenna tep-tep wari. Idah pemasmur, doni enda dem alu keleng ate Tuhan. Maksudna doni enda merupaken tinepa Tuhan, bagepe melala pasu-pasu Tuhan ibas doni enda. Emaka kalak si patuh man Tuhan saja si banci singaloken perkuah ate Tuhan. Kalak sipatuh man Tuhan saja sidatken pasu-pasu Tuhan. Emaka tanda patuh man Tuhan, arus tutus ngikuti undang-undang Tuhan saja. Iidah pemasmur  i darat Tuhan la lit pasu-pasu sibanci mereken kedamen, kemalemen ate ras nggeluh alu bujur.

5.     Amin gia lit ulih ibas ngikuti ras ndalanken undang-undang Tuhan, tapi pemeteh manusia terbatas. Pemeteh manusia la ngasup ngantusi undang-undang Tuhan, janah pemasmur sadar kerna sie. Erkiteken sie pemindon pemasmur eme gelah Tuhan singajari uga carana matuhi ras ndalanken undang-undangNa. Alu bage doni enda sidem alu keleng ate Tuhan banci inanami pemasmur ras man kalak simatuhi undang-undang Tuhan.

APLIKASI

            Guna ndatken nggeluh mejuah-juah penting man banta patuh man Tuhan. Tuhan eme ulu kegeluhen ras pasu-pasu man banta manusia. Patuh man Tuhan berarti kita arus ndalanken kai singana ateNa ibas kegeluhenta tep-tep wari. Kita arus ndalanken perentah-perentahNa. Jadi penungkunen, ija banci sijumpai perentah – perentah Tuhan e?  perentah-perentah Tuhan lit ibas khotbah ras Pustaka Si Badia (Alikitab). Adi khotbah banci sikataken terbatas ngenca, sebab khotbah lit bas kebaktin. Tapi Pustaka Si Badia lit bas kita. Pustaka si Badia eme Kata Dibata. Janah alu majuna IPTEK Pustaka Si Badia nggo banci si oge I ja pa pe, sebab Pustaka Si Badia nggo banci sitamakan ibas hand phone. Kalak rusur ngoge Pustaka Si Badia pasti dat pengertin uga nggeluh erkemalangan man Tuhan ibas doni enda. Kita banci nggeluh bujur, adil ras la gampang terpengaruh ibas situasi doni. Kita banci meteh kerna sibenar ras ndalanken sibenar ibas kegeluhenta tep-tep wari. 

            Erkite-kiteken Pustaka Si Badia eme Kata Dibata, janah Dibata ngenca simeteh kai sura-suraNa, maka selaku kalak sierkiniteken man Tuhan penting ibas ngoge Pustaka Si Badia arus ertoto lebe. Sebab ibas kita ertoto man Tuhan, Kesah Si Badia mereken pengertin man banta guna ngangkai kerna KataNa. Alu bage pengertin sidat kita ibas Pustaka Si Badia, terdalanken kita alu mehuli ibas kegeluhenta tep-tep wari.

            Arah Pustaka Si Badia kita ngasup ngidah Dibata eme dem alu keleng ate ras pasu-pasuNa ibereken man kalak sipatuh man baNa saja. Janah kepatuhan man Tuhan teridah ibas ndalaken perentah-perentahNa.

            Ibas tema-nta sekali enda kita iajuk gelah tetap sindalanken perentahNa. Perlu siinget, kita nggo erpadan ndube. Tupung kita ngawan nggo sibelaskan kerna padanta guna ngikuti perentahNa. Emaka mari sicidahken ibas kegeluhenta tep-tep wari kita enda nggit ndalanken kataNa. Bagepe mari sipindo gegeh ras kepentaren ibas Dibata nari gelah iajariNa kita ndalanken perentah-perentahNa. sebab alu kepentaren ibas Dibata nari ngenca kita ngasup nggeluh sue ras sura-suraNa. Perlu siteh alu sidalanken perentahNa, alu kita rusur ngoge Pustaka Si Badia maka terjalin me hubungan siintim ras Tuhan. Alu litna hubungan siintim ras Tuhan, pasti sialoken pasu-pasu ibas Tuhan nari. 

-->

Pdt. Steven Kumenit, S.Th. M.Min.  

Ulu Kepentaren Ras Keselamaten (2 Timotius 3:15-17).

PERPULUNGEN JABU-JABU

GEREJA GBKP

TANGGAL 27 JANUARI – 2 FEBUARI 2019.

2 Timotius 3: 15 – 17.

Tema : Ulu Kepentaren Ras Keselamaten.

LATAR BELAKANG 

1.     Secara umum Timotius eme anak kekelengen Rasul Paulus. Timotius ngelai i perpulungen Epesus sekaligus jadi pemimpin. Dahin-dahin Timotius i Epesus cukup mbue eme ngelawan ajaran-ajaren sipapak sincedai kiniteken ras persadan perpulungen, menata kebaktin gereja, milih ras nangkuhken pertua-pertua, ngaturken penampat ras ngelai diberu balu-balu, ngajarken kiniteken rasuli ras akibat moralna.

2.     Tupung Paulus nuratken surat enda, Paulus i penjara denga. Secara manusia lanai lit arapan pulah ibas penjara nari. Amin bage gia ibas kiniteken ras perukuren Paulus, dahin keselamatan i doni enda la banci ngadi. Emaka salah sada arapen Paulus guna nerusken dahin mberitaken Berita Si Mehuli eme man Timotius. Erkiteken sie arah surat pribadi, Paulus mereken gegeh ras semangat man Timotius gelah ula surut kiniteken Timotius. Tuhu melala tantangan-tantangan bagepe kiniseran (nen penjelasan i datas) ras serangan-serangan man Timotius, tapi arapen Paulus, Timotius arus tetap jemak kiniteken ras ndalakan simehuli. Ula Timotius mela ersaksi kerna Berita Si Mehuli. Erkiteken sie surat enda sipatna pastoral.

3.     Timotius arus tetap nggeluh ibas kebenaren ras tetap nggeluh ibas pelayanan emaka kebenaren si lit ibas pustaka si badia jadi jemaken Timotius. Erkiteken sie me Paulus ngingetken man Timotius gelah tetap inget pustaka si badia. Janah pustaka si badia nggo ndekah iteh Timotius. Perlu siteh Timotius ipebelin ibas keluarga si tutus ras erkemalangan man Tuhan. Nini tudung Timotius eme Lois ras nandena eme Eunike (bdk. 2 Tim. 1:5). Paulus nginget man Timotius kerna pustaka si badia, sebab pustaka si badia rehna ibas Dibata nari janah mereken kepentaren man Timotius ras mabai Timotius ibas keselamatan arah Yesus Kristus. Alu bage Timotius arus tetap nggeluh ibas kebenaren. Janah kebenaren enda me siarusna ipakeken Timotius ibas pelayanenna. Bagepe kebenaren pustaka si badia erguna guna ngajari kalak kerna si ngena ate Dibata, mandang si lepak, pekena sisalah dingen erguna ibas mereken pedah-pedah gelah nggeluh alu mehuli. Enda me alasenna ngkai Timotius arus tetap megegeh ras ndalanken dahin pelayananna.

4.     Paulus nuriken kerna pustaka si badia. Sipemena : pustaka si badia e rehna ibas Dibata nari. Tuhu pustaka si badia isuratken manusia, tapi kai siisuratken manusia erkite-kiteken Kesah Si Badia. Pikiren Dibata si lit ibas pustaka si badia. Sipeduaken : Pustaka si badia erguna guna keselamatan manusia. Engkai maka erguna guna keselamatan manusia, sebab inti pustaka si badia eme Yesus Kristus. Janah kalak singgeluh ibas keselamatan teridah ibas moral ras etika nggeluhna.

5.     Pergegeh ras motivasi siibereken Paulus arah suratna enda gelah Timotius tetap nginget maka ia nggo nandai kebenaren situhu-tuhu ibas pustaka si badia nari ras pe nggo nggeluh ibas jaminen keselamatan. Emaka ibas palas kebenaren ras keselamatan si lit ibas pustaka si badia nari enda me siarus jadi jemaken pelayanan Timotius. Alu bage perpulungen Epesus tetap nggeluh ibas keselamatan ras nggeluh ibas persadan, sebab perpulungen tetap njemak kebenaren situhu-tuhu.

APLIKASI

            Ope kita ngerana terdauhen kena ulu kepentaren ras keselamatan (nen = tema), mari si nen kerna konfesi (pengakun kiniteken) GBKP kerna Alkitab. Ibas konfesi Alkitab je ikataken kami percaya bahwa :

·      Alkitab adalah Firman Allah yang ditulis oleh manusia dengan ilham Roh Kudus (II Timotius 3:16; II Petrus 1:21).

·      Alkitab sebagai kitab suci dan tulisan kanonik: Perjanjian lama terdiri dari 39 kitab dan perjanjian baru terdiri dari 27 kitab.

·      Alkitab merupakan satu kesatuan yang utuh dan yang harus dipahami secara benar dan bertanggungjawab (Matius 5:17-20; Wahyu 22:18-19; II Timotius 3:16.

·      Alkitab berisi kesaksian penyataan diri, kehendak, karya penciptaan, pemeliharaan dan penyelamatan Allah terhadap manusia (dunia), yang berpusat pada Yesus Kristus (Yohanes 1:14).

·      Inti kesaksian Alkitab adalah Yesus Kristus, Tuhan dan Juru selamata dunia (Matius 1:21; Yohanes 1:1-14, 3:16, 14,16).

·      Alkkitab adalah dasar kehidupan orang kristen (Masmur 119:105) yang merupakan dasar pengajaran, nasehat dan penuntun tingkah laku (II Timotius 3:16).

·      Pemahaman dan penghayatan yang benar akan Alkitab hanya oleh pertolongan Roh Kudus (I Tomotius 2:10; Yohanes 16:8-11).

·      Penghayatan isi Alkitab menjadikan hidup berbuah dalam kehidupan sehari-hari (Galatia 5:22-23; Yakobus 2:14-26; Yohanes 15:5).

Ngenen konfesi kerna Alkitab maka banci sisimpulken ulu kepentaren ras keselamatan lit man Yesus Kristus. Alkitab (pustaka si badia) merupaken karya Tuhan siisuratken manusia. Bagepe beneken perukuren singatakenca pustaka si badia ulu kepentaren ras keselamatan. Alkitab ersaksi kerna keselamatan si lit ibas Yesus Kristus.

            Pustaka si badia mereken petunjuk uga seharusna nggeluh ibas keselamatan emaka pustaka si badia eme palas kegeluhen kalak kristen. Kalak singgeluh ibas keselamatan harus ndalanken kai singena ate Tuhan. Alu bage pustaka si badia mereken petunjuk praktis man banta ngangkai kerna sura-sura Tuhan. Alu bage ibas kita rusur ngoge pustaka si badia ibereken Dibata kepentaren man banta guna ndalanken kai sura-suraNa ibas doni enda. Emaka penting man banta rusur ngoge pustaka si badia. Bagepe perlu siteh pustaka si badia ibereken Dibata man banta gelah hubungenta ras Ia tetap terjaga.

Pdt. Steven Kumenit, STh.M.Min.

       

Mpekena-Kena Kula (Amsal 23: 19-35).

PEKAN PENATALAYANAN

GEREJA GBKP

WARI II, SENIN 21 JANUARI 2019.

Invocatio    : O Temanku sikukelengi, ertoto aku gelah kai simehuli jadilah man bandu, janah mejuah-juahlah bagi kueteh maka kegeluhen pertendinndu pe mehuli (3 Joh.1:2).

Ogen          :    Epesus 5:29-30 

Khotbah     :    Kuan-Kuanen 23:19-35.

Tema          :    Mpekena-Kena Kula.

LATAR BELAKANG

1.    Sada kata ajar kalak pentar nandangi anak, khususna anak kalak Israel. Tujun kata ajar enda gelah anak-anak banci nggeluh ibas keselamatan. Emaka gelah selamat maka siarus iperdiateken eme lagu langkah tep-tep wari, ntah pe perdalanen geluh. Sebab  isekitar kegeluhen manusia melala si la mehuli si banci saja adi la megermet anak-anak ndabuh ku bas kejahatan. Erkiteken sie me kohelet (pengamsal) mpersingeti gelah jadilah kalak pentar. Gelah jadi kalak pentar maka arus erkemalangan man Tuhan (band. Kuan-Kuanen 1:7). Kepentaren banci pebetehken man anak-anak uga searusna nggeluh selaku anak-anak Dibata, si arus tetap nggeluh bersih ras badia.

2.    Siarus ihindari anak-anak eme mabuk ras merangap. Janah biak enda lit man kalak jahat. Emaka ula pertemani kalak jahat. Ilarang anak-anak kalak Israel pertemani ras kalak jahat, gelah ula terikut biak-biak kalak jahat. Sebab adi terikut maka siilakoken eme mabuk ras merangap. Enda ngenca siipikirkenna. Alu bage lanai nggit erdahin. Padahal gelah tercukupi kebutuhen ekonomi keluarga arus lit etos kerja. Jadi arus erdahin. Tapi erkiteken pikiren ipengaruhi alkohol bagepe rangap, maka la nai nggit erdahinalu tutus. Biak bagenda erbahanca jadi kalak musil ras lanai ergonce.Tuhu anggur mejile rupana, janah lit daya btarik tersendiri, tapi situhuna anggur e jahat sebab lit alkohol. Emaka kalak siminem anggur seh mabuk pepagina erpagi-pagi igejapna bagi itagut nipe sierbisa. Gelap mata ras lanai ngasup rukur, bagepe ngam-ngamen babata, janah bagi tempa-tempa sangana kita i ancuk-ancuk kapal i lawit ras melimber takalta, bagepe perdalanenta mbewat-mbewat, janah siakap nggo igudami kalak kita.

3.    Pengamsal tuhu-tuhu ngingetken man anak-anak gelah mperdiateken ajaren orang tua, sebab orang tua ipake Tuhan guna ngajarken anak-anak erkemalangan man Tuhan ras nggeluh ibas etika ras moral simehuli. Bagepe orang tua lebih pengalaman nggeluh ibas doni enda. Emaka adi anak-anak megiken ajaren orang tua, anak-anak dat sada pengertin kerna erti nggeluh ras tanggungjawab selaku anak-anak bangsa Israel. Anak-anak bangsa Israel arus berbeda ras anak-anak bangsa sideban, sebab anak-anak bangsa Israel ididik guna nggeluh badia ras erkemalangan man Tuhan ras jadi pancur keselamatan nandangi bangsa sideban. Erkiteken sie me ibas anak-anak megiken ajar orang tua, tuhu-tuhu meriah ukur ras malem ate orang tuana. Pengajaren orang tua nandangi anak, la saja terjeng kata tapi pe perbahanen emaka anak-anak arus ngusih orang tuana erbahan simehuli ras singena ate Tuhan.

4.    Menolak didikan ras ajaran ibas orang tua nari bali kap ia ras kalak simereken dirina man diberu perdenggal. Sebab kegeluhen ngikuti sura-sura dirina saja. Alu bage erkiteken la ia erkemalangan man Tuhan, maka kena hukum Dibata me ia.

5.    Tujun kata ajar enda gelah anak-anak kalak Israel nggeluh erkemalangan man Tuhan ras praktekken kegeluhen sierkemalangan man Tuhan ibas kegeluhenna tep-tep wari. Alu bage anak-anak kalak Israel tetap nggeluh ibas keselamatan, sebab terhindar ia ibas kegeluhen si la mehuli.

APLIKASI

            Kulanta enda eme tinepa Dibata, janah bagi tempasNa (segambar ras Dibata). Kulanta enda ijadiken Dibata mehuli, sebab sura-sura Dibata kita merupaken wakilNa ibas doni enda. Alu bage arus sijaga ntah pe sirawat kulanta enda gelah tetap mehuli ntah pe sehat. Bagepe ibas manusia ndabuh ku bas dosa, Dibata ndilo kita guna jadi pancur keselamatan nandangi doni enda ras arus mpekena-kena tinepaNa sideban. Guna ndalanken misi enda kita arus sehat.

            Pelayanan tahun 2019, la saja ngerana kerna kewirausahaan, tapi pe ngerana kerna kesehatan kula. Siidah nterem kita la njaga kesehaten kula, emaka nterem senina turangta arus ertambar seh ku luar negeri. Memang tuhu erkiteken kulanta enda ermasap-masap, maka tentuna lit kelemahan. Banci saja kita sakit. Tapi ula min kita sakit erkite-kiteken la si jaga kulanta enda. Maksudna kita mengkonsumsi ntah pe rangap kita man pangan ntah pe gulen-gulen siberlebihen, mabuk-mabukan, bagepe ndalanken kegeluhen free sex (erelua-lua). Lit kuan-kuan eme sediakan payung sebelum hujan. Ertina harus sipekena-kena kulanta alu mehuli. Harus sirawat kulanta enda alu mehuli, gelah sehat kita ras meriah ukur Dibata. Kita banci jadi alatNa guna keselamatan jelma sinterem ras mpekena-kena doni enda. Lingkungen i ja kita tading ras berusaha pe banci sijaga ras sirawat. Emaka marilah kita mbiar man Tuhan. Sebab ibas kita mbiar ras tetap erkemalangan man Tuhan, lit bas kita kepentaren. Kepentaren enda me singajari kita guna nggeluh badia ras mpekena-kena daging kulanta enda alu mehuli. Alu bage kita banci nggeluh sehat. Sehat daging kulanta erkiteken sehat pertendinta. Bagepe marilah kita selaku teman, sitoto-toton kita gelah radu kita njaga kula ras persadan kristen. Sebab ibas kita sehat persadan kristen pe sehat. Alu bage pelayanan-pelayanan pe banci tersehi.

Pdt. Steven Kumenit, STh.M.Min.

            

Dibata Njadiken Mbaru Dingen Mehuli (Kejadian 1:1-31).

PEKAN PENATALAYANAN

GEREJA GBKP

WARI I, MINGGU 20 JANUARI 2019

Invocatio :    Tapi nina Jesus man kalak Jahudi e, “BapangKu erdahin kap lalap; emaka aku pe arus erdahin (Yohanes 5:17).

Ogen        :    Perngandungen 3:22-24

Khotbah   :    Kejadin 1:1-31.

Tema        :    Dibata njadiken Mbaru Dingen Mehuli.

LATAR BELAKANG

1.     Sijadi bahan oratenta sendah eme turi-turin kerna bena-benana doni ras kerina isina ijadiken Dibata. Alu bage ngatakenca Dibata eme pelaku utama ibas penciptaan doni ras kerina isina. Bagepe “menolak” sada pandangan singatakenca alam ras kekuatannya merupakan makhluk-makhluk ilahi.

2.     Ibas doni si i sekelewet bangsa Israel melala turi-turin kerna penciptaan. Intina nina doni ras kerina isina dibata-dibata sideban sinjadikenca. Erkiteken sie me imam-imam ertanggung jawab guna ngajari bangsa Israel sekaligus “menangkal” ajaren ibas bangsa sideban nari. Emaka adi sinen ayat 1 ras 2 merupakan pengakun kiniteken singatakenca Dibata sinjadiken langit ras doni. Ope denga Dibata njadiken langit ras doni, doni lume denga. Enda itekanken segelah bangsa Israel meteh kerna eksistensi Dibata. Dibata e erkuasa ras pencipta.

3.     Lit sada pandangan si seh genduari berkembang eme kerna “creatio ex nihilo”. Maksudna ijadiken Dibata langit ras doni enda mulai ibas la lit maka lit (dari tidak ada menjadi ada). Langit ras doni la lit tapi erkiteken Kata Dibata maka kerina lit. Situhuna ate imam-imam gelah bangsa Israel meteh Dibata njadiken doni enda ras mbentuk, menata ras mengatur serta memelihara. Maka siidah mbaru ras mehuli. Apai ka tupung sie bangsa Israel lenga ndekahsa mulih ibas taneh pembuangen nari, siernungkun-nungken kerna kuasa ras keleng ate Tuhan. Penungkunen sisederhana eme apakah Tuhan banci mereken kegeluhen man bangsa Israel ntah uga, sebab rumah ras teneh nggo ceda, harus iusahai mulihi. Emaka alu litna turi-turin penciptaan maka bangsa Israel termotivasi. Sebab Dibata simereken kemerdekaan man bangsa Israel, ras Dibata siisembah bangsa Israel eme Dibata sierkuasa. La lit simustahil man Dibata. Adi Dibata banci njadiken doni enda ibas lume nari emaka berbentuk, maka Dibata tentuna banci mereken kegeluhen simbaru man bangsa Israel. Sipenting lit kepatuhen bangsa Israel man Tuhan. Erkiteken sie bangsa Israel harus matuhi kerna wari sabat.

4.     Ope denga Dibata njadiken doni ras kerina isina, doni enda lume denga la lit tempasna, tapi alu kata Dibata doni ras kerina isina jadi ibas waktu pitu wari. Doni enda terbentuk bagi siisura-suraken Dibata. Doni ras kerina isina ijadiken Dibata mehuli kerina. Tuhu adi sipake ukuren pemeteh manusia, enda la masuk akal, sebab la kap mungkin doni ras kerina isina jadi ibas waktu pitu wari ngenca. Bagepe ibas penelitian ahli-ahli geologi (ilmu yang mempelajari bumi, komposisinya, struktur, sifat-sifat fisik, sejarah dan proses pembentukannya) bumi enda terjadi melalui proses berjuta-juta tahun lamanya. Erkiteken sie mesera man manusia moderen guna ngangkai turi-turin penciptaan ibas kejadin 1, i ja Dibata njadiken doni enda ibas waktu pitu wari. Erkiteken sie guna ngangkai turi-turin penciptaan Dibata arus sipake konsep ras perukuren Dibata.

5.     Ibas turi-turin penciptaan enda siidah eme Dibata merupaken pelaksana utama ras njadiken manusia siutama ras merupaken wakil Tuhan ibas doni enda. Lit pitu wari ijadiken Tuhan doni enda eme wari 1: Langit ras doni bagepe Terang (Dibata misahkan terang ras gelap). Wari 2 : Awang-awang (cakrawala - langit). Wari 3 : Daraten. Wari 4: Matawari ras bulan. Wari 5: rubia-rubia i lawit ras lau ras perik-perik. Bagepe rubiah-rubiah simeliar ras asuh-asuhen ibas daraten. Wari 6 : Manusia. Wari 7:  Wari si badia. Sura-sura Dibata ibas kerina siijadiken e janah mehuli kerina harus ijaga ras iusahai manusia.  Erkiteken sie me manusia ijadiken Dibata sentuduh ras tempasNa. Alu bage perukuren Dibata lit man manusia.

APLIKASI

            Tema tahun pelayanan 2019 eme meningkatken jiwa kewirausahaan (entrepreneurship) warga GBKP dalam bidang ekonomi serta kepedulian terhadap kesehatan dan lingkungan. Ate ibas tahun enda ekonomi warga banci meningkat, bagepe warga GBKP arus peduli nandangi kesehatan pribadi bagepe njaga gelah lingkungen isekeleweta mehuli.

            Selaku kalak kristen kita arus meteh kita iajarken gelah kita harus erdahin guna ncukupi kebutuhen-kebutuhen ekonominta. Sebab siidah melala kebutuhen-kebutuhen ekonominta. Kita la banci jadi kalak perkisat. Adi perkisat berarti kita nggo ngelawan Dibata. Melala sibanci idahiken ibas doni enda, sipenting nggit kita erdahin. Perlu siteh Dibata nggo mereken kepentaren man banta. Tupung Dibata ngembusken kesahNa man banta jiwa entreprneurship Dibata pe nggo lit man banta, emaka tading kita mpedaratsa.

            Mari sinen salah sada karakter Dibata eme erdahin. Seh genduari Dibata e erdahin, Yesus pe erdahin (bdk Joh.5:17 - Invocatio). Tentuna kita pe arus erdahin, sebab ibas kita erdahin la saja ekonomi keluarganta tercukupi, tapi pe kita ipasu-pasu Tuhan. Bagepe alu semangat kita erdahin janah tetap kita mbiar man Dibata. Dahinta siendesken man Tuhan maka lit kreativitas man banta alu bage Dibata mereken man banta hal simbaru ras simehuli. Ibas erti kata lit saja bas perukurenta hal simbaru ras simehuli siicidahken ibas ndahinta tep-tep wari. Bagi temanta Dibata njadiken mbaru dingen mehuli. Siimaksudken temanta eme erkiteken Dibata njadiken mbaru dingen mehuli maka kita selaku anak-anakNa ibas kita erdahin mbaru dingen mehuli min. Lit semangat mbaru ras mehuli. Sebab Dibata erkeleng ate man banta. Keleng atena la pernah keri, saja gelah kita ipasu-pasuna, arus kita tetap erpengarapen man baNa, gelah iberekenna man banta perukuren simbaru ras simehuli. Alu bage ngasup kita ndahiken ndahinta tep-tep wari, termasuk ibas kita ersembah lit kreativitas ras inovasi. Maksudna lit saja bas kita hal-hal simbaru bas dirinta la bage-bage saja kita ersembah man Tuhan. Nggit sinciptaken semangat simbaru, perukuren simbaru emaka dat hasil simehuli. Jadi adi kita ngerana kerna entrepreneurship, kita la saja ngerana kerna uga gelah kita banci berusaha ibas bidang ekonomi, tapi pe jiwa nggeluh mbaru, ngasup ngukuri kerna simbaru ras tetap berupaya nciptaken simbaru. Tapi perlu siinget kai siibahan kita harus pe inanami kalak sideban. Alu litna enda la kita gampang medu ibas ersembah man Dibata ras ibas kita erdahin.

Pdt. Steven Kumenit, STh.M.Min.