KERJA RANI/PESTA PANEN (IMAMAT 23:5-24)

IMAMAT 23:5-24.

Tema : Kerja Rani.

LATAR BELAKANG
1. Secara umum kitab enda ngerana kerna kebadiaan, janah enda merupakan sada penekanan man bangsa Israel. Bangsa Israel harus badia erkiteken Dibata Badia kap (band. 11:44-45; 19:2; 20:7,26). Penekanan enda erkiteken bangsa Israel berbeda ras bangsa si deban, bagepe bangsa Israel enggo ipedarat ntah pe enggo ipisahken ibas bangsa Mesir nari.
2. Ibas rangka nggeluh ibas kebadiaan, maka bangsa Israel harus ngikuti kai siikataken Dibata. Salah sada siikataken Dibata eme bangsa Israel harus ngerayaken wari-wari raya siitetapken Tuhan. Sebab ibas wariwari raya e lit sada petunjuk guna iikuti bangsa Israel, subuk cara ersembah bage nehken persembahen. Maksud enda kerina erkiteken Dibata Badia janah la lit si deban si Badia maka bangsa Israel patuh man Tuhan saja, sebab ibas kepatuhen man Tuhan maka bangsa Israel nggeluh ibas kebadiaan. Bangsa Israel banci badia adi bangsa Israel terhubung ras Dibata si Badia e.
3. Ibas kegeluhen bangsa si badia (bangsa Israel), maka lit waktu si mendukung gelah kebadiaan bangsa Israel tetap terjaga, janah waktu e berhubungen ras perayaan, bagepe penembahan. Ibas waktu-waktu si badia e eme wari kudus mingguan (sabat), bagepe lit waktu kudus tahunan, eme telu perayaan simbelin i tambah wari raya pendamaian. Piga-piga wari badia si berhubungen ras perayaan eme Paskah ras wari raya roti si la beragi, tujunna guna mpehagaken Tuhan, wari raya paksa rani, tujunna eme mpersembahken gandum simbaru man Tuhan, bagepe wari raya tahun simbaru siertujun ersembah ras nehken persembahen pangan man Tuhan. Sebab ate Dibata ibas pebadiaken waktu enda bangsa Israel banci ngakui Tuhan eme Dibata sierkuasa, bagepe gelah manusia (bangsa Israel) banci istirahat ras la erdahin guna dirina sendiri.
4. Ibas bangsa Israel ndalanken kai siiperintahken kerna kebadiaan ibas waktu-waktu si lit siberhubungen ras perayaan-perayaan, maka enda ngataken bangsa Israel ersembah man Dibata si Badia ras nggeluh ibas persadan, ras ndalanken kekelengen. Sebab ijenda la saja icidahken kerna kepatuhan ersembah man Tuhan saja, tapi uga mperdiateken sapih-sapih manusia.
5. Hukum kebadiaan enda siikemas ibas bentuk keagamaan ras beribadatan gelah bangsa Israel nggeluh ibas kebadiaan, sebab ibas bangsa Israel ersembah ras nehken persembahen, ije me bangsa Israel ibadiaken. Perlu siteh, lit makna ras tujun nehken persembahen, eme persembahen pangan (ayat 8, 16), ertina mindo gelah Dibata masu-masu ras hadir. Persembahen pungo (ayat10), tujunna gelah pasu-pasu Dibata (Tuhan berkenan). Persembahen tutungen, tujunna guna menebus dosa umum si la isengaja, janah enda harus itutung seh keri. Persembahen persadan (ayat 19), tujunna gelah Tuhan berkenan ras masu-masu.

APLIKASI
Ibas tahun gerejawi GBKP, tanggal 30 Januari eme pelaksanaan Kerja Rani, janah enda merupaken kegiatan ras “wari raya” rutin siilaksanakan gereja GBKP. Ibas kegiaten Kerja rani enda, lit piga-piga makna ije eme 1). Pelayanan gereja man perpulungen. 2). Naruhken anggota perpulungen nehken persembahen hasil jumana sedekah sada tahun. Memang ibas point enda harus min siteh labo kerina kita perjuma, apai ka kita sitading i kota, emaka siimaksudken ulih juma sada tahun eme ulih pendahinta sada tahun subuk hasil juma bage pe gajinta. 3). Ibas rangka pergegeh keuangan gerejanta gelah pelayanan-pelayanan gereja banci tersehi.
Ibas kerja rani enda kita nehken persembahen man Tuhan sebab siamini maka kai si lit bas kita, ntah pe lit hasil jumanta erkiteken pasu-pasu Tuhan, emaka bentuk persembahen enda eme pengataken bujur. Ibas pengataken bujur enda pe, sipindo man Tuhan gelah Dibata ngaloken persembahenta ras pe sipindo gelah Dibata masu-masu pendahin ras jumanta, alu bage ibas tahun si reh banci ka kita nehken persembahen man Tuhan ibas kerja rani
Siidah genduari bentuk ras pelaksanaan kerna kerja rani erbeda-beda, lit sikonvensional (alu nehken persembahen arah amplop siitamaken ku lebe ibas kebaktin minggu), lit ka si imodivikasi, eme ikerjaken. Tapi lepas arah sienda kerina, kita kerina harus merespon pasu-pasu Tuhan arah Kerja Rani. Alu bage kita ipasu-pasu Tuhan. Tapi harus ka siinget ibas kita nehken persembahen kerja rani harus maka simehulina sisehken ibas kai si lit bas kita. Janah harus ka siinget ibas kita nehken persembahen enda teridah me spiritualitasta man Tuhan Dibata.

Pdt.Steven Kumenit, STh.,M.Min.