Dibata Nggo Nikapken Ingan Si Mehuli Man Kalak Si Tek Man BaNa (Heber 11:1-3; 6-16).

BAHAN PJJ GEREJA GBKP

TANGGAL 11-17 NOVEMBER 2012.

Heber 11:1-3; 6-16.

Tema   :    Dibata Nggo Nikapken Ingan Si Mehuli Man Kalak Si Tek Man BaNa.

LATAR BELAKANG.

1.      Secara umum banci sikataken surat Heber enda ialamatken man kalak Jahudi sienggo jadi Kristen, sipaksa sie ngenanami kiniseran, janah ia enggo rukur mulihi ras erpengakap maka agama Yahudi ndauh ulin asangken enggo  jadi kalak kristen.

2.      Ibas situasi sibagenda me penulis Heber mereken pergegeh man kalak kristen asal Yahudi, khususna uga erkiniteken man Dibata, bagepe  gelah ula  sia-sia kalak sierkiniteken man Tuhan. Erkiteken sie me penulis ncidahken man piga-piga kalak situtus ibas erkiniteken man Tuhan, janah kerina jelma siikataken penulis enda tuhu-tuhu itandai perpulungen.

3.      Penulis alu tegas nekanken kerna inti erkiniteken. Inti erkiniteken eme nggeluh ibas pengarapen nandangi kai si la idah, ras kalak si tutus nggeluh ibas pengarapen erkiteken kinitekenna man Tuhan ndatken pasu-pasu ibas Dibata nari. Enda me siilakoken para tokoh ibas padan sindekah. Enda itekanken gelah kalak kristen banci meteh kiniteken para tokoh ibas padan sindekah, bali nge kiniteken ibas kalak “si genduari”.

4.      Kiniteken siimaksudken penulis man kalak kristen Yahudi eme labo patuh nandangi kerina peraturan keagamaan, ntah ngikuti kerina ajaren agama tapi tek nandangi Dibata amin gia Dibata e la iidah. Ibas tutus erkiniteken man Dibata maka Dibata “berkenan” man kalak kristen. Enda nggo lit contohna eme nini-nini bangsa Yahudi, emaka kalak si tutus ras tetap erpengarapen man Dibata saja nggeluh kap ras Dibata, ntah pe jadi bagin ibas bangsa Dibata nari.

5.      Arah enda situhuna ngataken man kalak Kristen maka lit situhuna ingan siisikapken Dibata nandangi kalak si tek man baNa ras tetap erpengarapen man baNa. Enda janji Tuhan man kalak si tek. Jadi alu pengarapen me maka kalak Kristen asal Yahudi tetap erpengarapen sebab amin gia sada paksa ia mate, maka nggo lit ingan sienggo isikapken Tuhan sijadi sekerajangen kalak si tek.

APLIKASI

            Janji man kalak si tek guna nggeluh ibas surga tetap berlaku man banta. Emaka siniharapken Dibata man banta eme nggeluh ibas pengarapen man baNa saja. Janah siinget senina turangta singgo leben idilo Dibata, labo berarti nggo dung sekerajangenna. Tapi ibas kerehen Yesus Kristus sipeduakaliken reh me Ia pagi guna ngeranaken singgeluh ras si nggo mate. Alu bage subuk kalak si nggo mate bage singgeluh denga idilo Tuhan guna bengket ku bas kinirajaanNa. Emaka situhuna kita selaku kalak si tek ras tetap erkiniteken man Tuhan pasti nggeluh ibas Tuhan i Surga.

            Erkiniteken man Tuhan berarti kita harus nggeluh ibas erpengarapen man Tuhan saja, amin gia ibas kegeluhenta jumpa si la bagi ukurta. Sebab tek kita ibas kita erkiteken man Tuhan, maka ipasu-pasu Tuhan me kita.

Pdt. Steven Kumenit, STh, M.Min.