Undang-Undang Guna Kiniraturen (Ulangan 6:1-3; 1 Korintus 14:33)

PERPULUNGEN JABU-JABU

GEREJA GBKP

TANGGAL 14 – 20 PEBUARI 2016.

Ulangan 6:1-3, 1 Korinti 14:33.

Tema : Undang-Undang Guna Kiniraturen.

LATAR BELAKANG

A.    ULANGAN 6:1-3.

1. Bangsa Israel ibebasken Tuhan i bas taneh Mesir nari, taneh perbudaken, sebab ate Tuhan naruhken bangsa Israel ku taneh siipadanken Tuhan eme taneh Kanaan. Taneh sidem alu dadih ras tengguli. Tapi bangsa  Israel sinandangi bengket ku taneh Kanaan eme kesusuren simbaru. Angkaten si pemena singaloken undang-undang Tuhan i deleng Sinai, nggo mate. Emaka paksa angkaten simbaru bangsa Israel ngadi-ngadi i dataran Moab, erpidato me Musa.
2. Pidato Musa man bangsa Israel isina eme gela bangsa Israel ngikutken kerina undang-undang Tuhan. Sebab adi bangsa Israel ngikutken undang-undang Tuhan, maka sialoken bangsa Israel eme umur si gedang ras nggeluh alu mejuah-juah ras jadi bangsa simbelin. Tuhan mereken jaminen kegeluhen man bangsa Israel, subuk umur bagepe kemalemen ate. Kemalemen ate la saja kerna kegeluhen pertendin, tapi pe kegeluhen jasmani. Sebab i taneh Kanaan siilambangkan dadih ras tengguli, situhuna sada simbol pasu-pasu Tuhan man bangsa Israel arah taneh Kanaan. Ibereken Tuhan taneh Kanaan kesuburan.
3. Bangsa Israel arus ngikutken undang-undang siiajarken Musa. Undang-undang e me sepuluh pedah Dibata. Bangsa Israel arus ngkelengi ras ersembah man Tuhan saja. Ula lit dibata-dibata sideban man bangsa Israel. Bagepe kegeluhen bangsa Israel arus nggeluh badia ras ndalanken keleng ate. Enda memang jadi penekanan man bangsa Israel, sebab taneh Kanaan sinandangi iianina, taneh silit jelmana (penduduk) ras lit agamana. Saja agama ras dibatana la seri ras agama ras Dibata bangsa Israel. Emaka nggeluh alu ersembah man Dibata saja (monoteisme) merupakan hal simutlak man bangsa Israel.

B.     1 KORINTI 14:33.

1. Enda merupakan kata persinget rasul Paulus man perpulungen i Korinti, khususna kerna makeken pemere-pemere Kesah (karunia-karunia Roh). Enda ipersingeti Paulus gelah kerina perpululungen siikut ibas kebaktin ndatken manfaatna, subuk  sitek man Yesus Kristus ras si lenga tek. Emaka pemaken  pemere-pemere Kesah si pelain-lain e arus iatur. Memang kerina perpulungen ibere Tuhan kebebasan makeken pemere-pemere Kesah e. Tapi kerina e arus ibas kiniraturen, gelah pajek kula ni Kristus. Sebab fungsi pemere-pemere Kesah siBadia eme ibas rangka majekken kula ni Kristus.
2. Kiniraturen eme karakter Dibata, emaka ate Dibata, singgeluh ibas doni enda nggeluh ibas kiniraturen, termasuk perpulungen Korinti ibas ersembah man baNa. Enda merupaken kata persinget man perpulungen sebab perpulungen arus nggejapken kerina si lit bas ia (pemere-pemere Kesah ) rehna ibas Dibata nari. Janah erkiteken ibas Dibata nari maka perpulungen arus makeken alu kiniraturen. Gelah nggeluh ibas kinirauren, maka perpulungen arus makeken kepentaren ibas Dibata nari.

APLIKASI

            Kita la banci ngangkai kerna kata Dibata, adi la kita pernah ngoge Pustaka Si Badia, bagepe megiken Kata Dibata arah khotbah. Sebab undang-undang Dibata lit ibas Pustaka Si Badia, bagepe pengajaren kata Dibata lit ibas khotbah (kebaktin minggu, PJJ ras PA).

            Adi siperdiateken kerna undang-undang Tuhan alu sederhana banci sikataken ipersada ibas kekelengen, maka lit dua hal mpraktekken kekelengen  eme secara vertikal. Ibas erti kata kita selaku kalak sierkiniteken man Tuhan arus Tuhan saja siisembah kita, la banci lit dibata-dibata sideban. Bagepe kekelengen secara Horisontal. Maksudna kita arus ngkelengi temanta manusia alu dem keleng ate erpalaskan keleng ate Tuhan. Emaka undang-undang Tuhan siibereken man banta mereken kiniraturen nggeluh. Sebab selaku kalak sierkiniteken man Tuhan, kegeluhenta arus nggeluh badia. Ibas arti kata erkiteken patuh ras sidalankan undang-undang Tuhan maka kegeluhenta tuhu-tuhu ibas kiniraturen, sebab pedomanta eme undang-undang Tuhan. Alu bage sialokenta eme nggeluh mejuah-juah ras dem kemalemen ate.

Pdt. Steven Kumenit, STh, M.Min.