Tetap Erpengarapen (Mazmur 126:1-6)

PERPULUNGEN JABU-JABU

GEREJA GBKP

TANGGAL 17 – 23 JULI 2016.

MAZMUR 126 : 1-6.

Tema : Tetap Erpengarapen.

LATAR BELAKANG

1.      Pemazmur mewakil bangsa Israel ertoto man Tuhan. Janah ibas pertotonna pemazmur nggejapken maka pembebasen bangsa Israel ibas pembuangan i Babel nari eme sada perbahanen Tuhan simbelin. Ibas bahasa pemazmur bagi kalak siernipi. Pemazmur nggejapken adi la erkiteken Tuhan, bangsa Israel la mulih/bebas ibas pembuangen i Babel nari. Sebab tupung sie, la mungkin alu gegeh si lit man bangsa Babel, bangsa Israel banci ndarat i Babel nari. Perlu siteh tupung sie bangsa Israel nggo ngelakoken erbage-bage cara, termasuk erbahan pemberontaken ras serangan-serangan sporadis ibas ingan-ingan tertentu, tapi kerina e gagal, sebab banci italuken bangsa Babel. Bagepe kalak sierbahan pemberontaken ihukum pemerintah Babel.

2.      Pemazmur tuhu-tuhu nggejap kerna kuasa ras keleng ate Tuhan tetap erdahin man bangsaNa. Amin gia bangsa Israel nggeluh ibas taneh pembuangen i Babel, tapi keleng ate Tuhan tetap ras bangsaNa. Bangsa Israel nggeluh i taneh pembuangen, tuhu erkiteken pernembeh ate Tuhan, tapi labo lalap Ia merawa. Emaka ibas waktu siitetapken Tuhan, ibebaskenNa bangsaNa ibas taneh pembuangen nari. Emaka uga pa pe gegehna bangsa Babel italuken Tuhan ia.

3.      Erkiteken perbahanen Tuhan simbelin man bangsaNa, ija Tuhan nggo mbebasken bangsaNa, maka bangsa Israel nggeluh ibas keriahen. Sebab tupung bangsa Israel i taneh pembuangen, bangsa Israel nggeluh mesera, sebab nggeluh selaku kalak tabanan. Bagepe perbahanen Tuhan simbelin enda, mabai bangsa sideban ngenen kempak Tuhan, janah ngakui kerna perbahanen Tuhan. Nina bangsa sideban, Tuhan simbebasken bangsa Israel, labo erkiteken gegeh ras kengasupen bangsa Israel.

4.      Amin gia bangsa Israel nggo bebas ras mulih i Yerusalem, tapi lit sada perbeben man bangsa Israel eme pemulihan perekonomian ras kesejahteraan bangsa Israel, janah penggejapen pemazmur adi Tuhan ikut campur tan maka perekonomian ras kesejahteraan bangsa Israel banci inanami bangsa Israel. Emaka ertoto pemazmur gelah Tuhan masu-masu bangsa Israel.

5.      Pemazmur nggejapken maka Tuhu Tuhan ngasup mereken pemulihan perkonomian ras kesejahteraan man bangsa Israel. Tapi bangsa Israel arus erdahin pe. Sebab alu bangsa Israel erdahin alu tutus ras tetap erpengarapen man Tuhan maka ipasu-pasu Tuhan bangsa Israel.

APLIKASI

            Temanta ngataken Tetap erpengarapen. Tentuna tema enda mpersingeti kita maka selaku kalak sierkiniteken man Tuhan, arus sigejapken Tuhan siisembah kita eme Tuhan singgeluh ras tetap ncikep padanNa. Emaka tek kita, Tuhan tetap masu-masu kita singgeluh ibas pengarapen man baNa.

            Nggeluh ibas erpengarapan eme nggeluh ibas ketergantungan man Tuhan saja. Bagepe nggeluh ibas erpengarapen mabai kita tetap tutus ras semangat nggeluh ras erdahin. Sebab siteh kai siidahiken kita, ipasu-pasu Tuhan.

            Genduari gereja GBKP nggo 75 tahun njayo. Janah enda ngatakenca maka kerina enda erkite-kiteken penemani ras pengarak-ngarak Tuhan nandangi gerejaNa. Gereja GBKP seh genduari banci eksis melayani erkite-kiteken Tuhan. Tapi sigejapken, amin gia nggo melala singgo ibahan gereja GBKP, tapi melala denga ka siarus ilakoken ntah pe ibahan GBKP ibas pelayanenna. Sebab gereja GBKP idilo gelah nehken Berita Si Meriah i tengah-tengah doni enda. Tentuna adi kita ngerana kerna gereja GBKP, maka kita ngerana kerna eksistensita selaku gereja situhu-tuhu. Gereja GBKP banci “bergerak” adi kita selaku gereja e jine ikut muat bagin ibas pelayanan-pelayanan gereja. Perlu siteh melala denga siarus ilakoken ras itingkatken ibas pelayanan-pelayanan gereja. Kerna sienda, la banci kita ngerana ibas sada aspek saja, tapi arus kita ngerana ibas kerina aspek pelayanan gereja. Janah ula mbiar adi kita ngerana kerna pelayanan, ras ikut kita ibas pelayanan e, maka Tuhan pasti masu-masu kita kerina. Emaka nggeluhlah kita ibas erpengarapen man Tuhan saja. Ula ibas kita erdahin i tengah-tengah gereja mengandalkan gegeh ras kepentarenta. Adi enda siterjadi maka pelayanan gereja pasti gagal, sebab lit denga sigegehen asangkan kita, sibanci naluken sura-suranta, eme iblis. Adi pelayanenta i tengah-tengah gereja mengandalkan ras tetap erpengarapan man Tuhan, kegeluhenta nggeluh ibas kemalemen ate.

Pdt. Steven Kumenit, STh.M.Min.