Nandai Dibata Ndalanken Sura-SuraNa (Bertelogi : Belajar Untuk Melakukan).

PEKAN PENATALAYANAN

GEREJA GBKP

WARI II, SENIN 16 JANUARI 2017.

Invocatio    :    Batang si mehuli tentu mehuli nge buahna, tapi batang si la mehuli tentu pe la mehuli buahna (Matius 7:17).

Ogen          :    2 Raja- Raja 4:8-17.

Renungan   :    Matius 7: 21-23.

Tema          :    Nandai Dibata Ndalanken Sura-SuraNa (Bertelogi : Belajar Untuk Melakukan).

LATAR BELAKANG

1.      Sijadi bahan renungenta sekali enda eme bagin-bagin pendungi ibas khotbah Yesus i datas uruk. Ibas khotbah Yesus enda, Yesus mereken sada penekanan man jelma sinterem kerna pentingna perbahanen. Perbahanen eme sinentuken kita bengket ku bas kinirajaan surga.

2.      Ibas khotbah i datas uruk enda, ate Yesus gelah kerina simegi pengajarenNa, la banci sinik saja. Tapi kai singgo ibegina kerna Kinirajaan Surga siiajarken Yesus arus ipraktekken ibas kegeluhenna tep-tep wari. Tuhu penting kata-kata, tapi si lebih penting eme perbahanen. Sebab siperlu ibas kegeluhen ras Dibata eme perbahanen.

3.      Alu sederhana ate Yesus ngataken man jelma sinterem, maka Yesus eme Tuhan, la saja terjeng pengakun, tapi arus teridah ibas perbahanen. Sebab iblis pe tek man Tuhan, bagepe nggirgir ia (bdk. Jakup 2:19), tapi ndalanken kata Dibata la ia nggit. Tapi siilakoken setan eme uga carana gelah kalak si tek man Yesus banci sirang ras Tuhan ras ngelakoken kai si la ngena ate Tuhan. Emaka sinentuken ise saja sibanci bengket ibas kinirajaan Surga eme sindalanken kai singena ate Tuhan.

4.      Bagepe ipersingeti Yesus man jelma sinterem, i ja ibas wari pendungi pagi, Yesus dat kuasa guna menghakimi kerina manusia. Emaka sia-sia me kalak sierlebuh man bangku Tuhan, Tuhan, ernubuat kami ibas gelar Tuhan, bagepe  ipelawes kami setan-setan ibas gelar Tuhan, tapi la idalankenna perbahanen-perbahanen singena ate Tuhan. kalak si bage la bengket ibas kinirajaan Surga. Sebab  la itandai Yesus, erkiteken sie me i pelawes Yesus ia kerina.

5.      Jadi, perbahanen singena ate Tuhan ras kinirajaan surga eme sada hal si la banci ipisahkan. Ibas kinirajaan surga Yesus si jadi Raja, emaka ia sinentuken/ngadili ise sibanci nggeluh ibas kinirajaan surga. Bagepe ise sindalanken kai singena ate Tuhan, tuhu-tuhu itandai Yesus ia. Sebab perbahanen-perbahanen simehuli siilakoken, tapi sebalikna ise siterjeng pengakun ngenca, janah la idalanken perbahanen simehuli, ia igolongken kalak jahat. Janah kalak jahat la dat ingan ibas kinirajaan surga.

APLIKASI

            Kegeluhen kalak kristen la terjeng megi-megi saja, tapi arus ndalanken kai singena ate Tuhan. harus siteh kegeluhen kalak kristen nggo melala ndatken pengajaren ibas Tuhan nari, tentuna arah gerejaNa eme kebaktin minggu (khotbah), PJJ, PA ras kegiaten-kegiaten gereja sideban. Bagepe ibas penandainta secara pribadi kerna Yesus eme arah kebaktin keluarga bagepe ngoge pustaka si badia, maka searusna min kita selaku kalak kristen arus ndalanken kai sijadi sura-sura Tuhan eme nehken kekelengen, ndalanken kebujuren ras keadilen, ras nggit ndalanken kai singena ate Tuhan ibas kegeluhenta tep-tep wari. Ise sidalanken sibage ndatken pasu-pasu Tuhan.

            Perlu siteh kegeluhenta la saja terjeng ibas doni enda ngenca, tapi kegeluhenta situhu-tuhu eme i surga, nggeluh ras Yesus selaku Tuhan ras Raja i surga ras i doni. Bagepe siteh ibas wari pendungi pagi, reh Yesus ku doni enda guna ngadili kita, subuk singgeluh ras singgo mate. Emaka ibas paksa enda kita ipersingeti gelah nggo paksana kita ncidahken perbahanen-perbahanen singena ate Tuhan. sebab perbahanen-perbahanen singena ate Tuhan, la saja kita siipasu-pasu Tuhan, tapi kalak sideban pe ndatken pasu-pasu Tuhan. Bagepe ibas kita ndalanken kai singena ate Tuhan maka itandai Tuhan kita. Alu bage malem ateta sebab kita banci atan ibas surga.

Pdt. Steven Kumenit, STh.M.Min.