Pilihlah Si Mehulina (Filipi 1 : 9 - 10)

PERPULUNGEN JABU - JABU

GEREJA GBKP

TANGGAL 10 - 16 MARET 2019.

=========================================================

Pilipi 1:9-10.

Tema : Pilihlah Si Mehulina

LATAR BELAKANG

1.    Sijadi oratenta eme bagin surat Paulus siikirimkenna ibas penjara nari man perpulungen i Pilipi. Perpulungen Pilipi eme perpulungen simehuli si mperdiateken kegeluhen ras pelayanan Paulus. Erkiteken sie me Perpulungen Pilipi dat bagin si istimewa ibas pusuh Paulus. Janah ibas surat enda Paulus ertoto gelah perpulungen Pilipi ertambah keleng atena, pemeteh situhu-tuhu ras pengangkan siserta alu bage perpulungen Pilipi banci meteh milihsa kerna simehuli emaka perpulungen Pilipi tetap bersih seh ngayak Yesus Kristus reh pedua kaliken guna ngadili manusia.

2.    Idah Paulus dahin simehuli siicidahken ras ipraktekken perpulungen Pilipi erkiteken Dibata sierdahin bas pusuh perpulungen Pilipi, emaka ibas pertotonna ipindo Paulus gelah Dibata tetap erdahin man perpulungen Pilipi gelah perpulungen Pilipi tetap ergiah-giah ngelakoken simehuli. Tapi  simehuli e tuhu-tuhu ngena ate Tuhan, maka perpulungen perlu pemeteh situhu-tuhu ras pengangkan siserta.

3.    Alu pemeteh situhu-tuhu ras pengangkan siserta, maka perpulungen banci milihsa si mehuli singena ate Tuhan. Enda itekanken Paulus sebab idah Paulus keleng ate si lit bas perpulungen arus ertambah, lenga sempurna. Keleng ate Perpulungen la terjeng man Paulus saja, tapi keleng ate e nandangi kerina jelma, perpulungen Pilipi arus nggeluh ibas sikeleng-kelengen (nggeluh ibas persadan), bagepe arus nggeluh ibas mekuah ate nandangi kalak sideban. Enda ikataken Paulus sebab perpulungen lit si la siangkan (bdk. Pilipi 2:1-4; 4:2). Erkiteken sie me pemeteh ras pengangkan ibas Dibata nari arus nggeluh man perpulungen Pilipi. Sebab keleng ate arus ilakoken kerina kalak sierkiniteken man Tuhan, janah ibas ngelakoken keleng ate, kalak si deban pe banci nggejapken keleng ate Tuhan. Alu bage kalak sindalanken keleng ate nggeluh la erpandangan maka ibas kerehen Jesus Kristus pedua kaliken, kalak sindalanken keleng ate situhu-tuhu singena ate Tuhan terkelin me.

4.    Perpulungen Pilipi warga Surga kap. Amin gia warga Surga tapi nggeluh denga ibas doni. Kerehen Yesus Kristus pedua kaliken mbaba kalak sierkiniteken man baNa ibas Surga. Alu kata sideban gelah perpulungen Pilipi tetap jadi warga Surga, nggeluh ibas Surga, perpulungen Pilipi arus ngelakoken keleng ate situhu-tuhu, gelah ibas kerehen Yesus pedua kaliken, tupung iadiliNa kerina manusia, idapatiNa perpulungen Pilipi nggeluh la erpandangan.

5.    Pemeteh si tuhu-tuhu ras pengangkan siserta arus imiliki perpulungen Pilipi, alu bage perpulungen Pilipi arus mbiar ras erkemalangan man Tuhan (bdk. Kuan-kuanen 1:7). Erkiteken keleng ate biak Kristus janah guna kemulian Kristus maka pemeteh ras pengangkan ibas Dibata nari arus ngkuasai perpulungen Pilipi gelah simehuli siilakoken perpulungen Pilipi. Alu milih ras ngelakoken simehuli maka perpulungen Pilipi nggeluh la erpandangan. Perpulungen Pilipi nggeluh ibas keterkelinen.

APLIKASI

            Pemeteh situhu-tuhu ras pengangkan si serta arus lit bas kita selaku kalak sierkiniteken man Yesus Kristus. Apai kah genduari kita iperhadapken ras pemilihen Pertua Diaken. Perlu siteh pemilihen Pertua Diaken la saja ngelaksanaken kalender gerejawi eme tep-tep 5 tahun arus ilakoken pemilihan Pertua Diaken ibas gereja GBKP. Tapi pemilihen Pertua ras Diaken merupaken salah sada bentuk siipake Tuhan arah gerejaNa guna seh ku gereja si dewasa (bdk. Misioner). Arah pemilihen Pertua Diaken lit dua Hal sibanci siperdiateken : Sipemena: Dibata make kita guna milih serayanNa, gelah serayanNa e ngelai mendewasakan kiniteken perpulungen (bdk. Epesus 4:11-13). Sipeduaken :Adi la terpilih, la bo berarti ia itulak Tuhan, tapi lit idah Dibata siterulin asangken kita. Janah khusus man Pertua Diaken ibas periode selanjutna la terpilih maka ia nggo jadi anggota perpulungen sidewasa. Alu bage alu litna pemeteh situhu-tuhu ras pengangkan siserta, kita banci milih Pertua ras Diaken situhu-tuhu ngena ate Tuhan.

            Tuhu kita kerina mehuli, tapi bas kita lit sipantasna guna jadi Pertua Diaken emaka kita pe arus ka sitandai teman-temanta guna ipilih. Jadi sipilihi eme simehulina. Emaka biak siarus lit bas kita eme 1). Lit min keleng ate bas kita. Siimaksudken keleng ate eme keleng min kita nandangi perpulungen Tuhan. Perpulungen Tuhan arus ibaba ibas persadan ras pemeteh bagepe pengangkan simehuli kerna Yesus Kristus. 2). Pemeteh situhu-tuhu ras pengangkan siserta. Maksudna kita arus ertoto man Tuhan ras mbiar man baNa gelah iberekenNa man banta pemeteh situhu-tuhu ras pengangkan si serta guna milih serayanNa. kita banci milih serayanna alu la erpalasken kade-kade, teman, kebayaken, rsd. tapi siipilih kita eme kalak singgit ngelai erpalasken keleng ate Tuhan. 3). Kita arus sikapken pusuh, gelah adi terpilih ras la terpilih, kita arus ngataken bujur man Tuhan.

Pdt. Steven Kumenit, S.Th.M.Min.