Ngendesken Kula Man Dibata, Eme Ibadah Ras Persembahen Si Tuhu-tuhu (Ibadah Eme Kap Persembahen Si Mehulina). Roma 12:1-3.

Roma 12:1-3.

Isi : Ngendesken Kula Man Dibata, Eme Ibadah Ras Persembahen Si Tuhu-tuhu (Ibadah Eme Kap Persembahen Si Mehulina).

LATAR BELAKANG
1. Secara umum banci sikataken perpulungen Roma labo Paulus simantekisa, tapi lit piga-piga alasan engkai Paulus nulis surat man perpulungen Roma, bagi siibahanna man perpulungen-perpulungen siipantekina, iantara alasen si lit eme la saja Paulus mpersiapken kerehenna man perpulungen Roma, tapi ate Paulus gelah perpulungen Roma banci lebih nggejapken kerna perkuah ate Tuhan si mbelin siisehkenNa man perpulungen Roma. Tujunna eme gelah perpulungen Roma termotivasi erbahan simehuli singena ate Tuhan, selaku kalak sitek man Yesus Kristus. Ibas erti kata “pembenaran” sienggo ibereken Tuhan harus teridah ibas kegeluhen tep-tep wari.
2. Lit telu hal siitekanken Paulus ibas oratenta sendah eme : 1). Endesken kulandu selaku persembahen singgeluh rikutken singena ate Tuhan. Maksudna eme kerina (totalitas) kegeluhen perpulungen Roma, subuk perukuren, pengerana ras perbahanen, ntah pe kerina “kemampuan” ras “kegiatenta” tep-tep wari harus iendesken man Tuhan. Jadi lit penyerahan total. Enda tentuna berhubungan ras Dibata, sebab labo pemerenta siiharapken Tuhan, tapi ateNa kulanta e jadi persembahenta. 2). Ola pelepas dirindu jadi seri ras doni enda. Maksudna eme lit dua bentuk eme : a). Ola pediat dirinta enda jadi seri (sepola) ras doni enda, sebab doni enda enggo ikuasai dosa ras la sempurna. b). lit perubahen si terus-menerus, khususna lagu langkah perpulungen Roma. Erkiteken sie, Paulus nekanken kerna perukuren sipelimbarui. Alu bage perpulungen banci meteh kerna sura-sura Dibata. 3). Sada teguran Paulus man pepulungen i Roma gelah perpulungen i Roma ula meganjang ukur. Sebab ibas perpulungen lit pemere-pemere Dibata sipelain-lain. Paulus menasehati gelah perpulungen ula meganjang ukur. La lit perukuren singukuri ganjangen akapna bana asangken kalak sideban. Emaka siiperluken perpulungen eme “kesederhanaan” kepentaren ras “kesantunan/kesopanan man kalak sideban. Janah kiniteken jadi sada tolak ukur man perpulungen guna ngelakoken kai singena ate Tuhan.
3. Jadi ibas ndalanken kai singena ate Tuhan, eme ndalanken kekelengen ras nggeluh mehuli merupakan sada bentuk persembahen singena ate Tuhan.
4. Ijenda Tuhu-tuhu Paulus mbedaken kerna ibadah menurut Injil ras ibadah menurut padan sindekah. Ibas padan si Ndekah, memang lit kin kurban siibaba eme asuh-asuhen. Tapi ibadah menurut Injil eme totalitas nggeluh manusia silebih itekanken.
5. Penekanen Paulus kerna nginget perkuah ate Dibata simbelin, eme sada pengapul, sebab enda ngataken kerna pemeliharaan Tuhan, ras kuga ate Dibata gelah perpulungen Roma isampati Tuhan adi perpulungen Roma ndabuh kubas dosa.
THEOLOGIA NASKAH
- Perpulungen Roma harus ngendesken kulana selaku persembahen singgeluh singena ate Tuhan.
- Ola pelepas dirindu jadi seri ras doni enda.
- Ola meganjang ukur.

APLIKASI.
Adi kita ngerana kerna persembahen, pasti perukurenta tertuju ku materi. Tapi ijenda, kita ngerana kerna kula selaku persembahen singena ate Tuhan.
Harus sipahami kenca kita ndabuh ku bas dosa, maka kegeluhenta lanai sibersih, tapi erkiteken perkuah ate Tuhan, arah Yesus Kristus, kita ibersihken, janah ate Dibata gelah ula nai min sirusur-usur erbahan si la mehuli si langena ate Tuhan. Emaka la banci lang siendesken kulanta enda man Tuhan saja. Sebab ibas kita ngendesken kulanta enda man Tuhan saja, berarti ateta Tuhan saja sipatut kita sembah, ras ateta ndalanken singena ate Tuhan. La ateta jadi budak dosa.
Tapi la ka berarti persembahen materi lanai perlu. Persembahen materi harus sipahami eme pengaplikasian ibas kulanta. Bagepe tanggungjawabta selaku kalak sierkiniteken man Tuhan ras salah sada bentuk pengataken bujurta man Tuhan Dibata.
Memang siidah ibas kegeluhenta tep-tep wari cukup nterem kita si ndalanken si la ngena ate Tuhan. Isea-seakenna kegeluhenna. Adi bagenda sitetap sidalanken maka alu sendirina sisea-seaken kap perkuah ate Dibata man banta, janah la nai tek nandangi pemeliharan Tuhan man banta. Emaka ibas kita ngendesken kulanta man Tuhan, e berarti siendesken kulanta ibas ketergantunganta man Tuhan. Alu bage ipeliharana kita ras tetap kita ngaloken pasu-pasu idur Dibata nari. Ibas rangka sie, kita harus ndalanken kai singena ate Tuhan arah makeken ras mengembangken kerina pemere-pemere Tuhan si lit bas kita. Alu bage, tuhu-tuhu persembahenta e, ngena ate Tuhan.

Pdt. Steven Kumenit.