Orang yang Beriman bertanggungjawab dalam pemilihan pemimpin (1 Samuel 16:3-13).

1 SAMUEL 16: 3 – 13.

Isi : Kalak Sierkiniteken Ertanggungjawab Ibas Milih Pemimpin.

LATAR BELAKANG
1. Tuhan enggo nulak Saul jadi raja bangsa Israel, emaka isuruh Tuhan si Samuel ku Betlehem guna minaki (nangkuhken) Daud jadi raja. Itulak Tuhan Saul jadi raja bangsa Israel erkiteken lit piga-piga hal siibahanna si langena ate Tuhan, Saul la nggit megiken kai siiperentahken Tuhan, Saul enggo erdosa i lebe-lebe Tuhan. Dosa Saul eme 1). Isuruh Tuhan gelah kerina kalak Amalek ibunuh, tapi raja Agak itabanna, janah biri-biri ras lembu simehuli bagepe barang-barang simehuli ibabana. 2). Saul nehken persembahen muat hak imam eme alu nehken persembahen man Tuhan.
2. Seh Samuel i kuta Betlehem, anak kuta minter nggirgir, sebab mbiar ia kerina. Pengalamen siterjadi, adi reh sekalak nabi, pasti ipebetehkenna penghukuman ras keriahen. Janah kebiaren kalak enda eme adi Samuel selaku imam mbaba berita penghukuman. Erkiteken sie me nina Samuel man anak kuta, kerehenna mbaba kedamen.
3. Siidah Tuhan labo fisik, emaka pitu kalak anak Isai siituduhken Isai man Samuel, kerina e la ipilih Tuhan. Anak sipewaluhken sisangana ermakan biri-biri, si la iperhitungken Isai eme si Daud kepe si ngena ate Tuhan, Emaka isuruh Samuel si Isai gelah idilona si Daud gelah acara nehken persembahen man Tuhan banci idalanken.
4. Kenca reh Daud minter Tuhan ngerana man Samuel enda me kalakna, emaka minter iminaki Samuel si Daud jadi raja bangsa Israel. Emaka Minter Daud ikuasai Kesah Tuhan.
5. Selaku raja bangsa Israel, ia labo saja mimpin bangsa Israel secara politik, tapi pe sekalak raja bangsa Israel spiritualitasna harus dewasa. Tandana spiritualitasna dewasa, ia harus patuh man Tuhan ras jadi simbol nggeluh mbiar man Tuhan nandangi bangsa Israel. Sebab bangsa Israel eme bangsa Tuhan, bangsa siikhususken Tuhan. Emaka bangsa Israel harus ncidahken kegeluhen si erbeda ras bangsa-bangsa si deban.

THEOLOGIA NASKAH
1. Samuel reh ku Batelehem ndahi keluarga Isai, erkiteken bekas persuruhen Tuhan jine. Emaka kerehen Samuel ije, mbaba kedamen.
2. Manusia ngenen fisik ngenca, tapi Tuhan inehenNa pusuhna.
3. Samuel minaki Daud jadi raja, emaka mis ikuasai Kesah Tuhan.

APLIKASI
Sekali enda kita isingetken kerna peranan gereja ibas masyarakat, khususna kerna keterlibaten gereja ibas dunia politik. Memang secara insititusi, gereja harus steril ibas dunia politik praktis, tapi labo berarti gereja secara institusi labo banci mendewasaken anggota perpulungenna guna terlibat ibas dunia politik praktis. Ate gereja, gelah anggota perpulungen ibas terlibat ibas dunia politik praktis harus makeken unsur-unsur kristiani, gelah terpuji gelar Tuhan. Guna sie perpulungen ula min alergi kerna keterlibatanna ibas politik praktis. Emaka adi soal dukung-mendukung salah sada kandidat merupaken sada hal siwajar. Saja siitekanken ijenda eme ula min erkiteken fisik, ntah si teridah jadi alasenta milih salah sada kandidat guna mimpin kita. Tapi sipaling penting eme uga pemimpin e mbiar ras erkemalangan man Tuhan. Erkiteken sie asa bancina sipedauh bas kita”money politik” ras KKN, sebab e labo saja ncedai kinitekenta, tapi enggo sijuruken gelar Tuhan. Emaka ibas rangka menyikapi kerna pemilihan Bupati, khususna Kabupaten Karo, kita harus dewasa ibas kiniteken. Sitotoken kerina calon gelah berpihak man masyarakat, terlebih mbiar ia man Tuhan. Janah siajuk keluarganta siikut milih gelah pilihlah siterbaik, sierpalasken sura-sura Tuhan, labo erpalasken sura-sura manusia. Janah sehubungan ras sie, kita pe iajuk gelah tetap dewasa ras mbiar man Tuhan, gelah ngena ate Tuhan man banta. Bagi Daud ngena ate Tuhan, emaka ipilihNa si Daud jadi raja bangsa Israel, kita pe harus bage, gelah ngena ate Tuhan, maka ipercayaken Tuhan kita ibas dahin-dahin Tuhan, sienggo isikapken Tuhan sue ras talentanta masing-masing.