Peningkatan Penggunaan Gedung Gereja (Mazmur 84:1-11)

BAHAN PJJ RUNGGUN GBKP
TANGGAL 3 – 9 OKTOBER 2010
________________________

Masmur 84:1-11

Isi : Peningkatan Penggunaan Gedung Gereja.

LATAR BELAKANG.
1. Enda sada Masmur siiendeken bani Korah, janah enda pe biasa igelari ende-enden ziarah. Maksudna ende-enden siiendeken paksa perdalanen ku Yerusalem (Sion), khususna ku Rumah Pertoton.
2. Perlu siteh bani Korah enda, sada terpuk ibas terpuk kalak Lewi sierdahin ibas rumah pertoton.
3. Bangsa Israel si merap ibelang-belang doni enda, tep-tep tahun lit telu kali ia ku Yerusalem guna ertoto ras ersembah man Tuhan Dibata ibas RumahPertoton eme wari raya Paskah, Kerja Rani, ras wari raya Sapo-sapo, sebab rumah pertoton ingan Dibata, janah enda merupaken sada undang-undang siharus ipatuhi bangsa Israel ( Ulangen 16:1-17). Tujun kerina enda eme ibas rangka mpehagaken Tuhan Dibata.
4. Pemasmur nggejapken maka erdeherna ia ku Rumah pertoton reh gegehna ia, sebab si reh ku Rumah Pertoton enda eme karak siertedeh ate jumpa ras Tuhan. Kalak sireh erpengakap maka adi jumpa ras Tuhan lit sada kemalemen ate, janah la lit ingan sideban sibanci mereken kemalemen ate e, asangken i Rumah Tuhan. Emaka amin gia cuaca cukup las, tapi ipasu-pasu Tuhan ia, emaka ngasup ia erdalan ku Rumah Pertoton. Janah enda situhuna pengalamen kiniteken bangsa Israel (band. Bangsa Israel ndarat i taneh mesir nari. Ibas paksa suari, Tuhan erdalan alu binangun embun, janah ibas berngi Tuhan mereken binangun api). Enda me situhuna ungkapen pemasmur kerna pengkelengi Tuhan man kalak si reh ku Rumah Pertoton (band. Ayat 7).
5. Pemasmur pe mindo man Tuhan gelah Tuhan masu-masu raja si bekas pilihan Tuhan, sebab adi bas raja lit kepentaren maka ipimpinna rakyatna alu dem kebujuren. Bagepe gelah raja tetap mbiar ras erkemalangen man Tuhan.

THEOLOGIA NASKAH
- Lit Sada ketedehen ate ku Rumah Tuhan.
- Kalak siringan ibas Rumah Tuhan, ndatken kesangapen.
- Pemasmur mindo man Tuhan gelah Tuhan masu-masu raja siiangkatNa.

APLIKASI.
Gedung Gereja eme sada ingan ersembah ras perpulungen Tuhan. Ibas ateta ersembah man Tuhan, banci sialoken kemalemen ate/kesangapen, sebab ije kita banci megiken kai siikataken Tuhan arah khotbah. Erkiteken sie me maka lit piga-piga runggun la iberena adi gedung gereja jadi ingan man ras ngisap-ngisap rokok ibas, sebab pengangkana maka gereja eme ingan si Badia. Tapi selain sie, gedung gereja jadi ingan sidang, rsd.
Ibas perkembangen genduari, cukup nterem kita si lit ibas perbeben ras kiniseran. Ateta reh ku Tuhan guna mindo penampat, janah salah sada ingan sibanci memfasilitasi (kelang-kelang) eme gereja, tapi mekatep kita terbentur ku hal-hal praktis eme kerna gereja si la ibuka, kurang nyaman siakap ibas gereja erkiteken melket, rsd. Bagepe la lit teman si banci megiken perbeben ras kiniseran ku (ingan pastoral), rsd. Emaka la perlu heran lit kita kenca jumpa perbeben ras kiniseran, kita pindo man dibata-dibata sideban (band. Kasus deleng sinabung. Ibas kasus enda, enggo lit piga-piga korban deleng Sinabung ertoto man dibata-dibata sideban, reh ia ku kerangen, ras ingan sideban. Labo ia reh ku gereja). Emaka mari siukuri kerna uga simehulina gelah ermeningkatna pelayanen ras penggunaan gereja. Ibas erti kata, gedung gereja jadi sentral pelayanan ibas perpulungen, bagepe ibas masyarakat. Alu bage, lit ketedehen ateta reh ku gedung gereja. Emaka, tentuna fasilitas ibas gereja harus ka menunjang.