Sikap GBKP Terhadap Aliran Kekristenan pada Sekarang ini (Lukas 9:46-50)

BAHAN PJJ GEREJA GBKP
TANGGAL 24-30 APRIL 2011
__________________________

Lukas 9:46-50.

Tema : Sikap GBKP Nandangi Aliran Kekristenan Ibas Paksa Si Genduari.

LATAR BELAKANG
1. Ajar-ajar Yesus salah ngangkai kerna pengajaran ras kerehen Yesus selaku Mesias ibas doni enda. Ajar-ajar Yesus erpengakap maka kerehen Yesus ras pengajaren Yesus eme ibas rangka majekken Kinirajaan si bali ras kinirajaan doni enda. Memang paksa sie kalak Jahudi sangana iteruh kuasa kerajaan Romawi, emaka ate kalak Jahudi bebas min a kerina ibas kuasa kerajaan Romawi, janah arapen kalak enda man Yesus Kristus, sebab ibas Yesus Kristus lit kuasa. Erkiteken sie me turah sada sura-sura man ajar-ajar guna ikut erkuasa ras Yesus.
2. Ibas perukuren ajar-ajar Yesus status sosial cukup mpengaruhi “jabaten ras keduduken”, emaka turah me perubaten sapih-sapih ia, kerna ise kin si mbelinna iantara ia i lebe-lebe Yesus. Amin gia persoalen enda la ipeseh man Yesus, tapi iteh Yesus perukuren ajar-ajarNa. Emaka idilo Yesus sekalak anak-anak, janah niNa Ise si ngaloken danak-danak enda ibas gelarKu, ia me singaloken Aku, labo Aku saja ialokenna, tapi ialokenna pe Ia sinuruh Aku. Sebab ise si nggit jadi sikitikna kal ibas kam kerina, ia me simbelinna. Pengajaren Yesus man ajar-ajar arah danak-danak enda, gelah ajar-ajar banci meteh kerna ise kin Yesus situhuna, janah lit min kiniteruken ukur bas ajar-ajar. Bagepe arah enda icidahken Yesus kerna makna simbelin ibas Kinirajaan Sorga. Bagepe ipihak si deban arah danak-danak enda, ate Yesus ngataken anak-anak e la erdosa, la meganjang ukur (la bo dirina saja siiukurina, la bo lit motivasi gelah ipuji kalak ras tek man pemeliharaan orang tuana). Bage me seharusna ajar-ajar Yesus harus percaya man pemeliharaan Tuhan, emaka lanai ajar-ajar ngerana kerna ise simbelinna ras lanai ngerana kerna jabatan ras keduduken.
3. Pengangkan sideban kerna jabatan ras keduduken ibas kinirajaan Sorga, sebab ibas kalak Farisi lit sada pengankan maka ibas Kinirajaan Mesias lit erbage-bage pangkat ras keduduken, janah kalak Jahudi me singaloken ras ngkunduli jabatan ras keduduken e. Enda me salah sada palas sierbahanca ajar-ajar Yesus ngerana kerna ise simbelinna ibas ia nari. Jadi ibas perukuren ajar-ajar Yesus, ajar-ajar Yesus me si dat keduduken ras jabatan si meganjangna asangken kalak sideban, sebab ia kerina ajar-ajar Yesus langsung ras ndeher kal ras Yesus.
4. Pengakap ajar-ajar Yesus, maka ia ngenca si banci pepalem kalak sakit ras pelawes setan ibas gelar Yesus, emaka paksa idahna lit sierbahan bage i laporna man Yesus, alu sada sura-sura gelah ilarang Yesus ia, tapi ijabab Yesus ula larang ia, sebab ise saja si la ngelawan kam berarti teman kap. Jadi enda teridah sipat keangkuhenna, padahal e denga kal Yesus mereken pengajaren kerna kiniteruken ukur ras uga cara ngaloken Ia. Ipihak sideban ate Yesus gelah kalak si pelawes setan ibas gelar Yesus e harus i bimbing sebab ia mbaru tek man Yesus.
5. Memang lit sada kekuatiran bas ajar-ajar Yesus man kalak si pelawes setan ibas gelar Yesus, akap ajar-ajar Yesus erkiteken ia la termasuk ibas bilangen ajar-ajar Yesus emaka banci saja ia “menyalahgunaken” gelar Yesus tapi keraguan e, mis ibeneken Yesus alu ngataken pelepas saja ia erbahan bage, sebab ia pe temanta.

THEOLOGIA NASKAH.
- Ajar-ajar Yesus ersoal kerna ise si mbelinna sapih-sapih ia.
- Yesus ngajarken man ajar-ajarNa alu make sekalak danak-danak gelah ajar-ajar meteh uga carana ngaloken Yesus ras si nuruh Yesus.
- Ajar-ajar Yesus melapor man Yesus, sebab idahna lit sekalak si pelawes setan i bas gelar Yesus, janah kalak e labo masuk bilangen ajar-ajar Yesus. Tapi ipediat Yesus erkiteken ia pe temanta.

APLIKASI
Adi kita ngerana kerna aliran-aliran gereja si lit ibas Indonesia, maka siidah cukup mbue, subuk si lit ibas naungan PGI ras i darat PGI. Saja ibas erbage-bage aliran si lit, banci isimpulkan lit 15 aliran ibas gereja si lit i Indoensia enda, janah tentuna erbage-bage ka dogma si lit. Saja mekatep erkiteken erbage-bage aliran gereja ras dogmana, maka dungna erbanca lanai siangkan sada ras sidebanna, janah si teridah kal eme gereja menstreem (bagi GBKP, HKBP, GMIM rsd) ras si beraliran kharismatik.
Aliran-aliran gereja si lit ibas naungan PGI berkembang i daerah-daerah, janah biasana ikataken gereja suku, amin gia nggo cukup melala gereja terbuka man suku si deban (lanai gereja suku). Gereja-gereja si lit ibas PGI enda erkiteken dogma pe erbeda-beda, maka “rentan” ersoal, emaka gereja-gereja enda erbahan sada kesepakatan alu ngelitken sada pedoman si gelarna Keesaan gereja. Janah nandangi gereja si deban (i luar PGI) erbahan kerja sama.
Tuhu gereja-gereja lit dogmana masing-masing, tapi ula min dogma enda sierban gereja-gereja lanai siangkan, padahal adi “itelusuri” kerna kehadiran gereja, maka idat sada ngenca tujunna eme gelah nggeluh ibas keselamatan. Guna seh ku je, gelah lit pe karakter ibas gereja, maka dogma enda cukup menentukan. Jadi fungsi dogma eme gelah kalak si tek lanai terpengaruh ku ajaran-ajaran si la tuhu.
GBKP Ngenen kerina enda (aliran-aliran si lit)eme teman sada aron guna ngelai doni enda, sebab gereja-gereja idilo guna nehken keselamaten man doni enda, saja bentuk ras dogmana saja siberbeda. Isamping sie, GBKP membekali anggotana ibas pengajaren sue ras dogma GBKP. Jadi ibas GBKP aliran-aliran si lit eme teman, janah la lit simbelinna, amin ibas kuantitas anggota lit piga-piga gereja sinterem anggotana, tapi inen GBKP, kerina gereja seri tanggungjawabna ras lit fungsi si seri ka. Emaka GBKP rusur terlbat ibas Oikumene gelah litna kebersamaan iantara gereja-gereja, ras guna meminilisasi persoalen ibas gereja kerna dogma.


Pdt. Steven Kumenit, STh.,M.Min.