Sura-Sura Dibata Ibas Kegeluhen Kalak Si Erkiniteken .(2 Korinti 4:7-12)

BAHAN PERPULUNGEN JABU-JABU GEREJA GBKP
TANGGAL 17 – 23 APRIL 2011
_______________________________________

2 Korinti 4 : 7 – 12

Tema : Sura-Sura Dibata Ibas Kegeluhen Kalak Si Erkiniteken.

LATAR BELAKANG
1. Secara umum, surat Paulus man perpulungen korinti enda (2 Korinti), menekanken kerna nilai kiniseran sebage kesaksin ibas kebenaran berita si meriah (injil). Erkiteken kesaksin berita si meriah (injil) e megegeh, dungna kiniseran e salih, tangtangna jahat dungna jadi kasaksin si mehuli kal ibas kiniteken.
2. Ibas oratenta, Paulus berapologet janah ncidahken ise kin situhuna Paulus selaku Rasul man perpulungen Korinti, sebab paksa sie Lit kelompok si reh, janah mpengaruhi perpulungen korinti alu ngataken kerasulan Paulus la tuhu, i ja pelayanan Paulus guna ndarami sen, bagepe la lit legetimasi/rekomendasi si sah i Yerusalem nari (Sinode), janah perpulungen nggo mulai terpengaruh. Erkiteken sie me Paulus ngataken man perpulungen Korinti kerna makna pelayananna. Nina Paulus pelayananna erkiteken perkuah ate Tuhan, erkiteken sie me Paulus erdahin alu la erleja-leja ( la mengharapken upah).
3. Ibas pembelaan Paulus, Paulus ngakataken maka ia situhuna bagi kudin taneh ngenca, tapi ibassa tersimpan erta simeherga. Jadi ate Paulus ngataken situhuna dirina labo lit ertina, tapi justru ibas dirina e tersimpan makna salib Kristus. Salib kristus e simereken gegeh ras mpengasup Paulus guna ndahiken dahin Tuhan alu la erleja-leja. Emaka amin gia Paulus lit ibas perbeben ras kiniseran (band. Ayat 8-9), tapi gegeh Kristus serta kap bas ia. Paulus menginfentarisasi perbeben ras kiniseran siinanamina e, ras uga ka ia banci megeggeng, enda kerina erkiteken kuasa salib Kristus.
4. Amin gia Paulus nggejapken lit kiniseran erkiteken salib Kristus, janah nggit Paulus ngalokenca, tapi labo berarti kiniseran e jadi tujunna, tapi ibas Paulus ikut serta ibas kiniseran Kristus, berarti Paulus pe ikut serta ibas kekeken Kristus.
5. Ibas kerina enda, ate Paulus gelah perpulungen i Korinti meteh uga pelayanan Paulus si mereken kegeluhen man perpulungen. Ibas kerina e, nina Paulus kematen erdahin ibas Paulus tapi kegeluhen erdahin ibas perpulungen. Maksudna, nggeluh ibas keselamatan erkiteken Kristus, si jadi berita keselamatan siibaba Paulus man perpulungen, termasuk man perpulungen Korinti, maka kegeluhenta terancam ibas kematen, sebab melala si la ermeriah ukur nandangi ia, tapi amin bage gia, erkiteken berita keselamatan siipeseh Paulus man perpulungen Korinti, dungna perpulungen Korinti ibas keselamatan erkiteken tek man Yesus Kristus. Keselamatan enggo jadi sikerajangan perpulungen Korinti. Jadi kai siituduhken kalak nandangi Paulus, kerina e salah, amin gia situhuna pantas kal Paulus ndatken upah arah pelayanenna, tapi nina Paulus upahna eme mberitaken berita si meriah alu la ngarapken upah (band.1 Korinti 9:18).

THEOLOGIA NASKAH
- Kula Paulus desken kudin taneh ingan nimpan erta pertendin.
- Ibas perbeben ras kiniseran tetap Paulus ndatken gegeh, janah kiniseran ras kematen Kristus lalap ipersan Paulus gelah kula Paulus siermasap-masap salih jadi kegeluhen erkiteken Kristus.
- Kematen (perbeben ras kiniseran) e erdahin ibas Paulus, tapi kegeluhen erdahin man perpulungen.

APLIKASI
Adi siperdiateken sura-sura Dibata ibas kegeluhenta eme ndalanken undang-undang Tuhan ibas kerina kegeluhenta. Undang-undang Tuhan eme si lit ibas Matius 22:37-40. Adi enda nggeluh bas kita maka kai singena ate Dibata, e me siilakoken ibas kegeluhenta tep-tep wari. Emaka keakunnta harus ibeneken ibas kegeluhenta tep-tep wari, sebab adi aku-nta enda lalap nggeluh maka kai si la ngena ate Tuhan lalap nggeluh bas kita, janah enda situhuna biak manusia male, janah ateta pe la nggeluh bage, sebab ibas kita nggeluhken kegeluhen si bage, maka kita nggeluh ibas kematen. Memang siisadari kita singgeluh ibas keselamatan lalap nge icubai si iblis alu erbage-bage bentuk, sierbahanca kinitekenta “terganggu”. Tapi tek kita maka situhuna lit Tuhanta singasup mpegegehi kita guna tetap bertahan ibas kiniteken ras pengarapen man Tuhan.
Harus ka sisadari kita enda kudin taneh kap ngenca, kita enda gampang pecah, harus ka siteh ibas dirinta enda lit erta simeherga eme erta pertendin. Enda me siate “doni” ibuatna, gelah erta pertendin e lanai bas kegeluhenta. Tapi adi sisadari lah maka erta pertendin e mpengasup kita guna tetap ngelakoken simehuli singena ate Tuhan, maka dungna la saja kita sitetap nggeluh ibas keselamatan, tapi pe kalak si deban nggeluh ibas keselamatan. Kegeluhenta nggeluh ibas kiniteruken ukur, mehuli, la percian, sabar, rsd (band. Galati 5:22-23).

Pdt. Steven Kumenit, STh.,M.Min.