Meteruk Ukurlah (Yohanes 13:1-17)

PERPULUNGEN JABU-JABU

GEREJA GBKP

TANGGAL 13 -19 MARET 2016.

Yohanes 13 : 1-17.

Tema : Meteruk Ukurlah

LATAR BELAKANG

1.      Erkite-kiteken dosa nggo ngkenai kerina manusia, emaka patut nge manusia ndatken hukumen ibas Tuhan nari, tapi erkite-kiteken keleng kal ate Tuhan man manusia, maka reh Tuhan ibas rupa manusia sitergelar Yesus Krisus ku doni enda. Tujun kerehen Tuhan, gelah manusia simerupaken sikerajangenNa banci ngenen Imago Dei situhu-tuhu (manusia si seri ras tempas Dibata). Bagepe pengajaren ras kuasa siicidahken Yesus, banci manusia jera ras nggeluh selaku Imago Dei situhu-tuhu. Tapi kepeken la bage, nterem manusia si la ngasup ngaloken Yesus selaku Tuhan, emaka itulakna Yesus. Khususna pemimpin kalak Yahudi, guru-guru agama, kalak Farisi erbage-bage cara ipakena gelah Yesus kena sidingna, alu bage Yesus ihukum mate. Jadi penungkunen apakah kenca Yesus mate maka nggo dung kegeluhen Yesus ibas doni enda? lang.

2.      Kematen Yesus eme dalan siipake Tuhan gelah Yesus nadingken doni enda guna mulih ku asalNa eme Surga. Janah enda nggo igejapken ras iteh Yesus kerna kematenNa nggo ndeher. Bagepe nggo ipake iblis si Judas selaku ajar-ajar Yesus gelah rencana iblis seh, janah enda iueken Tuhan, gelah keselamatan man isi doni enda banci tersehi. Amin gia Yesus jadi kurbanna.

3.      Pemilihan ajar-ajar Yesus sehubungan ras kinirajaan Surga siate ipanteki Tuhan i tengah-tengah doni, labo gelah ajar-ajar jadi kalak sierkuasa bagi kerajaan doni, tapi gelah ajar-ajar banci jadi serayanNa guna nerusken dahin keselamatan ibas doni enda singgo icidahken ras iajarken Yesus. Erkite-kiteken sie me lit terjadi perubaten i tengah-tengah ajar-ajar Yesus erkite-kiteken nggit jadi kalak sierkuasa. Kuasa ras pangkat simeganjangna ibas ukuren doni enda, adi ia ndeher ras Yesus. Tuhu-tuhu ajar-ajar Yesus lenga ngangkai kerna makna pendilo jadi ajar-ajarNa.

4.      Erkite-kiteken nggo terjadi perubaten ibas ajar-ajar Yesus emaka sangana man berngi tedis Yesus, ope wari paskah, itangtangina jubaNa, jenari ibantingkenna uis, itamakenNa lau ku bas sambung, jenari iburihiNa nahe ajar-ajarNa, janah ielapNa alu uis  si ibentingkenNa. Seharusna min sue ras budaya ngalo-ngalo temue kalak Yahudi, isi meterukna siburihi nahe kerina si lit i je. Bagepe selaku budak wajib burihi nahe tuanna. Tapi ajar-ajar Yesus la nggit mpeteruk bana, kerina ia atena jadi sierkuasa. Erkiteken sie me maka Yesus singelakoken sie. Padahal nggo iteh Yesus, Dibata nggo mereken kerina kuasa man baNa. Ibas palas enda searusna min ajar-ajar Yesus siarus burihi nahe Yesus. Tapi sebalikna ibahan Yesus gelah ajar-ajar Yesus banci ngusi perbahanenNa, janah banci nggeluh alu meteruk ukur.

5.      Erti ras pengangkan Yesus burihi nahe ajar-ajarNa la iangka ajar-ajarNa, erkiteken sie Petrus la nggit mere nahena iburihi Yesus, tapi kenca nina Yesus adi la kam nggit mere nahendu Ku burihi berarti kam lanai ajar-ajarKu. Erkiteken ikataken Yesus bage, dungna nina Petrus, adi bage tan ras takalku pe. Tapi nina Yesus, kalak si nggo nggo ridi nggo kap bersih kulana. Nahena saja siperlu iburihi. Maksudna, ate Yesus burihi nahe ajar-ajarNa, labo gelah nggo bersih saja. Tapi lit simbol ije, gelah ajar-ajar banci muat bagin ibas kiniseran (kehinaan) Yesus, bagepe nggeluh ibas kiniteruken ukur selaku serayan (hamba). Emaka kenca dung Yesus burihi nahe ajar-ajarNa minter ikatakenNa gelah ajar-ajarNa pe ikut ras ndalanken sie. Sebab la lit budak ganjamgan asangken tuanna i lebe-lebe Dibata.

APLIKASI

            Meteruk ukur eme karakter Tuhan (band. Yohanes 13:3-4; Filipi 2:6-8). Bagepe meteruk ukur eme ulih Kesah Si Badia (band. Galati 5:23).  Janah karakter Tuhan e lit bas kita, sebab kita enda Imago Dei (sentudu ras tempas Dibata), bagepe kita nggo nggeluh ibas persadan ras Tuhan. Ibas kita nggeluh ibas persadan ras Tuhan, nggeluh pe bas kita Kesah Si Badia. Emaka searusna min lit bas kita kiniteruken ukur, bagepe sidalanken kiniteruken ukur ibas kegeluhenta tep-tep wari.

            Memang lit denga bas kita mesera denga nggeluh ibas meteruk ukur, sebab terikut denga ibas biak ras karakter doni enda. Status sosial, subuk ekonomi ras pendidikan simekatep menghalang kita meteruk ukur. Padahal adi kita nggeluh ibas kiniganjangan ukur, kegeluhen persadan selaku gereja, bagepe nggeluh sisampat-sampaten ras sikeleng-kelengen mesera tersehi ibas kegeluhenta. Si lit eme cian ate, la siangkan bagepe nggit penonjolan pribadi. Tapi adi kita nggeluh ibas kiniteruken ukur maka kegeluhen persadan ras keharmonisan nggeluh ibas kita, jenari kita selaku gereja nggit ngelai ibas doni enda. Bagepe la saja terjeng je, tapi pe meriah ukurta banci ikut muat bagin ibas kiniseran Tuhan Yesus. Emaka gelah banci kita ngelai alu mehuli, maka sipaling penting bas kita sitangtangi status sosial doni si leket denga bas kita. Ibas kegeluhen sibagenda rupana maka kita nggo nggeluh ibas kiniteruken ukur. Bagepe nggeluh ibas meteruk ukur banci mabai kalak sideban nggeluh ibas keselamatan.

Pdt. Steven Kumenit, STh.M.Min.