Tek Dingen Iperidiken (Markus 16:16)

PERPULUNGEN JABU-JABU

GEREJA GBKP

TANGGAL 3 – 9 APRIL 2016.

Markus 16 : 16.

Tema : Tek Dingen Iperidiken.

LATAR BELAKANG

1.      Yesus kalak Nasaret si lit kuasa ibas kata ras perbahanan subuk iakap Dibata bagepe kerina manusia (band. Lukas 24:19) nggo mate. Erkiteken sie me maka kegeluhen ajar-ajar Yesus nggeluh ibas kebiaran ras putus asa. Sebab lit sada pengarapan jelma sinterem, bagepe ajar-ajar Yesus, gelah Yesus banci mulahi kalak Yahudi ibas kuasa bangsa Romawi nari. Sebab paksa sie bangsa Yahudi sangana iteruh kuasa bangsa Romawi. Bagepe mbiar ajar-ajar Yesus nandangi imam-imam simbelin, guru-guru agama ras penguasa bangsa Romawi, emaka cebuni ia kerina. Janah adi pulung ia, pulung alu cebuni-cebuni.

2.      Kuasa kematen la ngasup naluken kuasa Dibata, emaka ibas wari sipeteluken ipekeke Dibata  Yesus ibas simate nari (band. 1 Korinti 6:14). Kenca Yesus keke ibas simate nari, Yesus ncidahkan baNa man ajar-ajarNa, janah ajar-ajar enda singataken man teman-temanna kerna kekeken ras Yesus nggo nggeluh. Tapi erkite-kiteken mbiar ras putus asa, bagepe pengangkai kerna kematen si leket denga man ajar-ajar Yesus, maka la ia tek. Thomas alu pang ngatakenca, adi lenga ku idah, janah langa ku tamakan tanku ibas awakNa, lenga ku tek (band. Yohanes 20:25). Sebab tupung sie, manusia la banci pulah ibas kematen nari. Lenga lit sejarah ibas kalak Yahudi, manusia banci keke ibas simaten nari. Memang lit si keke ibas si mate nari, tapi e erkiteken Yesus sipekekesa eme Lazarus (band. Yohanes 11:43-44). Padahal nggo piga-piga kali ikataken Yesus kerna kekekenNa. Tuhu Yesus arus ngenanami kiniseran, mate, tapi ibas wari siperteluken keke Yesus ibas simate nari (Matius 16:21).

3.       Dungna Yesus ncidahken diriNa man ajar-ajarNa sisepuluh sada kalak (nen = Yudas Iskariot lanai i je), tupung ajar-ajarNa e sangana man ibas salah sada rumah. Yesus ncidahken diriNa erkite-kiteken ajar-ajarNa singaloken berita kekekenNa kurang tek, emaka la pang ajar-ajarNa mberitaken kekeken Yesus ku jelma sinterem. Erkiteken sie me ipandangi Yesus ia kerina.

4.      Ibas perjumpan Yesus ras ajar-ajarNa, Yesus nuruh gelah ajar-ajarNa mberitaken Berita Si Meriah, janah ise sitek dingen iperidiken terkelin ia, tapi ise si la tek ia pagi iukum. Peridin eme sada tanda maka kalak e tek man Yesus selaku Tuhan. Jadi Peridin eme sada materai kalak e nggo tek man Yesus.

5.      Peridin labo sada alat sibanci mabai manusia nggeluh ibas keselamatan. Tapi peridin eme sada tanda ntah pe materai. Emaka kalak singaloken peridin nggo tek ia man Yesus. Erkiteken sie me palas keselamatan eme tek. Emaka kalak si la tek man Yesus ia pagi iukum. Siimaksudken penghukumen eme la nggeluh ras Yesus ibas Surga.

APLIKASI

            Peridin eme salah sada sakramen siiakui gereja GBKP. Lit dua sakramen siiakui gereja GBKP eme peridin ras lakon persadan si badia. Janah ibas gereja GBKP mengenal peridin anak ras peridin dewasa. Tapi palas gereja erbahan dua sakramen enda, erkite-kiteken sakramen enda ngenca siitetapken Tuhan. Janah pengertin sakramen eme 1). Secara harafia eme perbuatan suci. 2). Secara teologis eme imeteraikan Tuhan padanNa, janah iberekenNa man banta pengalemi dosa, bagepe kegeluhen si la ermasap-masap erkite-kiteken pengurbanan Yesus i kayu persilang. Emaka sakramen itetapkan Tuhan gelah kinitekenta iarahkan ku pengorbanan Yesus i kayu persilang. Emaka situhuna sakramen eme khotbah siteridah.

            Peridin eme tanda maka kita e nggo tek man Yesus. Peridin eme simbol kita icuci alu lau gelah kita bersih. Dosa-dosa sierbahanca kita nggeluh melket nggo icuci alu dareh Yesus. Alu bage kita nggo ipebadiaken. Emaka tanda kita nggo ipebadiaken, kita arus ngelakoken kai singena ate Tuhan ibas kegeluhenta tep-tep wari. Emaka labo masalah apakah peridin e ilakoken alu ipirpiri ntah pe iselamken ibas lau.

            Lit sada persoalan si seh genduari jadi masalah man gereja-gereja sideban singelakoken peridin dewasa ngenca. Alu bage ngatakenca maka peridin anak la banci ilakoken sebab ia lenga ngangkai kerna erti peridin ras la iangkaina kerna erti tek. Gereja GBKP tetap ngelakoken peridin anak sebab : 1). Anak-anak pe nggeluh ibas ikaten padan Dibata ras anggota gereja. 2). Anak-anak eme benih si badia. Emaka anak-anak ikut ibas warisan padan-padan Dibata. Alu bage anak-anak kristen arus ibedakan ras anak-anak si la kristen. Ibas erti kata, anak-anak kristen arus isterilkan/ibadiakan ibas kegeluhen si la mehuli nari. 3). Orang tua berkewajiban pebelin-belin anakna ibas Kata Dibata. Gelah seh paksana anak-anak e ngakuken kinitekenna man Tuhan i lebe-lebe perpulungen.

            Uga ka kalak sipindah ibas gereja sideban nari, bagepe agama sideban nari. Adi sipindah ia nggo dewasa janah lenga iperidiken maka ia arus iajari lebe kerna kata Dibata, gelah tek ia man Tuhan, kenca sie maka ia iperidiken (peridin dewasa). Tapi adi nggo ia iperidiken, maka ia lanai iperidiken, tapi ia iajarken kerna pelajaran ngawan gelah ia ingawanken. Tapi adi sipindah ibas agama sideban nari maka ia arus iperidiken. Peridin siibahan gereja nandangi sipindah ibas agama sideban nari eme tanda maka ia nggo tek man Tuhan Yesus.

Pdt. Steven Kumenit, STh.M.Min.