Teologi Sakramen (1Korinti 11:23-34; Matius 28:19-20)

BAHAN PERPULUNGEN JABU-JABU

1 Korinti 11 : 23 – 34; Matius 28 : 19 – 20.

Isi : Teologi Sakramen.

LATAR BELAKANG
A. KORINTI 11: 23-34.
1. Perpulungen Korinti eme perpulungen siipanteki rasul Paulus, emaka banci sikataken perpulungen Korinti nguda denga. Perpulungen Korinti terdiri ibas kalak Jahudi si enggo tek man Yesus Kristus ras kalak si labo kalak Jahudi si enggo tek ka man Yesus Kristus.
2. Persadan kalak si tek (gereja) harus teridah ibas perjumpan-perjumpan eme kebaktin ras-ras. Tapi Paulus dat berita ibas keluarga Kloe nari, ija ibas kebaktin (perjumpan) la teridah kekelengen ije (nen = psl 1:11; 5:1). Seharusna ibas kebaktin ingan guna ncidahken kiniersadan, labo perpecahan. Ibas kebaktin eme guna mpeturah kegeluhen si rohani ibas kiniteken, janah nggeluh ibas saling ngelai sada ras sidebanna, bali ras Kristus ngelai man perpulungen (kalak si badia).
3. Ibas zaman kuno, pelayanen sakramen Lakon Persadan Si Badia ihubungken ras “perjamuan bersama ntah pelayanan kasih”. Ibas pelayanen enda kerina man ras inem ras-ras sebagai wujud kiniersadan, labo saja ras sapih-sapih ia, tapi persadan ras Tuhan. Tapi siterjadi, la teridah ikaten kekelengen ije, sebab lit siegois, la mperdiateken kalak sideban. Adi man ia, la itimaina temanna si arah pudi, emaka si arah pudi lanai man, sebab enggo keri. Adi minem ia, minem seh mabuk. Isamping sie lit ka kesombongan rohani siicidahken piga-piga anggota perpulungen. Erkiteken sie me ipersingeti Paulus perpulungen Korinti.
4. Ibas wejangen Paulus enda, ituriken Paulus kerna inti perjumpan ibas kebaktin ras makna sakramen Lakon Persadan Si Badia. Perjumpan ibas kebaktin eme ibas rangka kiniersadan, janah Sakramen Lakon Persadan si ilakoken perpulungen Korinti, e ialoken Paulus ibas pengajaren Kristus nari, janah iterusken Paulus man perpulungen Korinti, jadi enda situhuna tradisi ibas Kristus nari. Emaka roti ras lau anggur siikataken bujur man Tuhan eme tanda maka roti ras anggur e enggo badia. Janah enda me tubuhku siiendesken man gunanduna, ngataken roti ras anggur tanda kehadiren Tuhan ibas. Bagepe nina bahanlah bage, ngataken keselamaten harus ikerjaken ibas paksa genduari. Emaka ise alu la layak man ras menum lau anggur ia ersalah man kula ras dareh Kristus emaka dat hukumen ia ibas Dibata nari.

B. MATIUS 28:19-20.
1. Kenca Yesus keke ibas si mate nari, icidahkenNa diriNa man ajar-ajarNa, jenari isuruh Yesus ajar-ajarNa gelah lawes ku Galilea jumpa ras Yesus ije (ayat 16). Perjumpan ije situhuna merupaken perjumpan siterakhir ope denga Yesus nangkih ku Surga.
2. Ibas perjumpaan e, ikataken Yesus me maka kerina kuasa i Surga ras i doni enggo ibereken Bapa man Yesus. Emaka laweslah, siari doni enda, jadiken kerina bangsa ajar-ajar Yesus, janah pridikenlah ia ibas gelar Bapa e, ibas gelar Anak e, ras ibas gelar Kesah Si Badia e.
3. Persuruhan Yesus man ajar-ajar, ngataken maka ndahin pelayanen ibas doni enda harus idahiken ajar-ajar. Janah Ise atena nggeluh ibas keselamaten harus ngaloken peridin.

THEOLOGIA NASKAH
- Sakramen Lakon Persadan Si Badia siibereken Paulus man perpulungen, ialoken Paulus ibas Tuhan nari.
- Roti ras anggur tanda daging ras dareh Yesus. Emaka la banci imainken.
- Kerina kuasa i Surga ras i doni enggo ibereken Bapa man Yesus. Emaka isuruh Yesus ajar-ajarNa guna njadiken bangsa Ajar-ajarNa. Tanda jadi ajar-ajar eme ngaloken Peridin.

APLIKASI.
Ibas gereja protestan, termasuk GBKP ngakui dua sakramen ngenca eme Lakon Peridin ras lakon Persadan Si Badia. Sakramen enda sipatna badia kel, sebab enda merupaken tanda kerna kematen ras kekeken Yesus Kristus. Emaka subuk, roti, anggur bagepe lau eme alat nuriken kerna keselamaten sienggo iendesken Yesus man banta. Alu kata si deban sakramen eme firman si kelihaten, berita kerna keselamaten. Nina Calvin : Sakramen itu adalah suatu tanda lahiriah yang dipakai Allah untuk memeteraikan dalam batin kita janji-janji akan kerelaanNya kepada kita, supaya iman kita yang lemah diteguhkan, dan supaya kitapun menyatakan kasih dan kesetiaan kita kepadaNya, baik di hadapan Tuhan sendiri dan malaikatNya maupun dihadapan manusia.
Khusus kerna lakon Peridin man anak-anak, gereja protestan (GBKP) ngenen maka sebaiknya kita lebih cepat lebih baik nggeluh ras Yesus Kristus.
Erkiteken peridin pengganti sunat maka perintah-perintah Tuhan man kalak si tek tetap berlaku. Ibas anak-anak iperidiken ibas gelar Bapa, Anak ras Kesah Si Badia, maka anak e nggeluh ibas ikaten persadan gereja, janah arah e mendorong anak e ibas sada paksa, ibas umurna si enggo cukup ngakuken kinitekenna, maka iakukenna kinitekenna ilebe-lebe jelma si nterem. Bagepe peridin fungsina eme memeteraiken man anak selaku anak badia, anak si berbeda ras anak-anak si lenga nandai Yesus Kristus.
Lit denga anggota perpulungen si salah ngangkai kerna sakramen. Akapna sakramen e sinelamatken. Ndai enggo sikataken, sakramen e tanda, firman si nuduhken kerna keselamaten. Emaka salah nge adi lit denga anggota perpulungen sierpengakap adi lit anak, bagepe senina turanga sisakit mekelek janah sibahan sakramen. Si nelamatken kita eme Tuhan labo sakramen e. Erkiteken sie sakramen banci sisehken man senina turangta sisakit adi ia mampu berkomunikasi, subuk arah kata ntah tanda-tanda, bagepe memenuhi syarat. Ipihak sideban . Bagepe sibanci muat bagin ibas lakon Persadan si bdia eme senina turangta e la ikenaken pengepkepen. Bagepe ibas lakon Peridin anak si labo kalak kristen ntah pe orang tuana sangana ibas pengepkepen banci iperidiken adi lit orang tua baptis simabasa (Nen = Tata gereja BAB XIII pasala 3).
Khusus kerna sakramen lakon persadan si badia, nina calvin sebaiknya tep-tep kali kebaktin ibahan lakon persadan Si Badia, tapi erkiteken lit kendalana, maka nina Calvin bahanlah meinimal empat kali setahun. Emaka gereja protestan (GBKP) erbahan Lakon Persadan Si Badia minimal empat tahun sekali.

Pdt. Steven Kumenit, STh.,M.Min.