Tinepa Dibata Labo Guna I Sembah (Keluaren 20:1-5).

BAHAN PJJ GBKP
Keluaren 20:1-5.

Isi : Tinepa Dibata Labo Guna Isembah.

LATAR BELAKANG
1. Sijadi oratenta sendah eme bagin ibas sepuluh pedah Dibata, siibereken Dibata man bangsa Israel, ope denga bangsa Israel bengket ku taneh Kanaan. Sepuluh pedah enda, Tuhan jine jumpai bangsa Iasrael kenca bangsa Israel enggo “bersih” (band.Psl. 19: 10), janah Tuhan jine singerana man bangsa Israel kerna sura-suraNa man bangsa Israel paksa bangsa Israel ersembah man Tuhan.
2. Ibas perdalanen bangsa Israel ku taneh Kanaan kerina banci ituriken alu bentuk cerita, tapi perbahanen Dibata siicidahken i gunung Horeb/Sinai enda bentukna eme hukum. Hukum-hukum enda la banci iceritaken, tapi hanya banci iajarken saja.
3. Ibas oratenta, Dibata enggo nuriken kerna sura-surana man bangsa Israel alu bentuk undang-undang, sila banci ilakoken bangsa Israel sidekah kegeluhenna selaku bangsa Tuhan. Enda ilakoken Tuhan sebab ibas taneh Kanaan, pasti ijumpai bangsa Israel dibata-dibata sideban siisembah kalak Kanaan, janah la saja kenca bengket ku taneh Kanaan, tapi pe sedekah ibas perdalanen ku taneh Kanaan, sebab bangsa Israel ndarat I taneh Mesir nari, enggo idahna dibata ras cara bangsa Mesir ersembah man dibatana. Jadi situhuna hukm enda ngataken maka bangsa Israel la banci ersembah man Dibata sideban seakaten Dibata si enggo mbaba ndarat bangsa Israel ibas taneh perbudaken nari, Dibata Abraham, Isak ras Jakup.
4. Sepuluh pedah Dibata enda eme bagin ibas uga bangsa Israel ngikutken Dibata saja, gelah bangsa Israel jadi bangsa Dibata. Tanda maka bangsa Israel ngikuti Dibata saja maka bangsa Israel la banci ersembah man dibata-dibata sideban. Adi enda ilakoken bangsa Israel maka kena ukumen Tuhan me bangsa Israel. Penghukumen enda seh ku kesusuren peempatken. Jadi sengaja kin Tuhan mbaba bangsa Israel ku gunung Horeb/Sinai guna mengadaken perjanjin ije, perjanjin antara Tuhan ras bangsa Israel.
5. Dibata nehken sepuluh pedah Dibata, khususna ibas ayat 1-5 (sijadi oratenta), erkiteken manusia lanai patuh man Tuhan. Tuhan lanai jadi Dibatana. Padin iakap manusia megiken ajaren iblis asangken ajaren Dibata (lih=Adam ra hawa). Arah enda ngataken maka adi tuhu kin bangsa Israel njadiken Tuhan jadi Dibatana, janah ersembah man Tuhan saja, maka bangsa Israel arus ngikuti pedah Dibata enda.
6. Maksud Tuhan mereken pedah enda man bangsa Israel eme 1). La banci ersembah man dibata sideban seakan Tuhan saja, sebab Tuhan e ngenca Tuhan sibenar. 2). La banci erbahan patung ras ersembah man dibata sideban. Alu bage ate Dibata gelah banbgsa Israel banci nggeluh setia man Tuhan saja. Kegeluhen bangsa Israel tertuju man Tuhan saja. Kegeluhen bangsa Israel nggeluh alu teokratis, maksudna eme Tuhan kerinana.

THEOLOGIA NASKAH
- Aku kap Tuhan si enggo mpedarat bangsa Israel ibas taneh perbudaken Mesir nari.
- Ula ersembah man dibata-dibata sideban, ras man gana-nana.
- Tuhan e pencimberu, emaka adi lit siernembeh ate man Tuhan, maka ihukum Tuhan me ia seh ku kesusuren sipeempatken.

APLKASI.
Selalu kelak kristen si tek man Yesus Kristus selaku Tuhan ras Juruselamat, penegasen kerna ersembah man Dibata saja harus isehken, sebab engo cukup nterem kalak kristen ersembah man dibata-dibata doni enda, termasuk ersembah man hasil IPTEK, kekuasaan ras jabaten, pendahin, ku batang-batang kayu si galang ras ingan-ingan tertentu. Padahal enda kerina tinepa Dibata. Tuhu, kerina e lit kuasa, tapi harus siteh kuasa si lit bas ia, tunduk ras patuh man perentah Tuhan. Emaka adi kita enggo tek man Tuhan Dibata, janah enda padanta ras Dibata, janah rusur pe sibelasken kerna pengakun kiniteken, maka enda harus irealisasiken ibas kerina kegeluhenta tep-tep wari. Memang mekatep perbeben ras kiniseran mabai kita ku dibata-dibata sideban. Tapi adi teklah kita man Tuhan Dibata maka man Tuhan saja kita erlebuh ras mindo penampat, janah isampati Tuhan nge kita.
Ibas kegeluhenta ula min lit dibata sideban seakaten Dibata siisembah kita arah anakNa Yesus Kristus. Janah siteh tinepa Dibata e labo guna isembah tapi guna irawat ibas rangka nampati kita nggeluh ibas doni enda. Sebab perlu siteh sada paksa tinepa Dibata e masap, apakah e Tuhan sierbahanca arah masapken doni enda ntah kita sendiri arah kegoisenta, ija sibuat kayu-kayu ibas karangen ras la sijaga lingkungenta, maka reh bancir, ntah pe tanah longsor, emaka kayu-kayu galang ibas karangen bene kerina. Bagepe IPTEK kerina baci masap. Emaka guna kai kita banci ersembah man siermasap-masap, tapi ersembahlah man ulu tinepa ras si labanci masap eme Tuhan Ysus Kristus. Ibas kita ersembah man Tuhan Dibata teridah min ibas kita ku gereja ibas kebaktin minggu, PA-PA ras ibas kegiaten gereja si deban, bagepe ibas aktivitasta tep-tep wari. Sebab genduari enggo lit pemahaman, tempa lit pemisahen antara kegeluhen si rohani ras kegeluhen doni. Kegeluhen rohani e ibas gereja ngenca, tapi idarat gereja tempa banci silakoken kai si la mehuli ras si la ngena ate Tuhan. Harus min teridah ibas kita ersembah man Tuhan teridah min subuk ibas gereja, bagepe I darat gereja. Janah ibas kita ersembah man Tuhan kita pe nggeluh ibas kegeluhen si rasa lalap.

Pdt. Steven Kumenit, STh.,M.Min.