Perawatan Iventaris Gereja (Sakaria 14:20-21)

BAHAN PJJ GEREJA GBKP
TANGGAL 7 – 13 AGUSTUS 2011
============================
Sakaria 14 : 20-21.

Tema : Perawatan Iventaris Gereja

LATAR BELAKANG
1. Nabi Zakaria eme nabi siernubuat kenca bangsa Israel mulih ibas pembuangen nari, janah sangana mbangun tembok Jerusalem ras pembangunan Rumah Pertoton.
2. Adi siperdiateken alu manjar-anjar maka secara umum kitab Zakaria enda banci ibagi dua bagin, eme pasal 1-8 ras pasal 9-14. Alu bage banci sikataken oratenta bengket ibas bagin keriahen Sion erkiteken rehna sekalak Mesias, bagepe litna kehancuran Yerusalem, ras pemulihan Yerusalem.
3. Ibas oratenta, uga sada gambaran siinubuatkan nabi Zakaria kerna Yerusalem. Yerudalem ibas sada paksa ipebadiaken Dibata, la saja kalak Yerusalem tapi man kerina bangsa-bangsa si reh ku Yerusalem gelah nggeluh badia. Jadi Yerusalem jadi pusat. Enda itekanken sebab Yerusalem merupaken pusat spiritual. Sebab i Yerusalem lit rumah pertoton, janah ibas rumah pertoton e me Dibata hadir.
4. Kerina bangsa reh ku Yerusalem, bagepe kalak Yerusalem ersembah man Tuhan saja. Kegeluhen badia tuhu-tuhu nggeluh ibas Yerusalem, lanai lit keegoisan peperangan. Kuda simerupaken simbol peperangan ras gegeh lanai ndalanken kuasana sierbahanca manusia jadi erdosa, tapi she me paksana giring-giring si lit ibas kuda mpedarat sorana guna ipersembahken man Tuhan (band. Alkitab bah. Indonesia = Kudus bagi Tuhan). Janah kudin si lit ibas rumah-rumah kalak Yahudi ipake guna nanggerken daging persembahen. Bagepe rumah persembahen tuhu-tuhu enggo jadi rumah persembahen, lanai lit kalak sierbinaga ibas rumah pertoton e.
5. Enda kerina jadi erkiteken kerina bangsa nggit reh ku Yerusalem guna ersembah man Tuhan arah hari raya sapo-sapo. Zakaria “ngangkat” hari raya sapo-sapo enda jadi bagin ibas kegeluhen bangsa Yahudi gelah bangsa Yahudi banci “merenungken” mulihi ise situhuna Dibata. Keleng ate Dibata nge sierbahanca ia selamat. Dibata sienggo mpedarat bangsa Israel ibas perbudaken taneh Mesir nari ras perdalanen bangsa Israel ibas taneh simesawang. Jadi, Zakaria nekanken kerna wari raya sapo-sapo enda berlaku pe man bangsa-bangsa s deban erkiteken ibas wari raya e, kerina jelma siingikuti perayaan seremonial agama e, ersembah man Tuhan saja, ras ngakui kedaulatan (kuasa)Tuhan ngenca. Alu kata simbages, banci sikataken, Dibata erbahan bage man bangsa Yahudi ras Yerusalem, bagepe man bangsa-bangsa si deban, khususna rumah pertoton eme ibas rangka njaga kebadiaan. Sebab kerina bangsa eme alat Dibata, kerina bangsa e Dibata kap siempuna.

APLIKASI
Temanta ngerana kerna perawatan iventaris gereja, enda iangkatken erkiteken ibas minggu enda merupaken kegiaten pelaksanaan perawatan iventaris gereja.
Adi kita ngerana kerna iventaris gereja, maka kita ngerana kerna alat-alat siberfungsi guna mendukung ibas kebaktin gereja, bagepe guna ncidahken kerna perbahanen Tuhan ibas doni enda.
Siidah ibas kinata gerejanta, lit sada semangat simehuli singgeluh ibas diri kita selaku gereja eme mbangun ras ngelitken barang-barang guna iventaris gereja, tapi semangat enda kurang idukung alu semangat pemeliharanna, emaka ula mamang ateta adi melala kal barang-barang iventaris gereja si melket ras ceda (nen = gedung gereja si melket. Saund sistym si ceda, rsd). Memang kendala si lit ibas kita eme, masalah klasik eme kerna dana ras pemeliharanna). Tapi marilah genduari nari sibahanlah dana khusus guna sie. Bagepe marilah kita kerina njaga iventaris gereja, gelah kerina enda banci sipakeken guna pelayanan, alu bage kita banci nggeluh badia.

Pdt. Steven Kumenit, STh.,M.Min.