Ersada Ras Kristus (Matius 9:9-13).

BAHAN PJJ GEREJA GBKP
TANGGAL 1 – 7 APRIL 2012.
============================
MATIUS 9 : 9-13.

Tema : Ersada Ras Kristus.

LATAR BELAKANG
1. Ibas bahan oratenta sendah eme sada rangkaian ibas pemilihen ras pendilo jadi ajar-ajar Jesus. Janah sekali enda Jesus ndilo Matius ntah pe si Lewi sijadi ajar-ajarNa. Ibas bahan oratenta je ikataken Matius sangana kundul i kantorna janah idilo Jesus ia, nina Jesus Ikutken Aku ! minter tedis Matius janah iikutkenna Jesus. Ijenda teridah la lit tanya jawab antara Jesus ras Matius. La lit sada penungkunen ise kin kam, ntah pe la ku tandai kam. Enda ngatakenca maka Jesus enggo itandai Matius, apakah arah khotbah-khotbah ntah pe pengajaren Jesus. Bagepe ibas Matius ngikut Jesus maka ibas diri Matius enggo terjadi pemutusen hubungen secara menyeluruh ras kegeluhen sindekah.
2. Ibas keriahen ukur Matius, iundangna Jesus ras teman-temanna (nen = pemungut cuke) guna reh ku rumahna guna man ras-ras. Ibas acara man enda kalak Farisi pe lit ije guna naksiken acara e. Memang paksa sie adi lit kalak si erbahan “pesta man” banci isaksiken kalak si deban.
3. Ibas Jesus man ras pemungut cuke, minter ndatken respon negatif ibas kalak Farisi nari, erkiteken sie ikatakenna man ajar-ajarNa nina engkai gurundu e man ras pengalo cuke bagepe ras kalak perdosa. Ibegi Jesus penungkunen kalak Farisi e, emaka nina Jesus Kalak sehat la perlu dokter, tapi kalak sakit nge siperlu dokter, emaka laweslah pelajarilah kata sitersurat enda : keleng atendu nge sikuperluken, labo asuh-asuhen siipersembahkenndu. Aku reh labo guna ndilo kalak sibujur akapna bana, tapi guna ndilo kalak perdosa. Enda ikataken Jesus gelah kalak Farisi banci nggejapken situhuna ia pe erdosa. Janah memang biasana kalak perdosa termasuk kalak pemunguk cuke la banci ergaul ras kalak Farisi ras kalak Jahudi sideban, sebab kalak perdosa ras kalak pemungut cuke enggo ianggap najis. Emaka kalak si la najis la banci ergaul ras kalak si enggo najis. Sekalak pemungut cuke bengket ibas bilangen najis erkiteken pendahinna. Ija la saja kalak pemungut cuke mindo pajak melebihi asa patutna (nen = ketentun pajak. Memang ibas paksa sie lit situhuna ketentun pajak si ibereken pemerintah, tapi erkiteken pemungut cukue enggo mereken melebihi pendapatan ibas sada daerah man pemerintah, maka pemungut cuke e mungut cuke man masyarakat melebihi asa patutna). Bagepe penungut cuke enda rusur njemak barang-barang sinajis. Bagepe pengut cuke rusur berurusen ras ras pemerintah Roma siianggap kalak Jahudi kalak kafir.
4. Bagi kalak Jahudi merupaken sada pantangan ntah pe larangan ergaul ras kalak kafir ntah pe kalak najis (band. Kel. 23:24; Imamat 11:44; Ulangan 7:3; Esra 3:2; Johanes 17:15-16; 2 Timotius 3:1-5; Jakup 1:27; Jakup 4:4). Pantangan ntah pe larangan enda ertujun gelah kalak Jahudi tetap jadi bangsa badia selaku bangsa Tuhan, sebab Tuhan e badia. Sada catatan maka bangsa Israel ihukum Dibata ibas iambengkenNa ku Asyur ras Babilonia erkiteken bangsa Israel lanai badia (band. 2 Raja-raja 17:7-8; 2 Raja-raja 24:3; 2 Kronika 36:14, rsd).
5. Si lebih iperluken eme keleng ate asangken nehken persembahen, bagepe kerehen Jesus labo guna kalak sibujur akapna bana tapi guna ndilo kalak perdosa. Enda me situhuna palasna engkai maka Jesus nggit man ras kalak perdosa ras pemungut cuke. Janah enda gelah kalak Farisi banci ngenen kai siikataken pustaka si badia ibas Hosea 6:6. Jadi keleng ate si la pekulah-kulah ras erdiate nandangi kalak musil (nen = rohani ras jasmani) ndauh ulin asangken formalitas religius (nehken persembahen).

APLIKASI.
Harus lebe sipahami kenca kita enggo iperidiken ibas gelar Bapa, Anak ras Kesah Si Badia, maka kita enggo nggeluh ibas persadan ras Jesus Kristus, Jesus nggeluh bas kita janah kita nggeluh bas Jesus. Emaka tandana kita nggeluh ibas persadan ras Jesus maka kita harus erbahan kekelengen man kalak sideban gelah kalak sideban tersampati. La bo e saja, tapi pe kita harus mpersingeti kalak sideban gelah ula erbahan dosa, bagepe kita ula erbahan dosa. Enda banci jadi adi perukurenta bali ras perukuren Kristus (Filipi 2:5).
Bagepe harus sisadari kita singgeluh ibas Kristus, nggeluh bas doni enda, lit tanggungjawabta ras misinta eme uga gelah kalak si nggeluh ibas dosa banci jera ras ndalanken kai singena ate Tuhan. Emaka kita la banci alergi nandangi kalak si erbahan dosa, bagepe ula ka sianggap kita lebih badia janah kalak sideban najis. Tapi marilah sinen maka kita kalak sitek man Jesus Kristus harus katawari paksa pe bergaul ras sapih-sapihta manusia guna memenangkan ia gelah nggeluh ibas Kristus. Jadi ibas kita enggo ersada ras Kristus maka biak ras karakter Kristuslah singgeluh bas kita. Karakter si male bas kita harus tuhu-tuhu iputuskan, janah dalanken simehuli singena ate Tuhan.

Pdt. Steven Kumenit, STh, M.Min.