Tema : Ngelai Alu Kiniliten Sienggo Ialoken Ibas Dibata Nari (Matius :15-30).

BAHAN PJJ GEREJA GBKP
TANGGAL 4 – 10 MARET 2012.
===========================
Matius 25 :15-30.

Tema : Ngelai Alu Kiniliten Sienggo Ialoken Ibas Dibata Nari

LATAR BELAKANG
1. Ibas oratenta, Yesus ngerana kerna Kerajaan sorga alu make anding-andingen, maksudna gelah ajar-ajarna lebih meteh kerna keselamaten. Ibas anding-andingen sekali enda, iandingken Yesus kerna Kerajaan Sorga bagi sekalak tuan siberkat ku luar kota, janah senna ipokokken man juak-juakna. Ibereken tuanna man si sada juak-juakna 5 talenta, sada nari ibereken tuanna 2 talenta, janah sada nari ka iberekenna 1 talenta. Enda kerina ibereken tuan e sue ras kengasupen juak-juakna e.
2. Kenca ndekah reh me tuan ndai janah idilona me kerina juak-juakna ndai guna erkira, janah juak-juak si muat lima talenta enggo ertambah keuntungenna lima talenta, si dua talenta enggo ertambah dua talenta, janah sidua juak-juak enda ibereken tuan e tole perkara siterbelinen. Tapi juak-juak si ndatken sada talenta labo iusakenna gelah erta sada talenta enda banci erbunga, bagepe ipersalahkenna ka tuanna. Sienda ibahanna erkiteken nutupi kemalasenna saja. Emaka merawa tuanna janah ihukum tuanna me ia. Siidah ijenda maka bali ras kerajaan Sorga me, maka ije lit pengadilen. Jadi situhuna kalak sibengket ku bas Kinirajaan Sorga eme kalak sisetia nandangi persuruhen Dibata.
3. Talenta siimaksudken ijenda labo sen, tapi bakat sienggo ibereken man banta guna ipakeken alu mehuli bagi singena ate Tuhan. Ipake ibas rangka labo saja man keselamaten dirinta sendiri tapi pe keselamaten jelma sinterem.
4. Amin gia kengasupen siibereken Tuhan tuhu pelain-lain, tapi sipentingna eme harus ipergunakenna alu mehuli ras ertanggunjawab man Tuhan. Sebab kegeluhen manusia siidilo Tuhan ibas rangka berkarya guna keselamaten.
5. Anding-andingen enda eme sada pengajaran sincidahken uga pentingna makeken pemere Dibata alu sikap ertanggungjawab ibas ngelai Tuhan. Ibas pihak sideban anding-andingen enda nuriken kerna dua juak-juak siertanggungjawab ras setia bagepe banci makeken modal guna kepentingen tuanna. Tapi juak-juak sisada e ngenen ku modal e la bo sada hal sipenting ras labo mereken keuntungen man bana tapi man tuanna saja, emaka la bo iusahakenna kuga maka banci ertambah talenta si lit bas ia e. Enda me situhuna sada kerugin simbelin man bana.

APLIKASI
Man banta kerina selaku tinepa Dibata, situhuna enggo ibereken Dibata talenta man banta sekalak-sekalak, amin gia talenta si lit bas kita pelain-lain ntah pe lit ka si seri. Tapi tujun talenta e ibereken guna kemulian Tuhan ras guna keselamatenta bagepe keselamaten kalak sideban. Persoalen siterjadi mekatep talenta siibereken Dibata man banta la sikembangken, emaka kurang aktif kita muat bagin ibas pelayanen. Alu maksud sideban talenta silit bas kita banci erguna adi ipakeken sue ras sura-sura Tuhan, tapi sebalikna talenta e banci mate adi la ipake. Harus siinget ibas rangka keselamatenta ras keselamaten kalak sideban mebutuhken kerja keras.
John C.Maxwel ibas bukuna Talenta Adalah Tak Pernah Cukup (Talent Is Never Enough) ngataken bakat saja la bias. Tapi talenta butuh keyakinan, gairah, kegigihan, keberanian ras bertanggungjawab. Talenta menuntut inisiatif, fokus persiapen.latihan, karakter ras sikap membuka diri guna erlajar. Talenta pe mbutuhken dukungan ras jaringan kerja sama ras kalak sideban. Talenta saja la bias, sebab terjeng potensi saja denga emaka harus iasah gelah lit “prestasi”. Jadi la banci isinikken. Talenta harus icidahken ras irealisasiken ibas perbahanen sinyata rikut perukuren simecio. Jadi talenta la bo saja membutuhken ketrampilan tapi pe kejujuren, bagepe la bo saja gegeh siiperluken tapi pe campur tan Tuhan.
Ibas pengangkan sibagenda me maka kai pe talenta siibereken Tuhan, tuhu-tuhu harus ipake alu setia ras ertanggung jawab man Tuhan, emaka banci erguna man banta ras man kalak sideban terlebih man Tuhan.

Pdt. Steven Kumenit, STh,M.Min.