Jadi Keluarga Dibata (Kejadin 6. 8, 17-22)

BAHAN SERMON PJJ GEREJA GBKP
================================
KEJADIN 6 :8, 17-22.

Tema : Jadi Keluarga Dibata.

LATAR BELAKANG
1. Ertambahna jelma ibas doni enda, kepeken la iikuti alu erkemalangen man Tuhan, tapi justru teridah manusia reh jahatna, emaka ibas perbahanen sijahat siilakoken manusia, erkadiola me Tuhan ngenen manusia tinepana e, erkiteken sie me ersura-sura Tuhan guna ngkernepken tinepana e. Ate Tuhan ngkernepken manusia ras tinepana si sideban arah mpereh mbanjir simbelin (air bah).
2. Penghukumen siilakoken Tuhan e man kalak sijahat/erdosa ngenca, tapi Tuhan erngena ate man Nuah, sebab amin gia ia tading isekitar kalak perdosa tapi, la iikutkenna perbahanen-perbahanen dosa. Emaka ate Tuhan nelamatken Nuah ras keluargana ibas penghukumen nari. Jadi erkiteken kebenaren me, Nuah iselamatken.
3. Ibas rangka nelamatken Nuah, reh me Tuhan man Nuah arah kataNa nina : Enggo ketetapken maka kusasapken me kerina manusia. Kukernepken doni enda erkiteken doni enda enggo dem alu kejahaten manusia, emaka bahanlah sada kapal man bandu. Soal ukuren ras gedangna kapal e, Dibata jine sinetapkenca.
4. Ate Dibata nelamatken Nuah ibas banjir simbelin e, emaka Nuah ras keluargana harus bengket ku bas kapal e, janah la terjeng je saja, tapi ate Dibata nelamatken Nuah guna erbahan perpadanan ras Nuah. Jadi teridah ijenda, keselamaten ibereken Tuhan man kalak si mbiar ras erkemalangen man Tuhan saja. Bagepe perpadanen man kalak singena ateNa.
5. Penghukumen siibahan Dibata secara universal, sebab manusia merupaken tinepa Tuhan. Nuah iselamatken sebab ate Tuhan erbahan perpadanen ras Nuah, gelah ibas kesusuren Nuah terjadi me manusia simerupaken tinepa Dibata situhu-tuhu, emaka kalak si setia ras nggeluh bagi sura-sura Dibata saja siiselamatken Tuhan. Jadi teridah alu jelas, dosa erbahca manusia mate, tapi kalak bujur ndatken kegeluhen ras keselamaten.

APLIKASI
Kita enda eme keluarga Dibata. Kita jadi keluarga Dibata erkiteken kita ibereken hak menjadi anak Dibata erkite-kiteken kita enda tek man Yesus Kristus (band. Yohanes 1:12-13). Persoalenna genduari enggo kin kita tuhu-tuhu jadi keluarga Dibata erkite-kiteken kita enda anak-anakNa. Adi sioge ibas Roma 8:14, maka ije ikataken kalak siitegu-tegu Kesah Dibata, anak-anak Dibata kap. Jenda me kita banci merenungken mulihi kerna eksistensita selaku kalak si tek man Tuhan, ras singgeluh selaku keluarga Dibata. Sebab ibas kita jadi keluarga Dibata maka sipaling penting bas kita eme nggeluh harmonis ibas sada keluarga, termasuk hubungan Bapa ras anak. Ibas erti kata kita selaku anak harus min patuh man Bapa, selaku kepala keluarganta. Ibas erti kata kita harus tuhu-tuhu megiken kai siikataken bapa man banta, sebab tek kita kai siikataken Bapa man banta mbaba keselamaten.
Mari kita ercurmin man Nuah. Nuah erkiteken lit hubungen siharmonis ras Tuhan, maka kai pe siikataken ras siitawarken doni enda man bana, la ibegikenna, Tuhan saja siibegikenna. Kita seharusna bage ka, bahkan harus siinget kita banci seri ras Nuah erkiteken kita ipinpin Kesah Si Badia. Kesah Si Badia ngajari kita guna banci ngelakoken kai siiperentahken Bapanta. Bagepe kita banci megiken kata Dibata. Sebab harus ka siinget, adi kita selaku anak la megiken kai siiajarken Bapanta maka sijadi eme kita pasti ngelakoken kai si la ngena ateNa, emaka sialoken kita ibas kerehen Jesus sipeduakaliken eme kita iranaken. Janah ibas ateta tetap nggeluh selaku keluarga Dibata, silakokenlah kebujuren ras keadilen ibas kegeluhenta tep-tep wari.

Pdt. Steven Kumenit, STh,M.Min.