Geluh Ras Kulanta Jadi Perayaken (Matius 5:14-16).

BAHAN PJJ GEREJA GBKP
TANGGAL 11-17 MARET 2012.
================================
Matius 5 : 14-16.

Tema : Geluh Ras Kulanta Jadi Usihen.

LATAR BELAKANG.
1. Pendahin ras kuasa Jesus enggo mbar i daerah Palestina ras sekitarna, erkiteken sie reh jelma sinterem guna jumpa ras Jesus. Kerehen jelma sinterem eme ibas rangka gelah pinakit si lit bas daging kulana malem, janah deba guna ngenen kerna eksistensi Jesus sendiri.
2. Ibas ukur Jesus, kerehenNa la saja guna pepalem kalak sisakit ras pelawes setan tapi ibas rangka keselamaten manusia ras doni enda, emaka guna keselamaten e Kinirajan Sorga harus iberitaken. Sebab Kinirajaan Sorga enggo bergeser ndauh ibas pengangkan kalak Jahudi. Kerajaan Sorga eme Kerajaan si i ja Dibata minpim doni enda, janah kerina manusia ras doni enda patuh man Dibata. Janah Kinirajan Sorga berhubungen ras Jesus Kristus, Kinirajaan Sorga lit bas diri Jesus Kristus. Tapi erkiteken bangsa Jahudi i teruh kuasa kerajaan Roma maka, kalak Jahudi menafsir ibas sada paksa reh me Mesias si banci ngelawan ras mbebasken bangsa Jahudi ibas pemerintahen kerajaan Roma nari. Ipihak sideban perbahanen-perbahanen pemimpin-pemimpin agama, kalak Farisi ras kalak Jahudi sendiri lalap erbahan dosa. Jadi Kerajaan Sorga sihakiki tempa-tempa bene ibas kalak Jahudi nari. Erkiteken sie me iajari Jesus kerna keselamaten situhu-tuhu.
3. Ibas pihak sideban inen Jesus doni enda enggo dem alu kejahaten. Kejahaten enda mbaba kegelapan bas doni enda. Erkiteken sie me kejahaten/kegelapan doni enda harus italuken alu terang. Ajar-ajar Jesus harus jadi terang doni. Ibas erti kata ajar-ajar ras kalak sitek harus ngasup ncidahken kerna kebenaren ras terang situhu-tuhu si lit ibas Dibata nari eme keselamaten. Keselamaten e lit ibas diri Jesus Kristus. Adi sinen Jesus la saja ngerana kern terang tapi pe kerna Sira. Tapi sijadi penekanen sekali enda eme terang. Amin gia situhuna fungsi ras makna menam bali ras enda persuruhen Jesus man ajar-ajar ras man kalak si tek.
4. Penekanan kerna terang eme gelah ajar-ajar ras kalak sitek nggeluh ibas prinsip-prinsip kebenaren, ija harus nggeluh ibas kiniteken man Jesus Kristus selaku Tuhan ras juruselamat doni, janah enda harus icidahken ibas kegeluhen tep-tep wari.
5. Terang ibas Pustaka Si Badia merupaken simbol keselamaten. Keselamaten e la saja nuduhken man diri Jesus Kristus tapi man ajar-ajar ras kalak si tek. Ibas erti ajar-ajar ras kalak sitek enggo nggeluh ibas keselamaten, maka tandana nggeluh ibas keselamaten harus min teridah ibas perbahanen tep-tep wari. Janah tujun ndalanken ntah pe nggeluh ibas terang gelah kalak sideban (doni enda) banci ngenen kerna perbahanen-perbahanen simehuli, alu bage doni enda banci memuliaken Tuhan. Labo dirinta imuliaken doni enda. Adi enda si jadi maka ajar-ajar ras jelma sinterem bali ras kalak Farisi, ndalanken perbahanen alu pekulah-kulah gelah idah kalak ia sekalak situtus ibas beragama, ipuji kalak Bapa sini Surga, labo ajar-ajar ras kalak sitek siipuji, erkite-kiteken ajar-ajar ras kalak sitek labo terang e, tapi Kristus me ulu terang e.

APLIKASI
Adi siperdiateken kegeluhen doni enda maka, doni enda enggo iliputi (ibaluti) alu kegelapen, sebab praktek-praktek kegelapen enggo merajalela ibas kerina dampar kegeluhen, termasuk pe ibas gereja. Emaka kita selaku anak-anak terang terdilo gunanaluken kegelapen e. Cara ibas kita naluken kegelapen e eme alu perbahanen simehuli singena ate Tuhan, janah ula kita terkontaminasi ibas kegelapen. Emaka harus sisadari kita enda labo terang e tapi Jesus me terang e, emaka kita harus tetap nggeluh ibas ulu terang e gelah kita banci ersinalsal, sebab sepanjang kita la nggeluh ibas ulu terang e, maka kita la bo ngasup ndalanken perbahanen-perbahanen simehuli singena ate Tuhan, simerupaken sinalsal terang e sendiri. Maksudna eme kita selaku anak-anak terang harus nggeluh badia, ndalanken ntah pe erbuahken kekelengen, kebujuren, kebenaren ras simehuli.
Kita selaku anak-anak terang tuhu-tuhu harus jadi usihen man doni enda, sebab kita berbeda ras doni enda. Memang tuhu kita ibas gelap nari, tapi labo berarti kita banci berkompromi ras “sewaktu-waktu” banci ndalanken kegelapan adi kita jumpa perbeben ras kiniseran, lang. Kita la banci berkompromi ras kegelapen. Tuha kitaibas gelap nari, tapi status ras karakterta lanai seri ras kalak si nggeluh ibas kegelapen. Ibas status selaku anak terang enda me kita harus ngatakjen bujur man Tuhan, janah tanda kita ngataken bujur man Tuhan kita harus ndalanken kegeluhen terang, gelah kalak sideban pe banci ngenen terang e ras reh ku terang e ras nggeluh ibas terang, alu bage doni enda jadi terang (selamat).

Pdt. Steven Kumenit, STh.,M.Min.