Jadilah Teman Nandangi Sapih-Sapih Manusia (1 Yohanes 4:19-21)

BAHAN PJJ GEREJA GBKP

TANGGAL 15 – 21 SEPTEMBER 2013

1 Yohanes 4 : 19-21

Tema : Jadilah Teman Nandangi Sapih-Sapih Manusia.

LATAR BELAKANG

1.      Secara umum kitab 1 Yohanes  Enda merupaken sada pengajaren ntah pe kata persinget Yohanes man perpulungen gelah perpulungen tetap nggeluh ibas persadan. Sebab paksa sie kalak sitek nggeluh ibas percuban erkiteken litna ajaran sipapak. Ajaren papak e ngajarken : 1). La mungkin Dibata jadi manusia eme Yesus Kristus. 2).  Peraturan doni kerna moralitas lanai perlu man kalak singgo sempurna secara rohani. Tapi lebih asangken sie kelompok “simengklaim” nggo sempurna lanai nggit ergaul ras perpulungen. Ibas situasi sibagenda perpulungen ngenanami sada kebingungan, bagepe lit perpulungen la nai siangkan. Erkiteken sie me ipersingeti Paulus perpulungen kerna nggeluh sikeleng-kelengen.

2.   Palas kalak sitek harus nggeluh sikeleng-kelengen erkite-kiteken :  1).  Keleng ate e eme sipat Dibata. Enda teridah arah iberekenNa AnakNa si tonggal man banta, gelah kita terkelin. 2).  Erkiteken leben Dibata ngkelengi kita maka kita pe harus ngkelengi kalak sideban. 3).  Adi kita nggeluh sikeleng-kelengen maka Tuhan tetap ras kita, janah kekelengenNa e sempurna ibas kita. Jadi arah enda banci sikataken  kekelengen jadi karakter anak-anak Dibata.

3.   Ibas oratenta teridah tuhu uga kekelengen simerupaken karakter Dibata harus iaplikasiken kalak sitek ibas kegeluhenna tep-tep wari i tengah-tengah perpulungen. Perpulungen harus ndalanken kekelengen secara vertikal ras horisontal. Ibas perpulungen ndalaken kekelengen situhu-tuhu e, berarti kalak sitek tuhu-tuhu berbeda ras kelompok singataken ia nggo sempurna ibas rohani tapi mengabaikan moral kegeluhen, khususna kerna keleng ate.

4.   Ngkelengi manusia eme perintah Yesus ras undang-undang kekelengen (ayat 21 janah band. Matius 22:37-40), emaka kalak singgeluh ibas kekelengen bearti itandaina Tuhan alu tuhu-tuhu sebab kekelengen e rehna ibas Dibata nari, alu bage la atena ncedai hubungan persadan kalak si tek ras Tuhan erkite-kiteken la ndalanken kekelengen secara horisontal e. Jadi adi kalak si tek la ngkelengi seninana siidahna, la bo kap tuhu-tuhu kelengina Tuhan si la idahna. Enda me standart maka kalak sitek tuhu-tuhu ngkelengi Tuhan. Sebalikna la kap tuhu ntah pe perguak kap ia, adi nina ikelengina Tuhan tapi la ikelengina seninana siidahna.

5.  Kalak si tek ngkelengi kap seninana siidahna erkiteke-kiteken nggo leben kalak sitek ikelengi Tuhan. Sebab ibas pengkelengi Tuhan maka kalak sitek nggeluh ibas keselamaten. Yesus Kristus erkiteken keleng kal ateNa man manusia, maka nggit Ia mate ibas kayu persilang gelah kerina manusia nggeluh ibas keselamaten. Jadi palas kalak sitek ndalanken kekelengen erkiteken Yesus Kristus. Enda itekanken gelah kalak sitek ngenen kalak sideban eme seninanna, janah la banci mbalas kejahaten alu kejahaten, sebab pembalasan ras penghukumen e hak Tuhan kap.

APLIKASI

            Manusia ijadiken Tuhan sentudu ras tempasNa, bagepe ibas diri manusia lit kap Kesah Tuhan, emaka karakter Tuhan lit bas  manusia. Tapi karakter Tuhan si salah sadana eme kekelengen, lanai teridah bas kita manusia erkite-kiteken keegoisan ras kerangapenta. Enda la terkecuali pe man banta si nggo tek man Yesus Kristus. Janah kegeluhen sibage me sijadi kemamangen man banta. Ngkai ? sebab seharusna min kegeluhen siegois ntah pe la lit kekelengen nggo ikut itanemken ibas kematen Yesus Kristus, tapi kepeken nggeluh denga. I ja salahna maka kekelengen e tempa-tempa lanai lit bas kita kalak sitek man Yesus. Erkiteken sie me siidah rusur terjadi perjengilen ntah pe perubaten sapih-sapihta kalak kristen. Bagepe lit si la nggit nggeluh  sisampatsampaten. Enda jadi erkiteken kurangna pengangkanta kerna kekelengen si tuhu-tuhu, bagepe kurang kal penandainta kerna Yesus Kristus (nen ayat 8). Adi siteh kekelengen e ibas Kristus nari, janah nggo leben Kristus ngkelengi kita, bagepe kekelengen e eme sada undang-undang maka tentuna alu meriah ukur sidalanken me kekelengen e ibas hubungenta ras sapih-sapih teman manusia. Kita tuhu-tuhu jadi teman nandangi sapih-sapih manusia. Adi nggo jadi teman maka nggit me kita nampati  temanta e adi lit ibas paksa kesusahen ras perbeben, janah meriah pe ukurta adi lit temanta sukses/berhasil ibas geluhna.

Pdt. Steven Kumenit, STh.M.Min.